លោកចូ បៃដិន៖អាមេរិកបោះជំហានទៅមុខជាថ្មី
ចុះផ្សាយនៅថ្ងៃ៖
ស្តាប់ - ០៨:០៤
នៅសហរដ្ឋអាមេរិក ប្រធានាធិបតីលោកចូ បៃដិនបានថ្លែងសុន្ទរកថាលើកទី១ នៅក្នុងសភានាថ្ងៃពុធ ទី២៨ មេសា។ គឺជាសុន្ទរកថាស្តីពីតុល្យការនៃការកាន់អំណាចរយៈពេល ១០០ថ្ងៃរបស់លោក។ នៅក្នុងសុន្ទរកថា លោកបៃដិនបានលើកឡើងដោយមោទនភាពពីជោគជ័យដែលរដ្ឋបាលរបស់លោកសម្រេចបានក្នុងរយៈពេល ១០០ថ្ងៃ ដូចយ៉ាងយុទ្ធនាការចាក់វ៉ាក់សាំងបង្ការកូវីដ១៩ ឬមួយក៏ផែនការផ្តល់សន្ទុះសេដ្ឋកិច្ចជាដើម។ « ១០០ថ្ងៃក្រោយការកាន់អំណាច ខ្ញុំអាចនិយាយទៅកាន់ប្រទេសថា អាមេរិកបោះជំហានទៅមុខជាថ្មី » នេះជាការថ្លែងរបស់លោកបៃដិន។
តាមធម្មតានៅក្នុងបទអន្តរាគមន៍ ប្រធានាធិបតីថ្លែងសុន្ទរកថានៅចំពោះមុខវត្តមានអ្នកចូលរួមជាង ១ ៦០០នាក់ដែលជាសមាជិកសភា និងសមាជិកព្រឹទ្ធសភា។ តែស្ថានភាពជំងឺកូវីដ១៩ បានតម្រូវឲ្យកាត់បន្ថយអ្នកចូលរួមផ្ទាល់ ពោលមានអ្នកចូលរួមផ្ទាល់ប្រមាណតែ ២០០នាក់។ គេសង្កេតឃើញមានវត្តមានចៅក្រមម្នាក់នៃតុលាការកំពូលលោកចន រ៉ូប៊ែរ ប្រមុខការទូតលោកអង់តូនី ប្ល៊ីងកិន ឬមួយក៏រដ្ឋមន្រ្តីការពារជាតិលោកឡយដ៍ អូស្ទីន។ ចំណែកអ្នកផ្សេងត្រូវនៅផ្ទះ និងស្តាប់សុន្ទរកថាលោកបៃដិនតាមកញ្ចក់ទូរទស្សន៍ដូចពលរដ្ឋអាមេរិកផ្សេងទៀត។
នេះជាកំណត់សម្គាល់ទី១។ ចំណែកកំណត់សម្គាល់ទី២ ដែលទើបមានជាលើកទី១ នៅក្នុងប្រវត្តិសាស្រ្តអាមេរិក គឺវត្តមានស្រ្តី ២រូបនៅពីក្រោយលោកបៃដិន គឺលោកស្រីណាន់ស៊ី ប៉េឡូស៊ីដែលជាប្រធានសភាមកពីគណបក្សប្រជាធិបតេយ្យ និងលោកស្រីកាម៉ាឡា ហារីសដែលក្នុងខែមករា ឆ្នាំ ២០២១ បានក្លាយជាស្រ្តីទី១ ចូលកាន់តំណែងអនុប្រធានាធិបតី។ កំណត់សម្គាល់ចុងក្រោយ និងបើធៀបនឹងបទអន្តរាគមន៍របស់អតីតប្រធានាធិបតីលោកដូណាល់ ត្រាំក្នុងខែកុម្ភៈ ឆ្នាំ ២០២០ គឺបរិយាកាសនៃបទអន្តរាគមន៍របស់លោកបៃដិនមានលក្ខណៈធូរស្រាលច្រើន។
ធូរស្រាលនៅត្រង់ថាមុននឹងថ្លែងសុន្ទរកថា លោកបៃដិន និងលោកស្រីប៉េឡូស៊ីបានជម្រាបសួរគ្នាដោយជល់កែងដៃ ព្រោះវិធានការប្រឆាំងកូវីដ១៩ មិនអនុញ្ញាតឲ្យចាប់ដៃគ្នា។ តែជាមួយលោកត្រាំវិញ លោកត្រាំបានបដិសេធមិនចាប់ដៃជាមួយលោកស្រីប៉េឡូស៊ី ទោះបីជាលោកស្រីបានហុចដៃមកក៏ដោយ។ ដើម្បីជាការបញ្ឈឺចិត្តដាក់លោកត្រាំវិញ លោកស្រីប៉េឡូស៊ីបានហែកក្រដាសសុន្ទរកថាលោកត្រាំចោលនៅពេលលោកត្រាំថ្លែងសុន្ទរកថាចប់។
ពលរដ្ឋអាមេរិកចំនួន ២២០លាននាក់បានទទួលវ៉ាក់សាំងដូសទី១
សុន្ទរកថារបស់លោកបៃដិនជាសុន្ទរកថាស្តីពីតុល្យការនៃការកាន់អំណាចប្រធានាធិបតីរយៈពេល ១០០ថ្ងៃរបស់លោក។ ដោយមិននិយាយចំឈ្មោះអតីតប្រធានាធិបតីលោកដូណាល់ ត្រាំ លោកបៃដិនបានរៀបរាប់ពីស្ថានការណ៍ប្រទេសជួបវិបត្តិធ្ងន់ធ្ងរ ពិសេសវិបត្តិសុខភាព និងវិបត្តិសេដ្ឋកិច្ចនៅពេលដែលលោកទើបចូលកាន់តំណែងប្រធានាធិបតី។ តែបន្ទាប់ពីបានកាច់ចង្កូតប្រទេសអស់រយៈពេល ១០០ថ្ងៃមក លោកបៃដិនបានថ្លែងដោយអំណួត និងមានមោទនភាពពីការដែលអាមេរិកបានរកឃើញឡើងវិញនូវកន្លែងរបស់ខ្លួន ហើយអាមេរិកនឹងបោះជំហានទៅមុខជាថ្មី។
មានសមិទ្ធិផលសំខាន់ចំនួន ២ ដែលលោកបៃដិនបានលើកឡើង គឺយុទ្ធនាការចាក់វ៉ាក់សាំងបង្ការកូវីដ១៩ និងផែនការផ្តល់សន្ទុះសេដ្ឋកិច្ចឡើងវិញ។ រឿងចាក់វ៉ាក់សាំងបង្ការកូវីដ១៩ ពិតជាជោគជ័យមួយមិនអាចប្រកែកបាន ព្រោះពីដំបូង លោកបៃដិនបានសន្យាចាក់ឲ្យបានពលរដ្ឋអាមេរិកចំនួន ១០០លាននាក់នៅក្នុង ១០០ថ្ងៃនៃការកាន់អំណាចរបស់លោក។ តែជាក់ស្តែងពេលនេះ គឺមានពលរដ្ឋដល់ទៅ ២២០លាននាក់ដែលបានទទួលដូសទី១ ក្នុងនោះ មានជាង ៩៦លាននាក់ ឬស្មើនឹងជិត ៣០% នៃពលរដ្ឋសរុបបានចាក់ទាំងពីរដូសរួចហើយ។
លោកបៃដិនតាំងខ្លួនជាអ្នកគិតគូរ និងការពារពលរដ្ឋថ្នាក់មធ្យម
ក្នុងរយៈពេល ១០០ថ្ងៃ លោកបៃដិនបានចាយលុយចំនួន ៦ ០០០ ០០០ដុល្លារដើម្បីស្តារប្រទេសឡើងវិញ ពិសេសស្តារសេដ្ឋកិច្ចពីវិបត្តិកូវីដ១៩។ នៅក្នុងខ្ទង់ចំណាយនេះក៏មានការជួយពលរដ្ឋដែលបានបាត់បង់ការងារ និងកំពុងត្រូវការខ្លាំងដោយឲ្យម្នាក់ៗចំនួន ១ ៤០០ដុល្លារ។ លោកបៃដិនយល់មិនខុសទេថា លុយនេះនឹងអនុញ្ញាតឲ្យពលរដ្ឋធ្វើការចាយវាយប្រចាំថ្ងៃ ហើយការចាយវាយរបស់ពលរដ្ឋនឹងផ្តល់ឲ្យមានឡើងវិញនូវសង្វាក់សេដ្ឋកិច្ចជាតិ។ « ឥឡូវនេះ អាមេរិកត្រៀមខ្លួនដើម្បីហោះឡើងវិញជាមួយនឹងការព្យាករណ៍កំណើនសេដ្ឋកិច្ច ៦% » នេះជាការគូសបញ្ជាក់របស់លោកបៃដិន។
បន្ទាប់មក លោកបៃដិនបានសន្យាកាត់បន្ថយចំនួនអ្នកក្រីក្រឲ្យបានពាក់កណ្តាល និងចង់ឲ្យមានប្រព័ន្ធសុខាភិបាលប្រសើរចំពោះក្រុមមនុស្សដែលងាយរងគ្រោះខ្លាំង។ អ្វីជាការកត់សម្គាល់ លោកបៃដិនបានតាំងខ្លួនជាអ្នកគិតគូរ និងការពារពលរដ្ឋអាមេរិកថ្នាក់មធ្យម។ នៅក្នុងន័យនេះ លោកបៃដិនបានលើកឡើងពីមហាផែនការវិនិយោគក្នុងទឹកប្រាក់ ១ ០០០ ០០០លានដុល្លារ និងកាត់បន្ថយការបង់ពន្ធរបស់ពលរដ្ឋថ្នាក់មធ្យមក្នុងទឹកប្រាក់សរុប ៨០០ ០០០លានដុល្លារ។ មហាផែនការវិនិយោគ ពិសេសក្នុងវិស័យអប់រំ និងហេដ្ឋារចនាសម្ព័ន្ធនឹងបង្កើតការងាររាប់លានការងារសម្រាប់ពលរដ្ឋបានបាត់បង់ការងារ និងពលរដ្ឋដែលត្រូវបានសង្គមបំភ្លេចចោល។
សង្កត់ ក អ្នកមានយកទៅជួយអ្នកក្រ និងអ្នកមធ្យម
ដើម្បីមានលុយសម្រាប់ចំណាយនៅក្នុងផែនការស្តារសេដ្ឋកិច្ច លោកបៃដិនបានប្រើនយោបាយរបស់ក្រុមអ្នកឆ្វេងនិយមដោយសង្កត់ ក យកលុយពីអ្នកមានទៅជួយអ្នកក្រ និងអ្នកមធ្យម។ លោកបៃដិនមានការសោកស្តាយថា ខណៈដែលមានពលរដ្ឋអាមេរិកចំនួន ២០លាននាក់បានបាត់បង់ការងារក្នុងសម័យកូវីដ១៩ បែរជាមហាសេដ្ឋីដែលមានលុយរាប់ពាន់លានទទួលបានលុយកាន់តែច្រើនថែមទៀតទៅវិញ។ ដូច្នេះវាល្មមដល់ពេលដែលមហាសេដ្ឋីគ្រាក់ៗ និងក្រុមហ៊ុនអាមេរិកធំៗទម្លាក់លុយបន្ថែមដើម្បីជួយអ្នកក្រ និងអ្នកមធ្យម។
ផែនការដែលលោកបៃដិនគ្រោងអនុវត្តន៍ គឺលុបចោលវិញនូវការបន្ធូរបន្ធយពន្ធចំពោះអ្នកមានជាងគេដែលអតីតប្រធានាធិបតីលោកដូណាល់ ត្រាំបានអនុវត្ត និងដំឡើងពន្ធលើប្រាក់ចំណូលរបស់មហាសេដ្ឋីធំៗ។ តែលោកបៃដិនបានសន្យាថា គ្មានការដំឡើងពន្ធចំពោះពលរដ្ឋអាមេរិកណាដែលមានប្រាក់ចំណូលតិចជាង ៤០០ ០០០ដុល្លារក្នុងមួយឆ្នាំទេ។
អាមេរិកមិនស្វែងរកការប្រឈមមុខជាមួយរុស្ស៊ី និងជាមួយចិនទេ
ក្រៅពីនយោបាយផ្ទៃក្នុង លោកបៃដិនមិនភ្លេចនិយាយពីនយោបាយការបរទេសដោយផ្តោតសំខាន់លើទំនាក់ទំនងជាមួយចិន និងរុស្ស៊ី។ ជាមួយរុស្ស៊ីត្រូវបានលោកបៃដិនបញ្ជាក់ថា លោកបាននិយាយប្រាប់ប្រធានាធិបតីរុស្ស៊ីលោកពូទីនត្រង់ៗពីការដែលអាមេរិកមិនស្វែងរកភាពប្រទូស្រ្តាយ និងព្រមានថា ទង្វើលូកដៃរបស់រុស្ស៊ីនៅក្នុងការបោះឆ្នោតអាមេរិក និងការវាយប្រហារតាមអ៊ីធ័រនែតលើស្ថាប័ន និងក្រុមហ៊ុនអាមេរិកនឹងទទួលផលវិបាក។
ជាមួយចិនវិញ លោកបៃដិនបាននិយាយប្រាប់ប្រធានាធិបតីចិនលោកស៊ី ជីនពីងពីការដែលអាមេរិកមិនស្វែងរកជម្លោះ និងថា អាមេរិកការពារផលប្រយោជន៍អាមេរិកនៅលើគ្រប់វិស័យទាំងអស់។ តាមលោកបៃដិន អាមេរិកមិនជំទាស់នឹងការប្រកួតប្រជែងក្នុងផ្នែកពាណិជ្ជកម្មទេ តែប្រឆាំងដាច់ខាតនឹងការប្រកួតប្រជែងដែលមិនស្មើភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ