បោះឆ្នោតសភាអ៊ីស្រាអែល៖គណបក្សលោកនេតាន់យ៉ាហ៊ូនាំមុខ តែគ្មានសំឡេងភាគច្រើន
ចុះផ្សាយនៅថ្ងៃ៖
ស្តាប់ - ០៦:២៧
នៅក្នុងប្រទេសអ៊ីស្រាអែល លទ្ធផលបឋមនៃការបោះឆ្នោតសភាកាលពីថ្ងៃអង្គារ ទី២៣ មីនាឲ្យដឹងថា គណបក្សស្តាំនិយមលីគូដរបស់នាយករដ្ឋមន្រ្តីផុតអាណត្តិលោកបេនយ៉ាមីន នេតាន់យ៉ាហ៊ូទទួលបានសំឡេងនាំមុខ។ តែខណៈនេះ លោកនេតាន់យ៉ាហ៊ូគ្មានសំឡេងគ្រប់គ្រាន់ដើម្បីរៀបចំបង្កើតរដ្ឋាភិបាលថ្មីតែមា្នក់ឯងទេ មានន័យថា លោកត្រូវការចាប់ដៃជាមួយគណបក្សដៃគូផ្សេង។ ទោះជាយ៉ាងនេះក្តី និងដោយរង់ចាំលទ្ធផលផ្លូវការនាចុងសប្តាហ៍នេះ លោកនេតាន់យ៉ាហ៊ូបានចេញមុខប្រកាសរួចហើយពីមហាជ័យជម្នះរបស់គណបក្សស្តាំនិយម។
ការបោះឆ្នោតសភាអ៊ីស្រាអែលលើកនេះជាការបោះឆ្នោតលើកទី៤ ក្នុងរយៈពេលមិនដល់ ២ឆ្នាំពេញលេញផង។ ចំណែកតំណែងនាយករដ្ឋមន្រ្តីត្រូវបាននាយករដ្ឋមន្រ្តីផុតអាណត្តិលោកនេតាន់យ៉ាហ៊ូក្តាប់ជាប់ក្នុងដៃតាំងពីឆ្នាំ ២០០៩។ នេះជាកំណត់សម្គាល់ទី១។ កំណត់សម្គាល់ទី២ ការរៀបចំបោះឆ្នោតលើកនេះហាក់បានធ្វើឡើង ខណៈដែលប្រទេសកំពុងគ្របដណ្តប់ដោយប្លុកពីរ គឺប្លុកគាំទ្រលោកនេតាន់យ៉ាហ៊ូ និងប្លុកប្រឆាំងលោកនេតាន់យ៉ាហ៊ូ។ សម្រាប់ប្លុកគាំទ្រលោកនេតាន់យ៉ាហ៊ូ ពួកគេចង់ឃើញនាយករដ្ឋមន្រ្តីចាស់វស្សារូបនេះបន្តកាច់ចង្កូតប្រទេសមួយអាណត្តិថ្មី។
ចំណែកប្លុកប្រឆាំងលោកនេតាន់យ៉ាហ៊ូ ពួកគេចង់កំចាត់លោកនេតាន់យ៉ាហ៊ូចេញពីតំណែងនាយករដ្ឋមន្ត្រី។ ចូរកុំភ្លេចថា លោកនេតាន់យ៉ាហ៊ូកំពុងជាប់ចោទក្នុងបទពុករលួយ និងការរំលោភអំណាច។ តែលោកកំពុងត្រូវបានការពារដោយអភ័យឯកសិទ្ធិនាយករដ្ឋមន្រ្តី។ កំណត់សម្គាល់ទី៣សម្រាប់ការបោះឆ្នោតពេលនេះ គឺការធ្លាក់ចុះនៃអត្រាអ្នកចូលរួមបោះឆ្នោត បើធៀបនឹងការបោះឆ្នោតចំនួន ៣លើកចុងក្រោយ។ បើប្រៀបធៀបតែរវាងការបោះឆ្នោតក្នុងខែមីនា ឆ្នាំ ២០២០ និងការបោះឆ្នោតលើកនេះ គឺមានការធ្លាក់ចុះជាង ៤ពិន្ទុ។
ក្រុមអ្នកវិភាគបានហៅព្រឹត្តិការណ៍មួយនេះថាជា « ភាពអស់កម្លាំងនៃការបោះឆ្នោត » ដែលអ្នកបោះឆ្នោតធុញទ្រាន់នឹងវិបត្តិនយោបាយច្រំដែលក្នុងរយៈពេលប៉ុន្មានឆ្នាំចុងក្រោយនេះ។ វិបត្តិនយោបាយច្រំដែលនោះ គឺការជាប់គាំងនយោបាយដែលបានរុញប្រទេសឲ្យរៀបចំបោះឆ្នោតឡើងវិញមិនចេះចប់។
សេណារីយ៉ូច្រំដែលនឹងកើតមានជាថ្មី?
បើផ្អែកតាមលទ្ធផលបឋមនៅយប់ថ្ងៃអង្គារ ទី២៣ មីនា គណបក្សស្តាំនិយមលីគូដរបស់លោកនេតាន់យ៉ាហ៊ូទទួលបានសំឡេងនាំមុខគេដោយអាចទទួលបានចំនួនអសនៈនៅក្នុងរដ្ឋសភាចន្លោះពី ៣១ ទៅ ៣៣អសនៈ និងបន្តដោយគណបក្សកណ្តាលនិយម Yesh Atid របស់លោកយ៉ាអៀរ ឡាពីដដែលអាចទទួលបានអសនៈក្នុងចន្លោះពី១៦ ទៅ ១៨អសនៈ។ ចំណែកអសនៈដែលនៅសល់នឹងធ្លាក់ទៅក្នុងគណបក្សតូចតាចផ្សេងទៀត ពិសេសគណបក្សស្តាំនិយមយ៉ាមីណារបស់លោកណាហ្វតាលី បេននែតដែលអាចទទួលបានក្នុងចន្លោះពី ៧ ទៅ ៨អសនៈ។ គួរបញ្ជាក់ថា រដ្ឋសភាអ៊ីស្រាអែលមានអសនៈសរុបចំនួន ១២០អសនៈ។
ដូច្នេះឃើញថា ចំនួនអសនៈដែលគណបក្សលីគូដរបស់លោកនេតាន់យ៉ាហ៊ូទទួលបាននៅមិនទាន់គ្រប់គ្រាន់ដើម្បីអាចឲ្យលោកនេតាន់យ៉ាហ៊ូបង្កើតរដ្ឋាភិបាលថ្មីតែម្នាក់ឯងបានទេ ព្រោះលោកត្រូវការដល់ទៅ ៦១អសនៈ។ ពិតណាស់នៅយប់ថ្ងៃអង្គារ ទី២៣ មីនា លោកនេតាន់យ៉ាហ៊ូបានប្រកាសរួចជាស្រេចពីជ័យជម្នះធំធេងរបស់គណបក្សស្តាំនិយម។ តែក្នុងពេលជាមួយគ្នា លោកក៏មានការប្រយ័ត្នប្រយែង ព្រោះការរាប់សន្លឹកឆ្នោតនៅមិនទាន់ចប់នៅឡើយទេ។ នៅសល់សន្លឹកឆ្នោតចំនួន ៤០០ ០០០សន្លឹកទៀតដែលនៅមិនទាន់រាប់បញ្ចូល។ សន្លឹកឆ្នោតទាំង ៤០០ ០០០សន្លឹកនោះជាសន្លឹកឆ្នោតរបស់កងទ័ព មន្រ្តីការទូត អ្នកទោស និងក្រុមបុគ្គលិកពេទ្យ រួមទាំងអ្នកកំពុងមានកូវីដ១៩។
ដូច្នេះលទ្ធផលចុងក្រោយអាចនឹងមានការផ្លាស់ប្តូរតិច ឬច្រើននៅក្រោយការរាប់បញ្ចូលសន្លឹកឆ្នោតទាំង ៤០០ ០០០សន្លឹក។ ទោះជាយ៉ាងណាក៏ដោយ និងអ្វីដែលច្បាស់ គ្មានគណបក្សណាមួយទទួលបានសំឡេងភាគច្រើន ហើយល្បែងនៃការចងសម្ព័ន្ធនឹងវិលត្រឡប់ជាថ្មីនៅក្នុងរដ្ឋាភិបាលចម្រុះថ្មី។
សេណារីយ៉ូនៃការចងសម្ព័ន្ធ
មាននិន្នាការចំនួនពីរដែលកំពុងប្រជែងគ្នានៅក្នុងការបោះឆ្នោតលើកនេះ គឺការប្រជែងគ្នារវាងគណបក្សស្តាំនិយមលីគូដរបស់លោកនេតាន់យ៉ាហ៊ូ និងគណបក្សកណ្តាលនិយម Yesh Atid របស់លោកយ៉ាអៀរ ឡាពីដដែលទទួលបានសំឡេងលំដាប់ទី១ និងលំដាប់ទី២។ សម្រាប់លោកនេតាន់យ៉ាហ៊ូ លោកបានប្រកាសពីការត្រៀមបង្កើតរដ្ឋាភិបាលចម្រុះស្តាំនិយមដែលមានស្ថិរភាព និងខ្លាំង។ នៅក្នុងន័យនេះ លោកនេតាន់យ៉ាហ៊ូបានប្រាប់ពីការបានទាក់ទងជាមួយគ្រប់គណបក្សស្តាំនិយមទាំងអស់ដែលទទួលបានអសនៈតិច ឬច្រើននៅក្នុងសភា។ បន្ទាប់មក លោកក៏អាចពឹងលើគណបក្សសាសនា និងគណបក្សស្តាំនិយមជ្រុល។
ចំណែកលោកឡាពីដវិញ លោកត្រៀមចាប់ដៃជាមួយក្រុមគណបក្សឆ្វេងនិយម និងកណ្តាលនិយម ព្រមទាំងត្រៀមទាញយកគណបក្សស្តាំនិយមមួយចំនួនដែលខកចិត្ត និងមិនសប្បាយចិត្តនឹងលោកនេតាន់យ៉ាហ៊ូ។ ក៏ប៉ុន្តែ គ្រប់គ្នាកំពុងផ្តោតចក្ខុលើគណបក្សស្តាំនិយមយ៉ាមីណារបស់លោកណាហ្វតាលី បេននែតដែលអាចទទួលបានអសនៈក្នុងចន្លោះពី ៧ ទៅ ៨អសនៈនៅក្នុងសភា។ បើលោកបេននែតងាកទៅគាំទ្រលោកនេតាន់យ៉ាហ៊ូ រដ្ឋាភិបាលថ្មីជារដ្ឋាភិបាលចម្រុះស្តាំនិយមដឹកនាំដោយលោកនេតាន់យ៉ាហ៊ូ។ ផ្ទុយទៅវិញ បើលោកបេននែតងាកទៅគាំទ្រលោកឡាពីដ រដ្ឋាភិបាលថ្មីជារដ្ឋាភិបាលចម្រុះឆ្វេងនិយមដឹកនាំដោយលោកឡាពីដ។
តែមកទល់ពេលនេះ លោកបេននែតនៅមិនទាន់បានបង្ហាញជំហរច្បាស់លាស់របស់ខ្លួននៅឡើយទេ។ លោកបេននែតបានថ្លែងនៅយប់ថ្ងៃអង្គារ ទី២៣ មីនាថា លោកនឹងប្រើសិទ្ធិនៃការទទួលខុសត្រូវរបស់លោកដោយផ្អែកលើគោលការណ៍តែមួយគត់ គឺអ្វីដែលល្អសម្រាប់ប្រទេស និងប្រជាជនអ៊ីស្រាអែល។ គួររម្លឹកថា លោកបេននែតធ្លាប់ធ្វើការជាមួយលោកនេតាន់យ៉ាហ៊ូ មុននឹងផ្តាច់ខ្លួនទៅបង្កើតគណបក្សខ្លួនឯង។ បើអ្វីៗនឹងមានដំណើរការដោយរលូន អ៊ីស្រាអែលនឹងមានរដ្ឋាភិបាលថ្មីដែលបន្តជារដ្ឋាភិបាលចម្រុះ។ បើមិនដូច្នោះទេ អ៊ីស្រាអែលអាចស្គាល់វិបត្តិនយោបាយច្រំដែលជាថ្មីដែលត្រូវរៀបចំបោះឆ្នោតសារឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ