អាមេរិក៖ហេតុអ្វីបានជាលោកបៃដិនប្រកាសបិទបញ្ចប់សង្រ្គាមរបស់អាមេរិកនៅអាហ្វហ្កានីស្ថាន?
ចុះផ្សាយនៅថ្ងៃ៖
ស្តាប់ - ០៧:៣៣
នៅថ្ងៃពុធ ទី១៤ មេសា ប្រធានាធបតីអាមេរិកលោកចូ បៃដិនបានប្រកាសបញ្ជាក់ជាផ្លូវការពីការដកទ័ពអាមេរិកទាំងអស់ចេញពីប្រទេសអាហ្វហ្កានីស្ថាននៅមុនថ្ងៃទី១១ កញ្ញាខាងមុខ។ តាមលោកបៃដិន ពេលវេលាបានឈានមកដល់ហើយដែលអាមេរិកត្រូវបិទបញ្ចប់សង្រ្គាមយូរអង្វែងជាងគេនៃប្រវត្តិសង្រ្គាមរបស់អាមេរិកនៅក្រៅប្រទេស។ ក្រៅពីប្រកាសដកទ័ពអាមេរិកទាំងអស់ លោកបៃដិនក៏បានបញ្ជាក់ពីការដកទ័ពកម្លាំងណាតូទាំងអស់ដែលកំពុងមានវត្តមានក្នុងទឹកដីអាហ្វហ្កានីស្ថានដែរ។ ចំណែកប្រធានាធិបតីអាហ្វហ្កានីស្ថានលោកហ្កានីបានថ្លែងពីការគោរពតាមសេចក្តីសម្រេចរបស់លោកបៃដិន។
កាលពី ២០ឆ្នាំមុន ពោលនៅប៉ុន្មានថ្ងៃក្រោយមហាភេរវកម្មវាយប្រហារលើអាគារពាណិជ្ជកម្មភ្លោះក្នុងទីក្រុងញូយ៉កក្នុងថ្ងៃទី១១ កញ្ញា ២០០១ ប្រធានាធិបតីអាមេរិកពេលនោះលោក George W.Bush បានសម្រេចបើកការវាយប្រហារលើអាហ្វហ្កានីស្ថានដោយលោកយល់ថា មហាភេរវកម្មថ្ងៃ១១ កញ្ញាជាស្នាដៃរបស់អង្គការភេរវនិយមអាល់កៃដារបស់មេកើយបិនឡាដិនដែលមានមូលដ្ឋាននៅក្នុងទឹកដីអាហ្វហ្កានីស្ថាន។ សង្រ្គាមពេលនោះបានទម្លាក់ពួកតាលីបង់ពីអំណាច និងបានធ្វើឲ្យពួកនេះក្លាយជាពួកឧទ្ទាមប្រដាប់អាវុធមកដល់បច្ចុប្បន្ន។ ទន្ទឹមនឹងការប្រកាសដកទីពអាមេរិកទាំងអស់ លោកបៃដិនក៏បានបញ្ជាក់ពីការដកទ័ពរបស់កម្លាំងអង្គការណាតូដែរ។
គេត្រូវរង់ចាំដល់ខែឧសភា ឆ្នាំ ២០១១ ទើបអាមេរិកសម្លាប់បានមេកើយអាល់កៃបិនឡាដិនដែលបានលាក់ខ្លួនពួនអាត្មានៅក្នុងទឹកដីប៉ាគីស្ថានក្បែរខាង។ តែទោះជាសម្លាប់បានបិនឡាដិនក៏ដោយ ក៏ទ័ពអាមេរិក និងទ័ពអង្គការណាតូ រួមទាំងទ័ពជាតិអាហ្វហ្កានីស្ថានបន្តជាផ្ទាំងស៊ីបនៃការវាយប្រហារពីពួកភេរវជនអាល់កៃដា និងពួកឧទ្ទាមតាលីបង់សឹងរាល់ថ្ងៃ។ គួររម្លឹកថា ចន្លោះឆ្នាំ ២០១០ និង ២០១១ ចំនួនទាហានអាមេរិកនៅអាហ្វាហ្កានីស្ថានមានដល់ទៅ ១០០ ០០០នាក់ឯណោះ។ តែចាប់ពីឆ្នាំ ២០១១ មក អាមេរិកបានចាប់ផ្តើមកាត់បន្ថយចំនួនទ័ពបន្តិចម្តងៗតាំងពីជំនាន់ប្រធានាធិបតីអាមេរិកលោកអូបាម៉ា។ បន្ទាប់មក អតីតប្រធានាអាមេរិកលោកត្រាំបានពន្លឿនការកាត់បន្ថយរឹតតែលឿនដែលសព្វថ្ងៃនៅសល់តែប្រមាណ ២ ៥០០នាក់ប៉ុណ្ណោះ។
កម្មវត្ថុដែលអាមេរិកចង់បាន គឺសម្រេចហើយ
គេអាចនិយាយបានថា ផ្លូវដែលលោកបៃដិនបានជ្រើសរើសនេះជាផ្លូវដែលអតីតប្រធានាធិបតីលោកដូណាល់ ត្រាំបានត្រួសត្រាយ។ ចូរកុំភ្លេចថា លោកត្រាំក៏បានសម្រេចដកទ័ពអាមេរិកទាំងអស់ចេញពីអាហ្វហ្កានីស្ថាននៅត្រឹមថ្ងៃទី១ ឧសភា ឆ្នាំ ២០២១។ តែដោយមិនបានជាប់ឆ្នោតអាណត្តិទី២ លោកត្រាំមិនអាចសម្រេចគោលដៅមួយនេះបានឡើយ។ ដូច្នេះលោកបៃដិនជាអ្នកបន្តដោយបានប្រកាសពីការដកឲ្យអស់ចាប់ពីពេលនេះនៅមុនថ្ងៃទី១១ កញ្ញាដែលជាខួបគម្រប់ ២០ឆ្នាំនៃមហាភេរវកម្មថ្ងៃ១១ កញ្ញា ២០០១។ អ្វីដែលលោកបៃដិនចង់បាន និងចង់ឃើញ គឺគ្មានវត្តមានទាហានអាមេរិកណាម្នាក់នៅលើទឹកដីអាហ្វហ្កានីស្ថាននាខួបគម្រប់ ២០ឆ្នាំនៃមហាភេរវកម្មថ្ងៃ១១ កញ្ញា ២០០១ នៅអាមេរិកទៀតទេ។
លោកបៃដិនមិនភ្លេចបញ្ជាក់ទេថា លោកជាប្រធានាធិបតីអាមេរិកទី៤ ដែលបានដោះស្រាយវត្តមានទាហានអាមេរិកនៅក្នុងប្រទេសអាហ្វហ្កានីស្ថាន និងសន្យាថា លោកនឹងមិនបន្តទុករឿងមួយនេះឲ្យប្រធានាធិបតីអាមេរិកទី៥ ទៀតឡើយ។ មានហេតុផលមួយចំនួនដែលលោកបៃដិនបានលើកយកទៅពន្យល់ដោយផ្តើមចេញពីមូលហេតុដែលអាមេរិកបានសម្រេចចិត្តធ្វើសង្រ្គាមនៅអាហ្វហ្កានីស្ថានកាលពី ២០ឆ្នាំមុន។ លោកបៃដិនយល់ថា កម្មវត្ថុកាលណោះ គឺច្បាស់លាស់ និងមានបុព្វហេតុត្រឹមត្រូវ និងថា អាមេរិកសម្រេចបានកម្មវត្ថុនោះហើយដោយសម្លាប់បានមេកើយអាល់កៃដាបិនឡាដិន។ ហេតុផលមួយទៀតលើកឡើងដោយលោកបៃដិនគឺថា ក្នុងរយៈពេល ២០ឆ្នាំកន្លងទៅនេះ អាហ្វហ្កានីស្ថានលែងត្រូវបានពួកភេរវជនប្រើជាមូលដ្ឋានដើម្បីវាយប្រហារជាថ្មីលើអាមេរិកទៀតទេ។
លោកបៃដិនបានចោទសួរថា តើមានហេតុផលអ្វីដែលអាមេរិកត្រូវបន្តទុកទាហានរបស់ខ្លួននៅលើទឹកដីអាហ្វហ្កានីស្ថានទៀត?។
អាហ្វហ្កានីស្ថានវិលរកទ្រនំចាស់?
ក្រុមអ្នកជំនាញភាគច្រើនមិនបានយល់ឃើញដូចលោកបៃដិនទេ។ អ្វីដែលពួកគេព្រួយបារម្ភខ្លាំង ការវិលក្រោយរបស់អាហ្វហ្កានីស្ថានទៅរកស្ថានភាពដូចកាលពី ២០ឆ្នាំមុន មានន័យថា ការវិលត្រឡប់ទៅកាន់អំណាចឡើងវិញជាយថាហេតុរបស់ក្រុមឧទ្ទាមតាលីបង់។ ចូរកុំភ្លេចថា រឿងអាមេរិកបានសម្រេចចិត្តដកទ័ពរបស់ខ្លួនបណ្តើរៗរហូតដល់ដកទាំងអស់បានធ្វើឡើងដោយផ្អែកលើកត្តា និងលក្ខខណ្ឌមួយចំនួន ពិសេសស្ថានភាពសន្តិសុខ និងសុវត្ថិភាពផ្ទៃក្នុងរបស់ប្រទេស និងប្រជាជនអាហ្វហ្កានីស្ថាន។ សំណួរដែលចោទឡើង អត់ពីកម្លាំងទ័ពអាមេរិក និងទ័ពអង្គការណាតូទៅ តើរដ្ឋាភិបាលអាហ្វហ្កានីស្ថានមានលទ្ធភាព និងសមត្ថភាពទទួលខុសត្រូវផ្នែកសន្តិសុខ និងសុវត្តិភាពដោយខ្លួនឯងបានឬដែរ ឬទេ ប្រឈមនឹងពួកឧទ្ទាមតាលីបង់ដែលកំពុងបន្តមានឥទ្ធិពល។
គួររម្លឹកថា ការសម្រេចចិត្តរបស់អាមេរិកក្នុងការដកទ័ពទាំងអស់ចេញពីអាហ្វហ្កានីស្ថានបានធ្វើឡើងដោយមានកិច្ចព្រមព្រៀងរវាងរដ្ឋបាលអាមេរិកក្នុងជំនាន់លោកត្រាំ និងចលនាឧទ្ទាមតាលីបង់។ នៅក្នុងកិច្ចព្រមព្រៀង អាមេរិកសន្យាដកទ័ពចេញទាំងអស់ចេញពីអាហ្វហ្កានីស្ថាន ហើយពួកតាលីបង់បានយល់ព្រមចូលអង្គុយតុចរចាសន្តិភាពជាមួយរដ្ឋាភិបាលអាហ្វហ្កានីស្ថាន។ ពួកតាលីបង់បានព្រមានជាថ្មីក្នុងថ្ងៃពុធ ទី១៤ មេសាថា បើអាមេរិកមិនគោរពតាមពាក្យសន្យារបស់ខ្លួនទេ ពួកគេនឹងមិនចូលតុចរចាតាមការកំណត់ឡើយ។ ចំណែកលោកបៃដិនបានព្រមានពួកតាលីបង់ប្រឆាំងនឹងគ្រប់ការវាយប្រហាររបស់ពួកគេនៅពេលដែលអាមេរិកដកទ័ព។ យ៉ាងណាក៏ដោយ ប្រធានាធិបតីអាហ្វហ្កានីស្ថានលោកហ្កានីហាក់គ្មានជម្រើសអ្វីក្រៅពីទទួលយក និងគោរពការសម្រេចរបស់លោកបៃដិន។
ចំណែកក្រុមអ្នកជំនាញភាគច្រើនហាក់បានយល់ឃើញពីភាពបរាជ័យរបស់អាមេរិកនៅក្នុងសង្រ្គាម ២០ នៅអាហ្វហ្កានីស្ថាន។ បរាជ័យដោយពួកគេមើលឃើញថា នៅ ២០ឆ្នាំក្រោយមក ស្ថានការណ៍នៅអាហ្វហ្កានីស្ថានគ្មានការប្រែប្រួលទេ។ ពួកអាល់កៃដា និងពួកតាលីបង់មិនត្រឹមកំពុងបន្តមានវត្តមានប៉ុណ្ណោះទេ តែថែមទាំងនៅមានកម្លាំង និងឥទ្ធិពលខ្លាំងដូចឆ្នាំ ២០០១។ គួរបញ្ជាក់ថា សង្រ្គាម ២០ឆ្នាំកន្លងទៅបានបណ្តាលឲ្យស្លាប់ទាហានអាមេរិកជាង ២០០០នាក់ និងជនជាតិអាហ្វហ្កានីស្ថានជាច្រើនពាន់នាក់។ នេះដោយមិននិយាយពីការចំណាយរាប់សិនពាន់លានដុល្លាររបស់អាមេរិកនៅក្នុងសង្រ្គាមមួយរយៈពេល ២០ឆ្នាំមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ