សហជីព៖កម្មករនៅរោងចក្រមួយចំនួននៅខេត្តកណ្តាល និងភ្នំពេញនាំគ្នាតវ៉ារឿងចៅកែអត់បើកប្រាក់ខែឱ្យ
មួយរយៈចុងក្រោយនេះ កម្មករនៅរោងចក្រប្រមាណពី៥ទៅ៦រោងចក្រក្នុងខេត្តកណ្តាល និង រាជធានីភ្នំពេញបាននាំគ្នាតវ៉ាជាបន្តបន្ទាប់ ដើម្បីជំរុញឱ្យថៅកែបើកប្រាក់ខែឱ្យគ្រប់ចំនួនដល់ពួកគេ។ នេះបើតាមការអះអាងរបស់លោក អាត ធន់ ប្រធានសហភាពការងារកម្ពុជានៅព្រឹកថ្ងៃអង្គារនេះ។ ជាការកត់សម្គាល់ ការតវ៉ារបស់កម្មករទាំងនេះ ធ្វើឡើងស្របពេលដែលសមាគមរោងចក្រកាត់ដេរនៅកម្ពុជាបានអំពាវនាវដល់ក្រុមហ៊ុនបញ្ជាទិញទាំងអស់ឱ្យទូទាត់ប្រាក់ទិញទំនិញ ដើម្បីរក្សាស្ថិរភាពរោងចក្រ និង ប្រាក់ខែកម្មករខ្មែរ។
ចុះផ្សាយនៅថ្ងៃ៖
ស្តាប់ - ០២:១៩
លោកអាត ធន់ បានគូសបញ្ជាក់ថា បញ្ហាសំខាន់ដែលនាំក្រុមកម្មករទាំងនៅខេត្តកណ្តាល និង រាជធានីភ្នំពេញនាំគា្នតវ៉ាជាបន្តបន្ទាប់មកនេះ គឺដោយសារតែថៅកែរោងចក្រខ្លះបានបិទទ្វារ ហើយមិនបើកប្រាក់ខែឱ្យកម្មករ ខណៈខ្លះទៀតបើកប្រាក់ខែមិនគ្រប់ដល់កម្មករ។ ដូច្នេះហើយ ក្រុមកម្មករ កម្មការិនីបានទាមទារឱ្យថៅកែរោងចក្របើកប្រាក់ខែ និង ប្រាក់អត្ថប្រយោជន៍ផ្សេងៗតាមលក្ខខណ្ឌនៃច្បាប់ស្តីពីការងាររបស់កម្ពុជា។ បើតាមលោកអាត ធន់ ការតវ៉ាទាមទាររបស់កម្មករទាំងអស់នេះ គឺមានការជួយសម្របសម្រួលខ្លាំងពីសំណាក់ក្រសួងការងារ ប៉ុន្តែរោងចក្រខ្លះនៅពន្យាររហូតដល់៣ទៅ៤ខែទើបជជែកត្រូវរ៉ូវជាមួយក្រុមកម្មករ។
គួរបញ្ជាក់ថា គិតដល់ពេលនេះ រោងចក្រចំនួន១៨០រោងចក្រហើយបានព្យួរប្រតិបត្តិការរបស់ខ្លួន រីឯរោងចក្រចំនួន៦០រោងចក្រទៀតបន្ថែមទៀតនឹងឈានទៅរកការព្យួរនេះផងដែរ។ ចំណែក កម្មករជាង១៥ម៉ឺននាក់ហើយត្រូវបានព្យួរការងារជាបណ្តោះអាសន្នរហូតមកដល់ពេលនេះ ខណៈកម្មករជាង២០ម៉ឺននាក់ទៀតនឹងត្រូវព្យួរការងារដែរនាពេលខាងមុខនេះ។ នេះបើតាមសមាគមរោងចក្រកកាត់ដេរនៅកម្ពុជាហៅកាត់ថា GMAC។ ចំពោះកម្មករដែលត្រូវព្យួរការងារ រដ្ឋាភិបាលកម្ពុជាបានសម្រេចផ្តល់ទឹកប្រាក់ឧបត្ថម្ភក្នុងម្នាក់៧០ដុល្លារក្នុងមួយខែ ដោយរដ្ឋាភិបាលចេញ៤០ដុល្លារ និង ថៅកែរោងចក្រចេញ៣០ដុល្លារ។
ប៉ុន្តែនៅពេលនេះ ក្រុមថៅកែរោងចក្រកាត់សម្លៀកបំពាក់ និង ដេរស្បែកជើងកំពុងមានបញ្ហាទាក់ទងនឹងក្រុមហ៊ុនបញ្ជាទិញ។ ក្រុមហ៊ុនបញ្ជាទិញដែលមិនទាន់បានទូទាំងទឹកប្រាក់ទិញទំនិញដល់ពួកគេ។ កាលពីថ្ងៃចន្ទ សមាគមរោងចក្រកកាត់ដេរនៅកម្ពុជាបានអំពាវនាវទៅអ្នកបញ្ជាទិញឲ្យគោរពលក្ខខណ្ឌទូទាត់ប្រាក់សម្រាប់ទំនិញដែលបានទទួល និងទំនិញដែលកំពុងដឹកទៅ។ តាមលិខិតអំពាវនាវរបស់ខ្លួន សមាគមរោងចក្រកកាត់ដេរនៅកម្ពុជាបញ្ជាក់ថា រោងចក្រនៅកម្ពុជាកំពុងរងគ្រោះរួចហើយពីការលុបចោលការបញ្ជាទិញ ជាច្រើន និងគ្មានការបញ្ជាទិញថ្មីៗហើយមិនអាចទ្រាំទ្រនឹងការមិនទូទាត់ប្រាក់នោះទេ។
សមាគមរោងចក្រកកាត់ដេរនៅកម្ពុជាបានអះអាងថា ខណៈផលិតផលកំពុងត្រូវបានធ្វើការនាំចេញ រោងចក្រត្រូវតែទទួលបានការទូទាត់នូវអ្វីដែលត្រូវបានជំពាក់ ហើយការផ្តល់អ្វីតិចជាងនេះគឺមិនត្រឹមត្រូវនោះទេ។ បើតាមសមាគមរោងចក្រនៅកម្ពុជា លក្ខខណ្ឌទូទាត់ប្រាក់អាចពិភាក្សាគ្នាបាន ប៉ុន្តែការមិនទូទាត់គឺមិនអាចទទួលយកបានទេ។ ហេតុដូច្នេះហើយ សមាគមរោងចក្រអំពាវនាវដល់អ្នកបញ្ជាទិញត្រូវទូទាត់បំណុលរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ