សំណុំរឿងប្រមាថព្រះមហាក្សត្រ៖ លោក សម រង្ស៊ី ថាជាការបញ្ចេញមតិ ខណៈក្រសួងយុត្តិធម៌ស្នើតុលាការចាត់ការតាមផ្លូវច្បាប់
ភ្លាមៗបន្ទាប់ពីរដ្ឋមន្ត្រីក្រសួងយុត្តិធម៌ចេញអធិបញ្ជាទៅព្រះរាជអាជ្ញាអមសាលាដំបូងរាជធានីភ្នំពេញ ឲ្យចាត់វិធានការច្បាប់ជាបន្ទាន់និងតឹងរឹងបំផុត លើលោក សម រង្ស៊ី នៅថ្ងៃជាមួយគ្នានោះ ប្រធានស្តីទីអតីតគណបក្សសង្គ្រោះជាតិរូបនេះ បានសរសេរបកស្រាយយ៉ាងវែងអន្លាយចំពោះអ្វីដែលលោកបានលើកឡើងនោះ។ បើតាមលោក សម រង្ស៊ី លោកមានសិទ្ធិសម្តែងមតិជុំវិញរឿងនេះ ហើយថាអ្វីដែលរដ្ឋមន្ត្រីក្រសួងយុត្តិធម៌បានបញ្ជាទៅតុលាការគឺធ្វើទៅតាមបញ្ជារបស់លោក ហ៊ុន សែន។
ចុះផ្សាយនៅថ្ងៃ៖
ស្តាប់ - ០២:០២
មូលហេតុដែល លោក សម រង្ស៊ី ជាប់បណ្តឹងថ្មីមួយទៀតនៅតុលាការពីបទប្រមាថព្រះមហាក្សត្រនៅពេលនេះ គឺបន្ទាប់ពីលោកបានរិះគន់ការរៃអង្គាសប្រាក់ដើម្បីទិញវ៉ាក់សាំងប្រឆាំងកូវីដ១៩ ដោយប្រមុខរដ្ឋាភិបាល។ ប៉ុន្តែមិនត្រឹមតែចំអកឲ្យលោក ហ៊ុន សែន ក្នុងការប្រមូលថវិកាដើម្បីទិញវ៉ាក់ប៉ុណ្ណោះទេ លោក សម រង្ស៊ី ថែមទាំងសរសេរវាយប្រហាររាលដាលដល់ព្រះមហាក្សត្រថែមទៀតផង។
លោក គឹម សន្តិភាព រដ្ឋលេខាធិការ និងជាអ្នកនាំពាក្យពន្យល់ថា ការចេញអធិបញ្ជារបស់រដ្ឋមន្ត្រីក្រសួងយុត្តិធម៌ គឺបន្ទាប់ពីក្រសួងនេះមើលឃើញថា លោក សម រង្ស៊ី បានប្រើពាក្យពេចន៍ ដែលមានខ្លឹមសារជាការប្រមាថដល់អង្គព្រះមហាក្សត្រ។
ក្នុងសារបង្ហោះនៅលើគណនីហ្វេសប៊ុករបស់ខ្លួន កាលពីថ្ងៃទី ២០ ធ្នូ លោក សម រង្ស៊ី បានរិះគន់ទៅលើគម្រោងទិញវ៉ាក់សាំងប្រឆាំងជំងឺកូវីដ១៩របស់លោកនាយករដ្ឋមន្ត្រី ហ៊ុន សែន ប៉ុន្តែបានប្រមាថទៅលើអង្គព្រះមហាក្សត្រថា «ឥឡូវនេះ ហ៊ុន សែន ស្ងាត់ជ្រាបក្នុងរឿងនេះ ហើយគាត់ត្រៀមសងលុយសប្បុរសជនដែលចាញ់បោកគាត់ មានទាំងស្តេចទីងមោងផងដែរ»។
នៅត្រង់ចំណុចនេះ ក្រសួងយុត្តិធម៌ បានចាត់ទុកថា គឺជាការប្រមាថចំពោះអង្គព្រះមហាក្សត្រ ដោយបានធ្វើឲ្យប៉ះពាល់យ៉ាងធ្ងន់ធ្ងរដល់សេចក្តីថ្លៃថ្នូរ និងព្រះកិត្តិនាមរបស់ព្រះអង្គ ដែលជាទីសក្ការៈរបស់ប្រជាពលរដ្ឋខ្មែរនៅទូទាំងប្រទេស។
ភ្លាមៗបន្ទាប់ពីរដ្ឋមន្ត្រីក្រសួងយុត្តិធម៌ចេញអធិបញ្ជា បែបនេះ នៅថ្ងៃជាមួយគ្នានោះ ប្រធានស្តីទីអតីតគណបក្សសង្គ្រោះជាតិរូបនេះ បានសរសេរបកស្រាយយ៉ាងវែងអន្លាយចំពោះអ្វីដែលលោកបានលើកឡើងនោះ។ បើតាមលោក សម រង្ស៊ី លោកមានសិទ្ធិសម្តែងមតិជុំវិញរឿងនេះ ហើយថាអ្វីដែលរដ្ឋមន្ត្រីក្រសួងយុត្តិធម៌បានបញ្ជាទៅតុលាការគឺធ្វើទៅតាមបញ្ជារបស់ លោក ហ៊ុន សែន។
ជុំវិញសំណុំរឿងប្រមាថព្រះមហាក្សត្រនេះដែរ កាលពីខែឧសភាឆ្នាំ២០១៩ សាលាដំបូងរាជធានីភ្នំពេញ បានកាត់ទោសកំបាំងមុខឲ្យលោក សម រង្ស៊ីជាប់ពន្ធនាគារ៨ឆ្នាំ និងត្រូវបង់២០លានរៀល ពីបទញុះញង់កងទ័ព និងបទប្រមាថព្រះមហាក្សត្រ។ នេះមិនទាន់រាប់បញ្ចូលសំណុំរឿងជិត១០ផ្សេងទៀតដែល លោក សម រង្ស៊ី បានរងបណ្តឹង ដែលខ្លះត្រូវបានជំនុំជម្រះរួចហើយ និងខ្លះទៀតកំពុងស្ថិតក្នុងដៃតុលាការនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ