តើ ឥណ្ឌាមានមនុស្សឆ្លងជំងឺកូវីដដ៏ច្រើនសន្ធឹកសន្ធាប់ ដោយសារកំហុសអ្នកណា?
ចុះផ្សាយនៅថ្ងៃ៖
ស្តាប់ - ០៨:៣៧
ជំនួយបន្ទាន់របស់អាមេរិកបានទៅដល់ទីក្រុងញូវដេលី ប្រទេសឥណ្ឌា នៅថ្ងៃសុក្រទី ៣០មេសា ក្នុងកាលៈទេសៈ ដែលស្ថានភាពឆ្លងកូវីដ នៅក្នុងប្រទេសនេះ កាន់តែធ្លាក់ចុះអាក្រក់។ នៅព្រឹកថ្ងៃសុក្រនេះ ឥណ្ឌាបានប្រកាសមានអ្នកឆ្លងថ្មី ចំនួន ៣សែន ៨ម៉ឺន ៥ពាន់នាក់ និងមនុស្សស្លាប់ ជិត ៣៥០០នាក់ ក្នុងរយៈពេលតែមួយថ្ងៃម្សិលមិញ។ អ្វីដែលពិភពលោកកំពុងព្រួយបារម្ភផងដែរ គឺ មេរោគបំប្លែងខ្លួន កូវីដ មកពីឥណ្ឌា កំពុងចាប់សាយភាយផងដែរ ទៅបរទេស។ ករណីមេរោគបំប្លែងខ្លួនឥណ្ឌាដែលកើតចេញមកពីមេរោគ បំប្លែងខ្លួនទ្វេរដង ត្រូវបានគេរកឃើញ នៅក្នុងប្រទេសចំនួន ១៩ ហើយចុងក្រោយ គឺនៅប្រទេសវៀតណាម និងនៅប្រទេសបារាំង កាលពីថ្ងៃព្រហស្បតិ៍ម្សិលមិញ។
នៅព្រឹកថ្ងៃសុក្រនេះ រដ្ឋាភិបាលឥណ្ឌាបានប្រកាសថា ករណីឆ្លងថ្មី មានចំនួន ៣៨៥ ០០០នាក់ និងមានអ្នកស្លាប់ ជិត ៣៥០០នាក់ ក្នុងរយៈពេលតែមួយថ្ងៃព្រហស្បតិ៍ម្សិលមិញ។ គិតមកដល់ថ្ងៃនេះ ឥណ្ឌា មានមនុស្សស្លាប់ដោយសារជំងឺកូវីដជាង ២សែននាក់ និងមនុស្សឆ្លងជំងឺកូវីដ ជាង ១៨,៥លាននាក់ ដែលនៅក្នុងនោះ មាន៦លាននាក់ បានឆ្លងតែក្នុងមួយខែមេសានេះ។
ស្ថានភាពឆ្លងរាតត្បាតជំងឺកូវីដ កាន់តែធ្ងន់ធ្ងរ សព្វថ្ងៃនេះ ដោយសារ តែការគ្រប់គ្រងមិនបានល្អ ការមើលស្រាល របស់រដ្ឋាភិបាល ឥណ្ឌា ទៅលើជំងឺកូវីដនេះឯង។
នៅដើមខែ កុម្ភៈ លោកនាយករដ្ឋមន្រ្តីឥណ្ឌា លោកណារិនដ្រា ម៉ូឌីបានប្រកាសក្តែងៗថា ជាមួយករណីឆ្លងថ្មី ធ្លាក់មកនៅត្រឹម ៩ពាន់នាក់ ក្នុងមួយថ្ងៃ ឥណ្ឌាបានយកឈ្នះ ជំងឺរាតត្បាតកូវីដ។ នៅចំពោះមុខ មហាជនឥណ្ឌា លោកណារិនដ្រា ម៉ូឌី ដែលបានធ្វើនយោបាយប្រជាភិថុត នៅបានលើកតម្កើងខ្លួនទៀតថា លោក ជាអ្នកស្រោចស្រង់ប្រទេសឥណ្ឌា។ ឥណ្ឌារបស់លោកម៉ូឌី ដែលជាកន្លែងផលិតវ៉ាក់សាំងធំជាងគេបំផុត ក្នុងលោក បាន តាំងខ្លួនជាប្រទេសគំរូ នាំចេញវ៉ាក់សាំង សម្រាប់ជួយប្រទេសដទៃ។
ដោយសារតែ គិតថា ស្ថានភាពជំងឺកូវីដ បានល្អប្រសើរ ហើយសង្ឃឹមលើយុទ្ធនាការចាក់វ៉ាក់សាំង ដើម្បី បង្កើត ប្រព័ន្ធការពារក្នុងចំណោមប្រជាជន រដ្ឋាភិបាលឥណ្ឌារបស់លោកណារិនដ្រា ម៉ូឌី ចាប់ផ្តើមបន្ធូរខ្សែរ លែងរឹតបន្តឹង បិទខ្ទប់ប្រទេស ដូច ក្នុងជំនាន់រលកទី១ នៅឆ្នាំ ២០២០។
ដោយគិតថា ឥណ្ឌា រួចចាកផុតពីជំងឺឆ្លងរាតត្បាត កូវីដ រដ្ឋាភិបាលបានអនុញ្ញាត បើកភ្លើងខៀវ ឲ្យមានពិធីបុណ្យសាសនា ហិណ្ឌូ និងយុទ្ធនាការឃោសនាបោះឆ្នោត ដូចធម្មតា។ នៅថ្ងៃព្រហស្បតិ៍ ម្សិលមិញ អាជ្ញាធរឥណ្ឌានៅរដ្ឋBengal Occidental នៅភាគឦសានឥណ្ឌាបានរៀបចំការបោះឆ្នោតថ្ងៃចុងក្រោយរបស់ខ្លួន សម្រាប់ជ្រើសរើសអ្នកតំណាងរាស្រ្តប្រចាំរដ្ឋ។ ធ្លាក់ក្នុងស្ថានភាពកូវីដធ្ងន់ធ្ងរបែបនេះទៅហើយ ឥណ្ឌានៅតែបន្តរៀបចំការបោះឆ្នោត ប្រចាំរដ្ឋ ទៀត កាលពីថ្ងៃព្រហស្បតិ៍ម្សិលមិញ ដែលធ្វើឲ្យគេបារម្ភថា អាចជាកត្តាជំរុញ ឲ្យមានការឆ្លងរាលដាល កូវីដកាន់តែខ្លាំងនៅប្រទេសឥណ្ឌា។
គេសង្កេតឃើញ ថា នៅក្នុងពិធីបុណ្យសាសនា ហិណ្ឌូ ក៏ដូចជាក្នុងយុទ្ធនាការឃោសនាបោះឆ្នោត មនុស្សរាប់សែននាក់ ដែលបានចូលរួម គឺគ្មានរក្សាគម្លាត ពាក់ម៉ាស អ្វីនោះទេ។ គេវាយតម្លៃថា ការជួបជុំមនុស្សណែនណាន់ តាន់តាប់ ក្នុងពិធីបុណ្យនៅទន្លេគង្គារ នៅតាមភូមិឃុំ និងការប្រមូលផ្តុំធ្វើមិទ្ទិញ របស់គណបក្សនយោបាយ គឺជាកត្តាសំខាន់មួយ ដែល ធ្វើឲ្យចំនួនឆ្លងកូវីដ បានហក់ឡើង លឿនស្លេវ ក្នុងប្រទេសឥណ្ឌា។
ដោយនៅតែបន្តរៀបចំការបោះឆ្នោត នៅក្នុងកាលៈទេសៈ ដែលឥណ្ឌា កំពុងផ្ទុះជំងឺកូវីដខ្លាំងក្លារួចហើយនោះ រដ្ឋាភិបាលឥណ្ឌា របស់លោក ម៉ូឌី នៅតែមើលងាយស្ថានការណ៍កូវីដ និង ប្រមាថជីវិតរបស់ប្រជាជនឥណ្ឌា គឺដើម្បីតែសំឡេងឆ្នោត របស់គណបក្សរបស់លោកតែប៉ុណ្ណោះ។
ដោយសារជំងឺឆ្លងកូវីដ១៩កាន់តែរាតត្បាតខ្លាំង លោកនាយករដ្ឋមន្រ្តីបានរងការរិះគន់ ខ្លាំងនៅក្នុងប្រទេស។ នៅតាមបណ្តាញសង្គម មានសារ Hastag ទាមទារឲ្យលោកចុះចេញពីតំណែង។
រដ្ឋាភិបាល ចាប់បើកយុទ្ធនាការចាក់វ៉ាក់សាំង សម្រាប់អ្នកមានអាយុចាប់ពី ១៨ឆ្នាំឡើងទៅ
ប្រឈមនឹងស្ថានភាពធ្លាក់ដុនដាបយ៉ាងដូច្នេះ រដ្ឋាភិបាលរបស់លោកម៉ូឌី បានប្រកាសបើកយុទ្ធនាការចាក់វ៉ាក់សាំង ដល់មនុស្សធំ អាយុ ចាប់ពី១៨ឆ្នាំ ឡើងទៅ ចាប់ពីថ្ងៃសៅរ៍ ទី ១ ឧសភា។
ឥណ្ឌាជាប្រទេសផលិតវ៉ាក់សាំងធំជាងគេបំផុតនៅក្នុងពិភពលោក។ ប៉ុន្តែ ឥណ្ឌាមិនប្រាកដថា នឹងមានវ៉ាក់សាំង គ្រប់គ្រាន់សម្រាប់ចាក់ឲ្យប្រជាជនរបស់ខ្លួន ជាពិសេស ដើម្បី ងើបចាករួចពីវិបត្តិលើកនេះនោះទេ។
ទៅតាមផែនការរបស់រដ្ឋាភិបាល ឥណ្ឌា យុទ្ធនាការចាក់វ៉ាក់សាំង នឹងចាប់ផ្តើមចាប់ពីថ្ងៃសៅរ៍ស្អែក ស្រាប់មនុស្សធំ ចាប់ ពី១៨ឆ្នាំឡើងទៅនោះ។ ដោយសារឥណ្ឌាមានប្រជាជន ១ពាន់ ៤រយលាននាក់ នោះ នឹងមានមនុស្ស៦០០លាននាក់ ដែលត្រូវមានសិទ្ធិទទួលបានវ៉ាក់សាំងបង្ការកូវីដចាប់ពីថ្ងៃសៅរ៍ស្អែក។ ប៉ុន្តែ ឥណ្ឌា មិនទាន់មានសមត្ថភាពផលិតវ៉ាក់សាំង ក្នុងចំនួនដ៏ច្រើនបែបនេះទេ។ គិតរហូតមកដល់ថ្ងៃនេះ ឥណ្ឌាបានចាក់វ៉ាក់សាំង ឲ្យប្រជាជនរបស់ខ្លួនបាន១៥០លាននាក់ ស្មើនឹង ១១,៥%នៃប្រជាជនសរុប ជាង ១៤០០លាននាក់។ យុទ្ធសាស្រ្តចាក់វ៉ាក់សាំងរបស់រដ្ឋាភិបាលឥណ្ឌាមិនសូវជោគជ័យ ដោយសារតែរដ្ឋាភិបាល មានតែមហិច្ឆតា ប៉ុន្តែ មិនបានមើលដឹងពីសមត្ថភាពរោងចក្រផលិតវ៉ាក់សាំងក្នុងប្រទេសនោះទេ។
នៅពេលរដ្ឋាភិបាលប្រកាសបើកចាក់វ៉ាក់សាំងដល់មនុស្ស អាយុចាប់ពី ១៨ឆ្នាំ ឡើងទៅ មណ្ឌលចាក់វ៉ាក់សាំង នៅតាមរដ្ឋមួយចំនួនបានប្រកាសផ្អាកយុទ្ធនាការចាក់វ៉ាក់សាំងទៅវិញ ដោយហេតុថា ពួកគេដាច់ស្តុក គ្មានបានទទួលវ៉ាក់សាំង ពីក្រុមហ៊ុនផលិតវ៉ាក់សាំង ឥណ្ឌានោះទេ។
ឥណ្ឌា ដែលជាមហារោងចក្រ ផលិតវ៉ាក់សាំង គ្មានវ៉ាក់សាំង សម្រាប់ចាក់ឲ្យគ្រប់ប្រជាជនរបស់ខ្លួន ដើម្បីងើបចាកផុតពីរលកស៊ូណាមីកូវីដលើកនេះទេ។ ប្រឈមនឹងស្ថានភាពកូវីដ ធ្ងន់ធ្ងរ នៅឥណ្ឌា សហគមន៍អន្តរជាតិ ដែលមានជាង ៤០ប្រទេសបានបញ្ជូនជំនួយបន្ទាន់ ទៅឥណ្ឌា ជាពិសេស គឺម៉ាស៊ីនផលិតអុកស៊ីសែន ឧបករណ៍ ជំនួយផ្លូវដង្ហើម ដែលខ្វះខាតខ្លាំងជាងគេបំផុតនៅឥណ្ឌា។
ជំនួយរបស់អាមេរិក ដែលមានតម្លៃ ១០០លានដុល្លារ ដែលមានតាំងពីម៉ាស៊ីន ផលិតអុកស៊ីសែន វ៉ាក់សាំង និងវត្ថុធាតុ សម្រាប់ ផលិតវ៉ាក់សាំង នៅឥណ្ឌា បានទៅដល់ប្រទេសឥណ្ឌាហើយ នៅថ្ងៃសុក្រនេះ។ ចំណែកជប៉ុនឯណោះវិញ បានប្រកាសថា ខ្លួននឹងជួយឥណ្ឌាតាមរយៈ ការបញ្ជូន ឧបករណ៍សម្រាប់ជំនួយផ្លូវដង្ហើម ៣០០និង ធុង អុកស៊ីសែន ចំនួន ៣០០ដែរ។ តាមសេតវិមាន ជំនួយរបស់អាមេរិកសម្រាប់ឥណ្ឌា ជាពិសេស វ៉ាក់សាំង បង្ការកូវីដ នោះ គឺ តិចតួច មិនអាច ដោះស្រាយ បញ្ហាខ្វះខាត ដែលឥណ្ឌាកំពុងជួបប្រទះនោះទេ ប៉ុន្តែ យ៉ាងណាក៏ដោយ អាមេរិកនៅតែ បន្តជួយឥណ្ឌាជានិច្ច។
ហេតុអ្វីបានជាគេត្រូវបារម្ភពីការផ្ទុះរាតត្បាតនៃជំងឺកូវីដ ១៩ នៅប្រទេសឥណ្ឌា?
សហគមន៍អន្តរជាតិត្រូវខ្នះខ្នែងជួយឥណ្ឌា មកពីគេបារម្ភខ្លាចឥណ្ឌា ធ្លាក់ចូលកាន់តែជ្រៅទៅក្នុងវិបត្តិជំងឺរាតត្បាតលើកនេះ។ បើឥណ្ឌា ផុងខ្លួន កាន់តែជ្រៅ គ្មានអ្នកណារួចខ្លួននោះទេ។ ប្រទេសកាន់តែច្រើនបានចាប់បិទព្រំដែន អាកាសជាមួយឥណ្ឌា ដោយសារតែគេបារម្ភខ្លាច មេរោគកូវីដបំប្លែងខ្លួន ចូលទឹកដីរបស់ខ្លួនរបស់ខ្លួន ប៉ុន្តែ វិធានការយឺតបន្តិចហើយ ព្រោះថា រហូតមកដល់ពេលនេះ មានប្រទេស ចំនួន ១៩ ដែលចុងក្រោយ គឺវៀតណាម និងបារាំង ដែលតេស្តរកឃើញមានករណីមេរោគកូវីដ បំប្លែងខ្លួនមកពីឥណ្ឌា។ បើសិនគេមិនជួយឥណ្ឌា បង្ក្រាបជំងឺរាតត្បាតកូវីដ ក្នុងប្រទេសទេ នោះ ជំងឺកូវីដ នឹងកាន់តែរីកសាយភាយចេញទៅកន្លែងដទៃទៀត។ មេរោគកូវីដឆ្លងរាលដាល គ្មានស្គាល់ព្រំដែនអ្វីនោះទេ។
គេព្រួយបារម្ភខ្លាចខ្លាំងមេរោគកូវីដបំប្លែងខ្លួនថ្មី មកពីឥណ្ឌាក៏ដោយសារ គេមិនដឹង មិនបានស្គាល់មេរោគហ្នឹងថា តើវាឆ្លងលឿនខ្លាំង ឬកាចសាហាវ សម្លាប់មនុស្សខ្លាំង ជាងមេរោគកូវីដ ដើម ចេញមកពីក្រុងវូហានរបស់ប្រទេសចិនដែរឬទេ។
តាមការរៀបរាប់របស់អ្នកជំនាញឥណ្ឌា ខាងជំងឺឆ្លង ក្នុងស្រុកឥណ្ឌា មេរោគកូវីដបំប្លែងខ្លួនថ្មីនៅឥណ្ឌាបានឆ្លងទៅអ្នកចាក់វ៉ាក់សាំងរួចហើយ ឬអ្នកដែលធ្លាប់កើតកូវីដ ដែលមានប្រព័ន្ធការពារខ្លួនហើយ នៅតែអាចឆ្លងមេរោគបំប្លែងខ្លួនថ្មី របស់ឥណ្ឌានេះទៀត។
រឿងមេរោគ យកឈ្នះលើវ៉ាក់សាំង នេះគឺជាបញ្ហាចោទមួយធំណាស់ ព្រោះវានឹងធ្វើឲ្យការប្រឹងប្រែង ចាក់វ៉ាក់សាំងបង្ការកូវីដកន្លងមក ត្រូវ បរាជ័យធ្លាក់ទឹក។ មួយវិញទៀត ស្ថានភាពនៅឥណ្ឌា សព្វថ្ងៃ ធ្វើឲ្យគេបារម្ភផងដែរទៅដល់អនាគត ប្រទេសក្រីក្រ ផ្សេងទៀត នៅអាស៊ី ឬនៅអាហ្វ្រិក ព្រោះថា ប្រទេសទាំងនោះ ដែលមានប្រព័ន្ធសុខាភិបាលខ្សត់ខ្សោយដូចឥណ្ឌាដែរនោះ នឹងអាច ជួបវិបត្តិធ្ងន់ធ្ងរ ដូចឥណ្ឌា បើសិន មេរោគបំប្លែងខ្លួនថ្មី មកពីឥណ្ឌា អាចឆ្លងរាលដាលទៅដល់។
អង្គការសុខភាពពិភពលោកធ្លាប់បានព្រមានហើយថា ស្ថានភាពនៅឥណ្ឌា គឺអាចផ្ទុះកើតឡើងនៅកន្លែងផ្សេង នៅប្រទេសដទៃទៀត បើសិនគេធ្វេសប្រហែស មើលងាយ ជំងឺកូវីដ ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ