WHO៖អូមីក្រុងអាចបង្កើតចេញនូវមេរោគបំប្លែងខ្លួនថ្មីទៀតដែលគ្រោះថ្នាក់ខ្លាំង
ចុះផ្សាយនៅថ្ងៃ៖
ស្តាប់ - ០៧:២៨
អង្គការសុខភាពពិភពលោក WHO បានព្រមានក្នុងថ្ងៃអង្គារ ទី៤ មករាថា កំណើនករណីឆ្លងដោយអូមីក្រុងក្នុងលោកអាចបង្កើនឲ្យមានហានិភ័យនៃការលេចចេញនូវមេរោគបំប្លែងខ្លួនថ្មីទៀតដែលមានលក្ខណៈគ្រោះថ្នាក់ខ្លាំង។ ការព្រមានរបស់ WHO បានធ្លាក់មក ខណៈដែលមានប្រទេស និងមនុស្សកាន់តែច្រើនកំពុងបន្តឆ្លងដោយអូមីក្រុង។ គួររម្លឹកថា តាំងពីបានលេចរូបរាងនៅអាហ្រ្វិកខាងត្បូងជាង ១ខែ មក អូមីក្រុងបានក្លាយជាមេរោគបំប្លែងខ្លួនភាគច្រើនលើសមេរោគបំប្លែងខ្លួនដែលតា។ តែមានការកត់សម្គាល់ឃើញនៅពេលនេះថា អូមីក្រុងបានបង្កគ្រោះថ្នាក់តិចជាងដែលតា។
ជារៀងរាល់ថ្ងៃ ចំនួនប្រទេស និងចំនួនមនុស្សដែលឆ្លងជំងឺកូវីដ១៩ ពិសេសមេរោគបំប្លែងខ្លួនអូមីក្រុងមានការកើនឡើងជាលំដាប់។ គិតត្រឹមថ្ងៃទី២៩ ធ្នូ ឆ្នាំ ២០២១ អូមីក្រុងដែលមានប្រភពពីប្រទេសអាហ្រ្វិកខាងត្បូងកាលពីជាង ១ខែមុនបានឆ្លងចូល ១២៨ប្រទេស និងមានមនុស្សកាន់តែច្រើនឡើងៗបានឆ្លងអូមីក្រុង។ មួយវិញទៀតពេលនេះ អូមីក្រុងបានក្លាយបន្តិចម្តងៗជាមេរោគបំប្លែងខ្លួនភាគច្រើននៅក្នុងប្រទេសកាន់តែច្រើន។ ខណៈនេះ អឺរ៉ុបជាចំណុចក្តៅនៃការផ្ទុះករណីឆ្លងខ្លាំងជាងគេដោយមានករណីឆ្លងថ្មីជាង ៥លានករណីនាសប្តាហ៍ចុងក្រោយក្នុងខែធ្នូ ឆ្នាំ ២០២១។
ដូចដែលប្រទេសមួយចំនួនបានរង់ចាំ មានប្រទេសខ្លះបានស្គាល់ និងកំពុងស្គាល់សន្ទុះកំណើនករណីឆ្លងថ្មីលឿនដូចផ្លេកបន្ទោរក្នុងមួយថ្ងៃៗ។ ជាក់ស្តែង អាមេរិកបានរកឃើញករណីឆ្លងថ្មីជាង ១លានករណីក្នុងថ្ងៃចន្ទ ទី៣ មករា។ ករណីឆ្លងថ្មីនៅបារាំងមានជិត ៣០០ ០០០ករណីនារយៈពេល ២៤ម៉ោងចុងក្រោយ។ នៅអង់គ្លេស ករណីឆ្លងថ្មីមានជាង ២០០ ០០០នាក់ក្នុងថ្ងៃអង្គារ ទី៤ មករា ហើយនៅអូស្រា្តលី ករណីឆ្លងថ្មីក្នុងមួយថ្ងៃៗមានចំនួន ៥០ ០០០ករណី។ ចំណែកនៅក្នុងប្រទេសអាហ្សង់ទីន មានករណីឆ្លងថ្មីជាង ៨០ ០០០នាក់នាថ្ងៃអង្គារ ទី៤ មករា។ WHO បានព្រមានថា ប្រទេសណាដែលអូមីក្រុងបានចូលទៅដល់ហើយ យូរ ឬឆាប់នឹងស្គាល់សន្ទុះកំណើនករណីឆ្លងថ្មីដោយចៀសមិនរួច។
រឿងនេះប្រហែលគ្មានអ្វីគួរឲ្យភ្ញាក់ផ្អើលទេ ព្រោះការសិក្សាជាច្រើនធ្លាប់បានបញ្ជាក់ថា អូមីក្រុងជាមេរោគបំប្លែងខ្លួនដែលមានសមត្ថភាពឆ្លងលឿន និងឆ្លងខ្លាំង បើធៀបនឹងមេរោគបំប្លែងខ្លួនដែលតា។
អូមីក្រុងហាក់មិនសូវកាចខ្លាំងដូចដែលតា?
តាំងពីការលេចរូបរាងអូមីក្រុងជាង ១ខែមក ភាពស្រពិចស្រពិលកំពុងបន្តមានជុំវិញមេរោគបំប្លែងខ្លួនមួយនេះ។ ការអះអាងភាគច្រើនសុទ្ធតែបានផ្អែកតាមការសង្កេត និងការតាមដានលើការវិវឌ្ឍន៍របស់មេរោគ។ កុំថាឡើយមេរោគបំប្លែងខ្លួនរបស់កូវីដ១៩ សូម្បីតែកូវីដ១៩ ដែលជាមេរោគដើមលេចរូបរាងជាង ២ឆ្នាំមុនក៏គេហាក់នៅមិនទាន់បានស្គាល់ច្បាស់នៅឡើយដែរ។ អ្វីដែលបានសម្គាល់ឃើញ អូមីក្រុងឆ្លងលឿន និងឆ្លងខ្លាំងជាងដែលតា។ តែអូមីក្រុងហាក់មិនសូវគ្រោះថ្នាក់ និងកាចជាងដែលតាទេ។ ទោះជាយ៉ាងនេះក្តី ពិភពលោកត្រូវបន្តតាមដានជាបន្តទៀត។
នៅចំពោះមុខពេលនេះ ព័ត៌មានថ្មីចុងក្រោយពីអាហ្រ្វិកខាងត្បូងដែលជាប្រទេសកំណើតអូមីក្រុងបានឲ្យដឹងថា ករណីឆ្លងថ្មីបានផ្តើមធ្លាក់ចុះវិញ បន្ទាប់ពីមានសន្ទុះឆ្លងខ្លាំងឡើងដល់កំពូលនារយៈពេលប៉ុន្មានសប្តាហ៍ចុងក្រោយ។ សប្តាហ៍កន្លងទៅក្នុងឆ្នាំ ២០២១ ករណីឆ្លងថ្មីនៅអាហ្រ្វិកខាងត្បូងបានធ្លាក់ចុះជិត ៤៨%។ អត្រាធ្វើតេស្តិ៍វិជ្ជមានបានធ្លាក់ចុះពី ៣៥% ទៅ ២៥,៨%។ ការសិក្សាមួយធ្វើឡើងដោយក្រុមមន្ទីរពេទ្យឯកជនអាហ្រ្វិកខាងត្បូងចុះផ្សាយក្នុងថ្ងៃទី៣០ ធ្នូ ឆ្នាំ ២០២១ ឲ្យដឹងថា បើធៀបនឹងរលកឆ្លងដោយដែលតា រលកឆ្លងដោយអូមីក្រុងរយៈពេល ៣សប្តាហ៍បានធ្វើឲ្យចំនួនអ្នកជំងឺធ្ងន់ធ្ងរផ្លូវដង្ហើមក្នុងពេទ្យបានធ្លាក់ចុះពី ៩១,២% ទៅ ៣៦%។
ក្នុងពេលជាមួយគ្នា ចំនួនអ្នកជំងឺដែលត្រូវការជំនួយដកដង្ហើមដោយអុកស៊ីសែនបានធ្លាក់ចុះពី ៧៤%ទៅ ១៧%។ ចំណែកអត្រាអ្នកស្លាប់បានធ្លាក់ពី ២៩% ទៅ ២,៧% បើធៀបនឹងរលកឆ្លងដំបូងដោយដែលតា។ នេះស បញ្ជាក់ឲ្យឃើញថា អូមីក្រុងហាក់បានបង្កឲ្យមានរោគសញ្ញាស្រាលៗដោយមិនសូវចូលទៅវាយប្រហារដល់ក្នុងសួតដូចដែលតាទេ។ ទោះជាយ៉ាងនេះក្តី អូមីក្រុងហាក់មិនបានបញ្ឈប់ដំណើរត្រឹមនេះ ព្រមទាំងកំពុងបង្កឲ្យមានក្តីបារម្ភ និងកំពុងធ្វើឲ្យពិភពលោកជ្រួលច្របល់មកដល់សព្វថ្ងៃ។
បន្ទាប់ពីអូមីក្រុង ពិភពលោកកំពុងរង់ចាំមេរោគបំប្លែងខ្លួនថ្មីៗទៀត?
មានការលើកឡើងនូវសេណារីយ៉ូចំនួនពីរនៅពេលនេះ គឺសេណារីយ៉ូធូរស្រាល និងសេណារីយ៉ូគ្រោះថ្នាក់ខ្លាំង។ សេណារីយ៉ូធូរស្រាល គឺគេចង់និយាយពីភាពស៊ាំរួមនៅទូទាំងពិភពលោក មានន័យថា បើទាំងគ្នាបានឆ្លងអូមីក្រុង សង្វាក់នៃការឆ្លងក៏ត្រូវបានកាត់បន្ថយបន្តិចម្តងៗរហូតដល់ចប់តែម្តង។ គេអាចនិយាយបានថានៅពេលនោះ មេរោគអូមីក្រុងនឹងត្រូវចប់ ហើយគេក៏អាចនិយាយបានដែរថានៅពេលនោះ គឺជាការបិទបញ្ចប់កូវីដ១៩ ត្រឹមណេះ។
ចំណែកសេណារីយ៉ូគ្រោះថ្នាក់ខ្លាំង គឺការលេចចេញនូវមេរោគបំប្លែងខ្លួនថ្មីៗទៀតដែលបង្កើតឡើងដោយកំណើនករណីឆ្លងខ្លាំង និងឆ្លងលឿនរបស់អូមីក្រុង នេះជាការព្រមានរបស់លោកស្រី Catherine Smallwood អ្នកទទួលខុសត្រូវស្ថានការណ៍អាសន្នរបស់អង្គការសុខភាពពិភពលោកក្នុងថ្ងៃអង្គារ ទី៤ មករា។ តាមលោកស្រី Catherine នៅពេលដែលអូមីក្រុងឆ្លងរាលដាលកាន់តែខ្លាំង ប្រូបាប៊ីលីតេនៃការបំប្លែងខ្លួនថ្មីរបស់មេរោគក៏មានកាន់តែច្រើន និងអាចបង្កគ្រោះថ្នាក់ខ្លាំងជាងអូមីក្រុង។
លោកស្រី Catherine បានបន្ថែមថា ពិភពលោកកំពុងស្ថិតក្នុងដំណាក់កាលគ្រោះថ្នាក់ខ្លាំងណាស់ជាមួយនឹងសន្ទុះកំណើនករណីថ្មីដោយអូមីក្រុង និងដែលគេនៅមិនទាន់ដឹងពីផលវិបាកពិតប្រាកដបង្កឡើងដោយអូមីក្រុង។ តាមលោកស្រី Catherine នៅពេលដែលចំនួនករណីឆ្លងដោយអូមីក្រុងកើនសម្បើមរបៀបនេះ វាអាចនាំឲ្យមានអ្នកជំងឺច្រើនចូលពេទ្យ ធ្លាក់ខ្លួនឈឺធ្ងន់ធ្ងរ និងស្លាប់។ ជាមួយអូមីក្រុង ទោះបីប្រទេសខ្លះដែលមានប្រព័ន្ធសុខាភិបាលល្អ និងមានបំពាក់ឧបករណ៍គ្រប់គ្រាន់ក៏ប្រហែលពិបាកទប់នឹងលំហូរអ្នកជំងឺដោយអូមីក្រុងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ