ចិនធានាថានឹងគោរពឲ្យបានតាមការសន្យាកាត់បន្ថយបញ្ចេញឧស្ម័ន
ចុះផ្សាយនៅថ្ងៃ៖
ស្តាប់ - ០៧:១២
មួយថ្ងៃ ក្រោយពីចេញរបាយការណ៍អាកាសធាតុ របស់អ្នកជំនាញអន្តររដ្ឋាភិបាលនិងអង្គការសហប្រជាជាតិ ដែលបង្ហាញពីស្ថានភាពធ្ងន់ធ្ងរនៃការឡើងកម្តៅផែនដី គេនាំគ្នាសំឡឹងទៅមើល ចិន ដែលជាប្រទេសបញ្ចេញឧស្ម័នផ្ទះកញ្ចក់ច្រើនជាងគេបំផុតនៅលើពិភពលោក។ នៅថ្ងៃអង្គារ ទី១០សីហា ចិនបានចេញមុខធានាថា ខ្លួននឹងគោរពឲ្យបានទៅតាមការសន្យា ដើម្បីកាត់បន្ថយការបញ្ចេញឧស្ម័ន។
តើ រដ្ឋាភិបាលចិន អះអាង ប្រាប់ពិភពលោកយ៉ាងណាខ្លះ?
ពាក្យសម្តីធានា ជាបឋម ចេញពីសេចក្តីថ្លែងការណ៍របស់ក្រសួងការបរទេស ចិន ដែលគូសបញ្ជាក់ថា « ពិភពលោកគួរមានទំនុកចិត្តចំពោះការសន្យារបស់មហាប្រទេសចិន ក្នុងការប្រយុទ្ធប្រឆាំងនឹងការប្រែប្រួលអាកាសធាតុ។ » ការទូតចិន បញ្ជាក់ទៀតថា « ខ្លួនប្រកាន់ខ្ជាប់ការសន្យានេះ យ៉ាងជាប់លាប់ តាំងតែពីពេលចុះហត្ថលេខា លើកិច្ចព្រមព្រៀងស្តីពីអាកាសធាតុ ពីឆ្នាំ ២០១៥ រហូតមក ហើយ នគរចិន ក៏បាន និងកំពុងបន្តអនុវត្តឲ្យចេញជាសកម្មភាពជាក់ស្តែង និង ដោយភាពស្មោះត្រង់។ »
រដ្ឋអំណាចចិន បានឲ្យឧទាហរណ៍ជាក់ស្តែង ដើម្បីបង្ហាញពីសកម្មភាពរបស់ខ្លួន។ ខែកក្កដាមុននេះ ចិនកំណត់តម្លៃទីផ្សារកាបូននៅក្នុងស្រុក។ ក្រុមហ៊ុនឧស្សាហកម្មចិនដែលបញ្ចេញឧស្ម័នបំពុលបរិស្ថាន ត្រូវបង់ប្រាក់ជូនរដ្ឋ គឺក្នុង ១តោន គឺត្រូវបង់ ៥០យ៉ន់ ប្រហែលនិងជាង៦អឺរ៉ូកន្លះ។ ។
ម្យ៉ាងទៀត រដ្ឋចិនបានគាំទ្រយន្តការផលិតនិងលក់រថយន្ត ដែលដើរដោយថាមពលអគ្គិសនី។ របាយការណ៍ថ្មីៗនេះ ឲ្យដឹងថា រថយន្តប្រមាណ៥ភាគរយ លក់នៅស្រុកចិន គឺដើរដោយថាមពលអគ្គិសនី ។
មិនតែប៉ុណ្ណោះចិន ជំរុញនិងចូលរួមដាំដើមឈើ។ បើគិតជាមធ្យម ក្នុងរយៈពេល ៣០ឆ្នាំចុងក្រោយនេះ រដ្ឋាភិបាលក្រុងប៉េកាំង បានដាំដើមឈើ ចំនួន៤០ពាន់លានដើម។ ដើមឈើជួយស្រូបយកឧស្ម័នកាបូនិក និងផលិតអុកស៊ីសែន ហើយនិងផ្តល់ផលប្រយោជន៍ ជាច្រើនទៀត។ ជារួម ផ្ទៃដី ២២ភាគរយ របស់ចិន បានត្រូវគ្របដណ្តប់ដោយព្រៃឈើឡើងវិញ។ ព្រៃស្រុកចិនកើនឡើង ប្រសិនបើធៀបនឹងឆ្នាំ ១៩៧៨ ដែលចិនមានកម្រាស់ព្រៃតែ១២ភាគរយប៉ុណ្ណោះ។
ចិនសព្វថ្ងៃនេះ កំពុងធ្វើត្រូវការប្រភពអគ្គិសនីជាខ្លាំង ហើយថ្មីៗនេះទៀត ចិន បានអនុញ្ញាតឲ្យរោគចក្រធ្យូងថ្មបើកដំណើរការឡើងវិញបាត់ទៅហើយ។ ធ្យូងថ្ម នេះ ជាប្រភពបញ្ចេញឧស្ម័នកាបូនិកយ៉ាងច្រើនបំផុត។ តើចិនអាចធានាចំពោះការសន្យារបស់ខ្លួនយ៉ាងដូចម្តេចបាន?
ការសន្យារបស់ចិនគឺប្រឈមនឹងការអនុវត្តជាក់ស្តែង ព្រោះថា មហាយក្សចិន នៅរំពឹងខ្លាំងលើថាមពលធ្យូងថ្ម សម្រាប់បញ្ឆេះក្បាលម៉ាស៊ីនសេដ្ឋកិច្ចឧស្សាហកម្ម។ ឆ្នាំ២០២០ ព្រោះតែយន្តការកាត់បន្ថយការប្រើប្រាស់ធ្យូងថ្ម គឺ ចិនបានជួបការលំបាក ខ្វះខាតថាមពលអគ្គិសនី។ ដូច្នេះ ចិនត្រូវរកមធ្យោបាយដោះស្រាយបញ្ហាចំពោះមុខ។
កាលពីសប្តាហ៍មុន រដ្ឋាភិបាលចិន បានអនុញ្ញាតបើកភ្លើងខៀវឲ្យដំណើរការរោងចក្រឧស្សាហកម្មធ្យូងថ្ម ជាថ្មី ឡើងវិញ ចំនួន១៥ រោងចក្រ នៅតំបន់ប៉ែកនិរតីនៃផ្ទៃប្រទេស។ មិនតែប៉ុណ្ណោះ ក្រុមហ៊ុនចិន ចំនួន៣៨ទៀត ខាងផលិតធ្យូងថ្ម នៅជាប់ប្រទេសម៉ុងហ្គោលី ក៏ចាប់ផ្តើមសកម្មភាព វិញដែរ។ ថែមពីនេះ មជ្ឈមណ្ឌលចិន ទទួលបន្ទុកខាងអគ្គសនី បានបញ្ចេញធ្យូងថ្ម ១០លានតោន ចេញពីស្តុក របស់រដ្ឋ។ រដ្ឋាភិបាលចិន ក៏គ្រោងនឹងបង្កើនការបញ្ចេញធ្យូងថ្ម ពីស្តុកជាតិ ថែមទៀត ដើម្បីដោះស្រាយបញ្ហាខ្វះអគ្គីសនី ចំពោះមុខ។ ដ្បិតថា រដ្ឋ មិនចង់ឃើញ សេណារីយ៉ូ ខ្វះអគ្គីសនី ដូចឆ្នាំ ២០២០ កន្លងទៅទេ។ សរុបមក ចិន ច្បាស់ជាមិនអាចគោរពសន្យាបានជាប់លាប់នោះទេ ដរាបណា ចិន នៅតែរំពឹងលើធ្យូងថ្ម ជាត្រីមុខ។
តាមយោបល់របស់អ្នកជំនាញ ដើម្បីអាចគោរពសន្យាក្នុងការកាត់បន្ថយអាកាសធាតុបាន តើចិននឹងត្រូវធ្វើយ៉ាងណា?
គេត្រូវពិនិត្យមើលយន្តការកន្លងមករបស់ចិនសិន។ ក្រុមហ៊ុនចិនដែលឧស្ម័នកាបូនិន ផ្សែងបំពុលបរិយាកាស គឺត្រូវបង់ពន្ធថែមជូនរដ្ឋ។ គឺត្រូវបង់ប្រាក់ ១តោន ថ្លៃ៥០យ៉ន់។ អ្នកតាមដានស្ថានការណ៍ រិះគន់ថា តម្លៃនេះ នៅថោកណាស់។ ទី២ នាកន្លងទៅ រដ្ឋាភិបាលចិន បានឧបត្ថម្ភធនច្រើន ទៅលើវិស័យផលិតឡានអគ្គិសនី និងផលិតកន្លែងសាកអគ្គិសនី។ ស្រាប់តែឆ្នាំមុន គេរកឃើញថាមានអំពើពុករលួយ ក្នុងការអនុវត្តគម្រោង។ រដ្ឋចិនក៏សម្រេចផ្អាក និងកាត់បន្ថយជំនួយលើផ្នែកនេះបណ្តើរៗ។ ទី៣ ផ្នែកឧស្សាហកម្មដែកថែប ធ្យូងថ្ម និង ស៊ីម៉ង់! នេះរឿងស្លាប់រស់នៅក្នុងវិស័យសេដ្ឋកិច្ចរបស់ខ្លួន ហើយនិងដើម្បីឈានទៅសម្រេចក្តីសុបិនមហិច្ឆតាសាងសងហេដ្ឋារចនាសម្ព័ន្ធ។ រដ្ឋចិនច្បាស់ជាមិនអាចឈប់ ឬផ្អាកសកម្មភាពឧស្សាហកម្មទាំងនេះទេ។
ហេតុនេះ ទើបជាដំណោះស្រាយ អ្នកជំនាញអាកាសធាតុមួយក្រុមនៅសហរដ្ឋអាមេរិក យល់ថា ចិនត្រូវបន្តសកម្មភាពឲ្យខ្លាំងជាងមុន នៅលើផ្នែកដាំដើមឈើ, ជំរុញការប្រើប្រាស់រថយន្តដើរដោយអគ្គីសនី, ត្រូវផលិតថាមពលស្អាត ហើយនិងថាមពលកកើតឡើងវិញ។ ក្នុងន័យនេះ គឺ សំដៅដល់ ការផលិតថាមពលដើរដោយពន្លឺព្រះអាទិត្យ និងខ្យល់។ ពោលគឺផ្ទាំងសូឡា និង កង្ហាល់ផលិតអគ្គិសនីដើរដោយកម្លាំងខ្យល់។ នៅស្រុកចិន វិស័យទាំងពីរនេះ នៅមានតិចនៅឡើយ។ វាមានត្រឹមតែ១៥ភាគរយប៉ុណ្ណោះ នៃតម្រូវការអគ្គសនីបច្ចុប្បន្ន។
លើសពីនេះ អ្នកជំនាញគិតដល់ ថាមពលនុយក្លេអ៊ែរ ពីព្រោះថា ប្រសិនបើចិនចង់កាត់បន្ថយការផលិតឧស្ម័នបញ្ចេញទៅបរិយាកាស ឲ្យបាន៩០ភាគរយ គឺច្បាស់ជាត្រូវរំពឹងលើថាមពលកកើតឡើងវិញ ហើយនិងថាមពលនុយក្លេអ៊ែរ នេះហើយ។ ចំណុចនេះ រដ្ឋាភិបាលចិន បានគិតគូររួចស្រេចដែរ ដ្បិតថា ការវិនិយោគលើថាមពលនុយក្លេអ៊ែរ បានកើនខ្លាំងប៉ុន្មានឆ្នាំចុងក្រោយ។ ចិនរំពឹងថា នៅរវាង១៥ឆ្នាំទៀត គឺសមត្ថភាពផលិតថាមពលនុយក្លែអ៊ែររបស់ចិន គឺស្មើនឹង សមត្ថភាពផលិតថាមពលនាពេលបច្ចុប្បន្ន របស់បារាំងនិងអាមេរិក បូកបញ្ចូលគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ