តុលាការធម្មនុញ្ញថៃអាចនឹងហូតតំណែងនាយករដ្ឋមន្ត្រីយីងឡាក់ ថ្ងៃពុធស្អែក
នៅថ្ងៃអង្គារនេះ តុលាការធម្មនុញ្ញថៃបានប្រកាសថា តុលាការអាចនឹងហូតតំណែងនាយករដ្ឋមន្ត្រីយីងឡាក់ នៅថ្ងៃពុធស្អែកនេះ។ នាយករដ្ឋមន្ត្រីថៃជាប់ចោទពីបទរំលោភអំណាច។ នៅថ្ងៃអង្គារដែរនេះ នាយករដ្ឋមន្ត្រីថៃបានចូលខ្លួនទៅតុលាការធម្មនុញ្ញ។ លោកស្រីយីងឡាក់ ដែលប្រឈមនឹងចលនាតវ៉ាប្រឆាំងរដ្ឋាភិបាល៦ខែមកនេះ បានបដិសេធថា លោកស្រីមិនបានបំពានអំណាចទេ។
ចុះផ្សាយនៅថ្ងៃ៖
ស្តាប់ - ០១:៣៦
នៅប្រទេសថៃ តុលាការធម្មនុញ្ញថៃអាចនឹងហូតតំណែងនាយករដ្ឋមន្ត្រីថៃ យីងឡាក់ ស្ហ៊ីណាវ៉ាត្រា ថ្ងៃពុធស្អែក អោយលែងអោយគ្រប់គ្រងប្រទេសតទៅទៀត។ នេះបើយោងតាម លោក ឆារូន អ៊ីនតាចាន់ ជាប្រធានតុលាការធម្មនុញ្ញថៃ ប្រាប់អោយដឹងនៅថ្ងៃអង្គារនេះ។ លោកស្រីយីងឡាក់ ជាប់ចោទពីបទបំពានអំណាច ដកហូតតំណែងអតីតមេដឹកនាំក្រុមប្រឹក្សាសន្តិសុខជាតិមួយរូប ក្រោយពេលបក្សភឿថៃឡើងកាន់កាប់ប្រទេស ក្នុងឆ្នាំ២០១១។ សមាជិកព្រឹទ្ធសភាថៃមួយក្រុមបានដាក់ពាក្យប្តឹងពីរឿងរ៉ាវដកតំណែងនេះ ដោយចោទលោកស្រី យីងឡាក់ថា ដកតំណែងមន្ត្រីរាជការរូបនោះ ដើម្បីបំពេញប្រយោជន៍បក្សកាន់អំណាច។
នៅថ្ងៃអង្គារនេះ នាយករដ្ឋមន្ត្រីថៃបានប្រកាសការពារខ្លួនថា មិនបានបំពានអំណាចនោះទេ និងបានលើកឡើងថា ការដកតំណែងមេដឹកនាំក្រុមប្រឹក្សាសន្តិសុខជាតិរូបនោះ គឺដើម្បីផលប្រយោជន៍ជាតិប៉ុណ្ណោះ។ គួរបញ្ជាក់ដែរថា ក្រៅពីរឿងរ៉ាវដកតំណែងនេះ លោកស្រីយីងឡាក់ក៏កំពុងជាប់ចោទថា ធ្វេសប្រហែសក្នុងរឿងរដ្ឋទិញស្រូវជួយកសិករផងដែរ។ សំណុំរឿងនេះក៏អាចទំលាក់លោកស្រីយីងឡាក់ ពីអំណាចដែរ។
ចារុពុង រ័ងស៊ូវ៉ាន់ ជាមេដឹកនាំបក្សកាន់អំណាចថៃ បានលើកឡើងថា ប្រសិនបើតុលាការធម្មនុញ្ញថៃដកតំណែងលោកស្រីយីងឡាក់ នោះថៃនឹងរងភាពចលាចល។ ថៃបានរំលាយសភាចោល កាលពីខែធ្នូឆ្នាំ២០១៣។ ដូច្នេះ ពេលនេះ ការដកតំណែងនាយករដ្ឋមន្ត្រី អាចធ្វើអោយថៃកាន់តែដុនដាប ព្រោះថា គ្មានសភា គឺមិនអាចអោយថៃតែងតាំងនាយករដ្ឋមន្ត្រីថ្មីបានទេ។
គណៈកម្មការបោះឆ្នោតបានប្រកាសការរៀបចំការបោះឆ្នោតសភាជាថ្មី នៅថ្ងៃ២០កក្កដា ខាងមុខនេះ។ ប៉ុន្តែ ប្រធានបក្សប្រឆាំងមិនបានគាំទ្រការបោះឆ្នោតថ្មីនេះទេ។ បក្សប្រឆាំងថៃចង់អោយមានផ្នែករដ្ឋបាលស្តីទីមួយដើម្បីពិនិត្យកំណែទម្រង់ មុននឹងរៀបចំការបោះឆ្នោតជាថ្មី។ បក្សប្រឆាំងថៃចង់អោយថៃរៀបចំការបោះឆ្នោតសភា ក្នុង៦ខែខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ