អឺរ៉ុប និងសហរដ្ឋអាមេរិកបន្តដំឡើងសរសៃ ក ដាក់គ្នាជុំវិញរឿងពន្យារទណ្ឌកម្មសព្វាអាវុធលើអ៊ីរ៉ង់
សង្រ្គាមពាក្យសម្តីកំពុងបន្តកើតមានយ៉ាងផុសផុលរវាងសហរដ្ឋអាមេរិក និងអឺរ៉ុបស្តីពីការពន្យារទណ្ឌកម្មសព្វាវុធលើអ៊ីរ៉ង់។ គួររម្លឹកថាក្នុងថ្ងៃសុក្រ ទី១៤ សីហា ក្រុមប្រឹក្សាសន្តិសុខបានបោះឆ្នោតច្រានចោលសំណើរបស់សហរដ្ឋអាមេរិកក្នុងការពន្យារការដាក់ទណ្ឌកម្មសព្វាវុធប្រឆាំងអ៊ីរ៉ង់ដែលនឹងត្រូវអស់សុពលភាពនៅខែតុលាខាងមុខ។ តែសំណើមួយនេះត្រូវបានអឺរ៉ុប និងសម្ព័ន្ធមិត្តអឺរ៉ុប រួមទាំងប្រទេសមហាអំណាចផ្សេងទៀតបោះឆ្នោតច្រានចោលភ្លាមៗ។ អឺរ៉ុបយល់ថា អាមេរិកដែលបានដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ គ្មានសិទ្ធិអំណាចអ្វីទៀតដើម្បីអារកាត់លើរឿងបន្ត ឬមិនបន្តទណ្ឌកម្មអាវុធប្រឆាំងអ៊ីរ៉ង់ទេ។ ទោះជាយ៉ាងនេះក្តី ប្រមុខការទូតអាមេរិកលោកប៉ុមប៉េអូ លោកមិនញញើតនឹងចោទបារាំង អង់គ្លេស និងអាល្លឺម៉ង់ពីបទបានជ្រើសផ្លូវដើរជាមួយក្រុមអាយ៉ាតូឡាដែលកំពុងកាន់អំណាចនៅអ៊ីរ៉ង់។ លោកវ៉ាំងសង់ អេហ្វលីង អ្នកស្រាវជ្រាវជនជាតិបារាំងនៅមជ្ឈមណ្ឌលសិក្សានៃវិបត្តិ និងជម្លោះអន្តរជាតិហាក់មិនភ្ញាក់ផ្អើលចំពោះសង្រ្គាមពាក្យសម្តីរវាងសហរដ្ឋអាមេរិក និងអឺរ៉ុបពេលនេះទេ។ តាមលោកអេហ្វលីង អ្វីដែលកំពុងកើតមានពេលនេះនឹងធ្វើឲ្យអាមេរិកឯកោកាន់តែខ្លាំង និងធ្វើឲ្យគម្លាតរវាងសហរដ្ឋអាមេរិក និងអឺរ៉ុបកាន់តែឃ្លាតឆ្ងាយថែមទៀត។
ចុះផ្សាយនៅថ្ងៃ៖
ស្តាប់ - ០១:៤៦
« សហរដ្ឋអាមេរិកកំពុងប្រឈមនឹងផ្លូវទាល់មួយដែលមានជញ្ជាំងនៅពីមុខ។ អឺរ៉ុប ចិន រុស្ស៊ី និងប្រទេសសមាជិកអចិន្រ្តៃយ៍ផ្សេងទៀតនៃក្រុមប្រឹក្សាសន្តិសុខអង្គការសហប្រជាជាតិមិនចង់ឲ្យមានយន្តការណ៍ពន្យារការដាក់ទណ្ឌកម្មសព្វាវុធលើអ៊ីរ៉ង់ទេ។ និយាយបែបម្យ៉ាងទៀតនាពេលខាងមុខ វាច្បាស់ណាស់ដែលក្រុមនីមួយៗនឹងលើកឡើងពីសិទ្ធិអំណាចរៀងៗខ្លួន។
នៅម្ខាង សហរដ្ឋអាមេរិកច្បាស់ជាលើកឡើងថា ខ្លួនមានសិទ្ធិអំណាចស្របច្បាប់ត្រឹមត្រូវ។ ចំណែកនៅម្ខាងទៀតច្បាស់ជាឆ្លើយថាទេ និងលើកហេតុផលទៅពន្យល់ថា សហរដ្ឋអាមេរិកដែលបានដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ គ្មានសិទ្ធិអំណាចអ្វីចូលខ្លួនមកចាត់ចែងសម្រេចរឿងពន្យារ ឬមិនពន្យារការដាក់ទណ្ឌកម្មសព្វាវុធលើអ៊ីរ៉ង់ទេ។
នៅទីបំផុត ម្នាក់ៗបានបន្តប្រកាន់ជំហររៀងៗខ្លួនដែលនឹងធ្វើឲ្យស្ថានការណ៍ជាប់គាំងមួយកន្លែង។ ទោះជាយ៉ាងណាក៏ដោយ រឿងរ៉ាវមួយនេះមិនបានផ្តល់ផលវិជ្ជមានឲ្យអង្គការសហប្រជាជាតិ និងក្រុមប្រឹក្សាសន្តិសុខទេ ព្រោះវាបានបង្ហាញចេញនូវអសមត្ថភាពរបស់ក្រុមប្រឹក្សាសន្តិសុខក្នុងការធ្វើឲ្យចម្រើនទៅមុខលើសេចក្តីសម្រេចទាក់ទងនឹងសំណុំរឿងមួយដ៏រស៊ើប។ ទន្ទឹមគ្នានេះ វាក៏បង្ហាញឲ្យឃើញនូវភាពឯកោកាន់តែខ្លាំងរបស់សហរដ្ឋអាមេរិកនៅលើឆាកអន្តរជាតិ។
តាមពិតទៅ អស់រយៈពេលជាយូរមកហើយដែលអឺរ៉ុប និងសហរដ្ឋអាមេរិកបានប្រទាញប្រទង់គ្នានៅក្នុងសំណុំរឿងអ៊ីរ៉ង់។ ដូច្នេះឃើញថា អ្វីដែលកំពុងកើតមានរវាងសហរដ្ឋអាមេរិក និងអឺរ៉ុបពេលនេះគ្រាន់ជាចំណែកមួយទៀតធ្វើឲ្យគម្លាតរវាងភាគីទាំងពីរដែលកំពុងមានស្រាប់រឹតតែឃ្លាតឆ្ងាយថែមទៀតប៉ុណ្ណោះ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ