តុល្យការនៃការកាន់អំណាចរយៈពេល ១០ឆ្នាំរបស់មេដឹកនាំកូរ៉េខាងជើងលោកគីម ជុងអ៊ុន
ចុះផ្សាយនៅថ្ងៃ៖
ស្តាប់ - ០៦:៣១
ថ្ងៃទី១៧ ធ្នូ ឆ្នាំ ២០២១ ជាខួបគម្រប់ ១០ឆ្នាំនៃការឡើងកាន់អំណាចរបស់លោកគីម ជុងអ៊ុននៅកូរ៉េខាងជើងកាលពីថ្ងៃទី១៧ ធ្នូ ឆ្នាំ ២០១១។ សព្វថ្ងៃមានអាយុ ៣៧ឆ្នាំ មេដឹកនាំផ្តាច់ការកូរ៉េខាងជើងរូបនេះត្រូវបានក្រុមអ្នកវិភាគចាត់ទុកជាមេដឹកនាំមួយរូបដែលមានបទពិសោធន៍ខ្លាំងជាងគេក្នុងលោក។ ក្នុងរយៈពេល ១០ឆ្នាំនៃការកាន់អំណាច លោកគីម ជុនអ៊ុនបានប្រើធម៌ក្តៅ និងធម៌ត្រជាក់ដាក់ពិភពលោក ពិសេសបន្តប្រើនុយក្លេអ៊ែរជាមធ្យោបាយដើម្បីមានទឹកមាត់ប្រៃ និងមានទម្ងន់នៅលើឆាកអន្តរជាតិ។
បើគ្មានបញ្ហាសុខភាពអ្វីកើតឡើងទេ មេដឹកនាំកូរ៉េខាងជើងគីម ជុងអ៊ុនដែលទើបមានអាយុ ៣៧ឆ្នាំអាចបន្តកាន់តំណែងបានជាច្រើនឆ្នាំទៅមុខទៀត។ មានហេតុផលចំនួន ២ ដែលបញ្ជាក់លើចំណុចនេះ ទី១ គីម ជុងអ៊ុនមិនបារម្ភពីរឿងបោះឆ្នោតដែលមានគណបក្សតែមួយ និងទី២ រដ្ឋធម្មនុញ្ញមិនបានកំណត់ពីចំនួនអាណត្តិទេ។ នៅកូរ៉េខាងជើង អំណាចបានស្ថិតក្នុងកណ្តាប់ដៃគ្រួសារត្រកូលគីមតាំងពីជីតារហូតដល់ចៅសព្វថ្ងៃ។ ក៏ដូចជាជីតាលោកគីម អ៊ីលស៊ុង និងឱពុកលោកគីម ជុងអ៊ីល លោកគីម ជុងអ៊ុនបានប្រើនុយក្លេអ៊ែរជាមធ្យោបាយតែមួយគត់ដើម្បីរក្សារបបដឹកនាំនយោបាយនៅក្នុងគន្លងផ្លូវដែលត្រួសត្រាយដោយជីតា និងឱពុក។ អ្នកវិភាគលោកសូ គីមបានយល់ឃើញថា គីម ជុងអ៊ុនមិនអាចចិញ្ចឹមពលរដ្ឋខ្លួនទេ។ តែគីម ជុងអ៊ុនមានសមត្ថភាពរក្សារបបនយោបាយឱ្យនៅរស់បានដោយប្រើនុយក្លេអ៊ែរ។ តាមលោកសូ គីម នេះពិតជារឿងសំខាន់ណាស់សម្រាប់គីម ជុងអ៊ុន។
អំណាចផ្តាច់ការខ្លាំងជាងជីតា និងឱពុក
បើធៀបនឹងការដឹកនាំរបស់ជីតា និងឱពុក គីម ជុងអ៊ុនបានដឹកនាំប្រទេសកណ្តាប់ដៃដែកដោយមិនញញើតកំចាត់មនុស្សដែលខ្លួនសង្ស័យមានគំនិតក្បត់ ឬមានគំនិតអាក្រក់ ទោះបីជាមនុស្សនោះមានជាប់សាច់ឈាមគ្រួសារក៏ដោយ។ ជាក់ស្តែងក្នុងឆ្នាំ ២០១៣ ពោលកាន់អំណាចបានត្រឹម ២ឆ្នាំ គីម ជុងអ៊ុនបានបញ្ជាឲ្យអូស ក ឱពុកមាលោកចាង សុង ថេកចេញពីសភាទៅប្រហារជីវិតក្នុងទោសក្បាត់ជាតិ។ នៅ ៤ឆ្នាំក្រោយមក ពោលក្នុងឆ្នាំ ២០១៧ គីម ជុងអ៊ុនបានជាប់ចោទពីបទបានបញ្ជាឲ្យសម្លាប់បងប្រុសខ្លួនឯងម្តាយទីទៃលោកគីម ជុងណាមដោយដាក់ថ្នាំបំពុលនៅអាកាសយានដ្ឋានក្រុងគូឡាឡាំពួរ ប្រទេសម៉ាឡេស៊ី។
ក្នុងរយៈពេលនៃការកាន់អំណាចចំនួន ១០ឆ្នាំ គីម ជុងអ៊ុនបានធ្វើការសាកល្បងនុយក្លេអ៊ែរចំនួន ៤ដង និងសាកល្បងគ្រាប់មីស៊ីលបាលីស្ទិកដែលអាចបាញ់ដល់ទឹកដីសហរដ្ឋអាមេរិក។ គីម ជុងអ៊ុនមិនដែលខ្វាយខ្វល់នឹងគំនាប ទណ្ឌកម្មអន្តរជាតិ ឬទណ្ឌកម្មរបស់បស្ចិមប្រទេសណាមួយទេ។ ផ្ទុយទៅវិញ គីម ជុងអ៊ុនបន្តយកនុយក្លេអ៊ែរ និងគ្រាប់មីស៊ីលដើម្បីផ្គើនសហគមន៍អន្តរជាតិ។ អស់រយៈពេលជាច្រើនខែ គីម ជុងអ៊ុនមិនញញើតត ទល់នឹងប្រធានាធិបតីអាមេរិកលោកដូណាល់ ត្រាំរហូតបំផុសឲ្យមានក្តីបារម្ភរឿងផ្ទុះជម្លោះប្រដាប់អាវុធនៅក្នុងឧបទ្វីបកូរ៉េ។
តែគេបានសង្កេតឃើញថានៅពីក្រោយរូបភាពទាំងអស់នេះ គឺភាពអត់ឃ្លាន និងទុក្ខវេទនាជាប្រចាំអស់ជាច្រើនទសវត្សរបស់ពលរដ្ឋកូរ៉េខាងជើង។ នៅក្នុងចំណាត់អន្តរជាតិ សេដ្ឋកិច្ចកូរ៉េខាងជើងបានស្ថិតនៅចុងប៉ូចគេបង្អស់។
គ្មានថ្ងៃដែលគីម ជុងអ៊ុនបោះបង់នុយក្លេអ៊ែរ និងគ្រាប់មីស៊ីល?
ក្រុមអ្នកវិភាគបានចាត់ទុកលោកគីម ជុងអ៊ុនជាមេដឹកនាំមួយរូបដែលមានបទពិសោធន៍ខ្លាំងជាងគេក្នុងលោក។ ត្រង់ចំណុចនេះ ក្រុមអ្នកវិភាគចង់និយាយពីជោគជ័យរបស់គីម ជុងអ៊ុនដែលអាចប្រើនុយក្លេអ៊ែរ និងគ្រាប់មីស៊ីលជាអាវុធដើម្បីមានទឹកមាត់ប្រៃ មានឥទ្ធិពល និងមានទម្ងន់នៅលើឆាកអន្តរជាតិ។ សម្រាប់គីម ជុងអ៊ុន នុយក្លេអ៊ែរ និងគ្រាប់មីស៊ីលជាអាយុជីវិតរបស់កូរ៉េខាងជើង និយាយជារួម និងរបស់របបដឹកនាំសព្វថ្ងៃ និយាយដោយឡែក។ គីម ជុងអ៊ុនបានដឹងច្បាស់ណាស់ថា ខ្លួនមានផ្លូវតែពីរគត់ដែលត្រូវដើរ ឬមួយផ្លូវបន្តស្ថិតនៅឯកោដោយរងចាំថ្ងៃស្លាប់ខ្លួនឯង ឬមួយផ្លូវបន្តអភិវឌ្ឍលើបច្ចេកវិទ្យានុយក្លេអ៊ែរ និងគ្រាប់មីស៊ីលដើម្បីបន្តរស់។
នៅទីបំផុត គីម ជុងអ៊ុនបានជ្រើសយកផ្លូវបន្តរស់ដោយបន្តយកនុយក្លេអ៊ែរ និងគ្រាប់មីស៊ីលដើម្បីផ្គើនសហគមន៍អន្តរជាតិ។ លទ្ធផលដែលទទួលបាន និងដោយមានការជួយជ្រោមជ្រែងពីប្រធានាធិបតីកូរ៉េខាងត្បូងលោកមូន ចៃអ៊ីន គីម ជុងអ៊ុនបានក្លាយជាមេដឹកនាំកូរ៉េខាងជើងទី១ ដែលបានជួបផ្ទាល់ជាមួយប្រធានាធិបតីអាមេរិកកំពុងកាន់អំណាចលោកដូណាល់ ត្រាំចំនួន ៣ដងតាំងពីឆ្នាំ ២០១៨ នៅសិង្ហបុរី នៅវៀតណាម និងនៅតំបន់គ្មានកងទ័ពដែលខ័ណ្ឌចែកទឹកដីកូរ៉េ។ គ្រាន់តែជួបគ្នាលើកទី១ គីម ជុងអ៊ុន និងដូណាល់ ត្រាំដែលមានអាយុខុសគ្នាដល់ទៅ ៤០ឆ្នាំបានល្អូតល្អឺនដាក់គ្នា ក្រោយពីបានដៀមដាម និងគំរាម ប្រមាថដាក់គ្នាមក។
ក្នុងឆ្នាំ ២០១៨ ដដែល លោកគីម ជុងអ៊ុនបានជួបសន្ទនាជាមួយសមភាគីកូរ៉េខាងត្បូងលោកមូន ចៃអ៊ីន និងបានជួបច្រើនដងជាមួយប្រធានាធិបតីចិនលោកស៊ី ជីនពីង។ ក្នុងរយៈពេលនៃការកាន់អំណាចចំនួន ១០ឆ្នាំ មេដឹកនាំផ្តាច់ការវ័យក្មេងគីម ជុងអ៊ុនបានក្លាយជាមេដឹកនាំដែលបានអង្គុយនិយាយស្មើមុខ ស្មើមាត់ជាមួយមេដឹកនាំគ្រាក់ៗ ពិសេសអាមេរិកក្នុងជំនាន់លោកដូណាល់ ត្រាំ និងចិនរបស់លោកស៊ី ជីនពីងបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ