តុលាការធម្មនុញ្ញថៃទុកពេលអោយលោកស្រីយីងឡាក់ ដល់ថ្ងៃ២ឧសភា ដើម្បីឡើងការពារខ្លួន
នៅថៃ ថ្ងៃពុធនេះ តុលាការធម្មនុញ្ញបានយល់ព្រមទុកពេលរហូតដល់ថ្ងៃ២ឧសភា ដើម្បីអោយនាយករដ្ឋមន្ត្រីយីងឡាក់ ឡើងការពារខ្លួនក្នុងសំណុំរឿងប្តូរតំណែងអតីតមេដឹកនាំក្រុមប្រឹក្សាសន្តិសុខជាតិមួយរូប កាលពីឆ្នាំ២០១១ ក្រោយពេលដែលបក្សភឿថៃឡើងកាន់អំណាច។ សំណុំរឿងនេះអាចអោយលោកស្រីយីងឡាក់ ធ្លាក់ពីតំណែងបាន។ ដោយឡែក តុលាការមិនបានប្រាប់ថា តើនឹងធ្វើសេចក្តីវិនិច្ឆ័យទោសនៅថ្ងៃណាពិតប្រាកដទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
យោងតាមតុលាការធម្មនុញ្ញថៃ លោកស្រីយីងឡាក់មានពេលរហូតដល់ថ្ងៃ២ឧសភាខាងមុខ ដើម្បីឡើងការពារខ្លួននៅតុលាការ បង្ហាញពីហេតុផលទាក់ទងនឹងការដកហូតតំណែងមន្ត្រីរាជការមួយរូប កាលពីឆ្នាំ២០១១។ គឺជាការដកតំណែងលោក ថាវីល ភ្លីអិនស្រ៊ី ជាមេដឹកនាំក្រុមប្រឹក្សាសន្តិសុខជាតិថៃ ដោយផ្លាស់រូបលោកអោយទៅកាន់ការងារមួយផ្សេងទៀត ដែលលោកមិនបានបញ្ចេញសកម្មភាពអ្វីទាល់តែសោះ។
ដោយសាររឿងនេះ សមាជិកព្រឹទ្ធសភាមួយក្រុមបានដាក់ពាក្យប្តឹងទៅតុលាការធម្មនុញ្ញ ដោយចោទថា ការដែលលោកស្រីយីងឡាក់ដកតំណែងលោកភ្លីអិនស្រ៊ី គឺជាការរំលោភរដ្ឋធម្មនុញ្ញទាំងស្រុង។ ការដកតំណែងនេះ ធ្វើឡើងក្រោយពេលបក្សភឿថៃ ឡើងកាន់អំណាចក្នុងឆ្នាំ២០១១។ ក្នុងសំណុំរឿងនេះ សមាជិកព្រឹទ្ធសភាទាំងនោះ បានចោទថា ការដកតំណែងនេះគឺធ្វើឡើងដើម្បីផលប្រយោជន៍របស់បក្ស កាន់អំណាច។ សំណុំរឿងនេះ អាចនាំអោយនាយករដ្ឋមន្ត្រីយីងឡាក់ ធ្លាក់ពីតំណែងនាយករដ្ឋមន្ត្រីបាន។
តុលាការធម្មនុញ្ញបន្ថែមថា លោកស្រីយីងឡាក់បានសុំអោយតុលាការទុកពេលអោយ។ ហើយសាក្សីផ្សេងទៀត ក្នុងសំណុំរឿងនេះ នឹងត្រូវឡើងតុលាការ នៅថ្ងៃ៦ឧសភា។ គួររំលឹកដែរថា ក្រៅពីសំណុំរឿងផ្លាស់ប្តូរតំណែងមន្ត្រីរាជការនេះ លោកស្រីយីងឡាក់ក៏ត្រូវរងការចោទប្រកាន់ផ្លូវច្បាប់ពីបទធ្វេសប្រហែស ក្នុងរឿងទិញស្រូវអង្ករជួយកសិករ។ ជាសំណុំរឿង អាចអោយនាយករដ្ឋមន្ត្រីថៃធ្លាក់ពីតំណែងផងដែរ។
ក្រុមអាវក្រហមថៃដែលគាំទ្ររដ្ឋាភិបាល តែងបរិហារថា សំណុំរឿងទាំងអស់នេះ គឺជាការព្យាយាមធ្វើរដ្ឋប្រហារផ្លូវច្បាប់ ប្រឆាំងលោកស្រីយីងឡាក់។ ក្រុមអាវក្រហមសន្យាថា នឹងចុះធ្វើបាតុកម្មគាំទ្ររដ្ឋាភិបាល។ ជិត៦ខែមកនេះ នាយករដ្ឋមន្ត្រីយីងឡាក់ប្រឈមនឹងសកម្មជនប្រឆាំងរដ្ឋាភិបាល ដែលបានទាមទារអោយលោកស្រីចុះពីតំណែង។ អំពើហិង្សាក្នុងបាតុកម្មច្រើនខែមកនេះ បានសម្លាប់មនុស្ស២៥នាក់ និងបង្កអោយរបួសរាប់រយនាក់។
នៅរសៀលថ្ងៃពុធនេះ សកម្មជនគាំទ្ររដ្ឋាភិបាលមួយរូប ត្រូវបានគេសម្លាប់ នៅមុខអាហារដ្ឋានមួយកន្លែង នៅក្រុងបាងកក។ សកម្មជនរូបនោះ ជាអ្នកប្រឆាំងនឹងច្បាប់ទាក់ទងការប្រមាថព្រះមហាក្សត្រថៃ។ ប៉ូលិសមិនដឹងថា តើឃាតកម្មនេះមានជាប់ពាក់ព័ន្ធនឹងនយោបាយ រឺយ៉ាងណាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ