ចិនចេញមុខបរិហារចាស់ដៃលើការចោទប្រកាន់របស់អាមេរិក និងក្រុមសម្ព័ន្ធមិត្ត
ចុះផ្សាយនៅថ្ងៃ៖
ស្តាប់ - ០៧:១៦
នៅថ្ងៃអង្គារ ទី២០ កក្កដា ចិនបានបញ្ចេញប្រតិកម្មខ្លាំងៗតបនឹងការចោទប្រកាន់របស់អាមេរិក និងក្រុមសម្ព័ន្ធមិត្តនាថ្ងៃចន្ទ ទី១៩ កក្កដាដែលថា ចិននៅពីក្រោយការវាយប្រហារតាមអ៊ីនធ័រនែត និងបានការពារក្រុមចោរព័ត៌មានវិទ្យាចិនដែលបានវាយប្រហារទៅលើស្ថាប័ន ក្រុមហ៊ុនរដ្ឋ និងក្រុមហ៊ុនឯកជននៅក្នុងលោក។ ប្រតិកម្មរបស់ចិននេះបានធ្វើឡើងតាមរយៈអ្នកនាំពាក្យក្រសួងការបរទេសលោកហ្សាវ លីជាំងនៅក្នុងសន្និសីទកាសែតមួយ។ តាមលោកលីជាំង ការចោទរបស់អាមេរិក និងក្រុមសម្ព័ន្ធមិត្តជារឿងមូលបង្កាច់ដោយគ្មានភស្តុតាង និងជារឿងប្រឌិតទាំងស្រុង។ ទន្ទឹមគ្នានេះ លោកលីជាំងបានចោទអាមេរិកវិញថា ជាជើងឯកនៃការវាយប្រហារតាមអ៊ីនធ័រនែត។
រឿងអាមេរិកចោទចិនពីការវាយប្រហារអ៊ីធ័រនែតទៅលើសា្ថប័នអាមេរិក លើក្រុមហ៊ុនរដ្ឋ ឬក្រុមហ៊ុនឯកជននៅអាមេរិកមិនមែនជារឿងថ្មីទេ។ មួយវិញទៀត រឿងនេះគ្រាន់ជារឿងមួយក្នុងចំណោមរឿងវិវាទផ្សេងទៀតដែលក្រុងវ៉ាស៊ីនតោន និងក្រុងប៉េកាំងមានជាមួយគ្នា ដូចជាទាក់ទងនឹងរឿងពាណិជ្ជកម្ម រឿងក្រុមហ៊ុនទូរគមនាគមន៍ចិន Huawei រឿងជនជាតិភាគតិចអ៊ុយហ្គួរនៅតំបន់ស៊ីនជាំង រឿងតៃវ៉ាន់ ឬមួយក៏បញ្ហានៅហុងកុងជាដើម។ តែបើគេនិយាយតែរឿងការវាយប្រហារតាមអ៊ីធ័រនែតមួយ អាមេរិកគិតថាខ្លួនមិនមែនជាអ្នករងគ្រោះតែម្នាក់ឯងទេ គឺមានប្រទេសជាច្រើនផ្សេងទៀត ពិសេសក្រុមប្រទេសសម្ព័ន្ធមិត្តរបស់ខ្លួន។
អ៊ីចឹងហើយបានជាលើកនេះ អាមេរិកបានមូលមតិជាមួយក្រុមប្រទេសសម្ព័ន្ធមិត្តដើម្បីថ្កោលទោសចិនដោយចោទចិនពីបទនៅពីក្រោយ ជួយទំនុកបម្រុង និងបានការពារក្រុមចោរព័ត៌មានវិទ្យាជាជនជាតិចិននៅលើទឹកដីចិន។ សម្រាប់ក្រុងវ៉ាស៊ីនតោន ការមូលមតិគ្នានេះធ្វើឲ្យការចោទប្រកាន់មានទម្ងន់កាន់តែខ្លាំងដើម្បីដាក់គំនាបលើចិន។ ក្រុមសម្ព័ន្ធមិត្តដែលបានមូលមតិជាមួយអាមេរិកមានសហភាពអឺរ៉ុប អង់គ្លេស នូវែលសេឡង់ ជប៉ុន អូស្រា្តលី កាណាដា តួកគី ហូឡង់ ឬមួយក៏អង្គការណាតូ។ តែអ្វីជាការកត់សម្គាល់ ការវាយប្រហារ និងការថ្កោលទោសចិនមិនត្រូវបានអាមេរិក និងក្រុមសម្ព័ន្ធមិត្តធ្វើឡើងនៅក្នុងសេចក្តីប្រកាសព័ត៌មានរួមទេ មានន័យថា ម្នាក់ៗចេញសេចក្តីថ្លែងការណ៍រៀងៗខ្លួន។
នៅក្នុងសេចក្តីថ្លែងការណ៍នោះ មានប្រទេសខ្លះ ដូចយ៉ាងអាមេរិកបានវាយប្រហារចិនចាស់ដៃដោយមិនសំចៃមាត់ និងប្រទេសខ្លះទៀតមានការប្រយ័ត្នប្រយែងដោយបានថ្លឹងថ្លែងពាក្យពេចន៍របស់ខ្លួន។ កំណត់សម្គាល់មួយទៀត សេចក្តីថ្លែងការណ៍មិនបានប្រកាសពីការដាក់ទណ្ឌកម្មប្រឆាំងចិនទេ។ តែទោះជាយ៉ាងណាក៏ដោយ នេះជាការមូលមតិរួមរបស់អាមេរិក និងក្រុមសម្ព័ន្ធមិត្តថ្កោលទោសលើសកម្មភាពឌីជីថលរបស់ចិន។
រដ្ឋាភិបាលចិនគាំទ្រ និងជួយទំនុកបម្រុងដល់ក្រុមចោរព័ត៌មានវិទ្យាចិន
បើនិយាយជាលក្ខណៈទូទៅ ការចង្អុលមុខ និងការចោទគ្នាទៅវិញ ទៅមកក្នុងរឿងវាយប្រហារតាមអ៊ីនធ័រនែតនេះមិនដែលមានភាគីណាមួយភស្តុតាងច្បាស់លាស់ទេ។ មួយវិញទៀត ប្រទេសដែលរងការចោទប្រកាន់ពីបទបានវាយប្រហារតាមអ៊ីនធ័រនែតមានតែប៉ុន្មានប្រទេសប៉ុណ្ណោះ ដូចជាចិន រុស្ស៊ី កូរ៉េខាងជើង ឬមួយអ៊ីរ៉ង់។ ប៉ុន្មានប្រទេសនេះតែងស្ថិតក្នុងផ្ទាំងស៊ីបរបស់អាមេរិកនៅពេលដែលមានស្ថាប័ន ក្រុមហ៊ុនរដ្ឋ ក្រុមហ៊ុនឯកជននៅអាមេរិក ឬនៅក្នុងលោកបានរងការវាយប្រហារតាមអ៊ីនធ័រនែត។ តែបញ្ហានៅត្រង់ថា ក្រុងវ៉ាស៊ីនតោនមិនសូវ ឬមិនដែលបានលើកយកភស្តុតាងទៅបង្ហាញឲ្យបានច្បាស់លាស់ទេ។
សម្រាប់ក្រុងវ៉ាស៊ីនតោន ក្រុងប៉េកាំងបានរួមសហការជាមួយក្រុមចោរព័ត៌មានវិទ្យាចិនដើម្បីវាយប្រហារតាមអ៊ីធ័រនែតនៅលើលោកដោយលួចព័ត៌មានសម្ងាត់ លួចទិន្នន័យ និងលួចបច្ចេកវិទ្យាពីឧស្សាហកម្ម ក្រុមហ៊ុន និងស្ថាប័នរដ្ឋ។ ក្រសួងយុត្តិធម៌អាមេរិកបានលើកឡើងពីការចោទប្រកាន់លើក្រុមចោរព័ត៌មានវិទ្យាចិនចំនួន ៤នាក់ ក្នុងនោះមាន ៣នាក់ជាភ្នាក់ងារនៃក្រសួងសន្តិសុខចិនពីបទបានវាយប្រហារតាមអ៊ីនធ័រនែតលើប្រព័ន្ធឧស្សាហកម្ម សាកលវិទ្យាល័យ និងរដ្ឋបាលអាមេរិកក្នុងចន្លោះឆ្នាំ ២០១១ និង ២០១៨ ដើម្បីលួចយកទិន្នន័យ ឬបច្ចេកវិទ្យា។
ចំណែកអ្នកទទួលខុសត្រូវជាន់ខ្ពស់អាមេរិកម្នាក់សុំមិនបញ្ចេញឈ្មោះថែមទាំងថ្លែងចោទក្រុមចោរព័ត៌មានវិទ្យាចិនថា ក្រៅពីលួចយកទិន្នន័យសម្ងាត់ឧស្សហកម្ម ពួកគេអាចធ្វើសកម្មភាពដើម្បីប្រយោជន៍ផ្ទាល់ខ្លួនដែរ។ ប្រយោជន៍ផ្ទាល់ខ្លួនដែលអ្នកទទួលខុសត្រូវជាន់ខ្ពស់អាមេរិករូបនេះចង់និយាយ គឺការលួចយកទិន្នន័យ ឬព័ត៌មានសម្ងាត់ទុក រួចជំរិតទារលុយ មុននឹងប្រគល់ទិន្នន័យ ឬព័ត៌មានសម្ងាត់នោះត្រឡប់វិញ។
ទង្វើរបស់អាមេរិក និងក្រុមសម្ព័ន្ធមិត្តជារឿងប្រឌិត និងបង្កប់ហេតុផលនយោបាយ
ចិនមិនបានឈរឱបដៃឈរមើលនឹងការចោទប្រកាន់របស់អាមេរិក និងក្រុមប្រទេសសម្ព័ន្ធមិត្តរបស់អាមេរិកទេ។ រូបភាពដែលគេបានឃើញ គឺដល់វេនចិនម្នាក់ឯងចាត់ការទល់នឹងប្រទេសមួយក្រុមវិញ។ ស្ថានទូតចិនប្រចាំនៅក្នុងប្រទេសដែលបានរួមគំនិតជាមួយអាមេរិកបានចេញសេចក្តីថ្លែងការណ៍វាយបកវិញម្តងមួយៗ។ នៅព្រលឹមស្រាងៗព្រឹកថ្ងៃអង្គារ ទី២០ កក្កដា ស្ថានទូតចិនប្រចាំក្រុងកង់បេរ៉ា ប្រទេសអូស្រា្តលីបានវាយប្រហារខ្លាំងៗថា អូស្រ្តាលីនិយាយតាមអាមេរិកដូចសត្វសេក និងវាយបកដាក់អាមេរិកដោយបញ្ជាក់ថា គឺអាមេរិក និងក្រុមសម្ព័ន្ធមិត្តដែលជាជើងឯងខាងការវាយប្រហារតាមអ៊ីនធ័រនែតលើលោក។ តាមស្ថានទូតចិននៅអូស្រា្តលីដដែល អាមេរិកបានលួចស្តាប់កិច្ចសន្ទនារបស់ថ្នាក់ដឹកនាំលើលោក ក្នុងនោះមានទាំងថ្នាក់ដឹកនាំរបស់សម្ព័ន្ធមិត្តខ្លួនឯងផង។
ពីប្រទេសនូវែលសេឡង់ ស្ថានទូតចិនបានច្រើនចោលលើការចោទប្រកាន់របស់អាមេរិក និងក្រុមសម្ព័ន្ធនមិត្ត និងថា ការចោទប្រកាន់នេះគ្មានមូលដ្ឋាន និងគ្មានការទទួលខុសត្រូវ។ តែប្រតិកម្មចាស់ដៃជាងនេះមានពីក្រុងប៉េកាំងតាមរយៈអ្នកនាំពាក្យក្រសួងការបរទេសលោកហ្សាវ លីជាំងនៅក្នុងសន្និសីទកាសែតមួយ។ ទន្ទឹមនឹងបរិហារលើការចោទប្រកាន់របស់អាមេរិក និងក្រុមសម្ព័ន្ធមិត្ត លោកលីជាំងបានចាត់ទុកទង្វើរបៀបនេះជាទង្វើប្រឌិតសុទ្ធសាធ និងមានបង្កប់ដោយហេតុផលនយោបាយ។ « ការដែលអ្នកទម្លាក់កំហុសដាក់អ្នកដទៃមិនអាចបិទបាំង និងលាងកំហុសរបស់អ្នកបានទេ » នេះជាសារដែលអ្នកនាំពាក្យក្រសួងការបរទេសចិនផ្ញើត្រង់ទៅអាមេរិក។
បើតាមមើលទៅ សង្រ្គាមពាក្យសម្តី និងភាពតានតឹងរវាងអាមេរិក និងចិនដែលគេសង្ឃឹមស្ងប់ស្ងាត់នៅក្នុងរដ្ឋបាលអាមេរិករបស់លោកចូ បៃដិនអាចនឹងឡើងខ្លាំងជាងសម័យលោកដូណាល់ ត្រាំទៀតផងក៏មិនដឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ