ប្រមុខការទូតកូរ៉េខាងជើងចោទអង្គការសហប្រជាជាតិកុហក និងលម្អៀង
រដ្ឋមន្ត្រីក្រសួងការបរទេសកូរ៉េខាងជើង បានថ្លែងរិះគន់ ចោទក្រុមប្រឹក្សាសន្តិសុខរបស់អង្គការសហប្រជាជាតិថា បានកុហកគេឯង ហើយធ្វើការមានភាពលម្អៀង។ ប្រមុខការទូតកូរ៉េខាងជើង បានថ្លែងដូចនេះ នៅចំពោះមុខមហាសន្និបាទប្រចាំឆ្នាំ របស់អង្គការសហប្រជាជាតិ ដែលកំពុងប្រព្រឹត្តិធ្វើឡើង នៅក្រុងញូយ៉ក។ ក្រៅតែពីចោទអង្គការសហប្រជាជាតិ ប្រមុខការទូតកូរ៉េខាងជើង បានទាំងនិយាយថា កម្មវិធីនុយក្លេអ៊ែររបស់កូរ៉េខាងជើង គឺកូរ៉េខាងជើងម្នាក់គត់ជាអ្នកសម្រេច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
រដ្ឋមន្ត្រីក្រសួងការបរទេសកូរ៉េខាងជើង លោក ហ្រ៊ី ស៊ូយុង បានអញ្ជើញទៅដល់ទីក្រុងញូយ៉ក ដើម្បីចូលរួមក្នុងមហាសន្និបាទ ប្រចាំឆ្នាំរបស់អង្គការសហប្រជាជាតិ។ កាយវិការនេះ ត្រូវបានគេមើលឃើញថា កូរ៉េខាងជើង ហាក់បន្ទន់ឥរិយាបថ ត្រលប់ទៅជួបគេជួបឯង ក្នុងរង្វង់គ្រូសាររបស់អង្គការសហប្រជាជាតិ។ ប៉ុន្តែផ្ទុយទៅវិញ លោករដ្ឋមន្រ្តីការបរទេសកូរ៉េខាងជើង បានយកវេទិកានេះ ថ្លែងរិះគន់ដោយចំហរ ក្នុងសន្ទរកថារបស់គាត់ ថាក្រុមប្រឹក្សាសន្តិសុខអង្គការសហប្រជាជាតិ ជាមេកុហកបោកប្រាស់ ហើយរាល់ការសម្រេចចិត្តរបស់ក្រុមប្រឹក្សានេះ ធ្វើឡើងដោយលម្អៀង គិតតែប្រយោជន៍របស់ប្រទេសធំៗតែប៉ុណ្ណោះ។
លោករដ្ឋមន្រ្តីការបរទេសកូរ៉េខាងជើងបានថ្លែងថា ក្រុមប្រឹក្សាសន្តិសុខធ្វើការលម្អៀង កាន់ជើងតែអាមេរិក និងអ៊ីស្រាអែល មិនអើរពើរទៅនឹងជនរងគ្រោះប៉ាឡេស្ទីនដែលស្លាប់រាប់ពាន់នាក់។ មួយវិញទៀត គាត់ថា ការវាយប្រហារនៅស៊ីរី ដែលដឹកនាំដោយសហរដ្ឋអាមេរិក គឺជាទង្វើរំលោភបំពានទាំងស្រុង ទៅលើអធិបតេយ្យភាពរបស់ស៊ីរី ហើយថាការសម្រេចចិត្តនេះ ក្រុមប្រឹក្សាសន្តិសុខធ្វើឡើង ដោយស្តាប់បង្គាប់របស់អាមេរិក។ បន្ថែមពីនេះដែរ លោក ហ្រ៊ី ស៊ូយុងបានរិះគន់ ក្រុមប្រឹក្សាសន្តិសុខ ថាមិនបានចេញប្រតិកម្មអ្វីទាំងអស់ នៅពេលដែលកូរ៉េខាងត្បូង និងសហរដ្ឋអាមេរិក នាំគ្នាធ្វើសមយុទ្ធយោធា នៅក្បែរព្រំដែនកូរ៉េខាងជើង ដែលជាការគម្រាមកំហែងដោយស្រស់ៗ ទៅលើសន្តិសុខរបស់កូរ៉េខាងជើង។ រដ្ឋាភិបាលក្រុងព្យុងយ៉ាង បានទាំងស្នើសុំឲ្យមានការប្រជុំបន្ទាន់ ប៉ុន្តែក្រុមប្រឹក្សាសន្តិសុខបែរធ្វើព្រងើយ។
ទាក់ទិនទៅនឹងកម្មវិធីនុយក្លេអ៊ែររបស់កូរ៉េខាងជើង លោករដ្ឋមន្ត្រីបានថ្លែងថា វាជាសិទ្ធិរបស់ប្រទេសគេមួយៗ ជាអ្នកសម្រេច។ ក្រុមប្រឹក្សាសន្តិសុខរបស់អង្គការសហប្រជាជាតិ មិនមែនជាស្តេច អាចទៅហាមឃាត់គេ មិនឲ្យការពារខ្លួននោះទេ។ លោកបន្តថា ល្គឹកណាអាមេរិក នៅតែបន្តធ្វើនយោបាយ គម្រាមកំហែងដល់សន្តិសុខរបស់កូរ៉េខាងជើង ប្រទេសលោក មានសិទ្ធិគ្រប់គ្រាន់ ក្នុងការការពារខ្លួនដោយប្រព័ន្ធនុយក្លេអ៊ែរ។
សូមរំលឹកថាកន្លងមក អង្គការសហប្រជាជាតិ បានចេញសេចក្តីសំរេច ជាច្រើនលើកច្រើនសា ដើម្បីបញ្ចុះបញ្ចូល ឲ្យកូរ៉េខាងជើងបោះបង់ចោលគម្រោងចម្រាញ់ធាតុអ៊ុយរ៉ានីញ៉ូម ដើម្បីធ្វើអាវុធនុយក្លេអ៊ែរ។ លោក បាន គីមូន អគ្គលេខាធិការអង្គការសហប្រជាជាតិ ថែមទាំងបានជួបលោករដ្ឋមន្ត្រីការបរទេសកូរ៉េខាងជើងដែរ កាលពីថ្ងៃសៅរ៍ម្សិលមិញ ដើម្បីសម្របសម្រួល សុំឲ្យកូរ៉េខាងជើង បញ្ឈប់កម្មវិធីនុយក្លេអ៊ែរ ហើយវិលមករកតុចរចារ ដើម្បីឲ្យឧបទ្វីបកូរ៉េ បានរួចផុតពីការគម្រាមកំហែងនៃសង្គ្រាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ