អង់គ្លេសបានអនុញ្ញាតឲ្យប្រើវ៉ាក់សាំងបង្ការកូវីដ១៩ របស់មន្ទីរពិសោធន៍ AstraZeneca/Oxford
ចុះផ្សាយនៅថ្ងៃ៖
ស្តាប់ - ០៦:៤៧
នៅថ្ងៃពុធ ទី៣០ ធ្នូនេះ រដ្ឋាភិបាលអង់គ្លេសបានយល់ព្រមតាមអនុសាសន៍របស់ទីភ្នាក់ងារឱសថឲ្យប្រើវ៉ាក់សាំងបង្ការកូវីដ១៩ របស់មន្ទីរពិសោធន៍ AstraZeneca/Oxford។ ការយល់ព្រមនេះបានធ្វើឲ្យអង់គ្លេសក្លាយជាប្រទេសប្រើវ៉ាក់សាំងបង្ការកូវីដ១៩ របស់មន្ទីរពិសោធន៍ AstraZeneca/Oxford ដំបូងគេ បន្ទាប់ពីអនុញ្ញាតឲ្យប្រើវ៉ាក់សាំងរបស់មន្ទីរពិសោធន៍ Pfizer/BioNTech។ ដោយឡែក ក្នុងថ្ងៃដែលអង់គ្លេសបានយល់ព្រមឲ្យប្រើវ៉ាក់សាំងរបស់AstraZeneca/Oxford មន្ទីរពិសោធន៍មួយរបស់ចិនឈ្មោះ Sinopharm បានប្រកាសថា វ៉ាក់សាំងបង្ការកូវីដ១៩ របស់ខ្លួនមានប្រសិទ្ធិភាពជាង ៧៩%។
វ៉ាក់សាំងបង្ការកូវីដ១៩ របស់មន្ទីរ AstraZeneca/Oxford មានភាពងាយស្រួលទុកដាក់ និងមានតម្លៃថោកសមរម្យ។ ងាយស្រួលទុកដាក់ ព្រោះវ៉ាក់សាំងរបស់មន្ទីរពិសោធន៍ AstraZeneca/Oxfordអាចរក្សាទុកនៅក្នុងទូរទឹកកកធម្មតាដែលមានសីតុណ្ហភាពចន្លោះពី ២ ទៅ ៨អង្សារ។ គឺខុសឆ្ងាយពីវ៉ាក់សាំងរបស់មន្ទីរពិសោធន៍ Pfizer/BioNTechដែលគេត្រូវរក្សាទុកនៅក្នុងទូរបង្កកដែលមានសីតុណ្ហភាពដល់ទៅ -៧០អង្សារក្រោមសូន្យ និង -២០អង្សារក្រោមសូន្យសម្រាប់វ៉ាក់សាំងរបស់មន្ទីរពិសោធន៍ Moderna។ និយាយពីតម្លៃវិញ វ៉ាក់សាំងរបស់ AstraZeneca/Oxfordមានតម្លៃក្នុងរង្វង់តែ ២អឺរ៉ូកន្លះប៉ុណ្ណោះក្នុងមួយដូស។ ចំណែកវ៉ាក់សាំងរបស់ Pfizer/BioNTechមានតម្លៃប្រមាណ ១៧អឺរ៉ូក្នុងមួយដូស និងមានតម្លៃដល់ទៅជាង ៣០អឺរ៉ូក្នុងមួយដូសសម្រាប់វ៉ាក់សាំងរបស់មន្ទីរពិសោធន៍ Moderna។
ទាក់ទងនឹងប្រសិទ្ធិភាព។ ខណៈដែលមន្ទីរពិសោធន៍ Pfizer/BioNTechបានប្រកាសពីប្រសិទ្ធិភាពវ៉ាក់សាំងរបស់ខ្លួនចំនួន ៩៥% និង ៩៤,១% សម្រាប់វ៉ាក់សាំងរបស់មន្ទីរពិសោធន៍ Modernaមន្ទីរពិសោធន៍ AstraZeneca/Oxford បានប្រកាសត្រឹម ៧០%។ តែបានបញ្ជាក់ថា ប្រសិទ្ធិភាពរបស់វាអាចឡើងដល់ ១០០% ជាមួយនឹងការចាក់ចំនួន ២ដូស។ ប្រសិទ្ធិភាពវ៉ាក់សាំងរបស់ AstraZeneca/Oxford នេះក៏ត្រូវបានទទួលស្គាល់ដោយទស្សនាវដ្តីវិទ្យសាស្រ្ត The Lancet ដែរ។ លើសពីនេះ AstraZeneca/Oxford បានប្រកាសថា វ៉ាក់សាំងរបស់ខ្លួនមិនត្រឹមបង្ការមេរោគកូវីដ១៩ ធម្មតាមួយគត់ទេ តែក៏អាចបង្ការមេរោគកូវីដ១៩ បំប្លែងខ្លួនដែរ។
មេរោគកូវីដ១៩ បំប្លែងខ្លួនដែលមានប្រភពក្នុងប្រទេសអង់គ្លេស និងកំពុងឆ្លងរាលដាលចូលទៅក្នុងប្រទេសមួយចំនួននៅអឺរ៉ុប អាស៊ី និងនៅអាមេរិក។ រដ្ឋាភិបាលអង់គ្លេសបានកម្ម៉ង់ទិញវ៉ាក់សាំងរបស់ AstraZeneca/Oxfordចំនួន ១០០លានដូស ក្នុងនោះមាន ៤០លានដូសនឹងទទួលបានពីពេលនេះទៅខែមីនា ឆ្នាំ ២០២១។ មន្ទីរពិសោធន៍ AstraZeneca/Oxfordបានធានាថា ខ្លួនអាចផលិតវ៉ាក់សាំងបានប្រមាណ ៣ ០០០លានដូសសម្រាប់តម្រូវការពិភពលោកនៅឆ្នាំ ២០២១។
វ៉ាក់សាំងបង្ការកូវីដ១៩ ផលិតដោយចិនមានប្រសិទ្ធិភាព ៧៩,៣៤%
បន្ទាប់ពីវ៉ាក់សាំងរបស់មន្ទីរពិសោធន៍នៅបស្ចិមលោក មន្ទីរពិសោធន៍ចិនឈ្មោះ Sinopharm បានប្រកាសក្នុងថ្ងៃពុធ ទី៣០ ធ្នូថា វ៉ាក់សាំងបង្ការកូវីដ១៩ របស់ខ្លួនមានប្រសិទ្ធិភាព ៧៩,៣៤%។ គួរបញ្ជាក់ថា ចិនបានខ្នះខ្នែង ស្រាវជ្រាវស្វែងរកវ៉ាក់សាំងបង្ការកូវីដ១៩ តាំងពីដំបូងទីដោយបានចាយលុយយ៉ាងច្រើនសម្បើម។ មានមន្ទីរពិសោធន៍ចិនប្រមាណជា ១៥មន្ទីរពិសោធន៍បានចូលរួមប្រកួតប្រជែងរកវ៉ាក់សាំង។ តែមកទល់ពេលនេះ មានតែមន្ទីរពិសោធន៍ចំនួន ៥ គត់ដែលបានធ្វើការសាកល្បងវ៉ាក់សាំងរបស់ខ្លួននៅក្នុងដំណាក់ការចុងក្រោយដោយចាក់លើមនុស្សជាច្រើនម៉ឺននាក់។
Sinopharm ជាមន្ទីរពិសោធន៍ទី១ របស់ចិនដែលបានប្រកាសពីប្រសិទ្ធិភាពវ៉ាក់សាំងរបស់ខ្លួនក្នុងកម្រិត ៧៩,៣៤%។ អត្រាប្រសិទ្ធិភាពនេះនៅទាប បើធៀបនឹងវ៉ាក់សាំងរបស់Pfizer/BioNTechឬ Moderna។ រហូតមកដល់ពេលនេះ នៅមិនទាន់មានវ៉ាក់សាំងបង្ការកូវីដ១៩ របស់ចិនណាមួយត្រូវបានទីភ្នាក់ងារឱសថចិនអនុញ្ញាតឲ្យប្រើ និងដាក់លក់ជាសាធារណៈទេ។ តែនារដូវក្រៅកន្លងទៅ រដ្ឋអំណាចក្រុងប៉េកាំងបានអនុញ្ញាតឲ្យប្រើវ៉ាក់សាំងចិននៅក្នុងករណីបន្ទាន់ចាំបាច់ ដូចជាចាក់លើបុគ្គលិកសុខាភិបាល អ្នកប្រកបមុខរបរមានហានិភ័យ ឬមួយក៏សិស្ស និស្សិត និងមន្រ្តីការទូតដែលត្រូវធ្វើដំណើរទៅបរទេស។ គិតជាសរុបមកទល់ពេលនេះ ចិនបានប្រើវ៉ាក់សាំងខ្លួនចាក់ទៅលើពលរដ្ឋខ្លួនយ៉ាងតិច ១លាននាក់។
ចិនថា វ៉ាក់សាំងបង្ការកូវីដ១៩ របស់ខ្លួនជាទ្រព្យសាធារណៈ
បេក្ខជនវ៉ាក់សាំងបង្ការកូវីដ១៩ របស់ប្រទេសណាក៏ចង់ចេញវ៉ាក់សាំងរបស់ខ្លួនឲ្យបានមុនគេ មុនឯងដែរ។ តែបើចេញមកហើយស្រាប់តែប្រើមិនកើត មានបញ្ហា និងគ្មានប្រសិទ្ធិភាពដូចដែលបានសង្ឃឹមទុកក៏វាគ្មានប្រយោជន៍អ្វីដែរ។ លោក Zheng Zhongwei មន្រ្តីក្រសួងសុខាភិបាលចិនទទួលបន្ទុកវ៉ាក់សាំងដែលគេដាក់នាមជាលោកវ៉ាក់សាំងបានគូសបញ្ជាក់ថា ចិនត្រូវអនុវត្តតាមគោលការណ៍ដោយគោរពវិធានការវិទ្យាសាស្រ្ត និងធានាថា លទ្ធផលតេស្តិ៍របស់វ៉ាក់សាំងនីមួយៗពិតជាបានឆ្លើយតបតាមស្តង់ដារត្រឹមត្រូវ។ តាមលោក Zheng បញ្ហាមិនមែនស្ថិតនៅលើរឿងយឺត ឬលឿនទេ។
មែនទែនទៅ ចិនហាក់ដូចជាមិនត្រូវការវ៉ាក់សាំងបង្ការកូវីដ១៩ យ៉ាងតក់ក្រហល់ដូចប្រទេសមួយចំនួនទេ ព្រោះថាសព្វថ្ងៃនេះ រដ្ឋអំណាចក្រុងប៉េកាំងកំចាត់បាន និងគ្រប់គ្រងជំងឺកូវីដ១៩ បានល្អ។ ចិនក៏នៅមិនទាន់មានគម្រោងនាំចេញវ៉ាក់សាំងរបស់ខ្លួនទៅកាន់ប្រទេសបស្ចិមលោកដែរ។ គឺនៅអាស៊ី អាហ្រ្វិក និងនៅអាមេរិកខាងជើងដែលចិនអាចនាំវ៉ាក់សាំងរបស់ខ្លួនទៅមុនគេ។ រដ្ឋាភិបាលចិនធ្លាប់បានសន្យាថា វ៉ាក់សាំងបង្ការកូវីដ១៩ ដែលផលិតដោយមន្ទីរពិសោធន៍ចិនជាទ្រព្យសាធារណៈដែលចិននឹងលក់ក្នុងតម្លៃថោក និងអាចផ្តល់ឲ្យដោយឥតគិតថ្លៃចំពោះក្រុមប្រទេសកំពុងអភិវឌ្ឍ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ