ប្រឈមនឹងដែលតា ពិភពលោករឹតបន្តឹងវិធានការសាជាថ្មី
ចុះផ្សាយនៅថ្ងៃ៖
ស្តាប់ - ០៧:២៤
ដែលតា កំពុងធ្វើឱ្យពិភពលោកនៅមិនសុខជាថ្មី។ ក្តីសង្ឃឹមថានឹងបានដើរចេញពីវិបត្តិកូវីដឆាប់ៗ កាន់តែឃ្លាតចេញឆ្ងាយ ដោយហេតុតែការរីករាលដាលនៃមេរោគបំប្លែងខ្លួនប្រភេទដែលតា។ ចំនួនអ្នកឆ្លងថ្មីហក់ឡើងខ្លាំង នៅស្ទើរតែគ្រប់ទីកន្លែង មិនថានៅអាស៊ី ដើមបូព៌ា អឺរ៉ុបឬសហរដ្ឋអាមេរិកទេ។ សូម្បីតែអាហ្វ្រិកដែលរួចខ្លួនរហូតមក ក៏កំពុងចាប់ផ្តើមមានសន្ទុះចម្លងខ្លាំង ដូចជានៅសេណេហ្កាល់ ទុយនីស៊ី អាល់ហ្សេរី ... មន្ទីរពេទ្យចាប់ផ្តើមចាល់ណែន ខ្វះអុកស៊ីហ្សែនបណ្តើរៗហើយ។ ប្រទេសជាច្រើននៅទូទាំងពិភពលោក មានអាទិ៍សហរដ្ឋអាមេរិក បានចាប់ផ្តើមចាត់វិធានការរឹតបន្តឹងសាជាថ្មី។
ដោយមានលេចករណីវិជ្ជមានដែលតា ចិនបានបិទខ្ទប់ តំបន់មួយចំនួន ក្នុងខេត្តចំនួន៥និងបេកាំង។ ជប៉ុនសម្រេចបន្តដាក់តូក្យូក្នុងភាពអាសន្នបន្តទៀត រហូតដល់ចុងខែសីហា។ ក្រុងម៉ានីល និងប្រជាជន១៣លាននាក់ត្រូវបិទខ្ទប់ចាប់ពីសប្តាហ៍ក្រោយទៅ។
នៅអូស្ត្រាលី រដ្ឋាភិបាលទាំងបញ្ចេញទាហាន ៣០០នាក់ មកជួយប៉ូលិសក្នុងការគ្រប់គ្រងពលរដ្ឋជាង៦លាននាក់ នៅក្រុងស៊ីននី ឱ្យគោរពការបិទខ្ទប់ក្រុង និងបន្តការបិទខ្ទប់មួយខែទៀត គិតចាប់ពីថ្ងៃពុធទី ២៨កក្កដាទៅ ព្រោះចំនួនអ្នកឆ្លងថ្មីបានកើនឡើងដល់កំពូលនៅថ្ងៃព្រហស្បតិ៍ម្សិលមិញ ៖ ២៣៩ករណី និងស្លាប់សរុប៩២១នាក់ហើយ។
អាមេរិក ត្រលប់មកពាក់ម៉ាស់វិញ
ចំណែកនៅ សហរដ្ឋអាមេរិក ដែលជាប់ឈ្មោះជាប្រទេសចាក់ថ្នាំបង្ការបានច្រើន ហើយលឿនជាងគេ និងមានស្ថានភាពប្រសើរឡើងតាំងពីមុនគេវិញ កាលពីដើមខែកក្កដា ក្នុងថ្ងៃបុណ្យជាតិ លោកប្រធានាធិបតី ចូបៃដិន បានថែមទាំងសន្យា នៅចំពោះមុខប្រជាពលរដ្ឋ ថារដូវក្តៅឆ្នាំ២០២១ ជារដូវសេរីភាព។ ប៉ុន្តែមិនបានមួយខែផង ពោលគឺនៅថ្ងៃព្រហស្បតិ៍ទី២៩កក្កដាម្សិលមិញ លោកប្រធានាធិបតី បានចេញមកប្រកាសចាត់វិធានការរឹតបន្តឹង ដើម្បីទប់ស្កាត់ការរីករាលដាលនៃមេរោគកូវីដបំប្លែងខ្លួនប្រភេទដែលតា ដោយតម្រូវឱ្យ ពលរដ្ឋអាមេរិកទាំងអស់ ទោះបីជាបានចាក់វ៉ាក់សាំងហើយពេញលេញក៏ដោយ ត្រូវតែពាក់ម៉ាស់វិញ ជាពិសេសនៅក្នុងតំបន់ដែលមានការឆ្លងខ្លាំង។ ការវិលត្រលប់នៃម៉ាស់ជាវិធានការទីមួយ។
ទីពីរ អ្នករដ្ឋការ បុគ្គលិករដ្ឋទាំងអស់ (ជាងបួនលាននាក់) ត្រូវតែចាក់ថ្នាំបង្ការ។ អ្នកមិនព្រមចាក់ ត្រូវតេស្តកូវីដជាញឹកញយ យ៉ាងហោច ម្តងទៅពីរដងក្នុងមួយសប្តាហ៍ និងត្រូវពាក់ម៉ាស់ជាប់រហូតនៅកន្លែងធ្វើការ ហើយត្រូវកំរិតការធ្វើបម្លាស់ទីទៀត។ លោក បៃដិន ក៏តម្រូវឱ្យទាហាននិងបុគ្គលិកយោធាទាំងអស់ ត្រូវតែចាក់វ៉ាក់សាំងដែរ។ មិនដល់ថ្នាក់ប្រកាសដាក់ថ្នាំបង្ការកូវីដជាវ៉ាក់សាំងចាំបាច់ត្រូវតែចាក់ លោកប្រធានាធិបតីអាមេរិកបានសង្កត់ធ្ងន់ អំពី សេរីភាពនិងទំនួលខុសត្រូវរបស់ប្រជាពលរដ្ឋក្នុងការទប់ស្កាត់ការចម្លងមេរោគ។
ជាងនេះទៅទៀត ដើម្បីពន្លឿនយុទ្ធនាការចាក់ថ្នាំបង្ការឡើងវិញ លោកប្រធានាធិបតីបៃដិន បានអំពាវនាវឱ្យអាជ្ញាធរមូលដ្ឋាន ផ្តល់ប្រាក់រង្វាន់១០០ដុល្លារ ដល់គ្រប់អ្នកដែលបានទៅចាក់វ៉ាក់សាំង។
អ៊ីស្រាអែលចាក់ដូសទីបី លើមនុស្សវ័យលើស៦០ឆ្នាំ
ដោយសារមានយុទ្ធសាស្ត្រសម្រុកចាក់ថ្នាំបង្ការមុនគេ ហើយលឿនខ្លាំង អ៊ីស្រាអែលចាក់ជូនប្រជាពលរដ្ឋច្រើនជាងគេបំផុត ដល់ទៅជាង៥៥% និងបានដើរចេញពីវិបត្តិកូវីដ១៩ មុនគេ ប៉ុន្តែពេលនេះអ៊ីស្រាអែលក៏ដូចជាបណ្តាប្រទេសដទៃផ្សេងទៀត កំពុងរងការគំរាមកំហែងនៃមេរោគកូវីដបំប្លែងប្រភេទដែលតា។ ករណីឆ្លងថ្មីបានកើនឡើងជាថ្មីវិញ ជាង១៤០០នាក់ ក្នុងមួយថ្ងៃព្រហស្បតិ៍ម្សិលមិញ។ ជាចំនួនដ៏ច្រើនខ្លាំងមិនធ្លាប់មានទេ បើប្រៀបទៅនឹងខែមិថុនាដែលមានអ្នកឆ្លងមិនដល់១០០នាក់ផងក្នុងមួយថ្ងៃ។
ប្រឈមនឹងការសន្ទុះករណីវិជ្ជមាននេះ នាយករដ្ឋមន្ត្រីអ៊ីស្រាអែល ប្រកាសចាត់វិធានការរឹតបន្តឹងសាជាថ្មី និងផ្តល់សន្ទុះដល់យុទ្ធនាការចាក់ថ្នាំបង្ការ ដោយ តម្រូវឱ្យពលរដ្ឋបង្ហាញបណ្ណសុខភាព បញ្ជាក់ថាបានចាក់ថ្នាំបង្ការពីរដូសរួចហើយ ឬមានលទ្ធផលតេស្តកូវីដដោយប្រើម៉ាស៊ីនPCR អវិជ្ជមាន ក្រោម៧២ម៉ោង ទើបអាចចូលក្នុងទីកន្លែងមានមនុស្សច្រើនលើសពី១០០នាក់ មិនថានៅទីបិទជិតឬទីវាលខាងក្រៅទេ។ ចំណែកមនុស្សចាស់ចាប់ពីអាយុ៦០ឆ្នាំឡើងទៅ ដែលបានចាក់ដូសទីពីររួចរាល់ហើយកាលពីជាង៥ខែមុន ត្រូវទៅចាក់វ៉ាក់សាំងម្ជុលទីបី ដើម្បីការពារជីវិតពីមេរោគដែលតា។
បើតាមក្រុមហ៊ុនផលិតវ៉ាក់សាំង Pfizer ម្ជុលទីបីអាច មានប្រសិទ្ធភាពអាចកម្ចាត់មេរោគបំប្លែងដែលតា បាន៥ដងខ្លាំងជាងពីរម្ជុលចំពោះក្មេង និងដល់ទៅ ជាង១១ដងសម្រាប់មនុស្សចាស់។ ម្យ៉ាងវិញទៀត មេរោគកូវីដ ក៏ដូចជាមេរោគផ្តាសាយធំ ត្រូវតែចាក់រំលឹកជារឿយៗ។
បារាំងបិទខ្ទប់ដែនដីឯនាយសមុទ្ទ
នៅអឺរ៉ុប និងជាក់ស្តែងនៅបារាំង ករណីវិជ្ជមានមានកំណើនខ្លាំងណាស់ ! មានករណីវិជ្ជមានថ្មី ជាង២ម៉ឺននាក់ ក្នុងមួយថ្ងៃៗ តាំងពីប៉ុន្មានថ្ងៃមកហើយ នៅប្រទេសបារាំង ជាពិសេសនៅតំបន់ដែលមានទេសចរទៅកំសាន្តច្រើនដូចជាតំបន់មាត់សមុទ្ទ និងតំបន់ភ្នំ ដែលទេសចរមានកាតព្វកិច្ចត្រូវពាក់ម៉ាស់វិញ។
មន្ទីរពេទ្យចាប់ផ្តើមបំពេញដោយអ្នកជំងឺកូវីដជាបណ្តើរៗ តែដោយសារយុទ្ធនាការចាក់ថ្នាំបង្ការមានល្បឿនខ្លាំង បានជាង៥០%បន្តិច ករណីឈឺធ្ងន់ធ្ងរមិនសូវកើនលឿនខ្លាំង នៅក្នុងផ្ទៃនៃប្រទេស ប៉ុន្តែនៅដែនដីបារាំងឯនាយសមុទ្ទ ទីដែលប្រជាពលរដ្ឋព្រងើយកន្តើយមិនព្រមចាក់ថ្នាំបង្ការ និងមានអត្រាអ្នកចាក់វ៉ាក់សាំងទាបខ្លាំង មិនដល់២០%ផងនោះ ករណីឆ្លងថ្មីបានស្ទុះឡើងខ្លាំងរហូតជំរុញឱ្យអាជ្ញាធរ ចេញវិធានការបិទខ្ទប់តំបន់កោះ La Réunion La Matinique យ៉ាងហោចពីរសប្តាហ៍ ព្រមទាំងបានបញ្ចេញកងកម្លាំងយោធា ផ្នែកវេជ្ជសាស្ត្រមកជួយមន្ទីរពេទ្យស៊ីវិលផង។ ចំនួនអ្នកឈឺធ្ងន់កើនឡើងខ្លាំងរហូតត្រូវដឹកជញ្ជូនមកព្យាបាលនៅរដ្ឋធានីប៉ារីស ចម្ងាយ៧-៨ម៉ោងយន្តហោះផង។
អ្នកជំនាញ និយាយគ្រប់មាត់អំពីលទ្ធភាពនៃរលកចម្លងទីបួននៅក្នុងប្រទេស និងជំរុញកាន់តែខ្លាំងឡើងៗ មិនឱ្យបង្អង់ល្បឿននៃការចាក់ថ្នាំបង្ការទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ