អ្នកនាំពាក្យ៖ កម្មករជាង១.៥ម៉ឺននាក់ កំពុងស្ថិតនៅក្នុងបញ្ជីដែលក្រសួងសេដ្ឋកិច្ចត្រៀមផ្ទេរថវិកាជូនក្នុងពេលព្យួរការងារ
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានប្រាប់វិទ្យុបារាំងអន្តរជាតិ RFI នៅរសៀលថ្ងៃអាទិត្យនេះថា គិតត្រឹមថ្ងៃសុក្រ ទី០៨ ឧសភាមក គឺមានកម្មករនិយោជិតនៅតាមរោងចក្រ និងសហគ្រាសជាង ១ម៉ឺន៥ពាន់នាក់ កំពុងស្ថិតនៅក្នុងបញ្ជី ដែលក្រសួងសេដ្ឋកិច្ចនិងហិរញ្ញវត្ថុ ត្រៀមផ្ទេរថវិកាជួយឧបត្ថម្ភ ក្នុងពេលព្យួរការងារដោយសារតែវិបត្តិនៃជំងឺកូវីដ១៩។ សូមបញ្ជាក់ថា ការព្យួរកិច្ចសន្យាការងារដែលទទួលបានការឧបត្ថម្ភពីរដ្ឋាភិបាល គឺសម្រាប់តែរោងចក្រ សហគ្រាសដែលបានដាក់ពាក្យសុំព្យួរកិច្ចសន្យាការងារមកក្រសួងការងារ ហើយទទួលបានលិខិតអនុញ្ញាតិឲ្យព្យួរកិច្ចសន្យារការពីក្រសួងតែប៉ុណ្ណោះ។
ចុះផ្សាយនៅថ្ងៃ៖
យ៉ាងណាក្តី អ្នកនាំពាក្យក្រសួងការងារ លោក ហេង សួរ បានលើកឡើងពីឧបសគ្គដែលក្រសួងកំពុងជួបប្រទះនៅពេលនេះ គឺមានកម្មករនិយោជិតមួយចំនួន មិនបានបំពេញលេខទូរស័ព្ទ ដែលត្រឹមត្រូវជូនដល់ក្រសួងនោះឡើយ។ សូមបញ្ជាក់ថា យ៉ាងហោចណាស់មានរោងចក្រនិងកម្មករ ដែលសុំព្យួរការងារនៅមុនពេលចូលឆ្នាំ គឺមានជាង៩០រោងចក្រ និងមានកម្មករប្រមាណជាង ៦ម៉ឺននាក់។ ចំណែករោងចក្រដែលព្យួរការងារកម្មករ ក្រោយថ្ងៃ ២៧ ខែមេសា គឺមានជាង ៨០រោងចក្រ និងមានកម្មករប្រហែលជា ៥ម៉ឺននាក់។
បើតាមលោក ហេង សួរ ដដែល ខាងធនាគារឯកទេសវីង ដែលសហការជាមួយរដ្ឋាភិបាលនោះ កំពុងបង្កើតគណនីជូនដល់កម្មករ-កម្មការិនី ដែលមានលក្ខខណ្ឌគ្រប់គ្រាន់ជាមុន។ ការលើកឡើងរបស់លោក ហេង សួរ គឺបន្ទាប់ពីមានការចុះផ្សាយថា កម្មករនិយោជិតដែលរងផលប៉ះពាល់ពីវិបត្តិនៃជំងឺកូវីដ១៩ គឺមិនទាន់ទទួលបានប្រាក់ឧបត្ថម្ភពីរដ្ឋាភិបាលនៅឡើយ គិតត្រឹមថ្ងៃពុធ សប្តាហ៍មុននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ