បោះឆ្នោតប្រធានាធិបតីអាមេរិក៖តើសេណារីយ៉ូឆ្នាំ ២០០០ អាចនឹងកើតមានជាថ្មីក្នុងឆ្នាំ ២០២០ ដែរ ឬទេ?
ចុះផ្សាយនៅថ្ងៃ៖
ស្តាប់ - ០៦:៤១
នៅសហរដ្ឋអាមេរិក គេនៅមិនអាចដឹងលទ្ធផលផ្លូវការនៃការបោះឆ្នោតប្រធានាធិបតីក្នុងថ្ងៃទី៣ វិច្ឆិកានៅឡើយទេ។ ការរាប់សន្លឹកឆ្នោតនៅក្នុងរដ្ឋមួយចំនួនបានបិទបញ្ចប់ និងនៅក្នុងរដ្ឋមួយចំនួនទៀតបានផ្អាក។ តែលទ្ធផលបណ្តោះអាសន្នត្រឹមថ្ងៃទី ៤ វិច្ឆិកាឲ្យដឹងថា លោកបៃដិនទទួលបានចំនួន ២៣៨អង្គបោះឆ្នោត ឬអ្នកតំណាងរបស់អ្នកបោះឆ្នោត ហើយលោកត្រាំទទួលបានចំនួន ២១៣អង្គបោះឆ្នោត។ លោកបៃដិនបានថ្លែងដោយមានសុទិដ្ឋិនិយមថា លោកនឹងឈ្នះឆ្នោតដោយអំពាវនាវឲ្យក្រុមសកម្មជនរបស់លោកបន្តរង់ចាំការរាប់សន្លឹកឆ្នោតទាំងអស់។ ចំណែកលោកត្រាំបានប្រកាសពីជ័យជំនះ និងទាមទារឲ្យបិទការរាប់សន្លឹកឆ្នោត។ គួរបញ្ជាក់ថា ដើម្បីអាចក្លាយជាប្រធានាធិបតីបាន បេក្ខជនត្រូវទទួលបានអង្គបោះឆ្នោត ឬអ្នកតំណាងរបស់អ្នកបោះឆ្នោតចំនួន ២៧០រូប ក្នុងចំណោមអង្គបោះឆ្នោតសរុប ៥៣៨រូបនៅទូទាំងប្រទេស។
មិនទាន់អីផង ភាពចម្រូងចម្រាសជុំវិញលទ្ធផលបោះឆ្នោតបានកើតមានយ៉ាងផុសផុលក្នុងថ្ងៃបោះឆ្នោតថ្ងៃទី៣ វិច្ឆិកា។ ខណៈលោកត្រាំប្រកាសពីជ័យជំនះ និងទាមទារឲ្យបិទការរាប់សន្លឹកឆ្នោត លោកបៃដិនមានសុទិដ្ឋនិយម និងអំពាវនាវឲ្យក្រុមសកម្មជនបន្តរង់ចាំការរាប់សន្លឹកឆ្នោតទាំងអស់។ គួរបញ្ជាក់ថា មុនឈានដល់ថ្ងៃបោះឆ្នោតក្នុងថ្ងៃអង្គារ ទី៣ វិច្ឆិកា មានពលរដ្ឋអាមេរិកជិត ១០០លាននាក់ក្នុងចំណោមអ្នកចុះឈ្មោះបោះឆ្នោតទាំង ២៣០លាននាក់បានបោះឆ្នោតតាមសំបុត្រ ឬមួយទៅបោះឆ្នោតផ្ទាល់នៅមជ្ឈមណ្ឌលបោះឆ្នោត។ លទ្ធផលដែលទទួលបានតាំងពីការបិទមជ្ឈមណ្ឌលបោះឆ្នោតមកដល់ថ្ងៃទី៤ វិច្ឆិកាអាចភាគច្រើនជាលទ្ធផលដែលបានមកពីការរាប់សន្លឹកឆ្នោតចេញពីការបោះឆ្នោតក្នុងថ្ងៃបោះឆ្នោត។
ចំណែកការរាប់សន្លឹកឆ្នោតដែលបោះតាមសំបុត្រអាស្រ័យទាំងស្រុងលើរដ្ឋនីមួយៗ។ មានរដ្ឋខ្លះទទួលបានភ្លាមយកទៅផ្ទៀងផ្ទាត់ភ្លាម តែចាំរាប់ក្នុងថ្ងៃបោះឆ្នោត និងរដ្ឋខ្លះទទួលបានភ្លាម រួចទុកដល់ថ្ងៃបោះឆ្នោតទើបផ្ទៀងផ្ទាត់ និងរាប់។ យ៉ាងណាក៏ដោយ នីតិវិធីនេះត្រូវប្រើពេលប៉ុន្មានថ្ងៃបន្ថែមទៀតនៅក្រោយការបោះឆ្នោត ព្រោះសន្លឹកឆ្នោតដែលបោះតាមសំបុត្រកំពុងបន្តមកដល់ជាបន្តបន្ទាប់សម្រាប់រដ្ឋខ្លះ។ អ្វីដែលច្បាស់ នៅមានសន្លឹកឆ្នោតរាប់សិបពាន់ ម៉ឺនសន្លឹកទៀតដែលមិនទាន់បានរាប់ ពិសេសសន្លឹកឆ្នោតដែលបោះតាមសំបុត្រ។
មានការលើកឡើងថា សន្លឹកឆ្នោតដែលបោះតាមសំបុត្រអាចច្រើនជាសន្លឹកឆ្នោតគាំទ្រលោកបៃដិន ព្រោះបើតាមការអង្កេតមួយធ្វើឡើងក្នុងខែសីហា មានអ្នកប្រជាធិបតេយ្យជិត ៥០% ចង់បោះឆ្នោតតាមសំបុត្រ និងមានអ្នកសាធារណរដ្ឋតែ ២៥%។ ភាពយឺតយ៉ាវក្នុងការរាប់សន្លឹកឆ្នោតនេះជាហានិភ័យមួយដែលធ្វើឲ្យបេក្ខជនអាចប្រកាសពីជោគជ័យរបស់ខ្លួនដោយផ្អែកលើលទ្ធផលមិនទាន់ពេញលេញ ដូចដែលលោកត្រាំបានប្រកាសនាព្រឹកថ្ងៃទី៤ វិច្ឆិកាដោយទាមទារឲ្យឈប់រាប់សន្លឹកឆ្នោតត្រឹមនេះ។
ចុះបើមានការប្រទាញប្រទង់គ្នាលើលទ្ធផល?
បើបេក្ខជនទាំងពីរមិនចុះសម្រុងគ្នាលើលទ្ធផល គឺនឹងមានការប្តឹងផ្តល់គ្នាតាមផ្លូវច្បាប់ទៅតុលាការ។ គ្រប់គ្នាកំពុងមើលឃើញថា អ្វីដែលហាក់កំពុងលេចឡើងនៅក្នុងការបោះឆ្នោតប្រធានាធិបតីអាមេរិកឆ្នាំ ២០២០ គឺជាសេណារីយ៉ូមួយដែលសហរដ្ឋអាមេរិកធ្លាប់ជួបប្រទះកាលពីឆ្នាំ ២០០០។ កាលណោះ លោក George W.Bush មកពីគណបក្សសាធារណរដ្ឋបានប្រឈមនឹងលោក Al Gore មកពីគណបក្សប្រជាធិបតេយ្យ។ គេត្រូវរង់ចាំដល់ថ្ងៃទី១២ ធ្នូ ឆ្នាំ ពោលជាង ១ខែក្រោយការបោះឆ្នោតទើបគេដឹងឈ្មោះប្រធានាធិបតីថ្មី។ កាលណោះ តុលាការកំពូលបានសម្រេចឲ្យលោក Bush ឈ្នះលោក Gore។
នៅក្នុងការបោះឆ្នោតឆ្នាំ ២០២០ លោកត្រាំអាចប្តឹងទាមទារឲ្យឈប់រាប់សន្លឹកឆ្នោតត្រឹមនេះ ហើយបើមានការឈប់រាប់ត្រឹមនេះមែន លោកត្រាំឈ្នះលោកបៃដិនដោយទទួលបានចំនួនអង្គបោះឆ្នោត ២៧០ ដើម្បីអាចបន្តអង្គុយកៅអីប្រធានាធិបតីចំនួន ៤ឆ្នាំបន្ថែមទៀត។ តែបើតាមមើលទៅ លោកបៃដិនពិតជាមិនបន្តឈរឱបដៃនៅស្ងៀមទេ។ លោកត្រាំ និងលោកបៃដិនសុទ្ធតែបានត្រៀមក្រុមមេធាវីរៀងៗខ្លួនរួចជាស្រេចដើម្បីតតាំងគ្នានៅតុលាការ ប្រសិនបើមានសេណារីយ៉ូដូចឆ្នាំ ២០០០ កើតឡើងមែន។ តែនៅក្នុងករណីនេះ លោកត្រាំអាចមានប្រៀបលើលោកបៃដិន ព្រោះចូលកុំភ្លេចថានៅតុលាការកំពូលសព្វថ្ងៃដែលមានចៅក្រមចំនួន ៩នាក់ មាន ៦នាក់ជាចៅក្រមដែលមាននិន្នាការអភិរក្សនិយមដែលតែងតាំងដោយគណបក្សសាធារណរដ្ឋ និង ៣នាក់តែងតាំងដោយគណបក្សប្រជាធិបតេយ្យ។
ចុះបើលោកត្រាំ និងលោកបៃដិនមានចំនួនអង្គបោះឆ្នោតស្មើគ្នា គឺ ២៦៩
ដោយសមាជិកសរុបនៃអង្គបោះឆ្នោត ឬអ្នកតំណាងរបស់អ្នកបោះឆ្នោតជាចំនួនគូ គឺ៥៣៨ បេក្ខជនទាំងពីរនាក់លោកត្រាំ និងលោកបៃដិនអាចទទួលបានចំនួនអង្គបោះឆ្នោតស្មើគ្នា គឺ ២៦៩។ ក្នុងករណីនេះ គឺគ្មានអ្នកឈ្នះ និងក៏គ្មានអ្នកចាញ់ ហើយក្នុងករណីនេះ គឺរដ្ឋសភាជាអ្នកបោះឆ្នោតជ្រើសរើសប្រធានាធិបតី និងព្រឹទ្ធសភាជាអ្នកបោះឆ្នោតជ្រើសរើសអនុប្រធានាធិបតី។ គួរបញ្ជាក់ថា សមាជិករដ្ឋសភា និងសមាជិកព្រឹទ្ធសភាដែលត្រូវបោះឆ្នោតជ្រើសរើសប្រធានាធិបតី និងអនុប្រធានាធិបតីនៅក្នុងករណីសំឡេងស្មើគ្នារវាងបេក្ខជនទាំងពីរនាក់ គឺសមាជិកសភា និងសមាជិកព្រឹទ្ធសភាថ្មីដែលកើតចេញពីការបោះឆ្នោតក្នុងថ្ងៃទី៣វិច្ឆិកា ឆ្នាំ ២០២០ និងដែលត្រូវស្បថចូលកាន់តំណែងនៅថ្ងៃទី៣ មករា ២០២១។
មួយវិញទៀត នៅក្នុងការបោះឆ្នោតជ្រើសរើសប្រធានាធិបតីដោយរដ្ឋសភានេះ រដ្ឋមួយមានតែ១សំឡេងប៉ុណ្ណោះ ដោយមិនគិតថារដ្ឋនោះមានប្រជាជនច្រើនប៉ុណ្ណា និងមានសមាជិកសភាសរុបចំនួនប៉ុន្មានទេ។ ចំណែកការបោះឆ្នោតជ្រើសរើសប្រធានាធិបតីត្រូវធ្វើឡើងដោយសំឡេងភាគច្រើន គឺ ២៦សំឡេងពីក្នុងចំណោម ៥០រដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ