លោកដូណាល់ត្រាំ អះអាងថាគ្មានវិធានការបង្ការអ្វីទាំងអស់ ខណៈកូវីដ១៩ឆ្លងរាលដាលខ្លាំងឡើងៗ
ចុះផ្សាយនៅថ្ងៃ៖
ស្តាប់ - ០៨:៣៧
មិនខុសពីប្រទេសនៅតាមតំបន់អឺរ៉ុប ការឆ្លងរាលដាលកូវីដ១៩ កំពុងតែស្ទុះឡើងជាខ្លាំង នៅសហរដ្ឋអាេមរិក។ រដ្ឋញូយ៉ក អាចនឹងត្រូវបិទខ្ទប់ឡើងវិញ សាជាថ្មី។ ២៤ម៉ោងចុងក្រោយ រវាងថ្ងៃព្រហស្បតិ៍ និងថ្ងៃសុក្រ ទី១៣វិច្ឆិកា នៅសហរដ្ឋអាមេរិក មានអ្នកឆ្លងកូវីដ១៩ ថ្មីបន្ថែម ចំនួនជិត១៩ម៉ឺននាក់។ តែយ៉ាងណាក៏ដោយ លោកប្រធានាធិបតី ដូណាល់ ត្រាំ បានបញ្ជាក់ថា នឹងគ្មានវិធានការបិទខ្ទប់ប្រទេស ពីសំណាក់រដ្ឋបាលសហព័ន្ធទេ។ លោកបានធានាទៀតថា ថ្នាំវ៉ាក់សាំងប្រឆាំងកូវីដ១៩ នឹងអាចផលិតបាន ក្នុងរវាងខែមេសាឆ្នាំក្រោយ។
មួយថ្ងៃឆ្លងថ្មីថែម ជិត១៩ម៉ឺននាក់
សន្ទុះឆ្លងរាលដាលខ្លាំង នូវមេរោគជំងឺកូវីដ១៩នេះ កំពុងធ្វើឲ្យអ្នកជំនាញបារម្ភខ្លាំងណាស់ នៅសហរដ្ឋអាេមរិក។ តួលេខ២៤ម៉ោង ចុងក្រោយ រវាងពីថ្ងៃព្រហស្បតិ៍ ដល់ថ្ងៃសុក្រ ទី១៣វិច្ឆិកា គឺមានអ្នកឆ្លងថ្មីចំនួន ១៨៩០០០នាក់។ អ្នកឆ្លងថ្មីកើនឡើងខ្លាំង ឯអ្នកស្លាប់ក៏កើនឡើងខ្លាំងដែរ គឺក្នុង២៤ម៉ោងចុងក្រោយ មានស្លាប់ ប្រមាណ១៦០០នាក់។ នេះបើយោងតាមស្ថិតិស្រង់ដោយ សកលវិទ្យាល័យ Johns Hopkins។
គិតមកត្រឹមពេលនេះ ជាសរុប នៅសហរដ្ឋអាមេរិក គឺមានអ្នកឆ្លងកូវីដ១៩ ចំនួន១០លាន៧សែននាក់ ដែលក្នុងនោះ មានស្លាប់សរុបទាំងអស់ ២៤៤២០០នាក់។ ទាំងចំនួនអ្នកឆ្លង និងចំនួនអ្នកស្លាប់ គឺអាមេរិក មានលើសគេទាំងអស់។ នៅតំបន់ខ្លះ គឺកម្រិតអ្នកស្លាប់មានខ្ពស់ខ្លាំងណាស់ បើប្រៀបធៀបទៅចំនួនអ្នកឆ្លងក្នុងតំបន់នោះ ដូចជា ទំបន់ Harris រដ្ឋ Texas ដែលមានស្លាប់ សរុប ២៨៧៧នាក់ ក្នុងចំណោមអ្នកឆ្លង ជាង១៧ម៉ឺននាក់ និងនៅតំបន់ Maricopa រដ្ឋ Arizona ដែលមានអ្នកស្លាប់សរុប ៣៧៥៩នាក់ ក្នុងចំណោមអ្នកឆ្លងប្រមាណជាង១៧ម៉ឺននាក់ដែរ។
បច្ចុប្បន្ននេះ រលកឆ្លងរាលដាលកំពុងស្ទុះឡើងខ្លាំង ប្រហែលជាមកពីសីតុណ្ហភាពចុះត្រជាក់ផង និងបណ្តាលមកពីការជួបជុំគ្នា មុននិងក្រោយពេលបោះឆ្នោតផង។ នៅរដ្ឋញូយ៉ក ដែលធ្លាប់មានសភាពធ្ងន់ធ្ងរជាងគេ កាលពីរលក់ឆ្លងរាលដាលលើកទី១ កំពុងតែប្រឈមនឹងការបិទខ្ទប់ទាំងស្រុងឡើងវិញ។ លោក Andrew Cuomo អភិបាលរដ្ឋនេះ បានសម្រេចបិទ បារ ហាងបាយ ហាងកាហ្វេ នៅម៉ោង១០យប់ ចាប់ពីថ្ងៃសុក្រទី១៣វិច្ឆិកា។ យ៉ាងណាមិញ លោក Bill de Blasio អភិបាលទីក្រុងញូយ៉ក បានប្រាប់ទៅអាណាព្យាបាលសិស្សទាំងអស់ថា ត្រូវត្រៀមខ្លួន ព្រោះចាប់ពីថ្ងៃចន្ទ សប្តាហ៍ក្រោយទៅ លោកប្រហែលជាអាចសម្រេច បិទសាលារៀនទាំងអស់តែម្តង នៅក្រុងញូយ៉ក។
ជាទូទៅ យើងសង្កេតឃើញថា ការឆ្លងរាលដាល បានស្ទុះឡើងខ្លាំងប៉ុន្មានថ្ងៃចុងក្រោយនេះ នៅតាមរដ្ឋ ដែលមានទីក្រុងធំៗ ដូចជា ក្រុង Los Angeles រដ្ឋ California ក្រុងChicago រដ្ឋ Illinois ក្រុង Miami រដ្ឋFlorida និង នៅញូយ៉កនេះឯង។ នៅទីក្រុងញូយ៉ក អត្រាឆ្លងរាលដាល របស់អ្នកផ្ទុកមេរោគម្នាក់ ទៅអ្នកផ្សេងទៀត កាលពីខែមេសា ឧសភា មានខ្ទង់ ១% តែពេលនេះ បានឡើងដល់ទៅ៣%។ ដែលមានន័យថា មនុស្សម្នាក់ អាចឆ្លងទៅមនុស្ស៣នាក់ទៀត ជាមធ្យម។
លោកដូណាល់ត្រាំ៖ គ្មានវិធានការបិទខ្ទប់ឡើយ!
កាលពីថ្ងៃសុក្រ លោកដូណាល់ ត្រាំ បានធ្វើសន្និសីទកាសែត នៅវេលាម៉ោង៤រសៀល នៅសេតវិមានក្រុងវ៉ាស៊ីនតោន។ ទាក់ទិននឹងវិវាទ តវ៉ា រឿងលទ្ធផលបោះឆ្នោត គឺលោកត្រាំបានប្រើពាក្យថា « ទុកឲ្យពេលវេលាជាអ្នកសម្រេច »។ ពាក្យនេះ ហាក់មានន័យថា ដូចជាគាត់ ត្រៀមខ្លួនទទួលស្គាល់លទ្ធផល បើសិនជាគាត់ចាញ់ពិតមែន។
ទាក់ទិននឹងបញ្ហាការឆ្លងរាលដាលកូវីដ១៩នេះវិញ លោកដូណាល់ ត្រាំ បានបញ្ជាក់ថា ដរាបណា រដ្ឋាភិបាលគាត់ នៅតែគ្រប់គ្រងសហរដ្ឋអាេមរិក គឺនឹងគ្មានវិធានការបិទខ្ទប់សកម្មភាពសេដ្ឋកិច្ច ណាមួយឡើយ។ ដូច្នេះ ក្នុងអំឡុងពេលនេះ រហូតដល់ ពេលមានរដ្ឋាភិបាលថ្មីចូលមកកាន់តំណែង នៅខែមករា គឺរដ្ឋសហព័ន្ធ នឹងមិនដាក់កំហិតណាមួយ ឲ្យរិតត្បិតការធ្វើដំណើរ ឬ បិទសកម្មភាពសេដ្ឋកិច្ចទេ ទោះកូវីដ១៩ ឡើងឆ្លងខ្លាំងកម្រិតណាក៏ដោយ។
លោកត្រាំ បាននិយាយធានាទៀតថា ក្នុងរវាងប៉ុន្មានសប្តាហ៍ខាងមុខ វ៉ាក់សាំងនឹងត្រូវអាចផលិតចេញបាន បាននឹងយកមកចាក់ឲ្យអ្នកដែលប្រឈមខ្លាំងមុនគេ មុននឹងបើកយុទ្ធនាការចាក់ ក្នុងទ្រង់ទ្រាយធំ នៅរវាងខែមេសា។ លោកអះអាងថា រដ្ឋបាលលោក និងផ្តល់អាជ្ញាបណ្ណបន្ទាន់ ដល់វ៉ាក់សាំង របស់មន្ទីរពិសោធន៍ Pfizer។
តែយ៉ាងណាក៏ដោយ វាមិនប្រាកដទេ ថាវ៉ាក់សាំងរបស់ មន្ទីរពិសោធន៍ Pfizer នេះ នឹងអាចផលិតចេញបានក្នុងរវាងប៉ុន្មានសប្តាហ៍ទៀត ដូចលោកដូណាល់ ត្រាំ អះអាង ហើយមួយវិញទៀត ដំណាក់កាលដំបូង គឺអាចយកទៅចាក់បាន តែទៅលើក្រុមមនុស្សដែលងាយប្រឈមប៉ុណ្ណោះ ដូចជាបុគ្គលិកពេទ្យ ឬមនុស្សចាស់ជរាជាដើម។ ដូច្នេះ ទំរាំតែមានវ៉ាក់សាំង ចាក់ឲ្យប្រជាជនជាទូទៅ មិនមែនភ្លាមៗនេះទេ។
លោក Michael Mina អ្នកជំនាញជំងឺឆ្លង នៅសកលវិទ្យាល័យ Havard បានលើកឡើងថា ត្រូវតែមានវិធានការបិទខ្ទប់សកម្មភាពសេដ្ឋកិច្ច និងចរាចរណ៍មនុស្ស ឲ្យបានតឹងតែងបំផុត ជាពិសេសគឺនៅក្នុងរយៈពេលបុណ្យ Thanksgiving នៅចុងខែវិច្ឆិកានេះ។ បុណ្យនេះសំខាន់ណាស់នៅអាេមរិក ហើយជាឱកាស ដែលប្រជាជនអាេមរិកធ្វើដំណើរទៅជួបជុំគ្នាក្នុងគ្រួសារ។ ដូច្នេះ បើមិនចាត់វិធានការឲ្យទាន់ពេលនេះទេ គឺការឆ្លងរាលដាល នឹងស្ទុះឡើង ទប់មិនឈ្នះទេ។
អ្នកក្រ គ្មានបណ្ណធានារ៉ាប់រងសុខភាព រងគ្រោះខ្លាំងបំផុត
ប្រទេសនីមួយៗ មានប្រព័ន្ធសុខាភិបាលខុសគ្នា ចំណុចល្អចំណុចអាក្រក់ ក៏វាមានខុសៗគ្នាដែរ។ សម្រាប់សហរដ្ឋអាេមរិក ជាមួយជំងឺឆ្លងកូវីដ១៩នេះ គឺយើងអាចនិយាយជារួមថា អ្នកដែលរងគ្រោះខ្លាំងបំផុត គឺប្រជាជនក្រីក្រ។ ដូចយើងដឹងហើយ ថានៅសហរដ្ឋអាមេរិក គឺរដ្ឋពុំធានាការពារសុខភាពប្រជាជនទាំងអស់ ដូចនៅបារាំងទេ។ នៅអាមេរិក គឺប្រជាជនម្នាក់ៗ ជាអ្នកចុះឈ្មោះទិញធានារ៉ាប់រងសុខភាពរៀងៗខ្លួន ថ្លៃឬថោកទៅតាមលទ្ធភាព ហើយការសងប្រាក់មកវិញ ក៏វាមានតិចឬច្រើនទៅតាមនោះដែរ។ ថ្លៃសេវាសុខភាព នៅសហរដ្ឋអាមេរិក មានតម្លៃថ្លៃណាស់។ ជាក់ស្តែង ការព្យាបាលជំងឺកូវីដ១៩នេះ គឺអាចឡើងដល់ខ្ទប់ម៉ឺនដុល្លារផង។ មន្ទីរពេទ្យទាំងអស់ ប្រមាណ៦១៤០នៅសហរដ្ឋអាមេរិក គឺជាមន្ទីរពេទ្យឯកជន សឹងតែទាំងអស់។
ដូច្នេះ សម្រាប់ប្រជាជនក្រីក្រ ដែលគ្មានបណ្ណធានារ៉ាប់រងសុខភាព គឺពួកគេគ្មានលទ្ធភាពបង់ទេ។ ហើយអ្នកដែលគ្មានបណ្ណធានារ៉ាប់រងសុខភាពនេះ មានកាន់តែច្រើន។ ជាក់ស្តែង នៅរដ្ឋ Georgia អ្នកដែលគ្មានបណ្ណធានារ៉ាប់រងសុខភាព គឺមានដល់ទៅ៣០%។ បណ្ណធានារ៉ាប់រងសុខភាព ពេលខ្លះ វាភ្ជាប់ជាមួយនឹងការងារ។ ពេលណាបាត់បង់ការងារ ក៏បាត់បង់ធានារ៉ាប់រងសុខភាពដែរ។ ជាមួយនឹងវិបត្តិកូវីដ១៩នេះ មនុស្សបាត់បង់ការងារច្រើនលាននាក់ណាស់ នៅអាមេរិក។
បញ្ហាចោទមួយទៀត គឺប្រព័ន្ធគ្រប់គ្រងមន្ទីរពេទ្យ វាខុសគ្នា ពីរដ្ឋមួយទៅរដ្ឋមួយទៀត។ ត្រង់ចំណុចនេះហើយ ដែលមានអ្នកជំនាញជាច្រើន បានបន្ទោសរដ្ឋបាលសហព័ន្ធ ដឹកនាំដោយលោក ដូណាល់ ត្រាំ ថាគ្មានសមត្ថភាព ក្នុងការរៀបចំ ចាត់វិធានសម្របសម្រួលរួមមួយ ដើម្បីឲ្យប្រព័ន្ធមន្ទីរពេទ្យតាមរដ្ឋនីមួយៗ អាចធ្វើការសហការជាមួយគ្នាបាន។ គ្មានវិធានការរួមហើយ លោកដូណាល់ ត្រាំ មិនអំពាវនាវឲ្យប្រជាជនប្រុងប្រយ័ត្នទេ ហើយថែមទាំងនិយាយផ្ទុយពីអ្នកជំនាញវិទ្យាសាស្ត្រទៀត។
ជាមួយនឹងរដ្ឋាភិបាលថ្មីរបស់លោក ចូ បៃដិន ដែលនឹងចាប់ផ្តើមកាន់ការងារចាប់ថ្ងៃទី២០មករាទៅ គេសង្ឃឹមថា រដ្ឋបាលសហព័ន្ធនឹងមានវិធានការយុទ្ធសាស្ត្ររួម ដើម្បីដោះស្រាយវិបត្តិកូវីដ១៩នេះ។ កាលពីថ្ងៃចន្ទដើមសប្តាហ៍នេះ លោកចូ បៃដិនបានប្រកាស បង្កើតក្រុមការងារពិសេសមួយ ដើម្បីដោះស្រាយវិបត្តិកូវីដ១៩។ គេសង្ឃឹមថា រដ្ឋាភិបាលថ្មី នឹងចេញវិធានការជាក់ច្បាស់ ដូចជាដាក់កំហិតឲ្យពាក់ម៉ាសគ្រប់ទីកន្លែង ការធ្វើតេស្តដោយឥតគិតថ្លៃ និងជួយថវិកាដល់សហគ្រាស ដើម្បីកុំឲ្យបិទទ្វារឬបណ្តេញបុគ្គលិកជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ