ហេតុអ្វីបានជាសហភាពអឺរ៉ុបមិនសប្បាយចិត្តនឹងអ៊ីរ៉ង់ដែលបានប្រហារជីវិតអ្នកប្រឆាំងអ៊ីរ៉ង់លោករូហូឡា ហ្សាំ?
ចុះផ្សាយនៅថ្ងៃ៖
ស្តាប់ - ០៥:២៥
កាលពីថ្ងៃសៅរ៍ ទី១២ ធ្នូកន្លងទៅ ប្រទេសអ៊ីរ៉ង់បានប្រហារជីវិតអ្នកប្រឆាំងម្នាក់ឈ្មោះរូហូឡា ហ្សាំដោយព្យួរ ក។ ព្រឹត្តិការណ៍មួយនេះបានបង្កឲ្យមានប្រតិកម្មពីមហាជនអ៊ីរ៉ង់ និងសហគមន៍អន្តរជាតិ ពិសេសបារាំង និងសហភាពអឺរ៉ុប។ បន្ទាប់ពីបានថ្កោលទោស និងចាត់ទុកការប្រហារជីវិតលោករូហូឡា ហ្សាំជាអំពើព្រៃផ្សៃ និងមិនអាចទទួលយកបាន ឯកអគ្គរដ្ឋទូតបារាំង អាល្លឺម៉ង់ អូទ្រីស និងអ៊ីតាលីបានធ្វើពហិកាមិនចូលរួមនៅក្នុងវេទិកាសេដ្ឋកិច្ចរវាងសហភាពអឺរ៉ុប និងអ៊ីរ៉ង់ដែលគ្រោងរៀបចំរយៈពេល ៣ថ្ងៃពីថ្ងៃចន្ទ ទី១៤ ធ្នូ។ ទីបំផុត គណៈកម្មាធិការរៀបចំវេទិកាបានលើកពេលរៀបចំវេទិកានេះទៅពេលក្រោយវិញ។ តើរឿងរ៉ាវរបស់លោករូហូឡា ហ្សាំបានកើតឡើងយ៉ាងដូចម្តេច និងថា ហេតុអ្វីបានជាសហភាពអឺរ៉ុបមិនសប្បាយចិត្តនឹងអ៊ីរ៉ង់ដែលបានប្រហារជីវិតអ្នកប្រឆាំងអ៊ីរ៉ង់រូបនេះ?។
ប៉ុន្មានម៉ោងក្រោយពីបានទទួលដំណឹងស្តីពីការប្រហារជីវិតលោករូហូឡា ហ្សាំដោយព្យួរ ក សហភាពអឺរ៉ុបបានបញ្ចេញប្រតិកម្មខ្លាំងៗ និងបានរម្លឹកជាថ្មីពីការប្រឆាំងយ៉ាងដាច់អហង្ការចំពោះទោសប្រហារជីវិតតាមគ្រប់រូបភាពទាំងអស់។ ចំណែកបារាំងបានបញ្ចេញប្រតិកម្មស្រដៀងគ្នានេះដោយចាត់ទុកការប្រហារជីវិតអ្នកប្រឆាំងអ៊ីរ៉ង់រូបនេះជាអំពើព្រៃផ្សៃ និងមិនអាចទទួលយកបានទេ។ ប្រតិកម្មខ្លាំងៗរបស់សហភាពអឺរ៉ុប និយាយជារួម និងរបស់បារាំង និយាយដោយឡែកយ៉ាងដូចនេះមិនបានទុកឲ្យអ៊ីរ៉ង់ឈរឱបដៃស្តាប់យូរឡើយ។ ឯកអគ្គរដ្ឋទូតបារាំង និងឯកអគ្គរដ្ឋទូតអាល្លឺម៉ង់ប្រចាំទីក្រុងតេហេរ៉ង់ត្រូវបានក្រសួងការបរទេសអ៊ីរ៉ង់កោះហៅទៅជួបនាថ្ងៃអាទិត្យ ទី១៣ ធ្នូ។
នៅចំពោះមុខឯកអគ្គរដ្ឋបារាំង និងអាល្លឺម៉ង់ អ៊ីរ៉ង់បានសម្តែងការមិនសប្បាយចិត្តចំពោះការលូកដៃចូលជ្រៀតជ្រែកកិច្ចការផ្ទៃក្នុងរបស់អ៊ីរ៉ង់។ បន្ទាប់មក សាធារណរដ្ឋអ៊ីស្លាមអ៊ីរ៉ង់ក៏បានស្តីបន្ទោសដល់ប្រទេសអឺរ៉ុបខ្លះដែលបានត្រេកត្រអាលនៅចំពោះទង្វើសាយភាយបែបហិង្សា និងមានលក្ខណៈបង្កភេរវកម្មប្រឆាំងអ៊ីរ៉ង់។ ដើម្បីបន្ថែមទម្ងន់ប្រឆាំងលើអ៊ីរ៉ង់ បារាំង រួមទាំងប្រទេសអឺរ៉ុបផ្សេងទៀតបានដកខ្លួនមិនចូលរួមនៅក្នុងវេទិកាសេដ្ឋកិច្ចស្តីពីជំនួញរវាងសហភាពអឺរ៉ុប និងអ៊ីរ៉ង់ដែលគ្រោងរៀបចំតាមអនឡាញនៅក្រសួងការងារអ៊ីរ៉ង់រយៈពេល ៣ថ្ងៃពីថ្ងៃចន្ទ ទី១៤ ធ្នូ។
គណៈកម្មាធិការរៀបចំវេទិកាបានលើកពេលរៀបចំវេទិកានេះទៅពេលក្រោយវិញដោយមិនបានបញ្ជាក់ពីកាលបរិច្ឆេទថ្មីទេ។ ហេតុអ្វីបានជាគ្រាន់តែមួយប៉ប្រិចភ្នែកសោះ អ្នកប្រឆាំងអ៊ីរ៉ង់លោករូហូឡា ហ្សាំបានធ្វើឲ្យសហភាពអឺរ៉ុប និងអ៊ីរ៉ង់ស្គាល់ភាពរកាំរកូសកាទូតដល់ម្លឹង?។ តាមពិតទៅ មានតម្លៃជាសារវន្តចំនួនពីរដែលសហភាពអឺរ៉ុបបានការពារ ទី១ គឺប្រឆាំងនឹងទោសប្រហារជីវិត និងទី២ គឺសិទ្ធិសេរីភាពក្នុងការបញ្ចេញមតិដែលលោករូហូឡា ហ្សាំជាអ្នកប្រឆាំងអ៊ីរ៉ង់ម្នាក់។ តែទម្ងន់ទោសដែលលោករូហូឡា ហ្សាំបានទទួលពីតុលាការអ៊ីរ៉ង់ និងបន្ទាប់មកត្រូវបានបញ្ជាក់ដោយតុលាការកំពូលអ៊ីរ៉ង់មានលក្ខណៈធ្ងន់ធ្ងរជាងអ្នកប្រឆាំងធម្មតាទៅទៀត។
ជាសរុប លោករូហូឡា ហ្សាំបានជាប់ចោទក្នុងបទចោទប្រកាន់ចំនួន ១៣ រួមមាន ដើរតួនាទីយ៉ាងសំខាន់នៅក្នុងបាតុកម្មប្រឆាំងរបបអ៊ីរ៉ង់នាខែរងារឆ្នាំ ២០១៧ ២០១៨ ប្រព្រឹត្តិអំពើពុករលួយ សហការជាមួយប្រទេសសត្រូវមួយរបស់អ៊ីរ៉ង់ គឺសហរដ្ឋអាមេរិក និងធ្វើចារកម្មឲ្យប្រទេសបារាំង និងប្រទេសអ៊ីស្រាអែល។ គួររម្លឹកថាមានអាយុ ៤១ឆ្នាំ លោករូហូឡា ហ្សាំទទួលបានសិទ្ធិជាជនភៀសខ្លួននយោបាយក្នុងប្រទេសបារាំងតាំងពីឆ្នាំ ២០១២ ដោយរស់នៅជាមួយភរិយា និងកូន ២នាក់។ នៅក្នុងទឹកដីបារាំងក៏អ្នកប្រឆាំងអ៊ីរ៉ង់រូបនេះទទួលការគំរាមកំហែងដល់ជីវិតដោយបានបង្ខំរដ្ឋអំណាចបារាំងឲ្យដាក់កម្លាំងសន្តិសុខការពាររូបលោកជាប់ជាប្រចាំ។
ក្នុងខែតុលា ឆ្នាំ ២០១៩ លោករូហូឡា ហ្សាំបានធ្វើដំណើរទៅកាន់ប្រទេសអ៊ីរ៉ាក់ដើម្បីជួបអ្នកប្រឆាំងអ៊ីរ៉ង់ផ្សេងទៀតដែលសន្យាផ្តល់ឲ្យលោកនូវថវិកាសម្រាប់បង្កើតកាណាល់ទូរទស្សន៍មួយ។ កម្លាំងសន្តិសុខបារាំងដែលបានទទួលដំណឹងពីគម្រោងទៅកាន់អ៊ីរ៉ាក់របស់លោករូហូឡា ហ្សាំបានព្យាយាមឃាត់លោកកុំឲ្យទៅដោយលើកយកហេតុផលទៅពន្យល់ថា ជាផែនការអន្ទាក់រៀបចំដោយរបបក្រុងតេហេរ៉ង់។ តែលោកហ្សាំនៅតែចចេសទៅដដែល។ បន្ទាប់មក ភរិយារបស់លោកក៏បានរារាំងលោកតាំងពីមុនចេញដំណើររហូតដល់ពេលលោកចុះចតដូរយន្តហោះក្នុងប្រទេសហ្សកដានី និងពេលជាន់ទឹកដីអ៊ីរ៉ាក់ភ្លាម។
តែគឺនៅប៉ុន្មានម៉ោងក្រោយពីបានដាក់ជើងជាន់ទឹកដីអ៊ីរ៉ាក់នោះឯងដែលលោករូហូឡា ហ្សាំត្រូវបានចាប់ខ្លួន។ ដំណឹងមួយនេះត្រូវបានផ្សព្វផ្សាយដោយទូរទស្សន៍អ៊ីរ៉ាក់ជាមួយនឹងការបង្ហាញរូបលោករូហូឡា ហ្សាំអង្គុយក្នុងឡានខាងក្រោយដោយមានកន្សែងរុំភ្នែកទាំងពីរ។ តាមទូរទស្សន៍អ៊ីរ៉ាក់ដដែល ប្រតិបត្តិការចាប់លោករូហូឡា ហ្សាំត្រូវបានរៀបចំយ៉ាងប្រណិតដោយកងឆ្មាំបដិវត្តន៍អ៊ីរ៉ង់។ បន្ទាប់មក ទូរទស្សន៍អ៊ីរ៉ាក់បានចាក់ផ្សាយសម្តីសារភាពរបស់លោករូហូឡា ហ្សាំដែលទទួលស្គាល់ពីសកម្មភាពរបស់ខ្លួនក្នុងគោលដៅផ្តួលរំលំរបបដឹកនាំនៅអ៊ីរ៉ង់។ តែទូរទស្សន៍អ៊ីរ៉ាក់ដដែលមិនបានបញ្ជាក់ពីថ្ងៃខែពិតប្រាកដ ទីកន្លែងច្បាស់លាស់ និងព័ត៌មានលំអិតស្តីពីការចាប់ខ្លួនលោករូហូឡា ហ្សាំទេ។
នៅលើបណ្តាញ Telegram ឈ្មោះ Amadnews របស់លោករូហូឡា ហ្សាំដែលមានអ្នកជាវ ១លាន ៤សែននាក់ លោករូហូឡា ហ្សាំបានទម្លាយព័ត៌មានជាច្រើនស្តីពីថ្នាក់ដឹកនាំអ៊ីរ៉ង់ដែលជាប់ពាក់ព័ន្ធនឹងរឿងអាស្រូវពុករលួយ និងខ្សែអាត់វីដេអូដែលបង្ហាញពីអំពើហិង្សារបស់ប៉ូលិសអ៊ីរ៉ង់ទៅលើហ្វូងបាតុករអ៊ីរ៉ង់នាពេលបាតុកម្មប្រឆាំងរដ្ឋាភិបាលឆ្នាំ ២០១៧ ២០១៨។ ការប្រហារជីវិតលោករូហូឡា ឡាំពេលនេះជាសក្ខីកម្មថ្មីមួយទៀតដែលបញ្ជាក់ថា អ៊ីរ៉ង់មិនបានទុកបណ្តាយឲ្យអ្នកប្រឆាំងខ្លួនណាម្នាក់រួចខ្លួនឡើយទោះនៅទីកន្លែងណាក៏ដោយ មិនថាកំពុងស្ថិតក្នុងស្រុក ឬកំពុងរស់ជ្រកកោននៅបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ