វៀតណាមសំដែងស្វាគមន៍កងនាវាចិននិងអាមេរិក
នាវានៃកងទ័ពចិនមួយគ្រឿង បានធ្វើដំណើរចូលមកដល់កំពង់ផែទីក្រុងហូជីមិញភាគខាងត្បូងប្រទេសវៀតណាមហើយនៅថ្ងៃពុធម្សិលមិញនៅខណៈដែលកងម៉ារីនវៀតណាមនិងអាមេរិកកំពុងធ្វើលំហាត់សឹកដែលមិនមែនសំរាប់ប្រយុទ្ធតាំងពីថ្ងៃពុធ២៥មេសានិងបន្តរហូតដល់មួយសប្តាហ៍។ ការធ្វើលំហាត់នេះ ត្រូវបានប្រព្រឹត្តទៅនៅក្នុងបរិការណ៍នៃភាពតានតឹងជាប់ជាប្រចាំនៅតំបន់សមុទ្រប៉ែកខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
នវានៃកងទ័ពចិនមួយគ្រឿងដែលបានធ្វើដំណើរចូលមកដល់កំពង់ផែទីក្រុងហូជីមិញ កាលពីថ្ងៃចន្ទដើមសប្តាហ៍ ដើម្បីទស្សនកិច្ចរយៈពេល៣ថ្ងៃនៅប្រទេសវៀតណាម។ គោលដៅនៃទស្សនកិច្ច របស់កងនាវាចិននៅពេលនេះ គឺដើម្បីប្តោះប្តូរគ្នានៅលើវិស័យវិជ្ជាជីវៈ ចែករំលែកបទពិសោធន៍គ្នាទៅវិញទៅមក និង ពង្រឹងចំណងមិត្តភាពរវាងប្រទេសកុម្មុយនិស្តជិតខាងទាំងពីរនេះ។
នៅឯកណ្តាលសមុទ្រនៃកំពង់ផែ ដាណាងភាគកណ្តាលប្រទេសវៀតណាម កងនាវាអាមេរិកនិងវៀតណាម បានធ្វើលំហាត់សឹកដែលមិនមែនសំរាប់ប្រយុទ្ធ ចាប់តាំងពីថ្ងៃពុធ២៥មេសានិងបន្តរហូតដល់រយៈពេលមួយសប្តាហ៍ ។ លំហាត់នេះ ក៏មានរាប់បញ្ចូលផងដែរការហាត់ហ្វឹកហ្វឺនស្តីពីការគ្រប់គ្រងគ្រោះមហន្តរាយធម្មជាតិនៅលើ នាវាពិឃាដ USS Chafee។ ក៏ប៉ុន្តែ លំហាត់រវាងអាមេរិកនិងវៀតណាម នេះ ត្រូវបានប្រព្រឹត្តទៅ បន្ទាប់ពី ប្រទេសចិននិងវៀតណាម មានវិបត្តិការទូតមួយចំនួននៅឆ្នាំ២០១២នេះនៅក្នុងជម្លោះដែនសមុទ្រចិនខាងត្បូង។
គួររំលឹកថា ទីក្រុងប៉េកាំងនិង ទីក្រុងហាណូយ មានការឈ្លោះប្រកែកគ្នាជាយូរយារមកហើយក្នុងការទាមទារកម្មសិទ្ធិផ្តាច់មុខរៀងខ្លួននៅលើប្រជុំកោះ Spratley និង Paracels ដែលជាដែនសមុទ្រសម្បូណ៌ហូរហៀរដោយប្រេងឥន្ទនៈ។ចំណែក ប្រជុំកោះ Spratley វិញ ក៏ត្រូវ ប្រទេសមួយចំនួនផ្សេងទៀត ទាមទារថាជាកម្មសិទ្ធិរបស់ខ្លួនមួយចំណែកដែរ ក្នុងនោះ មានតៃវ៉ាន់ ព្រុយណេ ម៉ាឡេស៊ី និងហ្វីលីពីន។
នៅក្នុងជម្លោះដណ្តើមកប្រជុំកោះទាំងពីរនេះ សហរដ្ឋអាមេរិក ដែលប្តេជ្ញាពង្រឹងវត្តមានរបស់ខ្លួននៅតំបន់អាស៊ីប៉ាស៊ីហ្វិកដើម្បីប្រឆាំងទល់នឹងមហិច្ចតារបស់ប្រទេសចិន បានទាមទារឲ្យមានដំណោះស្រាយដោយសន្តិភាពមួយ តាមរយៈការចរចាជាពហុភាគី ក៏ប៉ុន្តែទីក្រុងប៉េកាំង មិនខ្ចីស្តាប់និងទាមទារការចរចាជាទ្វេភាគី។
កាលពីថ្ងៃអង្គារមុននេះ ក្រសួងការបរទេសវៀតណាម បានបរិហារអំពីចេតនាលោភលន់របស់ចិនដែលចង់អនុវត្តន៍ផែនការជាតិ មួយរបស់ខ្លួនដើម្បីការពារដែនប្រជុំកោះទាំងអស់នេះដោយក្រសួងការបរទេសវៀតណាម បានបញ្ជាក់ជាថ្មីទៀតថា តំបន់ប្រជុំកោះ Spratley និង Paracels គឺ ជាដែនអធិបតេយ្យរបស់ខ្លួនមិនអាចប្រកែកបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ