WHO និងមេដឹកនាំចំនួន ២៤ប្រទេសស្នើឲ្យបង្កើតសន្ធិសញ្ញាអន្តរជាតិមួយស្តីពីការគ្រប់គ្រងជំងឺឆ្លងសកល
ចុះផ្សាយនៅថ្ងៃ៖
ស្តាប់ - ០៧:៥០
នៅថ្ងៃចន្ទ ទី២៩ មីនា អគ្គនាយកអង្គការសុខភាពពិភពលោក ប្រធានក្រុមប្រឹក្សាអឺរ៉ុប រួមទាំងប្រមុខរដ្ឋ និងប្រមុខរដ្ឋាភិបាលចំនួន ២៤រូបបានអំពាវនាវឲ្យបង្កើតសន្ធិសញ្ញាអន្តរជាតិមួយស្តីពីការគ្រប់គ្រងជំងឺឆ្លងរាតត្បាតសកល។ កម្មវត្ថុនៃការបង្កើតឲ្យមានសន្ធិសញ្ញាអន្តរជាតិមួយនេះឡើង គឺដើម្បីចែករំលែកការទទួលខុសត្រូវ និងការគ្រប់គ្រងឲ្យបានល្អលើជំងឺឆ្លងរាតត្បាតសកលនាពេលអានាគត។ ការស្នើឲ្យបង្កើតសន្ធិសញ្ញាអន្តរជាតិមួយនេះ បានធ្វើឡើង ខណៈ ខណៈដែលពិភពលោកកំពុងបន្តញំញីដោយជំងឺកូវីដ១៩ និងការទទួលបានវ៉ាក់សាំងមិនស្មើភាពរវាងក្រុមប្រទេសអ្នកមាន និងក្រុមប្រទេសអ្នកក្រ។
ការអំពាវនាវឲ្យបង្កើតសន្ធិសញ្ញាអន្តរជាតិមួយស្តីពីការគ្រប់គ្រងជំងឺឆ្លងរាតត្បាតសកលពេលនេះមិនមែនជាថ្មីទេ។ គំនិតផ្តួចផ្តើមស្រដៀងគ្នានេះធ្លាប់បានលើកឡើងនៅក្នុងជំនួបកំពូលអឺរ៉ុបកាលពីខែធ្នូ ឆ្នាំ ២០២០ និងជំនួបកំពូលនៃក្រុមប្រទេសមហាអំណាចឧស្សាហកម្មទាំង ៧ កាលពីខែកុម្ភៈ ឆ្នាំ ២០២១។ អ្វីដែលថ្មី ការអំពាវនាវឲ្យបង្កើតសន្ធិសញ្ញាអន្តរជាតិមួយស្តីពីការគ្រប់គ្រងជំងឺឆ្លងរាតត្បាតសកលពេលនេះបានចុះហត្ថលេខាដោយលោកតេដ្រូស អគ្គនាយកអង្គការសុខភាពពិភពលោក ប្រធានក្រុមប្រឹក្សាអឺរ៉ុបលោកស្ហាល មីស្ហែល រួមទាំងមេដឹកនាំមកពី ៥ទ្វីបក្នុងលោក។
នៅអឺរ៉ុបមានដូចជាប្រធានាធិបតីបារាំងលោកម៉ាក្រុង នាយករដ្ឋមន្រ្តីអាល្លឺម៉ង់លោកស្រីមែរកិល និងនាយករដ្ឋមន្រ្តីអង់គ្លេសលោកបូរីស ចនសុន។ នៅអាហ្រ្វិកមានដូចជាប្រធានាធិបតីអាហ្រ្វិកខាងត្បូង ហើយនៅអាមេរិកឡាទីនមានដូចជាប្រធានាធិបតីឈីលី។ ចំណែកនៅអាស៊ីមានដូចជាប្រធានាធិបតីកូរ៉េខាងត្បូងលោកមូន ចៃអ៊ីន ឬសមភាគីឥណ្ឌូណេស៊ីលោកយ៉ូកូ វីដូដូ។ តែគួរឲ្យស្តាយ មានមេដឹកនាំសំខាន់ៗមួយចំនួនដែលជាសមាជិកនៃក្រុមប្រទេស G២០ មិនបានចូលរួមទេ ក្នុងនោះមានអាមេរិក រុស្ស៊ី ចិន ជប៉ុន ឥណ្ឌា និងប្រទេសប្រេស៊ីល។
គេនៅមិនទាន់ដឹងថា តើប្រទេសទាំងនេះមិនព្រមចូលរួម ឬមួយក៏នឹងចូលរួមនៅពេលក្រោយ។
កូវីដ១៩ ជាមេរៀនដែលត្រូវបញ្ចៀសនៅពេលខាងមុខ
ហេតុផលដែលបានជំរុញឲ្យ WHO សហភាពអឺរ៉ុប និងមេដឹកនាំទាំងជាង ២០ប្រទេសគិតគូរពីការបង្កើតសន្ធិសញ្ញាអន្តរជាតិមួយស្តីពីការគ្រប់គ្រងជំងឺឆ្លងរាតត្បាតសកលពេលនេះ គឺមេរៀនដ៏ល្វីងជូរចត់ដែលទាញបានពីជំងឺកូវីដ១៩។ ដូចគេបានដឹងហើយថា ជំងឺឆ្លងរាតត្បាតកូវីដ១៩ ជាបញ្ហាប្រឈមដ៏ធំដែលពិភពលោកមិនធ្លាប់ជួបប្រទះទេគិតតាំងពីឆ្នាំ ១៩៤០។ កាលណោះ ពិភពលោកបានឆ្លងកាត់សង្រ្គាមលោកចំនួន ២លើក ដោយបានបណ្តាលឲ្យស្លាប់ និងរបួសមនុស្សជាច្រើនលាននាក់។ តែអ្វីដែលសំខាន់ក្រោយមក គឺពិភពលោកបានយកសង្រ្គាមលោកទាំង២លើកធ្វើជាមេរៀនដើម្បីបញ្ជៀសសង្រ្គាមលោកផ្សេងទៀត។ នៅពេលនោះ មេដឹកនាំគ្រាក់ៗបានរួមប្រជុំគ្នាដើម្បីបង្កើតឲ្យមានប្រព័ន្ធពហុភាគីនិយមមួយដោយផ្អែកស្មារតីសាមគ្គីភាព និងកិច្ចសហប្រតិបត្តិការ។
គឺស្មារតីសាមគ្គីភាព និងកិច្ចសហប្រតិបត្តិការដដែលនេះដែលពិភពលោកត្រូវការដើម្បីប្រយុទ្ធប្រឆាំងនឹងជំងឺឆ្លងរាតត្បាតសកល ដូចយ៉ាងជំងឺកូវីដ១៩ សព្វថ្ងៃ និងជំងឺឆ្លងរាតត្បាតផ្សេងទៀតនាពេលអនាគត។ គួរបញ្ជាក់ថាជាងពេលណាៗទាំងអស់ កូវីដ១៩ កំពុងធ្វើឲ្យពិភពលោកចុះខ្សោយ និងបែកបាក់ កូវីដ១៩ កំពុងបង្កើតឲ្យមានគំនិតអត្មានិយម ក្បាលអ្នកណា សក់អ្នកហ្នឹង កូវីដ១៩ កំពុងជំរុញឲ្យមានគម្លាតកាន់តែខ្លាំងរវាងក្រុមប្រទេសអ្នកមាន និងក្រុមប្រទេសអ្នកក្រ ហើយកូវីដ១៩ កំពុងបង្កើតឲ្យមានភាពរើសអើងនៅក្នុងសង្គម។ ជាក់ស្តែងមិនអាចប្រកែកបាន គឺពាក់ព័ន្ធនឹងការទទួលបានវ៉ាក់សាំង។
ខណៈដែលក្រុមប្រទេសអ្នកមានកម្ម៉ង់ទិញវ៉ាក់សាំងលើលពីតម្រូវការរបស់ខ្លួន មានប្រទេសជាច្រើន ពិសេសប្រទេសក្រីក្ររកតែវ៉ាក់សាំងមួយដូសក៏គ្មានផង។ បន្ទាប់មក នៅមានវិសមភាពផ្សេងទៀតដើម្បីរួមគ្នាទប់ស្កាត់ការឆ្លងកូវីដ១៩ ដូចជាតម្រូវការម៉ាស់ ឬមួយទឹកអាល់កុលលាងដៃជាដើម។ បន្ទាប់មកទៀត គឺផលវិបាកសេដ្ឋកិច្ចដែលកើតចេញពីវិបត្តិកូវីដ១៩។ ត្រង់ចំណុចនេះ ប្រទេសដែលរងគ្រោះជាងគេ គឺក្រុមប្រទេសក្រីក្រ។
ធានាលើការទទួលបានជាសកល និងស្មើភាពនូវវ៉ាក់សាំង និងថ្នាំព្យាបាល
សន្ធិសញ្ញាអន្តរជាតិស្តីពីការគ្រប់គ្រងជំងឺឆ្លងរាត្បាតសកលដែល WHO ក្រុមប្រឹក្សាអឺរ៉ុប និងមេដឹកនាំទាំងជាង ២០ប្រទេសបានសង្កត់ធ្ងន់លើស្មារតីសាមគ្គីភាព និងកិច្ចសហប្រតិបត្តិការ។ គេត្រូវរួមសាមគ្គីគ្នាជាធ្លុងមួយដើម្បីកំចាត់កូវីដ១៩ ឲ្យបានជោគជ័យ និងបង្ការទប់ស្កាត់ជំងឺឆ្លងរាតត្បាតផ្សេងទៀតនាពេលអានាគត។ ចូរកុំភ្លេចថា កូវីដ១៩ មិនមែនជាជំងឺឆ្លងរាតត្បាតសកលលើកទី១ និងក៏មិនមែនលើកចុងក្រោយដែរ មានន័យថា ពិភពលោកនឹងស្គាល់ជំងឺឆ្លងរាតត្បាតផ្សេងទៀត និងស្គាល់ស្ថានភាពសុខភាពអាសន្នទ្រង់ទ្រាយធំច្រើនទៀតនាពេលខាងមុខ។
សំណួរមិនមែននៅត្រង់ថា តើមាន ឬមិនមានជំងឺឆ្លងរាតត្បាតនាពេលខាងមុខនោះទេ តែនៅត្រង់ថា តើជំងឺឆ្លងរាតត្បាតថ្មីនឹងកើតមាននៅពេលណា។ នៅក្នុងសេចក្តីប្រកាសព័ត៌មាន អគ្គនាយកអង្គការសុខភាពពិភពលោក ប្រធានក្រុមប្រឹក្សាអឺរ៉ុប រួមទាំងប្រមុខរដ្ឋ និងប្រមុខរដ្ឋាភិបាលទាំងជាង ២០រូបយល់ថា គ្មានរដ្ឋាភិបាលណាមួយ និងគ្មានស្ថាប័នណាមួយអាចទប់ស្កាត់នឹងជំងឺឆ្លងរាតត្បាតសកលតែម្នាក់បានទេ។ គឺមានតែទាំងអស់គ្នារួមដៃគ្នាទើបគេអាចត្រៀមមុន បង្ការ ស្គាល់អត្តសញ្ញាណ និងវាយតម្លៃលើមេរោគ។ គឺមានតែទាំងអស់គ្នាទើបគេអាចកំចាត់មេរោគប្រកបដោយប្រសិទ្ធិភាពខ្ពស់។
បន្ទាប់មក គឺធានាពីការទទួលបានជាសកល និងស្មើភាពនូវវ៉ាក់សាំង ថ្នាំព្យាបាល និងឧបករណ៍ធ្វើតេស្តិ៍ត្រឹមត្រូវ មានប្រសិទ្ធិភាព និងអាចទទួលយកបានទាំងអស់គ្នា។ សេចក្តីប្រកាសព័ត៌មានដដែលបញ្ជាក់ថា វ៉ាក់សាំងជាទ្រព្យសាធារណៈដែលពិភពលោកជាអ្នកអភិវឌ្ឍន៍ ផលិត និងជាអ្នកចែកចាយឲ្យមនុស្សលោកគ្រប់រូបដោយគ្មានការបែងចែក។ សេចក្តីប្រកាសព័ត៌មានយល់ថា បើពិភពលោកបានពួតដៃគ្នាតាំងពីថ្ងៃផ្ទុះកូវីដ១៩ ម្ល៉េះជំងឺឆ្លងរាតត្បាតកូវីដ១៩ ប្រហែលមិនបន្តញំញីពិភពលោកមកដល់សព្វថ្ងៃទេ។ ដូច្នេះនេះជាមេរៀនមួយដែលគេត្រូវបញ្ជៀសនាពេលខាងមុខ ហើយការបង្កើតឲ្យមានសន្ធិសញ្ញាអន្តរជាតិស្តីពីការគ្រប់គ្រងជំងឺឆ្លងរាត្បាតសកលពេលនេះ គឺទុកសម្រាប់មនុស្សជំនាន់ក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ