រដ្ឋមន្ត្រីការបរទេសកូរ៉េខាងជើងបានផ្តើមទស្សនកិច្ចរយៈពេល១១ថ្ងៃនៅរុស្ស៊ី
ក្នុងក្របខ័ណ្ឌទស្សនកិច្ចដែលបានចាប់ផ្តើមពីថ្ងៃទី៣០ កញ្ញា ហើយនឹងពន្យារទៅដល់ថ្ងៃទី១០ តុលា លោកប្រមុខការទូតកូរ៉េខាងជើង រី ស៊ុយ យ៉ុង នារសៀលថ្ងៃទី១ តុលាម្សិលមិញបានធ្វើកិច្ចចរចានៅម៉ូស្គូជាមួយសមភាគីរុស្ស៊ី លោក ស៊ែរហ្គៃ ឡាវ្រ៉ូវ ហើយជាតុល្យាការ គូភាគីបានចុះហត្ថលេខាលើ “ ផែនការនៃការផ្លាស់ប្តូររវាងក្រសួងការបរទេសប្រទេសទាំងពីរសម្រាប់ឆ្នាំ២០១៥-២០១៦។សម្រាប់ឆ្នាំ២០១៥-២០១៦”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
លោករដ្ឋមន្ត្រីទាំងពីរបានលើកយកទៅពិភាក្សា គឺបញ្ហាប្រកបដោយបច្ចុប្បន្នភាពនៃសហប្រតិបត្តិការឧភតោភាគី ជាពិសេស ផ្នែកនយោបាយ និងផ្នែកពាណិជ្ជកម្ម-សេដ្ឋកិច្ច។ គូភាគីបានផ្លាស់ប្តូរមតិយ៉ាងល្អិតល្អន់ជុំវិញស្ថានការណ៍នៅឧបទ្វីបកូរ៉េ និងនៅតំបន់អាស៊ីឦសានជាទូទៅ។
ដោយបើកកិច្ចចរចា លោករដ្ឋមន្ត្រីការបរទេសរុស្ស៊ី ស៊ែរហ្គៃ ឡាវ្រ៉ូវបានថ្លែងទៅលោករដ្ឋមន្ត្រីការបរទេសកូរ៉េខាងជើង រី ស៊ុយ យ៉ុងថា ក្រុងម៉ូស្គូសូមឲ្យតម្លៃខ្ពស់ដល់ប្រសាសន៍លោកអគ្គមគ្គុទ្ទេសក៍ គីម ជុនអ៊ុនអំពីនិរន្តរភាពនៃបន្ទាត់នយោបាយប្រកាន់យកដោយសាធារណរដ្ឋប្រជាមានិតប្រជាធិបតេយ្យកូរ៉េក្នុងទំនាក់ទំនងជាមួយសហព័ន្ធរុស្ស៊ី។
ប្រមុខការទូតរុស្ស៊ីបានសំដែងសេចក្តីសង្ឃឹមថា ទស្សនកិច្ចរយៈពេល១១ថ្ងៃ នៅរុស្ស៊ីរបស់លោក រី ស៊ុយ យ៉ុង មុខជានឹងប្រព្រឹត្តទៅយ៉ាងជោគជ័យ។ ប្រាកដណាស់ដែលក្នុងចំណោមប្រធានបទអន្តរជាតិ គូភាគីបានផ្តោតការយកចិត្តទុកដាក់ទៅលើបញ្ហាទាក់ទងនឹងកម្មវីធីនុយក្លេអ៊ែររបស់កូរ៉េខាងជើង។ គូភាគីជឿជាក់ថា បើបញ្ហានេះនៅតែមិនទាន់ដោះស្រាយរួច គឺវាបន្តជះឥទ្ធិពលអវិជ្ជមានទៅលើស្ថិរភាពនៅតំបន់ជាទូទៅ។
ដោយចាត់ទុកការផ្លាស់ប្តូរមតិជុំវិញសាច់រឿងនេះថា មានប្រយោជន៍ បានជាគូភាគីយល់ថា វានឹងជួយដល់ការស្វែងរកមាគ៌ាសម្រាប់ស្តារឡើងវិញនូវកិច្ចចរចា៦ភាគី ជុំវិញបញ្ហានេះ។
គូភាគីក៏បានពិភាក្សាអំពីគម្រោងដ៏ធំ ខាងសាងសង់ដោយរុស្ស៊ីនៅកូរ៉េខាងជើងនូវកំណាត់ផ្លូវដែកប្រវែង៥៤គ.ម.ដែលភ្ជាប់ក្រុងរុស្ស៊ីហាសានទៅនឹងផែរ៉ាជីន កូរ៉េខាងជើងដើម្បីភ្ជាប់ខ្សែផ្លូវដែកដែលកាត់តំបន់ស៊ីបេរីទាំងមូល ទៅនឹងខ្សែផ្លូវដែកកាត់ដែនដែនដីកូរ៉េខាងជើង និងខាងត្បូងតែម្តង។ ខាងពាណិជ្ជកម្ម គូភាគីដាក់ទិសដូចគ្នាថា បង្កើនក្នុងអនាគតដ៏ខ្លីឲ្យបាន១០ដង ទំហំផ្តោះប្តូរលើវិស័យនេះដែលបច្ចុប្បន្នមានទឹកប្រាក់តែប្រមាណ ១០០លានដុល្លារ ឲ្យឡើងលុះបានដល់ ១.០០០លានដុល្លារ ទើបសមស្របនឹងសក្តានុពលដែលម្ខាងៗមាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ