ក្រុមហ៊ុនSpaceX បានផ្តើមដោយជោគជ័យនូវបេសកកម្មបញ្ជូនមនុស្សទៅកាន់ស្ថានីយអវកាសអន្តរជាតិ
ចុះផ្សាយនៅថ្ងៃ៖
ស្តាប់ - ០៦:៥១
ក្រុមហ៊ុន SpaceX បានបាញ់បង្ហោះដោយជោគជ័យ នូវយានដឹកបញ្ជូនអវកាសយានិកចំនួន៤ រូប ទៅកាន់ស្ថានីយអវកាសអន្តរជាតិកាលពីថ្ងៃអាទិត្យម្សិលមិញ។ នេះ រាប់ចាត់ទុកថាជាព្រឹត្តិការណ៍ដ៏សំខាន់មួយ ក្នុងវិស័យអវកាសរបស់អាមេរិក ពីព្រោះថាវាគឺជាលើកទី១ ដែលអាមេរិកអាចបញ្ជូនអវកាសយានិកទៅកាន់ទីអវកាសដោយខ្លួនឯង ចេញពីទឹកដីខ្លួនឯង ក្រោយខកខានរយៈពេលប្រមាណជាជិត១ទសវត្សរ៍មកនេះ។
បេសកកម្មបង្ហោះយានដឹកអវកាសយានិក៤រូបទៅស្ថានីយអវកាសអន្តរជាតិរបស់ក្រុមហ៊ុនSpaceX
វិស័យអវកាសរបស់អាមេរិកមានការវិវត្តន៍ខ្លាំងគួរឲ្យកត់សម្គាល់នៅមួយរយៈពេលចុងក្រោយនេះ។ ជាក់ស្តែង ក្រោយពីបានបាញ់បង្ហោះសាកល្បងកាលពីខែឧសភានិងបាននាំយកអវកាសយានិកត្រលប់មកផែនដីវិញដោយជោគជ័យនៅខែសីហា ក្រុមហ៊ុន SpaceX កាលពីថ្ងៃអាទិត្យ ទី១៥ វិច្ឆិកាម្សិលមិញនេះ បានបាញ់បង្ហោះយានបញ្ជូនអវកាសយានិក៤រូប ទៅកាន់ស្ថានីយអវកាសអន្តរជាតិជាថ្មីម្តងទៀត។
ការបាញ់បង្ហោះយានបញ្ជូនអវកាសយានិក ៤រូបរបស់ទីភ្នាក់ងារណាសា ទៅកាន់ស្ថានីយអវកាសអន្តរជាតិនេះ គឺជាបេសកកម្មផ្លូវការជាលើកទី១ហើយរបស់សហរដ្ឋអាមេរិក ក្រោយការចុះកិច្ចសន្យារវាងណាសា និង ក្រុមហ៊ុនឯកជន SpaceX របស់មហាសេដ្ឋី Elon Musk។
ក្នុងចំណោមអវកាសយានិកទាំង៤ រូប មាន ៣នាក់ជាជនជាតិអាមេរិកាំង និងម្នាក់ទៀត គឺជាជនជាតិជប៉ុន ហើយពួកគេនឹងត្រូវស្នាក់នៅក៏ដូចជាបំពេញបេសកកម្មនៅលើស្ថានីយអវកាសអន្តរជាតិ រយៈពេល៦ខែ។
យានអវកាស Crew Dragon ដែលទើបតែត្រូវបានរចនាថ្មីឡើងដោយក្រុមហ៊ុន SpaceX ត្រូវបានគេបាញ់បង្ហោះទៅកាន់ស្ថានីយអវកាសអន្តរជាតិ (ISS) កាលពីវេលា ម៉ោង៧ និង ២៧នាទីល្ងាច ម៉ោងនៅស្ថានីយបាញ់បង្ហោះកេណេឌីរដ្ឋហ្វ្ល័ររីដា។
នាខណៈពេលនេះ អ្នកអវកាសទាំង៤ នាក់របស់ណាសា កំពុងធ្វើដំណើរនៅក្នុងគន្លងតារាវិថីដែលមានចម្ងាយជាង ៤០០គីឡូម៉ែត្រពីផែនដីយើងនេះ។ គេរំពឹងថា យាន Crew Dragon នឹងចូលចតទៅភ្ជាប់ខ្លួននឹងស្ថានីយអវកាសអន្តរជាតិនៅថ្ងៃចន្ទនេះវេលាម៉ោងប្រមាណ ១១ យប់ (eastern time) ម៉ោងនៅតំបន់ភាគខាងកើតនៃសហរដ្ឋអាមេរិក។ នេះមានន័យថា ក្រុមអវកាសយានិក នឹងត្រូវចំណាយពេលប្រមាណ ២៧ ម៉ោង នៅក្នុងគន្លងតារាវិថីដើម្បីឆ្ពោះដល់គោលដៅរបស់ពួកគេ។
ការបង្ហោះយាន Crew Dragon ប្រៀបបីដូចជាមោទនភាពជាតិមួយសម្រាប់អាមេរិក
ជាការពិតណាស់ ការបាញ់បង្ហោះយាន បញ្ជូនអវយាកាសនិក ទៅកាន់ស្ថានីយអវកាសអន្តរជាតិ គឺជាព្រឹត្តិការណ៍ដ៏សំខាន់ និងគួរជាទីមោទនៈមួយសម្រាប់ប្រជាជាតិអាមេរិក។
ហេតុអ្វី? មូលហេតុនោះ គឺដោយសារវាជាបេសកកម្មផ្លូវការលើកទី១ ដែលទីភ្នាក់ងារសាណាអាមេរិក អាចធ្វើឡើងដោយមានការសហការជាមួយក្រុមហ៊ុនឯកជនអាមេរិក SpaceX ។
កាលពីឆ្នាំ ២០១១អាមេរិក បានបញ្ឈប់កម្មវិធីបង្ហោះយានដោយខ្លួនឯង ដើម្បីបញ្ជូនមនុស្សទៅកាន់អវកាសដោយសារការបង្ហោះធ្លាប់បានជួបគ្រោះថ្នាក់ផ្ទុះយានរហូតដល់ពីរដង និងបានសម្លាប់អវកាសយានិកចំនួន ១៤ រូប កាលពីច្រើនឆ្នាំមុននេះដែលម្តងនៅកើតឡើងនៅឆ្នាំ ១៩៨៦ និងចុងក្រោយនៅឆ្នាំ ២០០៣។
អស់រយៈពេលប្រមាណជា ១០ ឆ្នាំ ដែលអាមេរិកគ្មានមធ្យោបាយ និងធនធានប្រើប្រាស់ដើម្បីធ្វើដំណើរទៅកាន់ទីអវកាសដោយខ្លួនឯងបាន ហើយក៏អស់រយៈពេលជាច្រើនដែរដែលអាមេរិក ត្រូវចំណាយលុយជាច្រើនរយលានដុល្លាទៅឲ្យរុស្ស៊ីសម្រាប់ការធ្វើដំណើរទៅមក ម្តង របស់អវកាសយានិករបស់ខ្លួន។ ជាក់ស្តែង អាមេរិកត្រូវបង់ប្រាក់រហូតដល់ ៨០លានដុល្លារ ទៅឲ្យរុស្ស៊ី សម្រាប់សេវាដឹកបញ្ជូនទៅយកម្តងសម្រាប់អវយានិកអាមេរិកាំងម្នាក់។
ក៏ប៉ុន្តែ ទន្ទឹមពេលនឹងពឹងរ៉ុកែតរបស់រុស្ស៊ីដើម្បីបញ្ជូនយានដឹកមនុស្សទៅទីអវកាស រយៈពេលប្រមាណជា ១ ទសវត្សរ៍មកនេះ សហរដ្ឋអាមេរិក ក៏បានខិតខំប្រឹងប្រែងស្រាវជ្រាវ និងអភិវឌ្ឍបច្ចេកវិទ្យាដើម្បីដឹកមនុស្សទៅទីអវកាសបានដោយឯងឯងដែរជាមួយនឹងបច្ចេកវិទ្យាដែលទំនើប មានសុវត្ថិភាព និងមានតម្លៃទាបជាងមុន។
នៅទីបំផុតទៅ សេចក្តីប៉ងប្រាថ្នារបស់អាមេរិក ពិតជាបានសម្រេចដូចការចង់បានមែន។ ដូចឃើញជាក់ស្តែងស្រាប់ ក្រុមហ៊ុន SpaceX បានដឹកអវយានិកណាសាចំនួន ៤ រូប ប្រកបដោយជោគជ័យ ក្នុងបេសកកម្មទៅកាន់ស្ថានីយអវកាសអន្តរជាតិ កាលពីម្សិលមិញនេះក្រោយខកខានអស់រយៈពេលប្រមាណ ១០ ឆ្នាំរួចមក។
គួរគូសញ្ជាក់ឡើងវិញថា ការបាញ់បង្ហោះសម្រាប់បេសកកម្មទី១ នេះ អ្វីៗធ្វើឡើងដោយអាមេរិកខ្លួនឯងទាំងអស់ ពោលគឺបាញ់ចេញពីទឹកដីអាមេរិក និងដោយប្រព័ន្ធបច្ចេកវិទ្យាអភិវឌ្ឍដោយក្រុមហ៊ុនឯកជនអាមេរិក គឺក្រុមហ៊ុន SpaceX សុទ្ធសាធ ពោលគឺលែងត្រូវការពឹងផ្អែកលើរុស្ស៊ីដូចពីមុនទៀតឡើយ។ ហេតុដូចនេះ ហើយទើបមានជាការលើកឡើងថាការបាញ់បង្ហោះយានក្រុមហ៊ុន SpaceX បញ្ជូនអវកាសយានិក ៤រូប ទៅកាន់ស្ថានីយអវកាសអន្តរជាតិ គឺជាមោទនភាពជាតិមួយសម្រាប់សហរដ្ឋអាមេរិក។
ថ្នាក់ដឹកនាំអាមេរិក សាទរចំពោះបេសកកម្មទៅកាន់អវកាសរបស់ទីភ្នាក់ងារណាសា
ការបាញ់បង្ហោះយាន របស់ក្រុមហ៊ុន SpaceX កាលពីថ្ងៃអាទិត្យម្សិលមិញគឺជាបេសកកម្មដំបូងក្នុងចំណោមបេសកកម្មប្រតិបត្តិការចំនួន ៦ របស់ទីភ្នាក់ងារណាសា។ ហើយជាការពិតណាស់ ការបង្ហោះយានដឹកមនុស្សទៅកាន់ស្ថានីយអវកាសអន្តរជាតិ តែងតែនៅស្ថិតនៅក្រោមក្រសែភ្នែកតាមដាន ដោយយកចិត្តទុកដាក់ពីថ្នាក់ដឹកនាំអាមេរិក។
លោកអនុប្រធានាធិបតីអាមេរិក Mike Pence កាលពីថ្ងៃអាទិត្យម្សិលមិញ បានអញ្ជើញទៅចូលរួមដោយផ្ទាល់នៅក្នុងពិធីបាញ់បង្ហោះនេះ ហើយបានឆ្លៀតនិយាយជាមុនថាក្រោមការដឹកនាំរបស់លោកប្រធានាធិបតីដូណាល់ ត្រាំ សហរដ្ឋអាមេរិកបាន “ប្តេជ្ញាចិត្តជាថ្មីដើម្បីដឹកនាំការរុករកស្រាវជ្រាវរបស់់មនុស្សនៅក្នុងទីអវកាស”។
ដោយឡែក បើទោះបីជាមិនបានអញ្ជើញទៅចូលរួមពិធីដោយផ្ទាល់ក៏ដោយ លោកដូណាល់ ត្រាំ បានបង្ហោះសារធ្វីតទ័រ ដោយបានកោតសរសើរចំពោះបេសកកម្មទៅកាន់អវកាសរបស់ណាសា និង ក្រុមហ៊ុន SpaceX។ លោកនិយាយថា នេះគឺជាការចាប់ផ្តើមដ៏អស្ចារ្យមួយជាមួយនឹងបច្ចេកវិទ្យាដែលត្រូវបានអភិវឌ្ឍឡើងយ៉ាងទំនើបបំផុត។
មិនខុសពីលោកត្រាំ ឡើយ គីមហុង ប្រធានាធិបតីទើបជាប់ឆ្នោតអាមេរិក លោកចូ បៃដិន បានប្រកាសការអបអរសាទររបស់លោក ដោយលើកឡើងថា ការបាញ់បង្ហោះយាន Crew Dragon គឺជាសក្ខីភាពនៃអំណាចវិទ្យាសាស្ត្រ។
លោកបានបញ្ជាក់បន្ថែមទៀតថា លោកចូលរួមជាមួយជនជាតិអាមេរិកទាំងអស់ហើយនិងប្រជាជនជប៉ុនទាំងមូលក្នុងការជូនពរដល់អវកាសយានិកក្នុងដំណើរបេសកកម្មទៅកាន់ស្ថានីយអវកាសអន្តរជាតិរបស់ពួកគេនាពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ