ហាណូយធ្វើសមយុទ្ធក្រោមក្រសែភ្នែកក្តៅក្រហាយរបស់ចិន
នៅថ្ងៃចន្ទនេះ វៀតណាមបានរៀបចំធ្វើសមយុទ្ធ មួយខ្សែ ដោយបាញ់គ្រាប់មែនទែន នៅក្នុងដែនសមុទ្ទចិនខាងត្បូង។ ជាសមយុទ្ធដែលធ្វើឡើងក្នុងអំឡុងពេលចិន និងវៀតណាមកំពុងដំឡើងសរសៃកដាក់គ្នាយ៉ាងខ្លាំង ក្នុងជម្លោះទាមទារបូរណភាពដែនដីលើប្រជុំកោះ Spratleys និង Paracels។
ចុះផ្សាយនៅថ្ងៃ៖
ស្តាប់ - ០១:៣៧
គ្រាន់តែទ្រនិចនាឡិកាវាយម៉ោង៨ភ្លាម ព្រឹកមិញ កងទ័ពជើងទឹកវៀតណាមបានចុចបង្ហើរ គ្រាប់មែនទែន ជាកិច្ចចាប់ផ្តើមធ្វើសមយុទ្ធ នៅម្តុំកោះ ហុង អុង (Hon Ong) ប្រមាណ២០០គីឡូម៉ែត្រពីប្រជុំកោះ Paracels រហូតដល់ម៉ោង១២ថ្ងៃត្រង់។
ដំណាក់កាលទីពីរនៃសមយុទ្ធបានចាប់ផ្តើមនៅម៉ោង ៦រសៀល (ម៉ោងនៅក្នុងប្រទេសវៀតណាម) សម្រាប់រយៈពេល៦ម៉ោង។ ប៉ុន្តែនាយទាហានវៀតណាម ដែលសុំមិនបញ្ចេញឈ្មោះ មិនយល់ព្រមផ្តល់ព័ត៌មានលម្អិត ទាក់ទងនឹងចំនួនទាហាន សម្ភារៈ និងនាវាចម្បាំងដែលចូលរួមធ្វើសមយុទ្ធពេលនេះទេ។ លោកគ្រាន់តែបង្ហើបថា មានតែការបាញ់កាំភ្លើងធំ គ្មានទេពពួកមីស្ស៊ីល។
សម្រាប់អ្នកនាំពាក្យក្រសួងការបរទេសវៀតណាម សមយុទ្ធនេះជាការហ្វឹកហាត់ដូចទម្លាប់ ជាប្រចាំឆ្នាំរបស់វៀតណាម។ ប៉ុន្តែមហាអំណាចចិន ដែលលែងបញ្ចេញប្រតិកម្មអ្វីតបវិញសោះ តាំងពីថ្ងៃសុក្រទី ១០មិថុនាមក បានតាមដានព្រឹត្តិការណ៍នេះ ដោយព្រួយបារម្ភ។
ចិននិងវៀតណាម សង្កៀតធ្មេញដាក់គ្នាជាថ្មីក្នុងអធិករណ៍ដណ្តើមប្រជុំកោះSpratleys និង Paracels តាំងពីដើមខែម្ល៉េះ នៅពេលដែលនាវាល្បាតចិន បានធ្វើឲ្យខូចខាតកប៉ាល់រុករកប្រេងវៀតណាម នៅចន្លោះប្រជុំកោះ Spratleys និង Paracels។ សម្រាប់វៀតណាម ទង្វើរបស់ចិន គឺជាការរំលោភអធិបតេយ្យរបស់ខ្លួន។ ចំពោះចិនវិញ គឺជាការការពារប្រយោជន៍ចិនប៉ុណ្ណោះ។
ការចោទប្រកាន់គ្នាទៅវិញទៅមកនេះ បានក្លាយជាកំហឹងកាន់តែខ្លាំងឡើង ម្សិលមិញប្រជាជនវៀតណាមជាច្រើនរយនាក់បាននាំគ្នាធ្វើបាតុម្មប្រឆាំងនយោបាយក្រុងប៉េកាំង នៅមុខស្ថានទូតចិនប្រចាំក្រុងហាណូយនិងក្រុងហូជីមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ