លោកពូទីនទៅចិនដើម្បីពង្រឹងកិច្ចសហប្រតិបត្តិការសេដ្ឋកិច្ច
លោកវ្លាដេមៀ ពូទីន និងលោកស៊ី ជិនពីង លែងបែកគ្នាហើយ ! ទើបតែជួបគ្នានៅក្នុងជំនួបអាស៊ីខាងកើត កាលពីប៉ុន្មានថ្ងៃមុននេះសោះ នៅថ្ងៃសៅរ៍ទី ២៥មិថុនានេះ បុរសរដ្ឋទាំងពីរត្រូវជួបគ្នាជាថ្មីនៅក្រុងប៉េកាំង។ នេះគឺជាលើកទីបួនហើយ ដែលប្រធានាធិបតីរុស្ស៊ី អញ្ជើញទៅបំពេញទស្សនកិច្ច នៅប្រទេសចិន គិតចាប់តាំងពីលោក ស៊ី ជីនពីង បានឡើងកាន់អំណាចមក។ ជាទស្សនកិច្ចដែលផ្តោតទាំងស្រុងទៅលើកិច្ចសហប្រតិបត្តិការសេដ្ឋកិច្ច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
"ចិននិងរុស្ស៊ីមានទំនុកចិត្តលើគ្នាទៅវិញទៅមក យ៉ាងខ្លាំង មិនធ្លាប់មានពីមុនមកទេ ! ភាពទុកចិត្តដែលជាមូលដ្ឋានដ៏រឹងមាំនៃកិច្ចសហប្រតិបត្តិការក្នុងវិស័យផ្តោះប្តូរពាណិជ្ជកម្ម ថាមពលនិងហេដ្ឋារចនាសម្ព័ន្ធ” ! នេះជាប្រសាសន៍របស់លោក ពូទីន ទៅកាន់អ្នកសារព័ត៌មានផ្លូវការចិនថ្មី។ រុស្ស៊ីមានទំនុកចិត្តព្រោះចិនបានលាកម្រាលព្រំទទួលស្វាគមន៍ ដែលអនុញ្ញាតឱ្យរុស្ស៊ីអាចបង្វែរទិសប្រទេសឱ្យរួចពីទណ្ឌកម្មរបស់សហភាពអឺរ៉ុប។ ហើយអ្វីដែលជានិម្មិតរូបបំផុតសម្រាប់លោកពូទីននោះ គឺរុស្ស៊ីមិនឯកាទេ ! រុស្ស៊ី អាចរំពឹងលើចិន ក្នុងការបញ្ចេញឥទ្ធិពលលើឆាកអន្តរជាតិ និងមានចិន ជាអ្នកមិនគាំទ្រទណ្ឌកម្មរបស់បស្ចឹមលោក ជាដៃគូ។
ប្រមុខរដ្ឋទាំងពីរត្រូវចុះហត្ថលេខាលើកិច្ចព្រមព្រៀងពាណិជ្ជកម្មយ៉ាងហោច៣០។ ក្នុងចំណោមនោះ មានគម្រោងសំខាន់មួយដែលចិនឱ្យរុស្ស៊ីខ្ចីប្រាក់៦ពាន់លានសម្រាប់គម្រោងសាងសង់ផ្លូវដែកចម្ងាយ៧០០គីឡូម៉ែត្រ ដើម្បីតភ្ជាប់ទីក្រុងម៉ូស្គូទៅKazan ក្រុងសេដ្ឋកិច្ចភាគកណ្តាលប្រទេសរុស្ស៊ី ក្នុងរយៈពេលក្រោមបួនម៉ោង តាមរថភ្លើងល្បឿនលឿន។
លោកពូទីន បានអញ្ជើញទៅដល់ប៉េកាំងតែម្តង ដើម្បីស្វែងរកទីផ្សារនិងអ្នកវិនិយោគ ព្រោះលុយរូប្លរុស្ស៊ី និងតម្លៃប្រេងកាត បាននិងកំពុងធ្វើឱ្យរុស្ស៊ីចុះខ្សោយខ្លាំង នាពេលនេះ។ ទំហំនៃការផ្តោះប្តូរពាណិជ្ជកម្មរវាងចិននិងរុស្ស៊ី ក៏កំពុងធ្លាក់ចុះយ៉ាងគំហុកដែរ ពោលគឺអស់២៨% បើទៅនឹងឆ្នាំ២០១៤។
បច្ចុប្បន្ននេះ រុស្ស៊ីគឺជាដៃគូពាណិជ្ជកម្ម ដ៏សំខាន់របស់ចិន ក្នុងលំដាប់ទី ១៦ ទល់នឹងលំដាប់ទី ៩ កាលពីឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ