ហេតុអ្វីបានជាកូរ៉េខាងជើងខំប្រឹងចង់ចូលប្រកួតនៅក្នុងកីឡាអាស៊ីហ្គេម នៅកូរ៉េខាងត្បូង
ចុះផ្សាយនៅថ្ងៃ៖
ស្តាប់ - ០៥:០៥
នៅឆ្នាំនេះ កូរ៉េខាងត្បូងជាម្ចាស់ផ្ទះទទួលរៀបចំការប្រកួតកីឡាអាស៊ីហ្គេមលើកទី ១៧ នៅទីក្រុងអ៊ីនឈិន (Incheon) ដែលត្រូវចាប់ផ្តើមពីថ្ងៃសុក្រទី ១៩ កញ្ញា រហូតដល់ថ្ងៃទី៤តុលា។ ប្រទេស៤៥នឹងត្រូវចូលរួមប្រកួតដើម្បីមេដាយដែលនៅក្នុងនោះក៏មានប្រទេសកូរ៉េខាងជើងដែរ។កូរ៉េខាងជើងដែលជាបងប្អូនសត្រូវរបស់កូរ៉េខាងត្បូងក៏បានបញ្ជូនកីឡាករ និងគណប្រតិភូជាង២៧០នាក់របស់ខ្លួនទៅក្នុងការប្រកួតកីឡាអាស៊ីហ្គេមលើកនេះដែរ។ តើអាស៊ីហ្គេមនឹងអាចជួយធ្វើឲ្យកូរ៉េទាំងពីរខិតចូលគ្នាដែរឬទេ?
ភាពតានតឹង ការប្រឈមមុខដាក់គ្នាខាងអាវុធត្រូវបានកូរ៉េខាងពីរដាក់នៅមួយ មួយកន្លែង ដោយឡែកសិន ដោយងាកមកផ្តោតសំខាន់តែទៅលើកីឡា។ ១០ឆ្នាំក្រោយ កូរ៉េខាងជើងចូលរួមក្នុងការប្រកួតកីឡាអត្តពលកម្មនៅកូរ៉េខាងត្បូង កូរ៉េខាងជើងបានត្រលប់មកដាក់ជើង ជាថ្មីនៅលើទឹកដីដែលជាសត្រូវរបស់ខ្លួន។ តាំងពីសប្តាហ៍មុន កីឡាករកូរ៉េខាងជើងចំនួន១៥០នាក់បានទៅដល់ទឹកដីកូរ៉េខាងត្បូង ដើម្បីត្រៀមចូលរួមប្រកួតនៅក្នុងវិញ្ញាសារចំនួន១៤ នៅក្នុងការប្រកួតកីឡាអាស៊ីហ្គេម។
ទម្រាំតែអាចឲ្យកីឡាករកូរ៉េខាងជើងបានចូលរួមប្រកួតនៅក្នុងអាស៊ីហ្គេមលើកនេះ ក្រុមគណៈកម្មការអូឡាំពិករបស់ប្រទេសទាំងពីរបានជជែក តវ៉ាគ្នាអស់ពេលរាប់ខែ។ កូរ៉េខាងជើងធ្លាប់បានព្រមាន មិនចូលរួមនៅក្នុងអាស៊ីហ្គេមរៀបចំនៅកូរ៉េខាងត្បូង ដោយបានចោទមួយលើក ជាពីរលើកថា ទីក្រុងសេអ៊ូល រើសអើងដោយបានដាក់លក្ខខណ្ឌជាច្រើនដើម្បីជាឧបសគ្គរារាំងមិនឲ្យកូរ៉េខាងជើងចូលរួមនៅក្នុងកីឡាអាស៊ីហ្គេមបាន។ ទីក្រុងព្យុងយ៉ាងចោទផងដែរទីក្រុងសេអ៊ូលថាបានយកបញ្ហានយោបាយ ជម្លោះរវាងកូរ៉េទាំងពីរមកលាយឡំនៅក្នុងការចរចាដែលនិយាយតែពីកីឡា។ ទាក់ទងនឹងការចូលរួមរបស់កីឡាករកូរ៉េខាងជើងនៅអាស៊ីហ្គេមលើកនេះ ភាគីចរចាទាំងពីរមិនចុះសម្រុងគ្នាទៅលើចំនួនមនុស្សចូលរួមរបស់កូរ៉េខាងជើង ដែលគ្រោងបញ្ជូនមនុស្សជាង៧០០នាក់ ដែលនៅក្នុងនោះមានក្រុមស្រ្តីអ្នករាំលើកកម្លាំងចិត្តជាង៣០០នាក់។ កូរ៉េខាងត្បូងចង់ទាមទារឲ្យកូរ៉េខាងជើងជាអ្នកទទួលបន្ទុកចំណាយលើក្រុមអ្នកចូលរួមរបស់ខ្លួន ដែលបញ្ហានេះត្រូវកូរ៉េខាងជើងបដិសេធ។
កូរ៉េខាងជើងដែលអាក់អន់ចិត្តនឹងកូរ៉េខាងត្បូង បានព្រមានថា កូរ៉េខាងត្បូងគួរឆ្លៀតឱកាសយកការប្រកួតអាស៊ីហ្គេមលើកនេះ ដើម្បីកាត់បន្ថយភាពតានតឹង និងងាកមកនិយាយពីការបង្រួបបង្រួមកូរ៉េទាំងពីរ។ បើតាមកូរ៉េខាងជើង ក្រុមស្រ្តីរាំលើកកម្លាំងចិត្តកូរ៉េខាងជើងតំណាងឲ្យវប្បធម៌ និងការបង្រួបបង្រួមប្រជាជាតិទាំងពីរ។ នៅក្នុងការប្រកួតកីឡាអត្តពលកម្ម រៀបចំឆ្នាំ ២០០៥ នៅកូរ៉េខាងត្បូង ក្រុមស្រ្តីរាំកូរ៉េខាងជើងបានទទួលការកោតសរសើរខ្លាំងពីអ្នកទស្សនាជនជាតិកូរ៉េខាងត្បូង ដែលតាមពិតទៅ បានចែករំលែកវប្បធម៌តែមួយនឹងកូរ៉េខាងជើង។ (នៅក្នុងក្រុមស្រ្តីអ្នករាំលើកកម្លាំងចិត្តកីឡាករកូរ៉េខាងជើង ក៏មានកញ្ញា រី សូជុល ដែលបច្ចុប្បន្នជាភរិយារបស់ប្រមុខដឹកនាំកូរ៉េខាងជើង គីម ជុងអ៊ុន)
នៅក្នុងការប្រកួតកីឡាអាស៊ីហ្គេមលើកនេះ បើទោះបីជាកូរ៉េខាងជើងមិនបានទទួលអ្វីច្រើនទៅតាមការទាមទាររបស់ខ្លួន ប៉ុន្តែ កូរ៉េខាងជើងនៅតែសុខចិត្តនៅទីបំផុតបញ្ជូនកីឡាករទៅប្រកួតនៅក្នុងទឹកដីកូរ៉េខាងត្បូង គឺមិនង៉ក់ងរដូចមុនទេ។ កាលពីឆ្នាំ ១៩៨៨ កូរ៉េខាងជើងធ្លាប់បានធ្វើពហិការមិនចូលរួមនៅក្នុងការប្រកួតកីឡាអូឡាំពិកដែលមានកូរ៉េខាងត្បូងជាម្ចាស់ផ្ទះ។ ប៉ុន្តែ នៅឆ្នាំ ២០០២ ទីក្រុងព្យុងយ៉ាងបានត្រលប់មកបញ្ជូនកីឡាករឲ្យទៅប្រកួតនៅក្នុងអាស៊ីហ្គេម ដែលរៀបចំនៅប៊ូសាន កូរ៉េខាងត្បូង។
ទាំងនេះបញ្ជាក់ថា បើទោះជាកូរ៉េខាងជើងខឹងស្អប់កូរ៉េខាងត្បូង និងអាចផ្ទុះសង្រ្គាមដាក់គ្នាគ្រប់ពេលវេលា ដោយកូរ៉េខាងជើងបានគំរាម មួយលើក ជាពីរលើក បាញ់គ្រាប់មីស៊ីលកំទេចកូរ៉េខាងត្បូង ប៉ុន្តែ នៅពេលនិយាយពីកីឡា កូរ៉េជើងបានបន្ទន់ជំហររបស់ខ្លួនបន្តិចនៅចំពោះមុខកូរ៉េខាងត្បូង។ កូរ៉េខាងជើងបានសំលឹងឃើញកីឡាជាយុទ្ធសាស្រ្តបន្ថែមមួយដើម្បីកសាងកេរ្តិ៍ឈ្មោះឡើងវិញ។
នៅប៉ុន្មានឆ្នាំចុងក្រោយនេះ ប្រមុខដឹកនាំវ័យក្មេងកូរ៉េខាងជើង គីម ជុងអ៊ុន បានផ្តោតសារៈសំខាន់ទៅលើការអភិវឌ្ឍន៍កីឡានៅក្នុងប្រទេស។ នៅក្នុងទស្សនកិច្ចត្រួតពិនិត្យកន្លែងប្រកួត នៅកូរ៉េខាងត្បូង មន្រ្តីទទួលបន្ទុកកីឡាកូរ៉េខាងជើងម្នាក់បានអះអាង លោកគីម ជុងអ៊ុនបានចំណាយថវិកាជាច្រើនដើម្បីសាងសង់ពហុកីឡាដ្ឋាន។ លោកគីម ជុងអ៊ុនចង់ឲ្យប្រទេសកូរ៉េខាងជើងខ្លាំងពូកែខាងកីឡា។ កូរ៉េខាងជើងដែលទទួលការដាក់ទណ្ឌកម្មពីសហគមន៍អន្តរជាតិដោយសារការល្មើសបាញ់សាកល្បងអាវុធនុយក្លេអ៊ែរជាច្រើនលើក ទំនងចង់ឆ្លៀតយកកីឡា មកទាមទារការទទួលស្គាល់ខ្លួនឡើងវិញ នៅលើឆាកអន្តរជាតិ។
កូរ៉េខាងជើងសំបូរដោយកីឡាករឆ្នើម មានសមត្ថភាព។ ជាក់ស្តែង ក្រុមកីឡាករកូរ៉េខាងជើងទើបប្រកួតឈ្នះក្រុមកីឡាករបាល់ទាត់ចិន កាលពីថ្ងៃចន្ទ ជាមួយពិន្ទុ ៣ ទល់នឹង០។ ទោះសំបូរកីឡាករឆ្នើមពូកែ ប៉ុន្តែ កូរ៉េខាងជើងមិនដែលធ្លាប់បានទទួលសិទ្ធិធ្វើជាម្ចាស់ផ្ទះ ដើម្បីរៀបចំកីឡាអន្តរជាតិ ដូចកូរ៉េខាងត្បូងទេ។
នៅកូរ៉េខាងត្បូង យុទ្ធសាស្រ្តបង្រួបបង្រួមកូរ៉េទាំងពីរហាក់មិនអាចធ្វើឡើងតាមរយៈការប្រកួតកីឡាអាស៊ីហ្គេម។ កាលពីថ្ងៃអង្គារ គណៈកម្មការរៀបចំការប្រកួត បានប្រកាសហាមមិនឲ្យអ្នកចូលទស្សនា ឬអ្នកគាំទ្រ នាំយកទង់ជាតិកូរ៉េខាងជើងចូលក្នុងស្តាត។ អ្នកដែលល្មើស នឹងអាចប្រឈមមុខនឹងការចាប់ឃាត់ខ្លួន ព្រោះថា នៅកូរ៉េខាងត្បូង ច្បាប់បានហាមគ្រប់សកម្មភាពដែលបង្ហាញពីការគាំទ្រចូលចិត្តកូរ៉េខាងជើង។ នៅក្រៅរបងស្តាត ទង់ជាតិរបស់ប្រទេសចូលរួមទាំងអស់ត្រូវគេដកចេញ ដោយសារគេខ្លាចក្រែងមានសកម្មភាពហិង្សារបស់ក្រុមប្រឆាំងនឹងដងទង់ជាតិកូរ៉េខាងជើង។
គួកត់សំគាល់ថា កីឡាCricketដ៏ល្បីល្បាញធ្លាប់បានទាក់ទាញប្រមុខដឹកនាំឥណ្ឌា និងប៉ាគីស្ថាន ដែលជាសត្រូវនឹងគ្នាឲ្យអង្គុយជិតគ្នា នៅលើវេទិកា។ ពេលខ្លះ Cricket ត្រូវគេចាត់ទុកជាកីឡាដែលអាចនាំសន្តិភាពឲ្យប្រជាជនប៉ាគីស្ថាន និងឥណ្ឌាព្រោះថា ប្រជាជនទាំងពីរស្រឡាញ់ចូលចិត្តកីឡានេះដូចគ្នា។ ប៉ុន្តែ ផ្ទុយពីCricket កីឡាអាស៊ីហ្គេមទំនងមិនអាចអូសទាញឲ្យកូរ៉េទាំងពីរខិតចូលគ្នាបានទេ។ ឧទាហរណ៍ក្នុងអតីតកាលបង្ហាញហើយថា បើទោះបីជាកូរ៉េខាងជើងបានចូលរួមប្រកួតនៅក្នុងទឹកដីកូរ៉េខាងត្បូង ប៉ុន្តែ ប្រទេសកុម្មុយនិស្តមួយនេះមិនរារែកនឹងដំឡើងសំឡេង ព្រមានបាញ់គ្រាប់មីស៊ីលដាក់កូរ៉េខាងត្បូង ដែលធ្លាប់ជាបងប្អូននឹងខ្លួននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ