អង្គការសុខភាពពិភពលោកផ្តល់អនុសាសន៍ឲ្យចាក់វ៉ាក់សាំងបង្ការជំងឺគ្រុនចាញ់លើកុមារដែលរស់នៅក្នុងតំបន់ហានិភ័យ
ចុះផ្សាយនៅថ្ងៃ៖
ស្តាប់ - ០៦:៤៦
នៅថ្ងៃពុធ ទី៦ តុលា អង្គការសុខភាពពិភពលោក (WHO)បានផ្តល់អនុសាសន៍ឲ្យប្រើវ៉ាក់សាំងបង្ការជំងឺគ្រុនចាញ់ក្នុងទ្រង់ទ្រាយធំសម្រាប់កុមារដែលរស់នៅក្នុងតំបន់អាហ្រ្វិកសាហារ៉ា និងនៅតាមតំបន់ដែលមានហានិភ័យខ្ពស់។ សម្រាប់អគ្គនាយកអង្គការសុខភាពពិភពលោក លោកទេដ្រូស វត្តមានវ៉ាក់សាំងបង្ការជំងឺគ្រុនចាញ់ពេលនេះជាព្រឹត្តិការណ៍ប្រវត្តិសាស្រ្ត និងជាសក្ខីកម្មដែលបញ្ជាក់ពីការវិវត្តន៍ផ្នែកវិទ្យាសាស្រ្ត ផ្នែកសុខភាពកុមារ និងការប្រឆាំងជំងឺគ្រុនចាញ់។
គ្រុនចាញ់ជាជំងឺមួយដែលបានលេចរូបរាងមានតាំងពីសម័យបូរាណកាលមកម្ល៉េះ ពោលមិនមែនជាជំងឺថ្មីថ្មោងថ្មោងដែលទើបកើតមាននាប៉ុន្មានឆ្នាំ ឬប៉ុន្មានទសវត្សចុងក្រោយនេះទេ។ គេក៏បានដឹងទៀតថា គ្រុនចាញ់ជាជំងឺមួយដែលឆ្លងពីមូស ពោលនៅពេលមូសខាំ និងមានលេចរោគសញ្ញាមានច្រើន ដូចជាក្តៅខ្លួន ឈឺក្បាល និងឈឺសាច់ដុំ ហើយបន្ទាប់មកក៏មានអាការៈក្តៅ ត្រជាក់ និងបែកញើស។ អ្នកដែលរងគ្រោះខ្លាំងជាងគេគឺកុមារ ព្រោះបើតាមអង្គការសុខភាពពិភពលោក ជំងឺគ្រុនចាញ់បានសម្លាប់កុមារម្នាក់នៅរៀងរាល់ ២នាទីម្តងនៅក្នុងលោក។
រហូតមកដល់សព្វថ្ងៃ និងដើម្បីបង្ការជំងឺគ្រុនចាញ់ ពិភពលោកមានតែថ្នាំគ្រាប់មួយប៉ុណ្ណោះ ហើយក្រៅពីការប្រើថ្នាំគ្រាប់ គេក៏អាចប្រើវិធីសាស្រ្តបង្ការផ្សេងទៀតដើម្បីកុំឲ្យមូសខាំ។ តែអ្វីដែលថ្មីសម្រាប់ឆ្នាំ ២០២១ នេះ គឺពិភពលោកមានវ៉ាក់សាំងបង្ការជំងឺគ្រុនចាញ់លើកទី១ ដែលមានឈ្មោះ RTS,S ឬហៅ Mosquirix។ វ៉ាក់សាំងបង្ការជំងឺគ្រុនចាញ់ឈ្មោះ Mosquirix នេះត្រូវបានផលិតដោយក្រុមហ៊ុនឱសថអង់គ្លេស GSK។ ប្រសិទ្ធិភាពរបស់ Mosquirix គឺអាចកាត់បន្ថយបានច្រើននូវករណីឆ្លងជំងឺគ្រុនចាញ់ទូទៅ ក្នុងនោះមានទាំងជំងឺគ្រុនចាញ់ដែលគំរាមកំហែងដល់ជីវិតកុមារ។
តាមអង្គការសុខភាពពិភពលោក លទ្ធផលនៃការសាកល្បងវ៉ាក់សាំងបង្ការជំងឺគ្រុនចាញ់ឈ្មោះ RTS,S ឬហៅ Mosquirixចំនួន ៣ដងបានបង្ហាញថា ក្រោយពីបានចាក់ចំនួន ៤ដូស វ៉ាក់សាំងនេះអាចបង្ការករណីជំងឺគ្រុនចាញ់ប្រភេទស្រាលចំនួន ៤ករណីក្នុងចំណោម ១០ករណី និងអាចបង្ការករណីជំងឺគ្រុនចាញ់ប្រភេទធ្ងន់ចំនួន ៣ករណីក្នុងចំណោម ១០ករណី។
Plasmodium falciparum ជាពពួកប៉ារ៉ាស៊ីតបង្កឲ្យមានជំងឺគ្រុនចាញ់ប្រភេទធ្ងន់
ជំងឺគ្រុនចាញ់ក៏ដូចជាជំងឺផ្សេងទៀតដែរ គឺមានករណីស្រាលដែលអ្នកជំងឺអាចរួចពីការស្លាប់ និងករណីធ្ងន់ធ្ងរដែលអ្នកជំងឺអាចប្រឈមនឹងការបាត់បង់ជីវិត។ ជំងឺគ្រុនចាញ់បានបង្កឡើងដោយពពួកប៉ារ៉ាស៊ីតខុសៗគ្នា។ តែពពួកប៉ារ៉ាស៊ីតដែលកាចខ្លាំង មានច្រើននៅអាហ្រ្វិក និងបានសម្លាប់អ្នកជំងឺគ្រុនចាញ់ច្រើនជាងនៅក្នុងលោក គឺពពួកប៉ារ៉ាស៊ីត Plasmodium falciparum ដែលចម្លងដោយមូស។ ពពួកប៉ារ៉ាស៊ីត Plasmodium falciparum នេះបង្កឲ្យមានជំងឺគ្រុនចាញ់ប្រភេទធ្ងន់ និងធ្វើឲ្យអ្នកជំងឺប្រឈមនឹងការបាត់បង់ជីវិត។
វ៉ាក់សាំងបង្ការជំងឺគ្រុនចាញ់ឈ្មោះ RTS,S ឬហៅ Mosquirixដែលទើបមានលើកដំបូងពេលនេះជាប្រភេទវ៉ាក់សាំងធ្វើពីប្រូតេអ៊ីនផ្សំជាមួយសារធាតុសកម្ម និងមានសមត្ថភាពប្រឆាំងនឹងពពួកប៉ារ៉ាស៊ីត Plasmodium falciparum។ គួរបញ្ជាក់ថា អាហ្រ្វិកជាតំបន់ដែលបានរងគ្រោះខ្លាំងជាងគេដោយជំងឺគ្រុនចាញ់ ព្រោះក្នុងមួយឆ្នាំៗ ជំងឺមួយនេះបានស្លាប់កុមារក្រោមអាយុ ៥ឆ្នាំជាង ២៦០ ០០០នាក់។ ដូច្នេះចង់ ឬមិនចង់ វត្តមានវ៉ាក់សាំងបង្ការជំងឺគ្រុនចាញ់ពេលនេះជាក្តីសង្ឃឹមតែមួយគត់ដែលអាចស្រោចស្រង់ជីវិតមនុស្សបានច្រើនពាន់នាក់។
តែទន្ទឹមនឹងមានវ៉ាក់សាំងពេលនេះ ប្រមុខអង្គការសុខភាពពិភពលោក លោកទេដ្រូសបានអំពាវនាវឲ្យបន្តប្រើវិធានការបង្ការដែលមានស្រាប់ដើម្បីប្រឆាំងនឹងជំងឺគ្រុនចាញ់។ ឥឡូវនេះអ្វីដែលត្រូវដោះស្រាយដំបូងគេ មុននឹងឈានដល់ការបើកយុទ្ធនាការចាក់វ៉ាក់សាំងបង្ការជំងឺគ្រុនចាញ់ទ្រង់ទ្រាយធំនៅតំបន់អាហ្វ្រិកសាហារ៉ា គឺស្វែងរកថវិកាដើម្បីទិញវ៉ាក់សាំង។ បើតាមអង្គការសុខភាពពិភពលោក សម្ព័ន្ធវ៉ាក់សាំងហ្កាវី(Gavi) បានប្រកាសពីការសិក្សា និងធ្វើការជាមួយគ្រប់ភាគីពាក់ព័ន្ធទាំងអស់។
២០២១ ជាឆ្នាំនៃការវិវត្តន៍ដ៏សំខាន់នៃយុទ្ធនាការប្រឆាំងជំងឺគ្រុនចាញ់
វាល្មមដល់ពេលដែលពិភពលោកត្រូវគិតគូរស្វែងរកមធ្យោបាយទប់ស្កាត់ បង្ការជំងឺគ្រុនចាញ់ដែលជំងឺមួយមានតាំងពីយូរ និងកំពុងបន្តសម្លាប់មនុស្សជារៀងរាល់ថ្ងៃមកដល់បច្ចុប្បន្ន ទោះបីជាជំងឺនេះច្រើនកើតមាននៅក្នុងប្រទេសក្រីក្រ ពិសេសនៅតំបន់អាហ្រ្វិក។ សព្វថ្ងៃនេះ ថ្នាំគ្រាប់ដើម្បីបង្ការជំងឺគ្រុនចាញ់នៅមិនទាន់គ្រប់គ្រាន់ទេ។ អ្វីដែលប្រសើរបំផុតក្នុងការបង្ការជំងឺគ្រុនចាញ់ក៏ដូចជាជំងឺមួយចំនួន គឺវ៉ាក់សាំង។ អស់រយៈពេលជាច្រើនឆ្នាំ ការស្រាវជ្រាវ និងក្រុមមន្ទីរពិសោធន៍ហាក់មិនសូវយកចិត្តទុកដាក់ស្វែងរកវ៉ាក់សាំងបង្ការជំងឺគ្រុនចាញ់ទេ។
គឺទើបនៅឆ្នាំ ២០២១ ដែលហាក់មានការវិវត្តន៍លឿនគួរឲ្យកត់សម្គាល់។ បន្ទាប់ពីវ៉ាក់សាំងរបស់ក្រុមហ៊ុនឱសថអង់គ្លេស GSK មានបេក្ខជនវ៉ាកសាំងចំនួនពីរទៀត គឺសាកលវិទ្យាល័យ Oxford និង BioNTech។ វ៉ាក់សាំងរបស់សាកលវិទ្យាល័យ Oxford មានឈ្មោះ Matrix-M និងមានប្រសិទ្ធិភាពដល់ទៅ ៧៧% នាពេលសាកល្បងក្នុងដំណាក់ការទី២ កាលពីខែមេសា និងអាចអនុញ្ញាតឲ្យប្រើនៅ ២ឆ្នាំខាងមុខ។ ចំណែក BioNTechបានត្រឹមបញ្ជាក់ពីការចង់បង្កើតវ៉ាក់សាំងបង្ការជំងឺគ្រុនចាញ់ដោយប្រើបច្ចេកវិទ្យា ARN messager ដូចដែលខ្លួនបានប្រើក្នុងការផលិតវ៉ាក់សាំងបង្ការកូវីដ១៩ ដែរ។ មន្ទីរពិសោធន៍អាល្លឺម៉ង់មួយនេះបានប្រកាសពីគម្រោងសាកល្បងនៅឆ្នាំ ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ