អាហ្វហ្កានីស្ថាន ៖ បារាំងនិងអង់គ្លេស ស្នើបង្កើត “តំបន់សុវត្ថិភាព” នៅក្រុងកាប៊ុល
ចុះផ្សាយនៅថ្ងៃ៖
ស្តាប់ - ០៦:៥៥
ប្រតិបត្តិការជម្លៀសនៅអាកាសយានដ្ឋានក្រុងកាប៊ុល បានឈានចូលដល់ដំណាក់កាលចុងក្រោយហើយ។ ប៉ុន្តែកាន់តែជិតចប់ ការគំរាមកំហែងសុវត្ថិភាពមានកាន់តែខ្លាំង។ លោកប្រធានាធិបតីអាមេរិក ចូបៃដិន បានព្រមានដោយផ្ទាល់ ថាកាប៊ុលអាចនឹងរងភេរវកម្មជាថ្មី ក្នុងរវាង២៤ម៉ោងទៅ៣៦ម៉ោង ពោលគឺនៅថ្ងៃអាទិត្យឬថ្ងៃចន្ទស្អែកនេះ។ ចំណែកបារាំងនិងអង់គ្លេស នឹងស្នើទៅអង្គការសហប្រជាជាតិឱ្យបង្កើតតំបន់សុវត្ថិភាពនៅកាប៊ុល។
បង្កើត “តំបន់សុវត្ថិភាព” នៅកាប៊ុល
នៅថ្ងៃចន្ទទី៣០សីហា សមាជិកអចិន្ត្រៃយ៍ទាំង៥នៃក្រុមប្រឹក្សាសន្តិសុខអង្គការសហប្រជាជាតិ នឹងត្រូវបើកជំនួបប្រជុំបន្ទាន់មួយ ដើម្បីពិភាក្សាអំពីវិបត្តិអាហ្វហ្កានីស្ថាន។ ក្នុងឱកាសនេះ បារាំងនិងអង់គ្លេស បានរៀបរៀងគម្រោងសេចក្តីសម្រេចចិត្តរួមគ្នា ស្នើទៅក្រុមប្រឹក្សាសន្តិសុខ ឱ្យបង្កើតតំបន់សុវត្ថិភាពមួយ នៅកាប៊ុល ដើម្បីទុកផ្លូវឱ្យពលរដ្ឋអាហ្វហ្កានីស្ថានដែលចង់ អាចចាកចេញពីប្រទេសបាន នៅក្រោយថ្ងៃទី៣១សីហាផង ដើម្បីបើកផ្លូវឱ្យសហគមន៍អន្តរជាតិ បន្តសកម្មភាពមនុស្សធម៌ ជួយអាហ្វហ្កានីស្ថានផង និង ដើម្បីឱ្យសហគមន៍អន្តរជាតិអាចបន្តដាក់សម្ពាធលើពួកតាលីបង់បានទៀត នៅក្រោយពេលដែលកងទ័ពអាមេរិកត្រូវដកចេញអស់ទាំងស្រុងពីអាហ្វហ្កានីស្ថាន នៅថ្ងៃទី ៣១សីហា។
បើតាមប្រសាសន៍របស់លោកប្រធានាធិបតីបារាំង ការបង្កើតតំបន់សុវត្ថិភាពនេះ មានសារៈសំខាន់ខ្លាំងណាស់ និងត្រូវតែស្ថិតនៅក្រោមការដឹកនាំ និងសម្រេចរបស់អង្គការសហប្រជាជាតិ។ ធ្វើយ៉ាងដូច្នេះ សមាជិកនីមួយៗអាចបញ្ចេញសកម្មភាពទៅតាមកំរិតទំនួលខុសត្រូវរៀងៗខ្លួន។ សមាជិកនីមួយៗនោះគឺសំដៅទៅលើប្រទេសចិន និងរុស្ស៊ី ដែលជាសមាជិកអចិន្ត្រៃយ៍ មានសិទ្ធិប្រើវេតូប្រឆាំង តែជាប់សង្ស័យថាគាំទ្រពួកតាលីបង់ក្នុងការវិលត្រលប់មកកាន់អំណាចនៅអាហ្វហ្កានីស្ថានវិញ។
បារាំងចរចាជាមួយតាលីបង់
ប្រតិបត្តិការជម្លៀសនៅអាកាសយានដ្ឋានក្រុងកាប៊ុល បានបិទបញ្ចប់ហើយ នៅត្រឹមថ្ងៃសៅរ៍ទី ២៨សីហា សម្រាប់បណ្តាប្រទេសមួយចំនួនធំ ដូចជាអេស្ប៉ាញ អូស្ត្រាលី អាល្លឺម៉ង់ កាណាដា អ៊ីតាលី អង់គ្លេស និងបារាំង នៅសល់តែអាមេរិកមួយប៉ុណ្ណោះដែលត្រូវបន្តសកម្មភាពរហូតដល់ថ្ងៃទី៣១សីហា។ ប៉ុន្តែបារាំង កំពុងតែចរចាដោយផ្ទាល់ជាមួយពួកតាលីបង់ ជុំវិញប្រតិបត្តិការជម្លៀសពលរដ្ឋអាហ្វហ្កានីស្ថាន ក្រោយថ្ងៃឱសានវាទ៣១សីហា។ បើតាមលោកប្រធានាធិបតីម៉ាក្រុង ដោយមានជំនួយពីប្រទេសកាតា ការចរចាបារាំង-តាលីបង់បានចាប់ផ្តើម តែនៅមានស្ថានភាពផុយស្រួយខ្លាំងណាស់ សម្រាប់ពេលនេះ។ ក្នុងក្របខ័ណ្ឌនៃការចរចាត្រូវជាមួយតាលីបង់ បារាំងគ្រោងនឹងទៅជម្លៀសយកពលរដ្ឋអាហ្វហ្កានីស្ថាន ដោយចោះៗចំៗ តាមរយៈការបើកជើងយន្តហោះស៊ីវិល ឬប្រទេសជិតខាង។
សូមបញ្ជាក់ថាក្នុងប្រតិបត្តិការជម្លៀស បារាំងបានសង្គ្រោះពលរដ្ឋអាហ្វហ្កានីស្ថានបាន ២៦០០នាក់ ពលរដ្ឋបារាំង១៤៧នាក់ និងពលរដ្ឋអឺរ៉ុប១៧នាក់។ តែប៉ារីសមិនបានបញ្ចេញឈ្មោះមានមនុស្សប៉ុន្មាននាក់នៅជាប់ក្នុងប្រទេសអាហ្វហ្កានីស្ថាន ត្រូវជម្លៀសមកបារាំងទេ។
ចំណែកអ្នកដែលគ្មានលទ្ធភាពចាកចេញពីអាហ្វហ្កានីស្ថានបានតាមប្រតិបត្តិការជម្លៀសនេះ គឺគ្មានអ្វីក្រៅពីប្រឹងរកមធ្យោបាយផ្សេង ដូចជាត្រូវរត់ចេញដោយខុសច្បាប់តាមច្រកព្រំដែនប្រទេសជិតខាងទេ។
ស្ថានភាពនៅអាកាសយានដ្ឋានកាប៊ុល
នៅក្នុងសេចក្តីថ្លែងការណ៍ចេញផ្សាយនៅយប់ថ្ងៃសៅរ៍ទី ២៨សីហា លោកប្រធានាធិបតីអាមេរិក ចូបៃដិន បានបញ្ជាក់ថា ប្រតិបត្តិការវាយប្រហារដោយប្រើដ្រូនសម្លាប់អ្នកទទួលខុសត្រូវអង្គការរដ្ឋអ៊ីស្លាមនៅអាហ្វហ្កានីស្ថានចំនួនពីរនាក់ កាលពីថ្ងៃសុក្រ មិនមែនជាប្រតិបត្តិចុងក្រោយឡើយ។ អាមេរិកនឹងបន្តតាមកម្ចាត់ជនមានពាក់ព័ន្ធនិងប៉ុនប៉ងធ្វើភេរវកម្មសម្លាប់ជនស៊ីវិលស្លូតត្រង់ នៅកាប៊ុល។ ប៉ុន្តែស្ថានភាពនៅក្រុងកាប៊ុលកំពុងប្រឈមនឹងគ្រោះថ្នាក់និងការគំរាមកំហែងភេរវកម្មខ្ពស់បំផុត។ លោកប្រធានាធិបតីបានព្រមានអំពីគ្រោះរងការវាយប្រហារភេរវកម្មនៅតំបន់អាកាសយានដ្ឋានក្រុងកាប៊ុល ក្នុងរវាង២៤ទៅ៣៦ម៉ោង ត្រូវជាថ្ងៃអាទិត្យ និងថ្ងៃចន្ទស្អែក ដែលជាថ្ងៃចុងក្រោយបង្អស់ មុននឹងកងទ័ពអាមេរិកត្រូវដកចេញអស់ទាំងស្រុងពីអាហ្វហ្កានីស្ថាន។
អាមេរិកក៏ទើបតែបង្ហាញអត្តសញ្ញាណទាហានអាមេរិកទាំង១៣នាក់ ដែលបានស្លាប់ក្នុងភេរវកម្មកាលពីថ្ងៃព្រហស្បតិ៍។ ក្នុងចំណោមនោះមាន៥នាក់ទើបតែអាយុ២០ឆ្នាំ ពោលគឺពួកគេបានកើតនៅឆ្នាំ២០០១ ឆ្នាំដែលអាមេរិកចូលធ្វើសង្គ្រាមបណ្តេញពួកតាលីបង់នៅអាហ្វហ្កានីស្ថាន និងបានស្លាប់នៅពេលអាមេរិកដកកងទ័ពចេញ ពេលពួកតាលីបង់វិលមកកាន់អំណាចវិញ។
តាមគម្រោងអាមេរិកត្រូវដកកងទ័ពនិងបញ្ឈប់រាល់គ្រប់សកម្មភាពជម្លៀសនៅអាកាសយានដ្ឋាក្រុងកាប៊ុល ត្រឹមថ្ងៃអង្គារទី ៣១សីហា។ អាកាសយានដ្ឋានក្រុងកាប៊ុលដែលជាទីតាំងតែម្តុំគត់ស្ថិតក្រោមការគ្រប់គ្រង់របស់អាមេរិកនេះ ក៏កំពុងសម្ពាធ និងច្រិបយកដោយពួកតាលីបង់ជាបណ្តើរៗហើយ។ តាលីបង់បានព័ទ្ធ គ្រប់ច្រក និងផ្លូវមកកាន់អាកាសយានដ្ឋាន ដោយបើកឱ្យតែឡានដែលមានបណ្ណអនុញ្ញាតចូលប៉ុណ្ណោះ។ មេបញ្ជាការរបស់ពួកតាលីបង់ បានប្រកាសថានឹងកាន់កាប់ អាកាសយានដ្ឋានទាំងមូលក្នុងពេលឆាប់ៗ។ ប៉ុន្តែដោយហេតុពួកតាលីបង់គ្មានអ្នកបើកបរយន្តហោះ គ្មានអ្នកត្រួតពិនិត្យផ្លូវអាកាស តាលីបង់កំពុងចរចាជាមួយតួកគី និងកាតា ដើម្បីសុំជំនួយឃុំគ្រងអាកាសយានដ្ឋាន ដោយតាលីបង់ជាអ្នកធានាការពារសន្តិសុខ ឯតួកគីជាអ្នកគ្រប់គ្រងកិច្ចការរដ្ឋបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ