ហេតុអ្វីបានជាក្រុមហ៊ុនអ៊ីនធ័រនែតធំៗកំពុងបារម្ភពីច្បាប់ស្តីពីការ ការពារជីវិតឯកជនរបស់រដ្ឋអំណាចហុងកុង?
ចុះផ្សាយនៅថ្ងៃ៖
ស្តាប់ - ០៥:៥៨
នៅហុងកុង រដ្ឋអំណាចបានបង្ហាញចេញនូវសេចក្តីព្រាងច្បាប់មួយស្តីពីការ ការពារជីវិតឯកជន។ ក្រុមហ៊ុនអ៊ីនធ័រនែតគ្រាក់ៗ ដូចជា Google Facebook និង Twitter បានសម្តែងក្តីបារម្ភជាពន់ពេកដោយពួកគេយល់ថា ខ្លួនជាផ្ទាំងស៊ីបរបស់ច្បាប់មួយនេះ។ តែថ្លែងប្រាប់ក្រុមអ្នកកាសែតក្នុងថ្ងៃអង្គារ ទី៦ កក្កដា ប្រមុខដឹកនាំហុងកុងលោកស្រីការី ឡាំបានព្យាយាមរំងាប់ក្តីបារម្ភរបស់ក្រុមហ៊ុនទាំងនោះ។ យ៉ាងណាក៏ដោយ ក្រុមហ៊ុនទាំងនោះបានព្រមានរួចហើយថា ពួកគេអាចចាកចេញពីហុងកុង បើច្បាប់នោះចូលជាធរមាន។
សេចក្តីព្រាងច្បាប់ស្តីពីការ ការពារជីវិតឯកជនដែលរដ្ឋអំណាចហុងកុងបានបង្ហាញ គឺមានគោលដៅប្រឆាំងនឹងការទម្លាយទិន្នន័យផ្ទាល់ខ្លួននៅតាមអ៊ីនធ័រនែត។ តែក្រុមហ៊ុនអ៊ីនធ័រនែតធំៗ ដូចជា Google Facebook និង Twitter បានយល់ឃើញថា ខ្លឹមសារដែលមានចែងនៅក្នុងសេចក្តីព្រាងច្បាប់មួយនេះមានលក្ខណៈទូលំទូលាយ និងបង្កប់ដោយភាពស្រពិចស្រពិល។ ក្រុមហ៊ុនអ៊ីនធ័រនែតគ្រាក់ៗទាំងនេះហាក់មានអារម្មណ៍ថា ពួកគេកំពុងក្លាយជាផ្ទាំងស៊ីបរបស់ច្បាប់មួយនេះ។ ពួកគេបានចោទសួរដោយបារម្ភថា តើក្រុមហ៊ុនរបស់ពួកគេ ឬមួយក៏ក្រុមបុគ្គលិករបស់ពួកគេឬជាអ្នកទទួលខុសត្រូវស្របច្បាប់លើខ្លឹមសារដែលអ្នកប្រើអ៊ីនធ័រនែតបានចុះផ្សាយ?។
កាលពីថ្ងៃទី២៥ មិថុនា អង្គការ Asia Internet Coalition ដែលប្រមូលផ្តុំដោយ Google Facebook Twitter LinkedIn និង Appel បានផ្ញើលិខិតមួយច្បាប់ទៅឲ្យរដ្ឋអំណាចហុងកុងដើម្បីសម្តែងក្តីបារម្ភរបស់ពួកគេចំពោះសេចក្តីព្រាងច្បាប់មួយនេះ។ អ្វីដែលគួរបញ្ជាក់ ការដែលរដ្ឋអំណាចហុងកុងបានរៀបចំឲ្យមានច្បាប់ស្តីពី ការ ការពារជីវិតឯកជននេះឡើងមិនមែនជារឿងចៃដន្យទេ។ មិនចៃដន្យ ព្រោះនៅក្នុងបាតុកម្មរបស់ក្រុមអ្នកគាំទ្រប្រជាធិបតេយ្យហុងកុងឆ្នាំ ២០១៩ ក្រុមបាតុករជាច្រើនបានប្រើវិធីសាស្រ្តទម្លាយទិន្នន័យជាអាវុធដើម្បីផ្សព្វផ្សាយទិន្នន័យផ្ទាល់ខ្លួនរបស់ប៉ូលិស ចៅក្រម និងអ្នកទទួលខុសត្រូវហុងកុងនៅលើអ៊ីនធ័រនែត។
ដូច្នេះសម្រាប់រដ្ឋអំណាចហុងកុង មានតែការប្រើច្បាប់ស្តីពីការ ការពារជីវិតឯកជនទេទើបគេអាចប្រឆាំងនឹងការទម្លាយទិន្នន័យផ្ទាល់ខ្លួនបាន៕
ប្រមុខដឹកនាំហុងកុងចេញមុខរំងាប់ក្តីបារម្ភរបស់ក្រុមហ៊ុនអ៊ីនធ័រនែតធំៗ
ឆ្លើយនឹងសំណួររបស់អ្នកកាសែត ប្រមុខដឹកនាំហុងកុងលោកស្រីការី ឡាំបានបញ្ជាក់ដោយមិននិយាយចំឈ្មោះក្រុមហ៊ុនអ៊ីនធ័រនែតណាមួយថា សេចក្តីព្រាងច្បាប់ស្តីពីការ ការពារជីវិតឯកជនមានគោលដៅវាយប្រហារលើការទម្លាយទិន្នន័យផ្ទាល់ខ្លួនដោយខុសច្បាប់ និងថា រដ្ឋអំណាចបានផ្តល់សិទ្ធិអំណាចឲ្យប៉ូលិសជាអ្នកតាមឃ្លាំមើលពីការគោរពត្រឹមត្រូវនូវជីវិតឯកជន ស៊ើបអង្កេត និងចាត់វិធានការចំពោះទង្វើខុសច្បាប់។ បន្ទាប់មក លោកស្រីការី ឡាំមិនញញើតនឹងប្រដូចសេចក្តីព្រាងច្បាប់ស្តីពីការ ការពារជីវិតឯកជនពេលនេះទៅនឹងច្បាប់ស្តីពីសន្តិសុខជាតិដែលដាក់ដោយរដ្ឋាភិបាលក្រុងប៉េកាំងដោយលោកស្រីយល់ថា ច្បាប់ស្តីពីសន្តិសុខជាតិក៏ទទួលបានការនិយាយបង្ខូច មួលបង្កាច់ខុសពីការពិតដូចគ្នាដែរ។
ទោះជាយ៉ាងនេះក្តី លោកស្រីការី ឡាំបានបន្ថែមថា គណៈកម្មការឃ្លាំមើលលើការគោរពជីវិតឯកជនបានត្រៀមខ្លួនរួចជាស្រេចដើម្បីជួបតំណាងក្រុមហ៊ុនអ៊ីនធ័រនែតដែលកំពុងបារម្ភពីសេចក្តីព្រាងច្បាប់ស្តីពីការ ការពារជីវិតឯកជនរបស់ហុងកុងពេលនេះ។ លោកស្រីការី ឡាំយល់ថា វាជារឿងល្អបើគេអាចដោះស្រាយក្តីបារម្ភ និងជម្រះភាពមន្ទិលសង្ស័យនៅពេលកំពុងរៀបចំច្បាប់នេះ។ តែលោកស្រីមិនភ្លេចបញ្ជាក់ដោយព្រមានថា រដ្ឋាភិបាលរបស់លោកស្រីបានប្តេជ្ញានឹងអនុម័តច្បាប់មួយនេះឲ្យខានតែបាននាពេលឆាប់ៗ។ ដូច្នេះបើតាមមើលទៅ ចម្លើយដូចនេះរបស់លោកស្រីការី ឡាំប្រហែលមិនបានរំងាប់ក្តីបារម្ភរបស់ក្រុមហ៊ុនអ៊ីនធ័រនែតគ្រាក់ៗដែលកំពុងមានវត្តមាននៅហុងកុងទេ។
ជម្រើសចុងក្រោយ គឺចាកចេញពីទឹកដីហុងកុង
បើចម្លើយរបស់លោកស្រីការី ឡាំនៅមិនទាន់អាចរំងាប់ក្តីបារម្ភរបស់ក្រុមហ៊ុនអ៊ីនធ័រនែតគ្រាក់ៗទាំងនោះបាន ជម្រើសចុងក្រោយគឺការចាកចេញពីហុងកុងដោយទៅបោះទុនរកស៊ីនៅកន្លែងផ្សេង។ ក្រុមហ៊ុនអ៊ីនធ័រនែតធំៗបានព្រមានរួចហើយថា បើច្បាប់ដ៏ចម្រូងចម្រាសនេះចូលជាធរមាន ពួកគេអាចនឹងចាកចេញពីហុងកុង។ លិខិតរបស់អង្គការ Asia Internet Coalition ដែលប្រមូលផ្តុំដោយ Google Facebook Twitter LinkedIn និង Appel ផ្ញើទៅឲ្យរដ្ឋអំណាចហុងកុងកាលពីថ្ងៃទី២៥ មិថុនាបានបញ្ជាក់ច្បាស់ៗថា ជម្រើសតែមួយគត់របស់ក្រុមហ៊ុនបច្ចេកវិទ្យាដើម្បីបញ្ជៀសពីការដាក់ទណ្ឌកម្មនៅហុងកុង គឺបញ្ឈប់ការវិនិយោគ និងការផ្តល់សេវានៅហុងកុង។
មែនទែនទៅ គេអាចយល់ពីក្តីបារម្ភ និងការព្រមានរបស់ក្រុមហ៊ុនអ៊ីនធ័រនែតគ្រាក់ៗនៅហុងកុងពេលនេះ ព្រោះចូរកុំភ្លេចថា ពួកគេធ្លាប់បានទទួលគំនាបម្តងហើយជាមួយនឹងច្បាប់ស្តីពីសន្តិសុខជាតិដែលចិនដីគោកបានដាក់លើហុងកុង។ ខណៈនេះ ក្រុមហ៊ុនបច្ចេកវិទ្យាបរទេសធំៗ ដែលបោះទុនរកស៊ីនៅហុងកុងមានការប្រយ័ត្នប្រយែងកាន់តែខ្លាំងនៅចំពោះការក្រសោបក្តាប់ហុងកុងបន្តិចម្តងៗពីសំណាក់រដ្ឋអំណាចនៅក្រុងប៉េកាំង។ ជាក់ស្តែងកន្លងមកគម្រោងពង្រាយខ្សែកាបបញ្ចូនទិន្នន័យតាមបាតសមុទ្ររវាងអាមេរិក និងហុងកុងត្រូវបានលុបចោលវិញ ហើយមានក្រុមហ៊ុនបរទេសគ្រាក់ៗខ្លះបានចាប់ផ្តើមដកម៉ាស៊ីនផ្ទុកទិន្នន័យចេញពីហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ