អ្នកភូមិជាង១ពាន់គ្រួសារនៅកោះកុងទាមទារឲ្យក្រុមហ៊ុនចិនផ្តល់សំណងរឿងវិវាទដីធ្លី
អ្នកភូមិចំនួន ៥ឃុំ ក្នុងស្រុកបទុមសាគរ និងស្រុកគិរីសាគរ ខេត្តកោះកុង ដែលកំពុងមានទំនាស់ដីធ្លីជាមួយក្រុមហ៊ុនចិន ក្នុងការវិនិយោគតំបន់អេកូទេសចរណ៍ គ្រោងនឹងធ្វើសន្និសីទកាសែតនៅថ្ងៃចន្ទស្អែក ដើម្បីទាមទារឲ្យក្រុមហ៊ុនកាត់ដីអ្នកភូមិចេញពីតំបន់អភិវឌ្ឍន៍ ឬផ្តល់សំណងសមរម្យតាមគោលនយោបាយរបស់រដ្ឋាភិបាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
អ្នកភូមិជាង១០នាក់ ដែលជាតំណាងអ្នកភូមិ ១.១៤៣គ្រួសារ នៅ៥ឃុំ ក្នុងស្រុកបទុមសាគរ និងស្រុកគិរីសាគរ នៅខេត្តកោះកុង ធ្វើដំណើរមកកាន់រាជធានីភ្នំពេញ នៅថ្ងៃអាទិត្យ។ ពួកគេមកបើកសន្និសីទកាសែតមួយ រៀបចំដោយអង្គការ CHRAC និងអង្គការ NGOs Forum នៅថ្ងៃចន្ទ ដើម្បីស្វែងរកដំណោះស្រាយ បញ្ហាជម្លោះដីធ្លីជាមួយក្រុមហ៊ុនចិន Union Development Group Co.,Ltd ។ នេះបើតាមការឲ្យដឹង ពីមន្រ្តីសិទ្ធិមនុស្សអាដហុក។
លោក នាង បូរ៉ាទីណូ មន្រ្តីសម្របសម្រួលអង្គការអាដហុកប្រចាំខេត្តកោះកុង បានប្រាប់វិទ្យុបារំាងអន្តរជាតិ នៅថ្ងៃនេះថា ក្រុមហ៊ុនចិន Union Development Group ទទួលដីសម្បទានសេដ្ឋកិច្ចពីរដ្ឋាភិបាល កាលពីឆ្នាំ២០០៨ ទំហំ ៣៦.០០០ហិកតារ សម្រាប់វិនិយោគជាតំបន់អេកូទេសចរណ៍ ដោយបង្កើតជាសណ្ឋាគារ រមណីយដ្ឋាន និងព្រលានយន្តហោះ។ រដ្ឋាភិបាលក៏សម្រេចផ្តល់ដីសម្បទានចំនួន ៩.១០០ហិកតារបន្ថែមទៀត សម្រាប់ធ្វើទំនប់វារីអគ្គិសនី និងអាងស្តុកទឹកស្អាត។
បើតាមមន្រ្តីអាដហុក ការវិនិយោគទាំងនោះធ្វើឲ្យអ្នកភូមិចំនួន១.១៤៣គ្រួសារ ត្រូវផ្លាស់ទីលំនៅ ទៅតំបន់មួយដែលគ្មានប្រព័ន្ធហេដ្ឋារចនាសម្ព័ន្ធ គ្មានសាលារៀន ទីផ្សារ មន្ទីរពេទ្យ និងវត្តអារាម។
តំណាងអ្នកភូមិមានបំណងធ្វើការទាមទារឲ្យក្រុមហ៊ុនចិនផ្តល់សំណងសមរម្យដល់ពួកគេ ទាមទារឲ្យមានការអភិវឌ្ឍន៍នៅនឹងកន្លែង ហើយក្រុមហ៊ុនត្រូវកាត់ចំណែកដីអ្នកភូមិចេញក្រៅពីគម្រោងអភិវឌ្ឍន៍របស់ខ្លួន។
លោក ទីណូ បញ្ជាក់ថា ក្នុងសន្និសីទកាសែតនៅថ្ងៃចន្ទ តំណាងអ្នកភូមិនឹងទាមទារយ៉ាងនេះ ដើម្បីឲ្យរដ្ឋាភិបាលជួយធ្វើអន្តរាគមន៍ បន្ទាប់ពីពួកគេបរាជ័យជាច្រើនលើក ក្នុងការធ្វើបាតុកម្មបិទផ្លូវ ដើម្បីដាក់សម្ពាធឲ្យក្រុមហ៊ុនចេញមកដោះស្រាយ។
ទាក់ទងនឹងបញ្ហាទំនាស់ដីធ្លីនៅកម្ពុជា តាមរបាយការណ៍អង្គការអាដហុក មានមនុស្សចំនួន១៧៣នាក់ ត្រូវបានតុលាការចោទប្រកាន់ និងឃុំក្នុងពន្ធនាគារ ក្នុងរយៈពេល៩ខែ ក្នុងឆ្នាំ២០១១។ មនុស្សចំនួន៤៩នាក់ត្រូវឃាត់ខ្លួន ២៨នាក់ ជាប់ឃុំក្នុងពន្ធនាគារ ២១នាក់ត្រូវលើកលែងការចោទប្រកាន់ និង ១២៤នាក់ទៀតរត់ចោលផ្ទះសម្បែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ