វ៉ាក់សាំងកូវីដ១៩៖ បញ្ហាប្រសិទ្ធិភាព និងការយឺតយ៉ាវក្នុងការផលិត ធ្វើឲ្យអឺរ៉ុបកាន់តែឈឺក្បាល
ចុះផ្សាយនៅថ្ងៃ៖
ស្តាប់ - ០៨:០១
ប្រទេសសហភាពអឺរ៉ុប កំពុងតែជ្រួលច្របល់ ដោយសារតែបញ្ហាវ៉ាក់សាំងវប្រឆាំងកូវីដ១៩ ខណៈដែលម្នាក់ៗ បានរំពឹងសង្ឃឹមយ៉ាងខ្លាំងទៅលើវ៉ាក់សាំង ព្រោះថាវាជាវិធីតែមួយគត់ ដើម្បីបើកដំណើរការសេដ្ឋកិច្ចឡើងវិញ។ តែយ៉ាងណា ប៉ុន្មានថ្ងៃចុងក្រោយនេះ មានបញ្ហាជាច្រើនបានលេចរូបរាងឡើង ជុំវិញវ៉ាក់សាំងកូវីដ១៩ទាំងអស់ ដូចជាការយឺតយ៉ាវក្នុងការផលិត របស់មន្ទីរពិសោធន៍ធំៗទាំង៣ ដែលជាម្ចាស់វ៉ាក់សាំង។ មិនត្រឹមតែប៉ុណ្ណោះ ប្រសិទ្ធិភាពនៃវ៉ាក់សាំងរបស់មន្ទីរពិសោធន៍ AstraZeneca កំពុងតែចោទជាបញ្ហាថែមទៀត ទៅលើមនុស្សចាស់អាយុចាប់ពី៦៥ឆ្នាំឡើងទៅ។
វ៉ាក់សាំង AstraZeneca មិនមានល្អសម្រាប់មនុស្សចាស់អាយុលើស៦៥ឆ្នាំ?
កាលពីថ្ងៃព្រហស្បតិ៍ទី២៨មករា គណកម្មការវ៉ាក់សាំងអាល្លឺម៉ង់ បានចេញលិខិតជូនដំណឹងថា វ៉ាក់សាំងរបស់មន្ទីរពិសោធន៍ AstraZeneca គឺអាចយកទៅចាក់បានតែទៅលើមនុស្ស អាយុក្រោម៦៥ឆ្នាំទេ។ អ្នកជំនាញអាល្លឺម៉ង់ អះអាងថា គេសម្រេចបែបនេះ ដោយសារ គ្មានតួលេខច្រើនគ្រប់គ្រាន់ គួរឲ្យទុកចិត្ត ស្តីពីប្រសិទ្ធិភាពរបស់វា ទៅលើមនុស្សវ័យចំណាស់ អាយុលើស៦៥ឆ្នាំ។ តែយ៉ាងណា ខាងមន្ទីរពិសោធន៍ AstraZeneca គេបានប្រកែក ថាគេមានទិន្នន័យគ្រប់គ្រាន់ ធានាថា វ៉ាក់សាំងគេមានប្រសិទ្ធិភាព ទៅលើក្រុមមនុស្សអាយុលើសពី៦៥ឆ្នាំ។
វ៉ាក់សាំងរបស់ AstraZeneca ខាងទីភ្នាក់ងារឱសថអឺរ៉ុបមិនទាន់ ផ្តល់ភ្លើងខៀវ ឲ្យអាជ្ញាបណ្ណចែកចាយនៅឡើយទេ។ មន្ទីរពិសោធន៍នេះ បានដាក់ពាក្យសុំកាលពីថ្ងៃទី១២មករា។ នៅរសៀលថ្ងៃទី២៩មករា ទីភ្នាក់ងារឱសថអឺរ៉ុប នឹងធ្វើសន្និសីទកាសែត ពីទីក្រុងអាំស្ទែរដាំ ដើម្បីសម្រេចថាផ្តល់ ឬមិនផ្តល់អាជ្ញាបណ្ណចែកចាយ។ គិតត្រឹមពេលនេះ មានតែវ៉ាក់សាំង២ទេ គឺ របស់ Pfizer-BioNTech និងរបស់ Moderna ដែលគេបានផ្តល់អាជ្ញាបណ្ណ។
វ៉ាក់សាំងរបស់មន្ទីរពិសោធន៍ AstraZeneca ធ្លាប់ត្រូវគេសង្ឃឹមខ្លាំង ដោយសារតែវាមានគុណសម្បត្តិពិសេសមួយ គឺគេអារក្សាស្តុកទុកនៅក្នុងទឹកកកធម្មតា មិនចាំបាច់ដល់ទៅទូបង្កកធំៗ សីតុណ្ណហភាព -៨០°c អីទេ។ សម្រាប់ពេលនេះ យើងមិនអាចសន្និដ្ឋានថា ទីភ្នាក់ងារឱសថអឺរ៉ុប នឹងយល់ស្របតាមការយល់ឃើញរបស់ គណកម្មការវ៉ាក់សាំងអាល្លឺម៉ង់ដែរ ឬ ក៏អត់ទេ។ តែបើតាមការប៉ាន់ស្មាន គឺគេអាចផ្តល់អាជ្ញាបណ្ណ តែគេអាចបន្ថែមនូវអនុសាសន៍រួមពីលើ ថាត្រូវយកវ៉ាក់សាំងនោះទៅប្រើរបៀបណា។
ផលិតមិនទាន់ ប្រគល់វ៉ាក់សាំងមិនគ្រប់ចំនួនកំណត់
សហភាពអឺរ៉ុប បានបញ្ជាទិញវ៉ាក់សាំងរបស់មន្ទីរពិសោធន៍AstraZeneca ប្រមាណជា៤០០លានដូស ដើម្បីយកទៅចែកគ្នាតាមប្រទេសសមាជិក។ តែស្រាប់តែមន្ទីរពិសោធន៍នេះ បានជូនដំណឹងកាលពីសប្តាហ៍មុនថា គេមិនអាចផលិតឲ្យគ្រប់ចំនួនកំណត់ទេ ដោយសារតែមានបញ្ហាបច្ចេកទេស នៅទីតាំងផលិតមួយកន្លែង ធ្វើឲ្យទិន្នផលវ៉ាក់សាំងដែលផលិតបាន មានការធ្លាក់ចុះ។ ពោលគឺក្នុងជំហានដំបូង AstraZeneca អាចប្រគល់វ៉ាក់សាំងមកឲ្យអឺរ៉ុប បានត្រឹមតែ១ភាគ៤ នៃអ្វីដែលបានកំណត់ទុកប៉ុណ្ណោះ។
សហភាពអឺរ៉ុប មិនសុខចិត្តនឹងការប្រែក្រឡាស់បែបនេះទេ។ ប្រទេសសមាជិកខ្លះ បានចោទថា មន្ទីរពិសោធន៍នេះ កំពុងតែបំពាននឹងខសន្យា ឬអាចចង់លេងខ្សែលើ ជាមួយអឺរ៉ុប។ មានមតិខ្លះលើកឡើងថា មន្ទីរពិសោធន៍នេះ អាចយកវ៉ាក់សាំងទៅលក់ឲ្យអ្នកផ្សេង ដែលឲ្យថ្លៃជាងជាដើម។ សហភាពអឺរ៉ុប បានកោះហៅថ្នាក់ដឹកនាំមន្ទីរពិសោធន៍នេះ មកប្រជុំបន្ទាន់ភ្លាមៗ ដើម្បីសួរនាំឲ្យច្បាស់ ទាក់ទិននឹងការយឺតយ៉ាវនេះ។ ធម្មតាទេ មន្ទីរពិសោធន៍ បានធានាថាផលិតបានទំហំប៉ុននេះ ផ្តល់ឲ្យនៅកាលបរិច្ឆេទកំណត់មួយ តែដល់តែមកផ្លាស់ប្តូរវិញ បែបនេះ វាជារឿងមិនត្រឹមត្រូវឡើយ។
ដើម្បីដោះស្រាយបញ្ហា ខាងសហភាពអឺរ៉ុប បានទាមទារចុះទៅឆែកឆេរ ត្រួតពិនិត្យ នៅទីតាំងផលិតវ៉ាក់សាំងរបស់ AstraZeneca ដែលគេអះអាងថាមានបញ្ហាបច្ចេកទេសនោះ។ យោងតាមការជូនដំណឹងពីទីភ្នាក់ងារសហព័ន្ធបែ៊លហ្សិក គឺគេបានដកហូតយកឯកសារ និងទិន្នន័យជាច្រើន ពីមន្ទីរពិសោធន៍AstraZeneca ដើម្បីយកមកស្រាវជ្រាវ ថាពិតជាមានបញ្ហាបច្ចេកទេសមែនឬយ៉ាងណា។ ការងារនេះ កំពុងដំណើរការមិនទាន់ចប់ទេ!
ផែនការយុទ្ធសាស្ត្រចាក់វ៉ាក់សាំងរបស់ប្រទេសអឺរ៉ុប ត្រូវប្រែប្រួល
បញ្ហាប្រសិទ្ធិភាព និងការយឺតយ៉ាវក្នុងការផ្តល់ឲ្យនូវវ៉ាក់សាំងនេះ គឺវវាអាចមានផលប៉ះពាល់ខ្លាំងណាស់ ទៅដល់យុទ្ធនាការចាក់វ៉ាក់សាំង នៅតាមប្រទេសទាំងនេះ។ ដូចយើងដឹងហើយ ប្រមាណមួយឆ្នាំមកហើយ ដែលអឺរ៉ុប ជួបបញ្ហាដោយសារកូវីដ១៩ សេដ្ឋកិច្ចត្រូវរាំងស្ទះសឹងតែទាំងស្រុង។ ប្រជាជនអឺរ៉ុប មិនអាចបន្តអត់ទ្រាំ សំងំក្នុងផ្ទះ តទៅទៀតទេ។ ម្លោះហើយគេសង្ឃឹមយ៉ាងខ្លាំងទៅលើវ៉ាក់សាំង។ ប្រជាជនបានដាក់សំពាធទៅលើរដ្ឋាភិបាល ថាត្រូវតែចាក់វ៉ាក់សាំងឲ្យបានលឿនបំផុត ដើម្បីអាចបើកប្រទេស បើកដំណើរការសេដ្ឋកិច្ចឡើងវិញ។
ប្រសិនបើវ៉ាក់សាំង របស់AstraZeneca មិនមានប្រសិទ្ធិភាព ទៅលើមនុស្សចាស់អាយុលើសពី៦៥ឆ្នាំមែន គឺមានន័យថា ប្រទេសអឺរ៉ុប ត្រូវតែរៀបចំសើរើឡើងវិញទាំងស្រុង នូវយុទ្ធសាស្ត្រចាក់វ៉ាក់សាំង ព្រោះថាកន្លងមកនេះ គឺគេបានផ្តោតអាទិភាព ចាក់ទៅលើមនុស្សចាស់មុនគេ ព្រោះគេគិតថា ងាយប្រឈមខ្លាំងនឹងកូវីដ។
បញ្ហាចោទចំបងមួយទៀត គឺថាគេត្រូវចាក់ដូសទី២ នៅចន្លោះ៤ ទៅ ៦សប្តាហ៍ក្រោយ។ បញ្ហានេះ តោងគេរៀបចំកាលវិភាគចាក់ ឲ្យបានច្បាស់លាស់បំផុត ដើម្បីគោរពរយៈពេលគំលាតនេះ។ តែបើក្នុងករណី វ៉ាក់សាំងមានមិនគ្រប់ ផ្តល់ឲ្យមិនទាន់ថ្ងៃកំណត់ គឺវានឹងធ្វើឲ្យក្រឡាប់ចាក់កាលវិភាគចាក់ដូសទី២។ ការចាក់លើកទី២នេះ បើចាំយូរពេក ក្រចាក់ គឺវាអាចធ្វើឲ្យបាត់បង់គុណប្រយោជន៍ នៃវ៉ាក់សាំងដែលចាក់លើកទី១ទាំងស្រុងក៏ថាបានដែរ ពោលគឺវាធ្វើឲ្យប៉ះពាល់ដល់ប្រសិទ្ធិភាព នៃយុទ្ធនាការចាក់វ៉ាក់សាំងទាំងមូលតែម្តង។
រឿងវ៉ាក់សាំងយឺត ផលិតមិនទាន់នេះ មិនមែនតែ AstraZeneca មួយទេ។ មន្ទីរពិសោធន៍ Pfizer-BioNTech និង Moderna ក៏សុទ្ធតែបានជូនដំណឹងថា នឹងមានការយឺតយ៉ាវដែរ។ ម្លោះហើយ ប្រទេសអឺរ៉ុប កំពុងតែភ័យជ្រួលច្របល់ខ្លាំងណាស់ ខ្លាចក្រែងគ្មានវ៉ាក់សាំងគ្រប់គ្រាន់។
វ៉ាក់សាំងមិនសូវមានប្រសិទ្ធិភាព ជាមួយកូវីដ១៩ទម្រង់បំប្លែងខ្លួនថ្មីមកពីអាហ្វ្រិកខាងត្បូង
គេបារម្ភខ្លាចថា វ៉ាក់សាំងទប់មិនជាប់ជាមួយកូវីដបំប្លែងខ្លួនថ្មី។ មន្ទីរពិសោធន៍ Pfizer-BioNTech អះអាងថា វ៉ាក់សាំងគេមានប្រសិទ្ធិភាពល្អ ទោះទម្រង់បំប្លែងខ្លួនមួយណាក៏ដោយ។ តែដោយឡែក មន្ទីរពិសោធន៍ Moderna លើកឡើងថា វ៉ាក់សាំងគេចុះអន់ប្រសិទ្ធិភាពបន្តិច ជាមួយនឹងកូវីដទំរង់បំប្លែងខ្លួនអាហ្វ្រិកខាងត្បូង។ Moderna អះអាងថាគេកំពុងស្រាវជ្រាវធ្វើវ៉ាក់សាំងថ្មីមួយទៀត។
ដោយឡែកកាលពីថ្ងៃទី២៨មករា មន្ទីរពិសោធន៍នៅអាមេរិកមួយទៀត ឈ្មោះ Novavax បានអះអាងថាវ៉ាក់សាំងកូវីដ១៩របស់គេ មានប្រសិទ្ធិភាពប្រមាណ៨៩.៣% ដោយយោងលើលទ្ធផលសាកល្បងលើកទី៣។ ក៏ប៉ុន្តែជាមួយនឹងកូវីដ១៩ទម្រង់បំប្លែងខ្លួនមកពីអាហ្វ្រិកខាងត្បូងវិញ មន្ទីរពិសោធន៍នេះ លើកឡើងថា ប្រសិទ្ធិភាពចុះថយ។ គេនឹងស្រាវជ្រាវធ្វើវ៉ាក់សាំងថ្មីមួយទៀតដែរ សម្រាប់កូវីដមកពីអាហ្វ្រិកខាងត្បូងនេះ។
ដូច្នេះយើងឃើញថា ការព្រួយបារម្ភនៅតែមានខ្លាំងណាស់ ជាពិសេសជាមួយកូវីដបំប្លែងខ្លួនថ្មីមកពីអង់គ្លេស និងអាហ្វ្រិកខាងត្បូងនេះ។ អង្គការសុខភាពពិភពលោក ក៏ដូចជាអាជ្ញាធរប្រទេសនៅអឺរ៉ុប បានអំពាវនាវថាត្រូវតែបន្តការប្រុងប្រយ័ត្ន ចាត់វិធានការ ទប់កូវីដទំរង់ថ្មីទាំងនេះ កុំឲ្យឆ្លងរាលដាលច្រើនចូលមកអឺរ៉ុប។ បើទប់មិនជាប់ទេ គឺបញ្ហានេះគ្មានថ្ងៃចប់ទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ