អាជីវករខ្មែរគួរប្រើប្រាស់សេវាផ្តល់ប្រឹក្សាមុនបើកអាជីវកម្ម
ចុះផ្សាយនៅថ្ងៃ៖
ស្តាប់ - ០៤:១៥
កម្ពុជាត្រូវបានទទួលស្គាល់ថា កំពុងតែមានសេដ្ឋកិច្ចរីកចំរើន។ ទន្ទឹមគ្នានេះ មុខរបរមួយចំនួនត្រូវបានគេបង្កើតជាបន្តបន្ទាប់។ មានមុខរបរមួយចំនួនត្រូវបានគេបង្កើតដូចគ្នា ឬធ្វើតាមគ្នា។ ចុងក្រោយ អាជីវកម្មមួយចំនួនក៏បរាជ័យ ដួលរលំទៅវិញ។ ក្រុមអ្នកវិភាគសង្គមសេដ្ឋកិច្ចមួយចំនួនបានស្តីបន្ទោសទៅលើកង្វះខាតរបស់អាជីវករខ្មែរដែលមិនចង់ប្រើប្រាស់សេវាផ្តល់ប្រឹក្សាអាជីវកម្ម។ តើការប្រឹក្សាអាជីវកម្មមានប្រយោជន៍យ៉ាងណាខ្លះ?
នៅក្នុងកាលៈទេសៈដែលសេដ្ឋកិច្ចកំពុងរីកចម្រើន គេឃើញអ្នកមានធនធានទ្រព្យសម្បត្តិបានខិតខំបង្កើតមុខរបរ ឬអាជីវកម្មជាច្រើនបន្តបន្ទាប់គ្នា។ ហើយអ្វីដែលជាលក្ខណៈរួមដែលធ្លាប់កើតមាននៅកម្ពុជាកន្លងមកនោះ ពិសេសនៅក្នុងរាជធានីភ្នំពេញ គឺការបង្កើតអាជីវកម្ម ដូចៗគ្នា និងតាមគ្នាយ៉ាងគំហុកទៀតផង។ ហើយចុងក្រោយ បាតុភូតនេះតែងតែចប់ទៅវិញដោយការក្ស័យធុន អាជីវកម្មមិនដំណើរការ។ ចំពោះអាជីវកម្មខ្លះ ការផ្គត់ផ្គង់បានកើនហួសតំរូវការទៅទៀត។
ប្រភេទអាជីវកម្មដែលជាពិសោធន៍ជាក់ស្តែងកន្លងមក ដែលគេបានឃើញរួមមាន ការបើកភោជនីយដ្ឋាន ហាងកាហ្វេ ការសាងសង់ខុនដូ ការបង្កើតសារព័ត៌មាន និងហាងអ៊ីនថឺនែត ជាដើម ។ល។
នៅក្នុងសង្គមសេដ្ឋកិច្ចទីផ្សារសេរី ការបង្កើតការផ្គត់ផ្គង់ច្រើន វាជាការបង្កើតជំរើសច្រើនដល់អតិថិជន ហើយថានេះ ជាចំនុចល្អសម្រាប់អតិថិជន។ ប៉ុន្តែបញ្ហានៅត្រង់ថា បន្ទាប់ពីការរីកស្គុះស្គាយ គ្រប់ទីកន្លែងដូចផ្សិតនូវមុខរបរអាជីវកម្មមួយចំនួននោះ បន្តិចក្រោយមក គេក៏ឃើញអាជីវកម្មទាំងនោះបានបិទទ្វារជាបន្តបន្ទាប់ទៅវិញដែរ។
អ្នកតាមដានសង្គមសេដ្ឋកិច្ចកម្ពុជាបានមើលឃើញភាពចន្លោះប្រហោងសំខាន់មួយរបស់ក្រុមអាជីវករ។ នោះគឺការខ្វះខាតការប្រឹក្សាផ្នែកអាជីវកម្ម។ ហេតុអ្វីបានជាសហគ្រិន មួយចំនួនមិនបានប្រើប្រាស់សេវាប្រឹក្សាអាជីវកម្ម?
ទី១ រហូតដល់ពេលនេះ អាជីវកម្មនៅកម្ពុជាមួយចំនួនធំ បានដំណើរការជាលក្ខណៈគ្រួសារ ដែលការពិភាក្សាអំពីអាជីវកម្ម ត្រូវប្រព្រឹត្តទៅនៅក្នុងរង្វង់គ្រួសារតែប៉ុណ្ណោះ។ ដូច្នេះ គ្មានទេ ទម្លាប់រកសេវាប្រឹក្សាខាងក្រៅ។ ទី២ គឺការមិនទុកចិត្ត មិនជឿជាក់លើសេវាប្រឹក្សានេះឯង ហើយជាងនេះទៅទៀត សេវាប្រឹក្សាអាជីវកម្មមានតម្លៃខ្ពស់។ និងទី៣ ប្រសិនបើអ្នកខ្លះ យល់ដឹងអំពីសារៈសំខាន់នៃការសិក្សាទីផ្សារ ឬគម្រោងមេនៃការបើកអាជីកម្មនោះ ពួកគេបានសម្រេចចិត្តចំណាយពេលធ្វើខ្លួនឯងតែម្តង។ ប៉ុន្តែ ការសិក្សាខ្លួនឯងបែបនេះ វាមានលក្ខណៈចង្អៀត និងអាចទទួលព័ត៌មានមិនបានត្រឹមត្រូវពីទីផ្សារ។
និយាយយ៉ាងដូច្នេះ មិនមែនថា សេវាផ្តល់ប្រឹក្សាអាជីវកម្មនឹងធ្វើអោយអាជីវកម្មមួយដឹងតែបានទទួលជ័យជំនះរហូត បើទោះជាមានការប្រកួតប្រជែងខ្លាំងយ៉ាងណាក៏ដោយនោះទេ។ ប៉ុន្តែថា ប្រសិនបើមានអ្នកប្រឹក្សាអាជីវកម្ម អ្នកប្រឹក្សាអាចផ្តល់ព័ត៌មានបានទូលំទូលាយ អាចផ្តល់ជំរើសច្រើនក្នុងការធ្វើអាជីវកម្ម អាចផ្តល់ព័ត៌មានពិត និងត្រឹមត្រូវបានច្រើន ចំនុចខ្លាំង ចំនុចខ្សោយ ការគ្រប់គ្រងបុគ្គលិក ការគ្រប់គ្រងប្រព័ន្ធហិរញ្ញវត្ថុ ស្ថានភាពទីផ្សារ និងចុងក្រោយនោះ អ្នកប្រឹក្សាក៏អាចផ្តល់ដំបូន្មានមិនអោយប្រកបអាជីវកម្មមួយដែលកំពុងកើនច្រើនជ្រុលហើយ ក៏មានដែរ។
និយាយសរុបមកវិញ អ្នកប្រឹក្សាអាជីវកម្មអាចធ្វើអោយ សហគ្រិន ឬអ្នកចង់បង្កើតអាជីវកម្មមួយ មានសេចក្តីសម្រេចចិត្តច្បាស់ជាង ថាគួរបើកអាជីវកម្ម ឬមិនគួរបើក ដោយឈរលើមូលដ្ឋានព័ត៌មានដែលត្រូវបានសិក្សាដោយអ្នកប្រឹក្សាអាជីវកម្ម។ តាមរយៈការប្រឹក្សាផ្នែកអាជីវកម្មនេះហើយ ដែលវាធ្វើអោយភាពប្រថុយប្រថាននៅក្នុងអាជីវកម្មមានទំហំកាន់តែតូច និងកម្រិតនៃការក្ស័យធុនបានចុះទាបនោះ។
ម្យ៉ាងវិញទៀត ប្រសិនបើ អ្នកចង់ប្រកបអាជីវកម្មមានគំនិតចង់រកសេវាប្រឹក្សា មុនបើកអាជីវកម្មនោះ អ្នកជំនាញសេដ្ឋកិច្ចក៏បានផ្តល់ដំបូន្មាន អោយពួកគេរកអ្នកប្រឹក្សាណា ដែលមានជំនាញផ្នែកអាជីវកម្មដែលពួកគេចង់ប្រតិបត្តិការដែរ។ មិនមែនមានន័យថា អ្នកប្រឹក្សាអាជីវកម្មណា ក៏អាចផ្តល់ប្រឹក្សាលើគ្រប់ប្រភេទអាជីវកម្មនោះទេ។
ទោះយ៉ាងណាក៏ដោយ អ្នកតាមដានសង្គមសេដ្ឋកិច្ចកម្ពុជាបានមើលឃើញអំពីការផ្លាស់ប្តូរបន្តិចហើយ នៅពេលនេះ។ ផ្លាស់ប្តូរពីទម្លាប់ដែលបើកអាជីវកម្មទាំងការផ្សងព្រេង មកជាការប្រើប្រាស់ការសិក្សាមុនបើកអាជីវកម្ម។ ហើយថាការផ្លាស់ប្តូរនេះ ត្រូវបានជំរុញដោយ បរិយាកាសនៃការប្រកួតប្រជែងក្នុងវិស័យពាណិជ្ជកម្មដែលកាន់តែតឹងតែង និងការហក់ចូលក្នុងទីផ្សារពាណិជ្ជកម្មពីបណ្តាក្រុមយុវជន ឬក្មេងជំនាន់ក្រោយ ដែលមានគំនិតអាជីវកម្មជឿនលឿន។
ប៉ុន្តែ អ្នកជំនាញសេដ្ឋកិច្ចក៏នៅតែលើកទឹកចិត្តអោយអ្នកជំនួញវ័យក្មេងប្រើប្រាស់ការសិក្សាទីផ្សារ ឬការប្រើប្រាស់សេវាប្រឹក្សាអោយបានច្រើន មុននឹងការបើកអាជីវកម្មដដែល។ អ្នកសេដ្ឋកិច្ចបានពន្យល់ថា ថ្វីដ្បិតសហគ្រិនវ័យក្មេងមានចំណេះដឹងច្រើនអំពីការធ្វើអាជីវកម្មមែន ប៉ុន្តែពួកគេនៅតែមិនអាចយល់ដឹងគ្រប់បញ្ហាទាំងអស់តែម្នាក់ឯងនៅក្នុងអាជីវកម្មមួយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ