ហុងកុង៖ បោះឆ្នោតជ្រើសរើសសមាជិកសភា ដែលបេក្ខជនឈរឈ្មោះ ត្រូវតែស្មោះនឹងប៉េកាំង
ចុះផ្សាយនៅថ្ងៃ៖
ស្តាប់ - ០៧:៤៦
ថ្ងៃទី១៩ធ្នូនេះ នៅហុងកុង គឺមានការបោះឆ្នោតជ្រើសរើសសមាជិកក្រុមប្រឹក្សានីតិបញ្ញតិ្ត ឬ ហៅថា សភាហុងកុង។ ជាការបោះឆ្នោត ជាលើកទីមួយ ដោយគោរពទៅតាមប្រព័ន្ធបោះឆ្នោតថ្មី ដែលចិនប៉េកាំងបានដាក់កំហិត ហើយដែលត្រូវបានក្រុមប្រជាធិបតេយ្យហុងកុង បរិហាររិះគន់ ថាវាជាឆាកល្ខោន ដើម្បីពង្រឹងអំណាចបក្សកុម្មុយនីស្តចិន តែប៉ុណ្ណោះ។ តើប្រព័ន្ធបោះឆ្នោតថ្មីនៅហុងកុងនេះ មានលក្ខណៈបែបណា? តើលទ្ធិប្រជាធិបតេយ្យ និងអធិបតេយ្យភាពនយោបាយ របស់ហុងកុង ត្រូវបានបំផ្លាញ ពិតមែនដែរឬទេ?
មានតែ២០អាសនៈ ដែលពលរដ្ឋហុងកុងអាចបោះឆ្នោតជ្រើសរើសដោយផ្ទាល់
ការបោះឆ្នោតនៅថ្ងៃទី១៩ធ្នូ ជាការបោះឆ្នោតរើសសមាជិកសភាហុងកុង ដែលមានឈ្មោះផ្លូវការថា ក្រុមប្រឹក្សានីតិបញ្ញត្តិ LegCo។ សភាហុងកុងនេះ កាលពីមុនមានអាសនៈ តែ៧០ទេ។ តែជាមួយនឹងប្រព័ន្ធបោះឆ្នោតថ្មី ដែលចូលជាធរមាន ចាប់ពីខែមីនាមក គឺ សភាហុងកុង មានអាសនៈ ចំនួន៩០។
ក្នុងប្រព័ន្ធបោះឆ្នោតចាស់ សមាជិកសភា គឺមាន២ប្រភេទ។ ប្រភេទទី១ មាន៣៥កៅអី ដែលជាសមាជិក ត្រូវបានបោះឆ្នោតជ្រើសរើសដោយផ្ទាល់ ពីប្រជាជនហុងកុងតែម្តង។ ប្រភេទទី២ មាន៣៥កៅអីដែរ តែជាបេក្ខជនឈរឈ្មោះ តំណាងឲ្យក្រុមជំនាញ មុខរបរនានា ឧទាហរណ៍ ដូចជាពាណិជ្ជករ អ្នកធ្វើការផ្នែកធនាគារហិរញ្ញវត្ថុ គ្រូបង្រៀន តំណាងប្រជាជនជនបទ ឬក៏ អ្នករកស៊ីនាំចេញនាំចូលអីជាដើម។ ពោលគឺដូចជាសហជីពជំនាញដូច្នោះដែរ ដែលសមាជិកក្នុងមុខជំនាញនីមួយៗ បោះឆ្នោតជ្រើសរើសតំណាងខ្លួន ឲ្យចូលទៅក្នុងសភា។
ក៏ប៉ុន្តែនៅក្នុងប្រព័ន្ធបោះឆ្នោតថ្មីនេះ ប្រភេទទី១ ដែលត្រូវបោះឆ្នោតជ្រើសរើសដោយផ្ទាល់ ពីសំណាក់ប្រជាជនហុងកុង គឺគេបន្ថយពី៣៥ មកនៅតែត្រឹមតែ២០អាសនៈទេ។ ហើយចំណែកប្រភេទទី២ គេបន្ថយពី ៣៥ មកនៅ៣០វិញ។ ជាមួយគ្នានេះ គេបានបង្កើតសមាជិកសភា ប្រភេទទី៣មួយទៀត ដែលមានអាសនៈសរុបចំនួន៤០។ ក្រុមប្រភេទទី៣នេះ នឹងត្រូវបោះឆ្នោតជ្រើសរើសដោយ គណកម្មាធិការបោះឆ្នោត ដែលមានសមាជិកចំនួន ១៥០០នាក់។ ១៥០០នាក់នេះ សុទ្ធតែជាមនុស្សរបស់គណបក្សកុម្មុយនីស្តប៉េកាំងទាំងអស់។ ហើយអនាគតសមាជិកសភា ក្រុមទី៣ មានគ្នា៤០នាក់នេះហើយ ដែលនឹងមានសិទ្ធិបោះឆ្នោតតែងតាំងប្រមុខរដ្ឋាភិបាលថ្មី ដឹកនាំហុងកុង។
បេក្ខជនឈរឈ្មោះ ត្រូវតែគោរពលក្ខខណ្ឌស្មោះត្រង់ចំពោះចិនប៉េកាំង
ពីមុន ៣៥អាសនៈ ក្នុងចំណោម៧០អាសនៈ ពោលគឺពាក់កណ្តាលនៃសមាជិកសភា ត្រូវបោះឆ្នោតជ្រើសរើសដោយផ្ទាល់ ជាសកលពីសំណាក់ប្រជាជនហុងកុងតែម្តង។ តែពេលនេះ គឺមានតែ២០ទេ ក្នុងចំណោម៩០អាសនៈ។ ជាងនេះទៀត យោងតាមច្បាប់បោះឆ្នោតថ្មីនេះ គឺបេក្ខជនឈ្មោះទាំងអស់ ត្រូវតែឆ្លងកាត់ ការពិនិត្យ តាមដានយ៉ាងល្អិតល្អន់ណាស់ មុននឹងគេអនុញ្ញាត ឲ្យឈរឈ្មោះបោះឆ្នោតបាន។ គេបានបង្កើតគណកម្មាធិការពិសេសមួយ ដើម្បីពិនិត្យមើលលើប្រវត្តិរូប របស់បេក្ខជនឈរឈ្មោះនីមួយៗ ដោយបេក្ខជននោះត្រូវតែគោរពលក្ខខណ្ឌ មានជាអាទិ៍ ត្រូវបង្ហាញភាពស្មោះត្រង់ចំពោះប្រទេសចិន និងមិនបង្កបញ្ហាដល់សន្តិសុខជាតិ ដោយផ្អែកលើចំណារបញ្ជាក់ ពីស្ថាប័ននគរបាលហុងកុង ថែមទៀតផង។
ហេតុដូច្នេះហើយ បានជាក្រុមប្រជាធិបតេយ្យ បានបរិហាររិះគន់ប្រព័ន្ធបោះឆ្នោតថ្មីនេះ ថាវាគ្មានប្រជាធិបតេយ្យទាល់តែសោះ។ ក្រុមគណបក្សប្រជាធិបតេយ្យទាំងអស់ អ្នកខ្លះ ត្រូវគេរារាំងមិនឲ្យឈរឈ្មោះបាន អ្នកខ្លះបានសម្រេចចិត្តដកខ្លួន មិនចួលរួមក្នុងការបោះឆ្នោតនេះទេ។ អ្នកនយោបាយប្រជាធិបតេយ្យមួយចំនួនធំ បើមិនត្រូវគេចាប់ដាក់ឃុំ តួយ៉ាងដូចលោក Yoshua Wong ទេ គឺភាគច្រើនបានភៀសខ្លួនទៅបរទេសអស់ហើយ។ យោងតាម ការចុះផ្សាយរបស់បណ្តាញសារព័ត៌មានហុងកុង ក្នុងចំណោមបេក្ខជនឈរឈ្មោះសរុបទាំងអស់ ១៥៣នាក់ គឺមានប្រមាណតែ១០នាក់ប៉ុណ្ណោះ ដែលគេជឿថាមានទំនោរនយោបាយ កណ្តាលនិយម មិនធ្វើតាមតែការញាក់ទាញខ្សែ ពីប៉េកាំង។ ក្រៅពីនោះ គឺសុទ្ធតែជាមនុស្សស្និទ្ធនឹងគណបក្សកុម្មុយនីស្តទាំងអស់។
ជាងនេះទៀត យោងតាមវែបសាយស៊ើបអង្កេតមួយឈ្មោះ Factwire បានអះអាងថា ខណៈដែលប្រជាជនហុងកុងសាមញ្ញទូទៅ ជាង៤លាននាក់ មានសំឡេងឆ្នោតតែមួយសន្លឹក ដើម្បីជ្រើសរើសសមាជិកសភាតែ២០នាក់ តែមនុស្សមួយចំនួនតូូចវិញ មានសំឡេងឆ្នោតលើសពី១។ ពោលគឺជាប្រព័ន្ធបោះឆ្នោត ដែលមិនស្មើភាព ដែលគ្មានលក្ខណៈសេរី និងសកលទេ។ យោងតាមគេហទំព័រនេះ មនុស្សចំនួនយ៉ាងហោច៤១នាក់ មានសំឡេងឆ្នោតដល់ទៅ៤ ១សំឡេងបោះរើសនៅក្នុងក្រុមប្រឹក្សាបោះឆ្នោត ២សំឡេងនៅក្នុងប្រភេទសមាជិកសភាតំណាងមុខរបរជំនាញ និង១សំឡេង បោះដូចប្រជាជនសាមញ្ញ។ ចំណែកមនុស្សប្រមាណ៦៥០នាក់ទៀត មានសំឡេងឆ្នោត ដល់ទៅ៣។
ចំនួនអ្នកមិនទៅបោះឆ្នោត អាចមានច្រើន
យោងតាមការស្ទាបស្ទង់មតិ ចេញផ្សាយកាលពីថ្ងៃសុក្រ គឺមានប្រជាជនហុងកុង ប្រមាណតែ៤៨%ប៉ុណ្ណោះ ដែលឆ្លើយថានឹងអាចទៅបើឆ្នោតនៅថ្ងៃនេះ។ នេះជាកម្រិតចូលរួមតិចណាស់ បើប្រៀបធៀបទៅការបោះឆ្នោតនៅឆ្នាំ២០១៦ ដែលប្រជាជនយ៉ាងហោច ៨៦% បានអះអាងថាទៅបោះឆ្នោត។
ក្រុមសកម្មជនប្រជាធិបតេយ្យ បានអំពាវនាវ ឲ្យប្រជាជនកុំទៅបោះឆ្នោត ដើម្បីកុំប្រគល់ភាពស្របច្បាប់ ទៅឲ្យប្រព័ន្ធបោះឆ្នោត ដែលជាឆាកល្ខោននេះ។ កាលពីថ្ងៃសៅរ៍ម្សិលមិញ តុលាការហុងកុងបានចេញដីកាតាមចាប់ខ្លួន សកម្មជនប្រជាធិបតេយ្យជាច្រើននាក់ ដែលភាគច្រើនសុទ្ធតែបានភៀសខ្លួនទៅក្រៅប្រទេសអស់ហើយ បន្ទាប់ពីពួកគេ បានអំពាវនាវតាមបណ្តាញសង្គម ឲ្យប្រជាជនហុងកុងធ្វើពហិការ កុំទទួលស្គាល់ការបោះឆ្នោតនៅថ្ងៃនេះ។ដើម្បីការពារសន្តិសុខ រដ្ឋបាលហុងកុង ក៏បានពង្រាយកម្លាំងសមត្ថកិច្ច ប្រមាណ១ម៉ឺននាក់ នៅតាមផ្លូវហុងកុង ខ្លាចក្រែងមានបាតុកម្មប្រឆាំង រំខានការបោះឆ្នោតនេះ
ដោយឡែក លោកស្រី ការី ឡាំ បានលើកឡើងថា មនុស្សចូលរួមបោះឆ្នោតតិច ក៏មិនជាបញ្ហាដែរ។ លោកស្រីពន្យល់ថា បើប្រជាជនហុងកុង ចូលរួមបោះឆ្នោតតិច គឺមានន័យថា ប្រជាជនពេញចិត្ត នូវការដឹកនាំបច្ចុប្បន្ននេះហើយ បានជាពួកគេមិនទៅបោះឆ្នោត ដើម្បីឲ្យមានការកែប្រែ ផ្លាស់ប្តូរនោះ។
តែយ៉ាងណាក៏ដោយ គេសង្កេតឃើញថា អាជ្ញាធរហុងកុង បានចេញវិធានការមួយចំនួន ដើម្បីជំរុញ លើកទឹកចិត្ត និងអំពាវនាវឲ្យប្រជាជនហុងកុង ទៅបោះឆ្នោត។ គេបានទិញទំព័រមុខ កាសែតធំៗនៅហុងកុង ដើម្បីផ្សព្វផ្សាយ ឲ្យប្រជាជនហុងកុងទៅបោះឆ្នោត។ រដ្ឋបាលហុងកុង ក៏បានសម្រេចថា ការធ្វើដំណើរតាមមធ្យោបាយដឹកជញ្ជូនសាធារណៈទាំងអស់ នៅថ្ងៃអាទិត្យនេះ គឺគេមិនគិតលុយទេ។ តែវិធានការនេះ អាចជះផលផ្ទុយពីការចង់បានរបស់អាជ្ញាធរហុងកុងទៅវិញ ព្រោះថាដោយសារតែការធ្វើដំណើរមិនអស់លុយ ប្រជាជនហុងកុងមួយចំនួន បានចេញទៅដើរលេង នៅទីឆ្ងាយៗ ពីការិយាល័យបោះឆ្នោតរបស់ខ្លួន។
ការបោះឆ្នោតនៅថ្ងៃនេះ ទោះជាប្រជាជនហុងកុងចូលរួមការបោះឆ្នោត តិចខ្លាំងក្តី ក៏វាមិនអាចធ្វើឲ្យប្រែប្រួល ដល់កម្លាំងឆន្ទៈរបស់ប៉េកាំង ក្នុងការក្តោបក្តាប់អំណាចលើរបបនយោបាយនៅហុងកុងដែរ។ ហុងកុងដែលចិនបានសន្យា កាលពីឆ្នាំ១៩៩៧ ថាអាចមានអធិបតេយ្យគ្រប់គ្រងដោយខ្លួនឯងរហូតដល់ឆ្នាំ២០៤៧នេោះ នៅពេលនេះបានក្លាយជាហុងកុង គ្រប់គ្រងដោយក្រញ៉ាំរបស់គណបក្សកុម្មុយនីស្តប៉េកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ