អាមេរិកផ្តល់ជំនួយដល់កម្ពុជា៨៥លានដុល្លារ តែដាក់លក្ខខណ្ឌឱ្យកម្ពុជាត្រូវប្រឆាំងនឹងការជ្រៀតជ្រែករបស់ចិន
នៅក្នុងឆ្នាំ២០២១ខាងមុខនេះ រដ្ឋាភិបាលអាមេរិកគ្រោងនឹងផ្តល់ជំនួយដល់ប្រទេសកម្ពុជាប្រមាណ៨៥លានដុល្លារអាមេរិក ដើម្បីជួយដល់ការអភិវឌ្ឍផ្សេងៗ។ នេះបើតាមសំណើកញ្ចប់ថវិកាប្រចាំឆ្នាំរបស់អាមេរិកដែលទើបត្រូវសភាអាមេរិកអនុម័តកាលពីថ្ងៃចន្ទដើមសប្តាហ៍នេះ។ ប៉ុន្តែ អាមេរិកបានដាក់លក្ខខណ្ឌជាច្រើន ក្នុងនោះ ក៏បានតម្រូវឱ្យកម្ពុជាត្រូវប្រឆាំងតទល់នឹងការជ្រៀតជ្រែកពីប្រទេសចិនផងដែរ។ ប៉ុន្តែ អ្នកនាំពាក្យរដ្ឋាភិបាលកម្ពុជាបានអះអាងថា អាមេរិកមិនអាចមកបញ្ជាលើកម្ពុជា ដោយសារតែផ្តល់ជំនួយបានទេ។
ចុះផ្សាយនៅថ្ងៃ៖
ស្តាប់ - ០២:១៤
កម្ពុជាអាចទទួលបានជំនួយប្រមាណជាង៨៥លានដុល្លារអាមេរិកនេះ លុះត្រារដ្ឋាភិបាលកម្ពុជាបង្ហាញពីឃើញពីការពង្រឹងសន្តិសុខ និង ស្ថិរភាពនៅក្នុងតំបន់ ពិសេសបញ្ហាជម្លោះនៅសមុទ្រចិនខាងត្បូង និងគោរពការដាក់ទណ្ឌកម្មអន្តរជាតិទៅលើប្រទេសកូរ៉េខាងជើង។ នេះ គឺជាលក្ខខណ្ឌដែលអាមេរិកបានដាក់មកលើកម្ពុជា ហើយក៏បានបន្ថែមដោយតម្រូវឱ្យកម្ពុជាប្រកាសពីអធិបតេយ្យភាពរបស់ខ្លួនប្រឆាំងទៅនឹងការជ្រៀតជ្រែកពីប្រទេសចិន ដោយរួមបញ្ចូលការរក្សាឱ្យមានអព្យាក្រិតភាពលើបញ្ហាមូលដ្ឋានកងទ័ពជើងរាម និងមូលដ្ឋានទ័ពផ្សេងៗទៀតនៅក្នុងប្រទេសកម្ពុជា និង បញ្ហាគម្រោងអភិវឌ្ឍតារាសាគរ។
ក្រៅពីបញ្ហាទាំងនេះ អាមេរិកក៏ដាក់លក្ខខណ្ឌឱ្យកម្ពុជាបញ្ឈប់អំពើហិង្សា និងការយាយីប្រឆាំងនឹងសង្គមស៊ីវិល និង គណបក្សប្រឆាំងនៅក្នុងប្រទេសកម្ពុជា និងទម្លាក់ចោលនូវបទចោទព្រហ្មទណ្ឌបែបនយោបាយទៅលើអ្នកដែលរិះគន់រដ្ឋាភិបាលកម្ពុជា។ ម្យ៉ាងទៀត អាមេរិកក៏តម្រូវឱ្យកម្ពុជាគោរពសិទ្ធិមនុស្ស សេរីភាព និងករណីកិច្ចដែលមានចែងនៅក្នុងរដ្ឋធម្មនុញ្ញដែលប្រកាសឱ្យប្រើប្រាស់កាលពីឆ្នាំ១៩៩៣។
អ្នកនាំពាក្យរដ្ឋាភិបាលកម្ពុជា លោកផៃ ស៊ីផាន បានសម្តែងការស្វាគមន៍ដែលរដ្ឋាភិបាលអាមេរិកគ្រោងផ្តល់ជំនួយដល់ប្រទេសកម្ពុជានេះ។ លោកបានអះអាងថា បើទោះបីនឹងទទួលបានជំនួយពីអាមេរិក តែកម្ពុជានៅតែរក្សាសិទ្ធិក្នុងការធ្វើអ្វីៗដោយខ្លួនឯង ដើម្បីផលប្រយោជន៍របស់កម្ពុជា។ បើតាមលោកផៃ ស៊ីផាន កម្ពុជា និងអាមេរិកមានការគោរពគ្នាទៅវិញទៅមក ដូច្នេះហើយ មិនមានភាគីណាមួយអាចបញ្ជាលើភាគីណាមួយបានឡើយ។
សូមបញ្ជាក់ថា នៅក្នុងឆ្នាំ២០២០នេះ រដ្ឋាភិបាលអាមេរិកបានផ្តល់ជំនួយដល់កម្ពុជាប្រមាណ១២៨,៧លានដុល្លារ ក្នុងនោះក៏បានផ្តល់១១លានដុល្លារសម្រាប់ប្រយុទ្ធប្រឆាំងនឹងជំងឺកូវីដ១៩។ នៅក្នុងខែធ្នូនេះ អាមេរិកក៏បានផ្តល់ជំនួយដល់កម្ពុជាចំនួន៦៦,២លានដុល្លារអាមេរិកផងដែរ។ ដោយឡែក គិតតាំងពីឆ្នាំ១៩៩២ដល់ឆ្នាំ២០១៩ អាមេរិកបានផ្តល់ជំនួយឥតសំណងដល់កម្ពុជាប្រមាណ១,៥ពាន់លានដុល្លារ ស្មើនឹង៦,១០% នៃជំនួយទាំងអស់ដែលផ្តល់ដោយដៃគូអភិវឌ្ឍ។ ជំនួយអាមេរិកភាគច្រើន គឺផ្តោតសំខាន់វិស័យសុខាភិបាល អប់រំ បរិស្ថាន កសិកម្ម អភិបាលកិច្ច និង ការអភិវឌ្ឍតាមបែបប្រជាធិបតេយ្យ និងកម្មវិធីដោះមីន និងយុទ្ធភ័ណ្ឌមិនទាន់ផ្ទះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ