ចិន និងសហភាពអឺរ៉ុបខិតកាន់តែជិត ដល់ការចុះកិច្ចព្រមព្រៀងស្តីពីការវិនិយោគរវាងគ្នា
ចុះផ្សាយនៅថ្ងៃ៖
ស្តាប់ - ០៧:៥០
ចិន និងសហភាពអឺរ៉ុបកំពុងបោះជំហាន ទៅសម្រេចជិតបានកិច្ចព្រមព្រៀងស្តីពីការវិនិយោគរវាងគ្នា ក្រោយពី ការចរចាអស់ ៧ឆ្នាំ។ សហភាពអឺរ៉ុបអាចចុះកិច្ចព្រមព្រៀង ស្តីពីការវិនិយោគជាមួយចិន ឲ្យបានមុនដំណាច់ឆ្នាំនេះ គឺជាកម្មវត្ថុរបស់លោកស្រីនាយករដ្ឋមន្រ្តី អាល្លឺម៉ង់ ដែលត្រូវធ្វើប្រធានផ្លាស់វេន សហភាពអឺរ៉ុប រហូត ដល់ថ្ងៃទី៣១ធ្នូ ឆ្នាំនេះ។ តើកិច្ចព្រមព្រៀងស្តីពីការវិនិយោគ ចិន អឺរ៉ុប នឹងផ្តល់ប្រយោជន៍អ្វីខ្លះដល់ភាគីទាំងពីរ?
កិច្ចព្រមព្រៀងស្តីពីការវិនិយោគ ដែលចិន និងសហភាពអឺរ៉ុបបានបើកការចរចាតាំងពីចុងឆ្នាំ ២០១៣ សំដៅ ការពារការវិនិយោគរបស់សហភាពអឺរ៉ុប នៅទឹកដីចិន និងការវិនិយោគរបស់ចិន នៅទឹកដី អឺរ៉ុប។ កិច្ចព្រមព្រៀងនេះសំខាន់ណាស់ បើគេមើលទៅលើទំហំនៃការវិនិយោគរវាងភាគីទាំងពីរ។ ការវិនិយោគរបស់សហភាពអឺរ៉ុបនៅ ចិន មានតម្លៃ ១៥០ពាន់លានអឺរ៉ូ ចំណែកចិនវិញ វិនិយោគក្នុងបណ្តាប្រទេសសមាជិកសហភាពអឺរ៉ុប ក្នុងទឹកប្រាក់ ១៣០ពាន់លានអឺរ៉ូ។ នៅក្នុងរយៈពេល ១០ឆ្នាំចុងក្រោយនេះ សហភាពអឺរ៉ុប វិនិយោគ ជាមធ្យម ៧ពាន់លានអឺរ៉ូ ក្នុងមួយឆ្នាំៗ ក្នុងពេលចិនវិនិយោគជាមធ្យម ជាង ៥ពាន់លានអឺរ៉ូ។
ដោយសារតែការវិនិយោគមានទំហំ ក្នុងទឹកប្រាក់រាប់ពាន់លានអឺរ៉ូ ភាគី ទាំងពីរ ជាពិសេស សហភាពអឺរ៉ុប បានចរចា ទាមទារច្រើន មុននឹងអាចឈានទៅ ចុះកិច្ចព្រមព្រៀងរវាងគ្នា ស្តីពីការវិនិយោគ។
នៅ ចំណែកចិន ទីក្រុងប៉េកាំង ចង់ចូលប្រើទីផ្សារសេរីរបស់អឺរ៉ុប ដោយទាមទារឲ្យសហភាពអឺរ៉ុប ឈប់ការពារ រឹតត្បិត ការវិនិយោគបរទេស ទៅលើវិស័យសំខាន់ៗមួយចំនួន ដែល អឺរ៉ុបចាត់ទុកជាវិស័យគន្លឹះ យុទ្ធសាស្រ្ត ដូចជា វិស័យទូរគមនាគមន៍ និងថាមពលជាដើម។ ចិនចង់បានការធានាឲ្យមានវិនិយោគរបស់ខ្លួន ក្នុងវិស័យសំខាន់ពីរនេះរបស់អឺរ៉ុប។ ត្រូវដឹងថា សព្វថ្ងៃ នេះ ចិន មិនសប្បាយចិត្តទេ ដែលឃើញ ប្រព័ន្ធ 5G របស់ក្រុមហ៊ុន Huawei ត្រូវផាត់ចេញពីទីផ្សារ នៅក្នុងប្រទេសអឺរ៉ុប ជាច្រើន ដោយសារតែហេតុផលការសម្ងាត់ និងការពារសន្តិសុខរបស់អឺរ៉ុបនោះ។
នៅភាគីអឺរ៉ុបវិញ គេចង់ឃើញក្រុមហ៊ុនអឺរ៉ុបទទួលបានសិទ្ធិ វិនិយោគនៅ ប្រទេសចិន ដូចដែលក្រុមហ៊ុនចិន បានទទួល ពីការវិនិយោគនៅ ទឹកដី អឺរ៉ុប។ សហភាព អឺរ៉ុប ទាមទារចង់បានខ្លាំងឲ្យមានការធានាដល់ការគោរព កម្មសិទ្ធិបញ្ញា របស់ក្រុមហ៊ុនអឺរ៉ុប នៅ ទឹកដី ចិន។ ទៅតាមសេចក្តីព្រាងនៃកិច្ចព្រមព្រៀង សហភាពអឺរ៉ុបបដិសេធ រាល់ការទាមទារឲ្យមានការផ្ទេរបច្ចេកវិទ្យា របស់ក្រុមហ៊ុនអឺរ៉ុប ដូចដែលចិនធ្លាប់ធ្វើកន្លងមក ហើយចិន ត្រូវបង្ហាញតម្លាភាព ពីរឿងផ្គត់ផ្គង់ឧបត្ថម្ភទុនរបស់រដ្ឋ សម្រាប់ក្រុមហ៊ុនឯកជន។ ចំណុចសំខាន់ចុងក្រោយ ហើយដែលធ្វើឲ្យការចរចា នៅជាប់គាំង ខ្លាំងគឺ បញ្ហាសង្គម និងបរិស្ថាន ដែលជាការកំណត់ចង់បានរបស់សហភាពអឺរ៉ុប។ ប៉ុន្តែ នៅថ្ងៃចន្ទម្សិលមិញ គណៈកម្មការអឺរ៉ុបដែលទទួលបន្ទុកការចរចាជាមួយភាគីចិន បាននិយាយប្រាប់ថ្នាក់ដឹកនាំអឺរ៉ុប ថា ប្រទេសចិនបានយល់ព្រម តាមសំណើរបស់អឺរ៉ុប។
តើចិនធ្វើសម្បទានអ្វីខ្លះ?
កន្លងមក ដើម្បី បញ្ចុះបញ្ចូលសហភាព អឺរ៉ុប ឲ្យចុះកិច្ចព្រមព្រៀងជាមួយខ្លួន ភាគីចិនបាន យល់ព្រមឲ្យក្រុមហ៊ុនអឺរ៉ុប អាចវិនិយោគ នៅក្នុងវិស័យសំខាន់ៗ ដូចជា ទូរគមនាគមន៍ មន្ទីរពេទ្យឯកជន វិស័យហិរញ្ញវត្ថុ ហើយនិងគមនាគមន៍ នៅប្រទេសចិន។ ប៉ុន្តែ ការបន្ទន់ជំហររបស់ចិន នៅមិនទាន់គ្រប់គ្រាន់ ជាពិសេស នៅក្រោយមានរឿងអាស្រូវស្តីពីការងារចាប់បង្ខំ ទៅលើប្រជាជនអ៊ុយហ្គួរ នៅខេត្តស៊ីនជាំង។
អ្នកជំនាញ និងអង្គការការពារសិទ្ធិមនុស្ស ជាច្រើនបានចោទប្រកាន់ទីក្រុងប៉េកាំង បានចាប់ឃុំជនជាតិអ៊ុយហ្គួរប្រមាណ ១លាននាក់ នៅក្នុងជំរំលត់ដំ និងចាប់បង្ខំឲ្យពួកគេ ធ្វើការងារធ្ងន់ធ្ងរ សម្រាប់ក្រុមហ៊ុនចិន។
នៅ សប្តាហ៍មុន រដ្ឋាភិបាលបារាំងដែលជាសមាជិកមួយរបស់សហភាពអឺរ៉ុបបានប្រកាសហើយថា បារាំងនឹងមិនគាំទ្រឲ្យមានកិច្ចព្រមព្រៀង បើសិន បក្សកុម្មុយនិស្តចិន មិនព្រមផ្តល់សច្ចាប័នលើអនុសញ្ញា របស់អង្គការពលកម្មអន្តរជាតិ ដែលមានគោលដៅ ហាមឃាត់ ពលកម្មដោយចាប់បង្ខំ។
សូមបញ្ជាក់ថា សហភាពអឺរ៉ុបបានទាមទារឲ្យចិនផ្តល់សច្ចាប័នទៅលើអនុសញ្ញាទាំង៨របស់អង្គការពលកម្មអន្តរជាតិ ប៉ុន្តែ ចិនរហូតមកដល់ពេលនេះបានផ្តល់សច្ចាប័នតែ៤ ប៉ុណ្ណោះ ចំណែកអនុសញ្ញា សំខាន់ពីរ ដែលហាមឃាត់ការងារចាប់បង្ខំ ហើយនិងការធានាសេរីភាពសហជីព នោះ គឺចិន នៅមិនទាន់ ផ្តល់សច្ចាប័ននៅឡើយទេ។
ប៉ុន្តែ គណៈកម្មការអឺរ៉ុប ដែលទទួលបន្ទុកការចរចា បានប្រាប់រដ្ឋសមាជិកអឺរ៉ុប កាលពី ថ្ងៃចន្ទម្សិលមិញថា ចិន បានយល់ព្រម តាមសំណើរបស់អឺរ៉ុប ទៅលើចំណុចសំខាន់ពីរខាងលើនេះហើយ។
បើសិនចិន យល់ព្រមតាមសំណើ ការចង់បានរបស់ខ្លួនហើយនោះ អឺរ៉ុប នឹងមើលមិនឃើញថា នៅមានចំណុចខ្ទាស់អ្វីផ្សេង ទៀតនោះទេ។ តាមមន្រ្តីទូតអឺរ៉ុប ចិន និងសហភាពអឺរ៉ុបនឹងអាចរកឃើញកិច្ចព្រមព្រៀង យ៉ាងយូរ នៅសប្តាហ៍នេះ ឲ្យបានមុនដាច់ឆ្នាំ ២០២០។
ហេតុអ្វី ចិនយល់ព្រមធ្វើសម្បទាន ទៅឲ្យអឺរ៉ុប នៅពេលនេះ?
អាមេរិកក្រោមការដឹកនាំរបស់លោកដូណាល់ ត្រាំ បានបង្កើតសង្គ្រាមពាណិជ្ជកម្មជាមួយចិន និងបង្កើតឧបសគ្គ ចោទប្រកាន់ សូម្បីអឺរ៉ុប ដែលជាសម្ព័ន្ធមិត្ត។ ប៉ុន្តែ នៅ ប៉ុន្មានសប្តាហ៍ខាងមុខ អាមេរិក នឹងលែងមានលោកដូណាល់ ត្រាំ ជាប្រធានាធិបតី ប៉ុន្តែ ជាលោកចូ បៃដិន ដែលជាមិត្តរបស់សហភាពអឺរ៉ុប។ នេះជាហេតុផលសំខាន់មួយដែលធ្វើឲ្យចិន សម្រុក ជំរុញការចរចា ឲ្យបានជាមួយភាគីអឺរ៉ុប។ ចិន ដែលមានជម្លោះពាណិជ្ជកម្មជាមួយអាមេរិក បានព្យាយាមទាក់ទាញអឺរ៉ុបឲ្យមកចុះកិច្ចព្រមព្រៀងវិនិយោគជាមួយខ្លួន ឲ្យបានមុនពេលដែលលោកចូ បៃដិន ចូលស្បថកាន់តំណែងជាប្រធានាធិបតី បន្តពីលោកដូណាល់ ត្រាំ នៅ ថ្ងៃទី ២៩មករាឆ្នាំក្រោយ។
ក្នុងក្រសែភ្នែក ចិន មានជំហរផ្ទុយពីលោកដូណាល់ ត្រាំ រដ្ឋបាលលោកចូ បៃដិននឹងត្រលប់មកជានាជាមួយសម្ព័ន្ធមិត្តអឺរ៉ុប ដែលនឹងធ្វើឲ្យចិន ពិបាកចរចា ឬ បង្កើតកិច្ចព្រមព្រៀង ណាមួយជាមួយសហភាព អឺរ៉ុប។ អឺរ៉ុបផ្ទាល់ក៏យល់ដែរថា នៅពេលលោកចូ បៃដិន ចូលកាន់តំណែងជាប្រធានាធិបតីថ្មី នោះ រដ្ឋបាលអាមេរិក ថ្វីត្បិតថា ជាសម្ព័ន្ធមិត្តរបស់អឺរ៉ុប ប៉ុន្តែ ប្រាកដជានឹងដាក់សម្ពាធលើអឺរ៉ុប ដូចមុន ដោយបង្ខំឲ្យអឺរ៉ុប លះបង់ចោល ការចុះកិច្ចព្រមព្រៀង ជាមួយចិន។
កង្វល់របស់ចិន និងអឺរ៉ុប បានស្តែងឡើងរួចហើយ នៅពេលទីប្រឹក្សាសន្តិសុខជាតិរបស់លោកចូ បៃដិន បាននិយាយនៅសប្តាហ៍មុនថា អាមេរិកនឹងពិភាក្សាជាមួយភាគីអឺរ៉ុប ដើម្បី និយាយប្រាប់ភាគីអឺរ៉ុបពីកង្វល់របស់អាមេរិក នៅចំពោះមុខការអនុវត្តនយោបាយសេដ្ឋកិច្ចរបស់ចិន។
បន្ថែមពីលើសម្ពាធរបស់អាមេរិក ទំនាក់ទំនងរវាងចិន និងអឺរ៉ុបផ្ទាល់ក៏មិនសូវជារលូនណាស់ណាទេ ជាពិសេស ដោយសារតែ រឿង ចិនអនុវត្តច្បាប់ការពារសន្តិសុខនៅទីក្រុងហុងកុង ចាប់សកម្មជនសិទ្ធិមនុស្ស ចាប់អ្នកកាសែត ដែលរាយការណ៍ព័ត៌មានពីការរីករាតត្បាតជំងឺកូវីដ។
ការរំលោភសិទ្ធិមនុស្សទាំងអស់នេះ គឺបានប៉ះពាល់ដល់គោលការណ៍គោរពសិទ្ធិមនុស្សរបស់សហភាពអឺរ៉ុប ដែលនឹងអាចធ្វើឲ្យសភាអឺរ៉ុប អាចបោះឆ្នោត ទាត់ចោល បើទោះបីជាគណៈកម្មការអឺរ៉ុបអាចរកឃើញ កិច្ចព្រមព្រៀងស្តីពីការវិនិយោគជាមួយចិន នៅមុន ដំណាច់ឆ្នាំនេះក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ