បារាំងរកឃើញករណីមេរោគកូវីដ១៩បំប្លែងខ្លួន ខណៈយុទ្ធនាការចាក់វ៉ាក់សាំងត្រៀមចាប់ផ្តើម
ចុះផ្សាយនៅថ្ងៃ៖
ស្តាប់ - ០៨:០៣
នៅបារាំង អាជ្ញាធរសុខាភិបាល បានប្រកាសនៅថ្ងៃសៅរ៍ ទី២៦ធ្នូថា គេបានរកឃើញករណីដំបូងគេ ដែលបុរសម្នាក់មានផ្ទុកមេរោគជំងឺកូវីដ១៩ ទំរង់ថ្មី ដែលវាបានបំប្លែងខ្លួនពីទំរង់ដើម។ កូវីដ១៩បំប្លែងខ្លួនថ្មីនេះ ត្រូវបានគេរកឃើញ នៅប្រទេសអង់គ្លេស ហើយបានបណ្តាលឲ្យមានការព្រួយបារម្ភយ៉ាងខ្លាំង ដោយគេសង្ស័យថា វាមានកម្លាំងឆ្លងរាលដាលខ្លាំងជាងមេរោគដើម។ ទន្ទឹមនឹងនេះដែរ វ៉ាក់សាំងប្រឆាំងកូវីដ១៩ ត្រូវបានគេដឹកចែកចាយទៅដល់បារាំង និងប្រទេសសហភាពអឺរ៉ុបផ្សេងទៀតហើយ នៅព្រឹកថ្ងៃសៅរ៍នេះ ដោយយុទ្ធនាការចាក់ នឹងចាប់ផ្តើមធ្វើនៅថ្ងៃអាទិត្យ។
មានករណីបុរសម្នាក់ នៅទីក្រុង Tours ភាគកណ្តាលប្រទេសបារាំង មានផ្ទុកមេរោគជម្ងឺកូវីដ១៩ ដែលមានទំរង់បំប្លែងខ្លួនថ្មី។ នេះបើផ្អែក តាមការជូនដំណឹងផ្លូវការ ពីក្រសួងសុខាភិបាលបារាំង នៅព្រឹកថ្ងៃសៅរ៍នេះ។ ប្រភពដដែលនេះ បញ្ជាក់ថា បុរសនោះគឺជាជនជាតិបារាំង តែរស់នៅប្រទេសអង់គ្លេស។ បុរសនេះ បានធ្វើដំណើរពីទីក្រុងឡុង ត្រលប់មកបារាំងវិញ កាលពីថ្ងៃទី១៩ធ្នូ។ មកដល់បាន២ថ្ងៃ ក៏ធ្លាក់ខ្លួនឈឺ ហើយត្រូវបានគេយកទៅព្យាបាល និងតាមដាន នៅមន្ទីរពេទ្យ។ បច្ចុប្បន្ន បុរសនេះ មិនមានអាការៈជម្ងឺទៀតទេ តែត្រូវបានគេតម្រូវឲ្យសំងំ ធ្វើចត្តាឡីស័កក្នុងផ្ទះ យ៉ាងម៉ដ្ឋចត់បំផុត។
ឥឡូវនេះ អាជ្ញាធរសុខាភិបាលបារាំង កំពុងតែស្វែងរក បុគ្គលិកពេទ្យ និងមនុស្សទាំងអស់ ដែលបានជួបប្រាស្រ័យ ប៉ះពាល់ ជាមួយបុរសនោះ ដើម្បីតាមដានធ្វើតេស្ត និងដាក់ឲ្យនៅដាច់ដោយឡែក ធ្វើយ៉ាងណា ទប់ស្កាត់ឲ្យបាន កុំឲ្យកូវីដ១៩ទម្រង់បំប្លែងខ្លួនថ្មីនេះ អាចឆ្លងរាលដាលបាន។
កូវីដ១៩បំប្លែងខ្លួនថ្មីនេះ ត្រូវបានអាជ្ញាធរសុខាភិបាលអង់គ្លេស ប្រកាសរកឃើញ នៅថ្ងៃអាទិត្យទី២០ធ្នូ ហើយភា្លមៗនោះ ប្រទេសអឺរ៉ុបបាននាំគ្នា ប្រកាសបិទព្រំដែនជាមួយអង់គ្លេសទាំងស្រុងតែម្តង។ កាលពីថ្ងៃចន្ទ លោករដ្ឋមន្ត្រីសុខាភិបាលបារាំង បានលើកឡើងថា វាអាចទៅរួច ដែលថា កូវីដ១៩ទំរង់ថ្មីនេះ វាបានមានវត្តមាននៅបារាំង តាំងតែពីមុនពេល គេបិទព្រំដែនចេញចូល ជាមួយអង់គ្លេសទៅទៀត។ ឥឡូវជាក់ស្តែង គឺពិតមែន បុរសករណីទីមួយដែលគេរកឃើញនៅបារាំងនេះ គឺបានមកដល់បារាំងនៅថ្ងៃទី១៩ធ្នូ។ ដូច្នេះវាអាចមានករណីដូចគ្នានេះផ្សេងទៀត។ ហើយមិនមែននៅតែបារាំងទេ នៅអាល្លឺម៉ង់ គេក៏បានរកឃើញករណីស្រ្តីម្នាក់ ធ្វើដំណើរមកពីទីក្រុងឡុង មានផ្ទុកមេរោគកូវីដ១៩ទំរង់បំប្លែងខ្លួននេះដែរ។ ករណីដូចគ្នាមួយទៀត គឺនៅទីក្រុងបេរូត ប្រទេសលីបង់។
កូវីដ១៩ទំរង់ថ្មី អាចមានកម្លាំងឆ្លងរាលដាលច្រើន តែមិនប្រាកដអាចធ្វើប៉ះពាល់ដល់ប្រសិទ្ធិភាពវ៉ាក់សាំង
បើនិយាយពីកម្លាំងនៃការឆ្លងរាលដាល យោងតាមអ្នកការសិក្សាមួយចំនួនធំនៅអង់គ្លេស គឺកូវីដ១៩ទំរង់បំប្លែងខ្លួនថ្មីនេះ មានកម្លាំងឆ្លងរាលដាលខ្លាំងជាងទម្រង់ដើម ខ្ទង់ប្រហែលចន្លោះ ពី ៥០% ទៅ ៧៤%។ កម្រិតនេះ គឺខ្លាំងក្រែល ដែលវាអាចធ្វើឲ្យចំនួនអ្នកឆ្លងតៗគ្នា មានកាន់តែច្រើន ក្នុងពេលដ៏ឆាប់រហ័ស។ មនុស្សឆ្លងកាន់តែច្រើន វាមានន័យថា អ្នកជំងឺដែលប្រឈមនឹងការឈឺធ្ងន់ ក៏វាអាចកើនឡើងច្រើនដែរ។ តែយ៉ាងណាក៏ដោយ មិនមានការស្រាវជ្រាវណាមួយ ដែលបញ្ជាក់ឲ្យច្បាស់ ថាមេរោគកូវីដ១៩បំប្លែងខ្លួនថ្មីនេះ វាអាចបង្កឲ្យអ្នកជំងឺ ធ្លាក់ខ្លួនឈឺធ្ងន់ខ្លាំង ជាងអាទំរង់ដើមនោះទេ។
ទាក់ទិនទៅនឹង ការប៉ះពាល់ ដល់ប្រសិទ្ធិភាព នៃវ៉ាក់សាំងវិញ លោកស្រី Emer Cooke អគ្គនាយកទីភ្នាក់ងារឱសថអឺរ៉ុប បានលើកឡើងថា គិតមកទល់ពេលនេះ គឺមិនមានអ្នកជំនាញ ឬការស្រាវជ្រាវណាមួយ បញ្ជាក់ឲ្យច្បាស់ប្រាកដនោះទេ។ វាមានតែមតិព្រួយបារម្ភ។
ដោយឡែក អ្នកជំនាញវិទ្យាសាស្រ្តខ្លះអះអាងថា មេរោគវាអាចបំប្លែងខ្លួន ផ្លាស់ប្តូរទំរង់បន្តិចបន្តួច វាជារឿងធម្មតាទេ មេរោគណាក៏អាចបំប្លែងខ្លួនដែរ នៅពេលណាវាឆ្លងតពីមនុស្សម្នាក់ទៅមនុស្សម្នាក់។ តែអ្វីដែលសំខាន់ គឺវ៉ាក់សាំងដែលនឹងទៅជំរុញ បង្កើតប្រព័ន្ធអង់ទីក័រ ដើម្បីមកទប់នឹងមេរោគ បើទោះបីជាវាមានទំរងប្រែប្រួលខុសពីមុនបន្តិចក្តី។
យ៉ាងណាមិញ លោក Ugur Sahin អគ្គនាយកមន្ទីរពិសោធន៍ឱសថ BioNTech បានលើកឡើងថា វ៉ាក់សាំងដែលមន្ទីរពិសោធន៍លោក បានសហការផលិតជាមួយមន្ទីរពិសោធន៍ Pfizer គឺមានទំរង់តាមបច្ចេកទេស ARN ហើយមានផ្សំដោយ អាស៊ីដអាមីណេ ចំនួន១០០០មុខ ដោយក្នុងចំណោមនេះ មានតែ៩តែប៉ុណ្ណោះ ដែលអាចបំប្លែងខ្លួនបាន។ ដូច្នេះមានន័យថា ៩៩% នៃ ប្រូតេអ៊ីន ដែលនៅក្នុងវ៉ាក់សាំង គឺនៅតែមានទំរង់ដូចដើមដដែលទេ។ លោកបានធានាថា វ៉ាក់សាំងរបស់មន្ទីរពិសោធន៍ នឹងនៅតែរក្សាប្រសិទ្ធិភាពខ្ពស់ បើទោះបីជាមួយនឹងកូវីដ១៩ទំរង់បំប្លែងខ្លួនថ្មីក៏ដោយ។ ហើយបើក្នុងករណីមេរោគនេះ កាន់តែបំប្លែងខ្លួនប្លែកខ្លាំងឡើង លោកបានធានាថា មន្ទីរពិសោធន៍លោក អាចផលិតវ៉ាក់សាំងថ្មីបាន ដោយត្រូវការពេលតែ៦សប្តាហ៍តែប៉ុណ្ណោះ។
បារាំង និងប្រទេសអឺរ៉ុបឯទៀត ទទួលបានវ៉ាក់សាំង ដើម្បីបើកយុទ្ធនាការចាក់
វ៉ាក់សាំងរបស់មន្ទីរពិសោធន៍ BioNTech និង Pfizer ចំនួន១៩៥០០ដូស ដំបូងគេបង្អស់ បានដឹកមកដល់ប្រទេសបារាំងហើយ ចេញពីទីតាំងផលិត ដែលស្ថិតនៅក្នុងប្រទេសបែលហ្ស៊ិក។ វ៉ាក់សាំងត្រូវបានគេដឹកមកដល់ មន្ទីរឱសថស្ថានធំរបស់មន្ទីរពេទ្យក្រុងប៉ារីស នៅព្រឹកថ្ងៃសៅរ៍នេះ។ ចំណែកចំនួនដូសផ្សេងទៀត កំពុងតែបន្តដំណើរ ទៅតាមទីក្រុងធំៗផ្សេងទៀត។ ការដឹកជញ្ជូន បានធ្វើទៅដោយមានការហែរហម ដោយកងកម្លាំងការពារសន្តិសុខ យ៉ាងម៉ដ្ឋចត់បំផុត ហើយវាគឺជាការដឹកជញ្ជូន ដែលមានលក្ខណៈបច្ចេកទេសស្មុគស្មាញណាស់ដែរ ព្រោះថា ថ្នាំវ៉ាក់សាំងនេះ ត្រូវតែទុកក្នុងទូបង្កកធំៗ ក្នុងសីតុណ្ហភាព -៨០°c។
យុទ្ធនាការចាក់ នឹងចាប់ផ្តើមបើកជាផ្លូវការ នៅថ្ងៃអាទិត្យទី២៧ធ្នូ នៅមន្ទីរពេទ្យ René-Muret ក្នុងតំបន់ Sevran ភាគខាងជើងក្រុងប៉ារីស ដោយចាក់ទៅលើ មនុស្សចាស់ជរាដែលស្នាក់នៅព្យាបាលនៅទីនោះ និងយ៉ាងហោច ចាក់ទៅលើ បុគ្គលិកពេទ្យម្នាក់ ជានិម្មិតរូប។ ទីតាំងចាក់វ៉ាក់សាំងនេះមួយទៀត នៅថ្ងៃអាទិត្យ គឺនៅមន្ទីរពេទ្យក្រុង Dijon។ ចំណែក មនុស្សចាស់នៅតាមមណ្ឌលចាស់ជរា គឺគេនឹងចាប់ផ្តើមបើកយុទ្ធនាការចាក់ នៅដើមឆ្នាំ២០២១។
ការចាក់វ៉ាក់សាំងនេះ ត្រូវការតាមការរៀបចំកាលវិភាគ ឲ្យបានច្បាស់លាស់ណាាស់ ដោយសារទីមួយ គ្រប់ទីតាំងគឺមិនមានទូបង្កកធំៗ ដើម្បីរក្សាសីតុណ្ហភាព-៨០°c ទេ។ ទី២ គឺថា វ៉ាក់សាំងនេះ ក្នុងមួយដបហ្វ្លាកុង គឺមាន៥ដូស ហើយតែកាលណាបើកវាហើយ គឺអាចរក្សាទុកបានតែ៥ថ្ងៃទេ ក្នុងសីតុណ្ហភាព ពី ២ទៅ៨°c។ ផុតពីនេះ គឺសាបលែងមានប្រសិទ្ធិភាពហើយ។ ដូច្នេះ គេត្រូវរៀបចំកាលវិភាគ កំណត់ចំនួនមនុស្ស ដែលត្រូវចាក់ ឲ្យបានច្បាស់បំផុត ដើម្បីចៀសវៀង កុំឲ្យសល់វ៉ាក់សាំងដែលបើកហើយ ទុកឲ្យខូចចោល។ លោក Franck Huet ប្រធានផ្នែកឱសថដ្ឋាននៃមន្ទីរពេទ្យក្រុងប៉ារីស បានបញ្ជាក់ថា កាលវិភាគចាក់ គឺគេកំណត់នៅរៀងរាល់ចុងសប្តាហ៍ម្តង មុននឹងសម្រេចផ្ញើវ៉ាក់សាំង ចេញពីទីតាំងដែលមានទូបង្កកធំ យកចេញទៅដល់ទីតាំងចាក់ បើកដបហើយរក្សាទុកក្នុងទូទឹកកកធម្មតា រយៈពេល៥ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ