ជំនួបG20៖ អ.ស.ប.អំពាវនាវឱ្យលុបចោលបំណុលពីប្រទេសក្រីក្រកំពុងប្រឈមនឹងវិបត្តិកូវីដ១៩
ចុះផ្សាយនៅថ្ងៃ៖
ស្តាប់ - ០៨:០៥
ថ្ងៃសោរ៍ ទី២១ វិច្ឆិកា ប្រទេសមហាសេដ្ឋីប្រេង អារ៉ាប៊ីសាអូឌីត ធ្វើជាម្ចាស់ផ្ទះ លើកទី១ រៀបចំជំនួបកំពូល G២០។ កូវីដ១៩ ជាប្រធានបទស្នូលជំនួបកំពូលតាមអនឡាញរយៈពេល ២ថ្ងៃ ចុងសប្តាហ៍នេះ។ ក្នុងបរិបទការរីករាលដាលជំងឺកូវីដ១៩ គឺមានការជំរុញបែងចែកវ៉ាក់សាំងដោយសមធម៌ និងការជំរុញឱ្យដោះបំណុលប្រទេសក្រីក្រ ដែលរងគ្រោះសេដ្ឋកិច្ចដោយសារវិបត្តិកូវីដ។
អគ្គលេខាធិការអង្គការសហប្រជាជាតិ Antonio Guterres អំពាវនាវឱ្យប្រទេសមហាអ្នកមានទាំង២០ លុបបំណុលពីប្រទេសអ្នកក្រីក្រ។ អង្គការរូបិយវត្ថុអន្តរជាតិ ក៏ទ្រឱ្យបង្កកបំណុល ឬលុបចោលបំណុលដែរ ហើយក៏គួរលុបចោលរនាំងឧបសគ្គផ្សេងៗផ្នែកពាណិជ្ជកម្ម ដែលបានដាក់ចេញប៉ុន្មានឆ្នាំចុងក្រោយនេះ។ រនាំងឧបសគ្គពាណិជ្ជកម្មទាំងនោះរាំងស្ទះដល់ដំណើរសេដ្ឋកិច្ចពាណិជ្ជកម្ម ពិភពលោក។
អង្គការសហប្រជាជាតិ អង្គការសុខភាពពិភពលោក សហភាពអឺរ៉ុប បានឯកភាពគ្នា នៅក្នុងគោលគំនិតដែលថា ប្រទេស G20 ត្រូវបន្ថែមជំនួយក្នុងកញ្ចប់ថវិកាសម្រាប់ជួយវិស័យរុករកវ៉ាក់សាំង បែងចែកវ៉ាក់សាំង ជួយដល់ប្រទេសក្រីក្រ។ បើតាមអង្គការសហប្រជាជាតិ រយៈពេល ៧ ខែចុងក្រោយនេះ គេបានវិនិយោគសម្រាប់ការរុករកវាំងសាក់ ធ្វើតេស្តសាកល្បងវ៉ាក់ គឺត្រូវចាយអស់ជាង១០ពាន់លានដុល្លារ គឺខ្វះលុយជាង២៨ពាន់លានដុល្លារថែមទៀត។ បើគិតពីពេលនេះដល់ដាច់ឆ្នាំ គឺខ្វះជាង ៤,២ពាន់លានដុល្លារទៀត សម្រាប់ថវិកាប្រចាំឆ្នាំ។
សំបុត្រចំហរួមគ្នាមួយ បានអំពាវនាវឱ្យប្រទេស G20 ជួយចេញថវិកាបង្គ្រប់ការខ្វះខាត ក្នុងហឹបមូលនិធិអង្គការសុខភាពពិភពលោក និងសម្រាប់ចែកចាយវ៉ាក់សាំងបង្ការកូវីដ១៩។ នេះជាសំបុត្ររួម ចុះហត្ថលេខាដោយ នាយករដ្ឋមន្ត្រីស្រីស៊ុយអែត Erna Solberg ប្រធានាធិបតីអាហ្វ្រិកខាងត្បូង Cyril Ramaphosa ប្រធានសហភាពអឺរ៉ុប Ursula von der Leyen និងប្រធានអង្គការសុខភាពពិភពលោក Tedros Adhanom Ghebreyesus ជាដើម។
លោក Antonio Guterres បញ្ជាក់ថា វ៉ាក់សាំងបង្ការកូវីដ១៩ ត្រូវតែជាថ្នាំវ៉ាក់សាំងសាធារណៈ ដែលប្រជាជនគ្រប់គ្នាអាចទទួលបាន ហើយមានតែការផ្តល់វ៉ាក់សាំងដល់គ្រប់ៗគ្នាទេ ទើបអាចទប់ស្កាត់ជំងឺឆ្លងរាតត្បាតសកលនេះបាន។
តើអាចមានការឆ្លើយតបបង្ហាញឆន្ទៈជួយយ៉ាងណា?
តាមក្រុមអ្នករៀបចំកម្មវិធីជំនួបកំពូល គឺប្រទេស G20 បានចាយលុយ២១ពាន់ដុល្លារទៅហើយដើម្បីទប់ទល់នឹងកូវីដ១៩។ ហើយប្រទេស G20 ក៏បានសម្រេចបញ្ចេញកញ្ចប់ថវិកា ១១ ០០០ ពាន់លាន ដុល្លារសម្រាប់ស្រោចស្រង់សេដ្ឋកិច្ចពិភពលោក។ គេឃើញថា G20 ក៏បានចាយលុយច្រើនមកហើយសម្រាប់រឿងកូវីដនេះ។ ទោះយ៉ាងនេះក្តី គេកំពុងតែរង់ចាំការបង្ហាញឆន្ទៈលះបង់របស់ប្រទេសធំៗ។ ប្រទេសដែលគេរង់ចាំខ្លាំង មានដូចជា អាមេរិក ចិន រុស្ស៊ី អង់គ្លេស ជាដើម។
ចំពោះសហរដ្ឋអាមេរិក លោក ដូណាល់ ត្រាំ នឹងចូលរួចប្រចាំតាមអ៊ីនធ័រនែតនេះ ក៏ប៉ុន្តែគេមិនទាន់ដឹងឆន្ទៈគាត់ប៉ុន្មានទេ។ ចំពោះលោកស្រី Ursula von der Leyen ប្រធានសហភាពអឺរ៉ុប គឺគេសង្ឃឹមតិចតួចណាស់ពីរដ្ឋបាលរបស់លោក ត្រាំ ដែលជិតផុតអាណត្តិនេះ ព្រោះថា កាលពីឆ្នាំមុន រដ្ឋាបាលអាមេរិក របស់លោក ត្រាំ ធ្វើឱ្យគាំង គ្មានសេចក្តីសម្រេចរួម របស់ G20 សំណុំរឿងកិច្ចព្រមព្រៀងអាកាសធាតុក្រុងប៉ារីស។ ប្រធានសហភាពអឺរ៉ុប មិនសូវរំពឹងអ្វីច្រើនពី អាមេរិករបស់លោក ត្រាំ ទេ តែគេសង្ឃឹមថានឹងអាចធ្វើការបានច្រើនជាង ជាមួយ លោក បៃដិន ដែលនឹងមកដល់ថ្មី។
ចំពោះប្រទេសចិនវិញ គេក៏មិនដឹងពីចេនាថាជួយបានអ្វីខ្លះដែរ ក៏ប៉ុន្តែ ចិនធ្លាប់បានបង្ហើមថានឹងជួយជ្រោមលុយកាក់ខ្លះ ពិសេសទៅលើផ្នែកស្តារសន្ទុះសេដ្ឋកិច្ច តាមរយៈការលុបចោលបំណុល និងពន្យារពេលសងប្រាក់។ យើងត្រូវដឹងថា ចិនគឺជាម្ចាស់បំណុល មានទំហំប្រមាណ២០ ទៅ៤០ ភាគរយ នៅបណ្តាប្រទេសអ្នកក្រ។ ចិនក៏ធ្លាប់បង្ហាញឆន្ទៈជួយរឿងបង្កកបំណុល ឬលុបបំណុលពីប្រទេសក្រីក្រនេះដែរ។ ក៏ប៉ុន្តែ ចិនថា ចិនមិនអាចធ្វើតែម្នាក់ឯងទេ ត្រូវប្រទេសអ្នកមានផ្សេងទៀត ចូលរួមដែរ។
ចំណែក អារ៉ាប៊ីសាអូឌីត បានត្រៀមមហិច្ចតាស្រេចហើយក្នុងការចូលរួមចំណែងជំរុញកំណើនសេដ្ឋកិច្ចពិភពលោក តែក្នុងនាមជាម្ចាស់ផ្ទះរៀបចំជំនួបកំពូល អារ៉ាប៊ីសាអូឌីត រង់ចាំមើលថ្នាក់ដឹកនាំដដៃផ្សេងទៀតដែរ។
ជំនួបកំពូល G20 ក្តីសង្ឃឹមដាច់ដោយឡែករបស់ អារ៉ាប៊ីសាអូឌីត ម្ចាស់ផ្ទះរៀបចំពីធី គឺចង់អួតបណ្តាប្រទេសអ្នកមាននិងពិភពលោក ពីការរីកចម្រើនរបស់ អារ៉ាប៊ីសាអូឌីត ហើយនិងចង់ស្តារមុខមាត់ខ្លះឡើងវិញ តែក្តីរំពឹងនេះ ត្រូវរាំងស្ទះ។
អារ៉ាប៊ីសាអូឌីត ទី១ នៅតំបន់ដើមបូព៌ា ដែលបានចូលជាសមាជិក G២០ ហើយក៏ជាលើកទី១ដែរ ដែលរាជាណាចក្រអ៊ីស្លាម បានធ្វើជាប្រធានរៀបចំជំនួបកំពូលពិភពលោក នេះ។ ដូច្នេះហើយ ទើប អារ៉ាប៊ីសាអូឌីត ចង់ស្តារមុខមាត់តាមរយៈវេទិកាអន្តរជាតិបែបនេះ ក៏ប៉ុន្តែ ក្តីសង្ឃឹមហាក់មិនសូវសមស្របសោះ ព្រោះការធ្វើវេទិកាតាមអនឡាញ អ៊ិនធ័រនែត គឺមិនស្រណុកប៉ុន្មាននោះឡើយ ក្នុងការបង្ហាញផ្ទាល់ភ្នែកនៃការចម្រើនមុខមាត់ពិតរបស់ប្រទេស។
តាំងពីព្រះអង្គម្ចាស់ មហាម៉េត ប៊ិន សាល់ម៉ាន (Mohammed ben Salmane) ក្លាយជារាជបុត្រស្នងរាជនៅឆ្នាំ២០១៧មក អារ៉ាប៊ីសាអូឌីត បានកែទម្រង់ច្រើនលើផ្នែកនយោបាយ សេដ្ឋកិច្ច និង សង្គមកិច្ច។ ផ្នែកសិទ្ធមនុស្ស គឺផ្តល់សិទ្ធឱ្យស្រីៗអាចបើកឡានបានដោយខ្លួនឯង ហើយមានសិទ្ធចូលមើលកុនមើលល្ខោនបាន ជាដើម។
ក៏ប៉ុន្តែ ប្រទេសអារ៉ាប់នេះ ត្រូវ រងការរិះគន់និងចង្អុលមុខកាន់តែខ្លាំងឡើងៗពីសំណាក់អង្គការការពារសិទ្ធិមនុស្ស ដោយសារតែបង្ក្រាប សំឡេងប្រឆាំងក្នុងផ្ទៃរាជវង្ស និងបង្ក្រាបក្រុមបញ្ញវ័ន្ត ជាពិសេសករណីឃាតកម្មសម្លាប់អ្នកកាសែត Jamal Khashoggi នៅក្នុងស្ថានកុងស៊ុលអារ៉ាប៊ីសាអូឌីត ប្រចាំទីក្រុងអ៊ីស្តង់ប៊ូល កាលពីឆ្នាំ២០១៨។ ម្យ៉ាងទៀត ការធ្វើសង្គ្រាមនៅប្រទេស យ៉េមែន គឺទាំងនេះ ធ្វើឱ្យ អារ៉ាប៊ីសាអូឌីត ប្រឡាក់មុខមាត់កិត្តិយស ខ្លាំងណាស់ នៅលើឆាកអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ