អាហ្វហ្កានីស្ថាន៖ហេតុអ្វីបានជាពួកតាលីបង់បន្តអូសបន្លាយការបង្កើតរដ្ឋាភិបាលថ្មី?
ចុះផ្សាយនៅថ្ងៃ៖
ស្តាប់ - ០៧:៤១
នៅក្នុងប្រទេសអាហ្វហ្កានីស្ថាន រដ្ឋាភិបាលថ្មីមួយដែលពួកតាលីបង់គ្រោងប្រកាសតាំងពីថ្ងៃសុក្រ ទី៣ កញ្ញាកំពុងបន្តគ្មានរូបរាងនៅឡើយទេ។ ទន្ទឹមគ្នានេះ ការប្រយុទ្ធគ្នាកំពុងបន្តមានយ៉ាងខ្លាំងក្លារវាងពួកតាលីបង់ និងកម្លាំងតស៊ូនៅជ្រលងភ្នំផាន់ឈៀរ។ ជិត ៣សប្តាហ៍ក្រោយការឡើងកាន់អំណាចជាថ្មីរបស់ពួកតាលីបង់ ជ្រលងភ្នំផាន់ឈៀរកំពុងបន្តជាតំបន់តែមួយគត់ដែលនៅមិនទាន់ធ្លាក់ក្នុងដៃពួកតាលីបង់នៅឡើយទេ។ រូបភាពនៃការប្រយុទ្ធគ្នានេះត្រូវបានអាមេរិកលើកឡើងពីរូបភាពនៃការមានសង្រ្គាមស៊ីវិលនៅអាហ្វហ្កានីស្ថាននាពេលខាងមុខ។
ការប្រយុទ្ធគ្នាកំពុងបន្តមានយ៉ាងគគ្រឹកគគ្រេងរវាងពួកតាលីបង់ និងកម្លាំងរណសិរ្យតស៊ូជាតិនៅជ្រលងភ្នំផាន់ឈៀរដែលដឹកនាំដោយកូនប្រុសរបស់សពអតីតមេបញ្ជាការទ័ពលោកម៉ាស៊ូ។ បច្ចុប្បន្ន កម្លាំងរណសិរ្យតស៊ូជាតិទទួលបានការចូលរួមពីកម្លាំងទ័ពរបស់អតីតរដ្ឋាភិបាលអាហ្វហ្កានីស្ថាននៅពេលដែលក្រុងកាប៊ុលធ្លាក់ក្នុងដៃតាលីបង់។ តាំងពីថ្ងៃទី៣០ សីហា និងការដកទ័ពអាមេរិកចុងក្រោយចេញពីទឹកដីអាហ្វហ្កានីស្ថាន ពួកតាលីបង់បានផ្តើមប្រតិបត្តិការសឹកតាមគ្រប់រូបភាពទៅលើជ្រលងភ្នំផាន់ឈៀរ។
ជ្រលងភ្នំផាន់ឈៀរជាតំបន់ព្រៃភ្នំមួយមានចម្ងាយប្រមាណជា ៨០គីឡូម៉ែត្រពីទីក្រុងកាប៊ុល ជាតំបន់ពិបាកចូល និងធ្លាប់ជាទីតាំងរបស់ចលនាតស៊ូប្រឆាំងនឹងសហភាពសូវៀត និងពួកតាលីបង់។ សូមរម្លឹកថា សហភាពសូវៀតបានចូលឈ្លានពានអាហ្វហ្កានីស្ថានពីឆ្នាំ ១៩៧៩ដល់ឆ្នាំ ១៩៨៩ ហើយពួកតាលីបង់ធ្លាប់កាន់អំណាចលើកទី១ ពីឆ្នាំ ១៩៩៦ ដល់ឆ្នាំ ២០០១។ ដូច្នេះនេះជាលើកទី២ ដែលជ្រលងភ្នំផាន់ឈៀរបានក្លាយជាតំបន់តស៊ូប្រឆាំងនឹងការឡើងកាន់អំណាចលើកទី២ របស់ពួកតាលីបង់ពេលនេះ។ តែពួកតាលីបង់ហាក់មិនចង់ទុកឲ្យជ្រលងភ្នំផាន់ឈៀរនេះស្ថិតនៅក្រៅការគ្រប់គ្រងរបស់ខ្លួនឡើយ។
នៅថ្ងៃអាទិត្យ ទី៥ កញ្ញា ពួកតាលីបង់បានបញ្ជាក់ពីការរំកិលទៅមុខដោយវាយដណ្តើមបាននូវទីតាំងមួយចំនួនរបស់កម្លាំងរណសិរ្យតស៊ូជាតិ។ ពីខាងក្រុមអ្នកតស៊ូវិញ អ្នកនាំពាក្យរបស់កម្លាំងរណសិរ្យតស៊ូជាតិលោកអាលី ម៉េសាំ ណាហ្សារីបានធានាថា ការតស៊ូបន្តមាន និងនៅបន្តមានដោយគ្មានថ្ងៃបរាជ័យទេ។ តើអ្វីទៅជាស្ថានភាពពិតនៅជ្រលងភ្នំផាន់ឈៀរ តើពួកតាលីបង់កំពុងឈានទៅវាយយកបានតំបន់ចុងក្រោយរបស់ក្រុមអ្នកតស៊ូប្រឆាំងខ្លួនដែរ ឬយ៉ាងណា?។ គេមិនពិបាកឆ្លើយ និងផ្ទៀងផ្ទាត់លើព័ត៌មានទាំងនេះដោយសារតែប្រព័ន្ធទាក់ទងទៅកាន់ជ្រលងភ្នំផាន់ឈៀរមានការលំបាកខ្លាំង។
អាហ្វហ្កានីស្ថានធ្លាក់ក្នុងសង្រ្គាមស៊ីវិល?
រូបភាពនៃសង្រ្គាមរវាងពួកតាលីបង់ និងកម្លាំងរណសិរ្យតស៊ូនៅជ្រលងភ្នំផាន់ឈៀរពេលនេះត្រូវបានអាមេរិកលើកឡើងថា ជាលក្ខខណ្ឌនៃការឈានទៅផ្ទុះសង្រ្គាមស៊ីវិលនៅអាហ្វហ្កានីស្ថានជាយថាហេតុ។ ការលើកឡើងរបស់អាមេរិកនេះធ្វើឡើងដោយមេបញ្ជាការកងទ័ពអាមេរិកឧត្តមសេនីយ Mark Milley នៅក្នុងបទសម្ភាសន៍មួយឲ្យទូរទស្សន៍ Fox News និងដែលបទសម្ភាសន៍នេះត្រូវបាន Fox News ចាក់ផ្សាយនាថ្ងៃសៅរ៍ ទី៤ កញ្ញា។ ឧត្តមសេនីយអាមេរិករូបនេះបានយល់ឃើញថា ប្រឈមនឹងស្ថានការណ៍វឹកវរនេះ ប្រឈមនឹងការត តាំងផ្លូវអាវុធរវាងពួកតាលីបង់ និងកម្លាំងរណសិរ្យតស៊ូជាតិនៅជ្រលងភ្នំផាន់ឈៀរពេលនេះ លក្ខខណ្ឌនៃការឈានទៅមានសង្គ្រាមស៊ីវិលមួយនៅអាហ្វហ្កានីស្ថានទំនងជាត្រូវបានបំពេញ និងមានគ្រប់គ្រាន់។
អាចមានចំណុចពីរដែលឧត្តមសេនីយអាមេរិកលោក Mark Milley ចង់និយាយ ទី១ ជាសង្រ្គាមស៊ីវិលរវាងភាគីជម្លោះផ្ទៃក្នុងអាហ្វហ្កានីស្ថានសុទ្ធសាធ និងទី២ សង្រ្គាមស៊ីវិលមួយនេះជាឱកាសដែលអនុញ្ញាតឲ្យអង្គការអាល់កៃដាចាប់ក កើតឡើងវិញ ឬមួយអនុញ្ញាតឲ្យអង្គការរដ្ឋអ៊ីស្លាមពង្រឹងកម្លាំង និងឥទ្ធិពលកាន់តែខ្លាំង ឬមួយក៏អនុញ្ញាតឲ្យមានការចាប់កំណើតថ្មីនូវក្រុមភេរវនិយមផ្សេងទៀត។ គឺរូបភាពទាំងអស់នេះដែលក្រុមប្រទេសបស្ចិមលោក និយាយជារួម និងអាមេរិក និយាយដោយឡែកកំពុងបារម្ភខ្លាំងជាងគេ។ ជិត ៣សប្តាហ៍ក្រោយទទួលបានអំណាចជាថ្មី ពួកតាលីបង់នៅមិនទាន់បានប្រកាសពីសមាសភាពនៃរដ្ឋាភិបាលថ្មីរបស់ខ្លួននៅឡើយទេ។
ការអូសបន្លាយដែលត្រូវបានគេមើលឃើញថា ប្រហែលជាមានហេតុផលចំនួនពីរ ទី១ ពួកតាលីបង់កំពុងជាប់រវល់ដៃនឹងការប្រយុទ្ធត ទល់នឹងកម្លាំងរណសិរ្យតស៊ូជាតិនៅជ្រលងភ្នំផាន់ឈៀរ និងទី២ ពួកតាលីបង់កំពុងបន្តនិយាយមិនចុះសម្រុងគ្នាក្នុងការបែងចែកអំណាច។ គួរបញ្ជាក់ថាតាមគម្រោង ពួកតាលីបង់ត្រូវប្រកាសរដ្ឋាភិបាលថ្មីតាំងពីថ្ងៃសុក្រ ទី៣ កញ្ញាមកម្ល៉េះ។
ប៉ាគីស្ថានត្រូវការអាហ្វហ្កានីស្ថានសម្រាប់សន្តិសុខផ្ទៃក្នុង
នៅថ្ងៃសៅរ៍ ទី៤ កញ្ញា ប្រមុខក្រសួងស៊ើបការណ៍សម្ងាត់ប៉ាគីស្ថានលោកហ្វេ ហាមីដបានទៅបំពេញទស្សនកិច្ចនៅអាហ្វហ្កានីស្ថាន។ នៅក្នុងទីក្រុងកាប៊ុល លោកហាមីដត្រូវជួបសន្ទនាជាមួយអ្នកទទួលខុសត្រូវជាន់ខ្ពស់តាលីបង់។ តែនៅពេលនេះ គេគ្មានព័ត៌មានបែកធ្លាយណាមួយស្តីពីទស្សនកិច្ចរបស់ប្រមុខស៊ើបការណ៍សម្ងាត់ប៉ាគីស្ថានលោកហ្វេ ហាមីដ ក៏ដូចជាប្រធានរឿងដែលលោកហាមីដត្រូវលើកទៅជជែកជាមួយក្រុមអ្នកតំណាងតាលីបង់ទេ។ អ្វីដែលគេអាចនិយាយបាន វត្តមានរបស់ថ្នាក់ដឹកនាំប៉ាគីស្ថានម្នាក់នៅអាហ្វហ្កានីស្ថានពេលនេះជាសក្ខីកម្មមួយដែលបញ្ជាក់ពីការដែលប៉ាគីស្ថានបន្តមានទំនាក់ទំនងជិតស្និទ្ធជាមួយពួកតាលីបង់។ គឺជិតស្និទ្ធតាំងពីពួកតាលីបង់អស់អំណាចកាលពី ២០ឆ្នាំមុនរហូតដល់ពួកតាលីបង់ទទួលបានអំណាចជាថ្មីនៅ ២០ឆ្នាំក្រោយមក។
តាំងពីការឡើងកាន់អំណាចជាថ្មីរបស់ពួកតាលីបង់ជិត ៣សប្តាហ៍កន្លងទៅ រដ្ឋាភិបាលប៉ាគីស្ថានតែងលើកទឹកចិត្ត និងគាំទ្រឲ្យមានការប្រសូត្រចេញនូវរដ្ឋាភិបាលចម្រុះមួយនៅអាហ្វហ្កានីស្ថានដោយមានការចូលរួមពីគ្រប់ភាគីជាតិពិន្ទុទាំងអស់។ គួររម្លឹកថា មានហេតុផលសំខាន់ចំនួនពីរដែលប៉ាគីស្ថានគ្មានជម្រើសអ្វីផ្សេងក្រៅពីបន្តរក្សាទំនាក់ទំនងល្អជាមួយអាហ្វហ្កានីស្ថាន ទី១ គឺក្នុងនាមជាប្រទេសជិតខាង និងទី២ គឺដើម្បីផលប្រយោជន៍លើវិស័យសន្តិសុខ។ ចូរកុំភ្លេចថា រដ្ឋអំណាចប៉ាគីស្ថានកំពុងបន្តប្រយុទ្ធប្រឆាំងនឹងក្រុមភេរវជននៅលើទឹកដីរបស់ខ្លួន ពិសេសនៅតាមព្រំដែនជាមួយអាហ្វហ្កានីស្ថាន ដូចជាក្រុមតាលីបង់ប៉ាគីស្ថាន TTP។
ដូច្នេះ ការដែលប៉ាគីស្ថានបានបញ្ជូនប្រមុខស៊ើបការណ៍សម្ងាត់របស់ខ្លួនទៅកាន់អាហ្វហ្កានីស្ថានពេលនេះ និងការដែលប៉ាគីស្ថានបានសាទរលើជ័យជំនះរបស់ពួកតាលីបង់ដោយមិនអល់អែក គឺប្រហែលមកពីប៉ាគីស្ថានចង់ធានាខ្លួនឯងដោយសង្ឃឹមថា ចៅហ្វាយថ្មីនៅអាហ្វហ្កានីស្ថាននឹងក្លាយជាសម្ព័ន្ធមិត្តរបស់ខ្លួននៅក្នុងយុទ្ធនាការប្រឆាំងនឹងក្រុមតាលីបង់ប៉ាគីស្ថាន TTP៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ