លោកអ៊ីតស៊ូណូរី អូណូដឺរ៉ា៖ក្រោយការកែប្រែរដ្ឋធម្មនុញ្ញ ជប៉ុនអាចជួយការពារនាវាចម្បំាងអាមេរិកដែលរងការវាយប្រហារ
លោករដ្ឋមន្រ្តីក្រសួងការពារជាតិជប៉ុនអ៊ីតស៊ូណូរី អូណូដឺរ៉ា (Itsunori Onodera) បានប្រកាសឲ្យដឹងនៅថ្ងៃសុក្រ ទី១១ កក្កដាថា ការដែលជប៉ុនត្រៀមខ្លួនធ្វើការសើរើឡើងវិញនូវច្បាប់រដ្ឋធម្មនុញ្ញសន្តិភាពនិយមនឹងអនុញ្ញាតឲ្យទាហានជប៉ុនអាចចូលរួមជួយការពារនាវាចម្បំាងអាមេរិកដែលទទួលរងការវាយប្រហារ។ លោកប្រមុខការពារជាតិជប៉ុនបានថ្លែងយ៉ាងដូចនេះប្រាប់លោករដ្ឋមន្រ្តីការពារជាតិអាមេរិកឆាក់ ហាហ្គែល (Chuck Hagel) ក្នុងទីក្រុងវ៉ាស៊ីនតោន សហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:២៧
គឺនាឱកាសដំណើរទស្សនកិច្ចនៅសហរដ្ឋអាមេរិកដែលលោករដ្ឋមន្រ្តីក្រសួងការពារជាតិជប៉ុនអ៊ីតស៊ូណូរី អូណូដឺរ៉ា (Itsunori Onodera) បានឆ្លៀតរម្លឹកជាថ្មីពីសេចក្តីសម្រេចចិត្តជាប្រវត្តិសាស្រ្តរបស់រដ្ឋាភិបាលក្រុងតូក្យូក្នុងការពិនិត្យមើលឡើងវិញនូវច្បាប់រដ្ឋធម្មនុញ្ញរបស់ប្រទេស។ គឺជាច្បាប់រដ្ឋធម្មនុញ្ញសន្តិភាពនិយមដែលជប៉ុនបានអនុវត្តតំាងពីឆ្នំា ១៩៤៧ ពោលតំាងពីក្រោយសម័យសង្រ្គាមលោកលើកទី២មកម្ល៉េះ។ សម្រាប់លោកប្រមុខការពារជាតិជប៉ុន នៅពេលដែលជប៉ុនបានធ្វើការកែប្រែច្បាប់រដ្ឋធមុ្មនុញ្ញរបស់ខ្លួនរួចហើយ នោះកងទ័ពជប៉ុននឹងអាចចូលរួមនៅក្នុងប្រតិបត្តិការយោធាក្រៅប្រទេសជាមួយនឹងសម្ព័ន្ធមិត្ត ឬមួយក៏អាចទៅជួយប្រទេសសម្ព័ន្ធមិត្តដែលទទួលរងការវាយប្រហារ។
ថ្លែងនៅឯមជ្ឈមណ្ឌលផ្នែកយុទ្ធសាស្រ្ត និងសិក្សាអន្តរជាតិក្នុងទីក្រុងវ៉ាស៊ីនតោន លោកប្រមុខការពារជាតិជប៉ុនអូណូដឺរ៉ាបានលើកឧទាហរណ៍មកពន្យល់ថា ប្រសិនបើមាននាវាចម្បំាងអាមេរិកំាងដែលកំពុងជួយការពារដែនដីជប៉ុនសព្វថ្ងៃបានទទួលរងការវាយប្រហារណាមួយនោះ រដ្ឋធម្មនុញ្ញជប៉ុនបច្ចុប្បន្នមិនបានអនុញ្ញាតឲ្យកងទ័ពជប៉ុនចូលរួមជួយការពារនាវាចម្បំាងអាមេរិកនោះទេ។ ដូច្នេះសម្រាប់លោកអូណូដឺរ៉ា ការសម្រេចចិត្តរបស់លោកនាយករដ្ឋមន្រ្តីជប៉ុនស៊ីនហ្សូ អាបេក្នុងការសើរើច្បាប់រដ្ឋធម្មនុញ្ញឡើងវិញដែលប្រកាសឲ្យដឹងកាលពីថ្ងៃទី១ កក្កដា គឺជាការបើកផ្លូវថ្មីមួយនៅក្នុងទំនាក់ទំនងយោធារវាងជប៉ុន និងសហរដ្ឋអាមេរិក។
ជាការឆ្លើយតបវិញ លោកប្រមុខការពារជាតិអាមេរិកឆាក់ ហាហ្គែល (Chuck Hagel) បានបញ្ជាក់ថា ការសម្រេចចិត្តរបស់ជប៉ុន គឺការសម្រេចចិត្តជាប្រវត្តិសាស្រ្ត និងពោរពេញដោយក្តីក្លាហាន និងថា វានឹងអនុញ្ញាតឲ្យជប៉ុនអាចបង្កើនសមត្ថភាពរបស់ខ្លួនក្នុងការចូលរួមជួយការពារសន្តិសុខ និងសុវត្ថិភាពនៅក្នុងតំបន់ និងនៅលើពិភពលោក ព្រមទំាងអនុញ្ញាតឲ្យជប៉ុនអាចពង្រីកតួនាទីរបស់ខ្លួននៅលើឆាកអន្តរជាតិទៀតផង។ តែសម្រាប់ប្រទេសចិនវិញ ទីក្រុងប៉េកំាងបានសម្លឹងមើលដោយកន្ទុយភ្នែកចំពោះការសម្រេចចិត្តរបស់ជប៉ុនពេលនេះ។ រីឯប្រជាជនជប៉ុនមួយភាគធំក៏មិនសូវជាត្រេតត្រអាលប៉ុន្មានទេ ដោយពួកគេចង់បន្តរក្សាទុករដ្ឋធម្មនុញ្ញសន្តិភាពនិយមដដែល។
គួររម្លឹកជូនថា ទន្ទឹមនឹងការប្រកាសធ្វើកំណែទម្រង់ច្បាប់រដ្ឋធម្មនុញ្ញ លោកប្រមុខរដ្ឋាភិបាលជប៉ុនអាបេក៏បានប្រកាសដំឡើងថវិកាយោធាជាលើកទី១ ក្នុងគោលដៅពង្រឹងបន្ថែមប្រព័ន្ធការពារមីស៊ីលប្រឆំាងមីស៊ីល និងបំពាក់ឲ្យស្ថាប័នកងទ័ពនូវសម្ភារៈបរិក្ខារទំនើបៗ ពិសេសទ័ពជើងទឹកដើម្បីការពារទីប្រជុំកោះមួយចំនួនដែលជប៉ុនកំពុងមានជម្លោះជាមួយប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ