ទស្សនកិច្ចនាយករដ្ឋមន្ត្រីចិននៅរុស្ស៊ីបានចប់ទៅល្ងាចមិញដោយការចុះឯកសារទ្វេភាគីជាង២០ច្បាប់
ថ្ងៃ៦និង៧វិច្ឆិកា លោកនាយករដ្ឋមន្ត្រីចិនលី ខឺឈាង បានបំពេញទស្សនកិច្ចនៅក្រុង Saint-Petersbourg អតីតរាជធានីចក្រភពរុស្ស៊ី ជាទីដែលគាត់បានធ្វើកិច្ចចរចាជាមួយលោកប្រមុខរដ្ឋាភិបាលរុស្ស៊ី ឌ្មីទ្រី មេដវេដេវ ក្នុងក្របខ័ណ្ឌសម័យប្រជុំលើកទី២១នៃគណៈកម្មការអន្តររដ្ឋាភិបាលចិន-រុស្ស៊ី ដោយលើកយកទៅពិភាក្សាចង្កោមបញ្ហាបែបយ៉ាង វិស័យពាណិជ្ជកម្ម-សេដ្ឋកិច្ច វិស័យសហប្រតិបត្តិការយោធា-បច្ចេកទេស វិស័យវិនិយោគ វិស័យថាមពលប្រេង-ឧស្ម័ន និងថាមពលបរមាណូ។ ជាតុល្យាការ គូភាគីបានចុះឯកសារ សរុបទៅចំនួនដល់២៣ច្បាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
លើកមុន ជំនួបរវាងលោកឌ្មីទ្រី មេដវេដេវ និងលោកលី ខឺឈាង បានប្រព្រឹត្តទៅទើបកាលពីថ្ងៃ៨កញ្ញាឆ្នាំនេះ នៅប្រទេសឡាវក្នុងជំនួបកំពូលអាស៊ីបូព៌ា។
នាកិច្ចចរចាម្សិលមិញ លោកឌ្មីទ្រី មេដវេដេវ កត់សម្គាល់ថា ៖
-“រុស្ស៊ីនិងចិនភ្ជាប់គ្នាដោយទំនាក់ទំនងដ៏កក់ក្តៅនៃភាពជាដៃគូ និងសហប្រតិបត្តិការយុទ្ធសាស្ត្រ។ យើងពិតជាមិត្តនឹងគ្នាមែន យើងប្រកាន់គោលជំហរដូចគ្នាចំពោះដំណោះស្រាយបញ្ហាជាច្រើនក្នុងលោក យើងតែងចូលរួមក្នុងជំនួបពហុភាគីនានា ប្រាកដណាស់ បូកទាំងនៅលើវេទិកាសែនសំខាន់ បែបយ៉ាងអង្គការសហប្រជាជាតិ ក្រុម២០ប្រទេសដែលមានសេដ្ឋកិច្ចហំហួនជាងគេហៅថាG20 អង្គការសហប្រតិបត្តិការក្រុងសៀងហៃOCS ក្រុមប្រទេសBRICS។ល។
លោកនាយករដ្ឋមន្ត្រីចិន លី ខឺឈាង ពីចំណែកខ្លួនថ្លែងថា ៖
-យើងទ្រទ្រង់នឹងគ្នាទំនាក់ទំនងជិតស្និទ្ធ លើឆាកអន្តរជាតិ។ ក្នុងឋានៈជាសមាជិកអចិន្ត្រៃយ៏ដូចគ្នានៃក្រុមប្រឹក្សាសន្តិសុខអ.ស.ប យើងការពារដោយរួមគ្នា ឲ្យមានការគោរពតាមធម្មនុញ្ញអ.ស.ប ហើយរក្សាទុកស្ថិរភាពនិងសន្តិភាពក្នុងលោក។
ចំណែកឯកសារដែលមានចុះបាននោះ សរុបទៅមានដល់២៣ច្បាប់ ដែលពីក្នុងនោះចុះ ហត្ថលេខាដោយនាយករដ្ឋមន្ត្រីទាំងពីរតែម្តង គឺសេចក្តីថ្លែងការណ៍រួមនៃរដ្ឋាភិបាលទាំងពីរ ចំនួន៣ច្បាប់ ប៉ះលើតុល្យាការផ្ទាល់នៃសម័យប្រជុំកន្លងទៅ ប៉ះលើការផ្ទៀងផ្ទាត់រួមគ្នា ជាលើកទី១ នៅត្រង់ព្រំប្រទល់ចិន-រុស្ស៊ី ប៉ះលើការប្រើប្រាស់ថាមពលបរមាណូក្នុងគោលដៅស៊ីវិល។
ឯកសារ២០ច្បាប់ទៀត គឺរួមក្តោបពិធីសារ៦ច្បាប់ អនុស្សរណៈ៦ច្បាប់ដែរ កិច្ចព្រមព្រៀងមាន៦ច្បាប់ដែរ និងកិច្ចព្រមព្រៀងក្របខ័ណ្ឌមាន២ច្បាប់ ចុះដោយមន្ត្រីក្រសួងសមស្របដោយប្រធានក្រុមហ៊ុនពាក់ព័ន្ធនឹងវិស័យនៃសហប្រតិបត្តិការដែលមានលើកយកទៅចរចា។
ថ្លែងក្នុងសន្និសីទកាសែត នាយករដ្ឋមន្ត្រីទាំងពីររំពឹងថា ទៅទល់ឆ្នាំ២០២០ បង្កើនទំហំផ្តោះប្តូរពាណិជ្ជកម្មរវាងចិននិងរុស្ស៊ីឲ្យបានដល់ ២០០.០០០លានដុល្លារ ដូចដែលមានគ្រោងទុក ហើយប្រើលុយយ័នចិន និងប្រាក់រូប្លរុស្ស៊ីកាន់តែច្រើនឡើងសម្រាប់ទូទាត់គ្នា
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ