ង្វៀន តាន់ហ្ស៊ុងថា Paracels និង Spratleys ជាកម្មសិទ្ធិវៀតណាម
នាយករដ្ឋមន្ត្រីវៀតណាមង្វៀន តាន់ហ្ស៊ុង(Nguyen Tan Dung) បានប្រកាសយ៉ាងចំហថាប្រទេសរបស់លោកត្រូវតែការពារអធិបតេយ្យរបស់ខ្លួនទៅលើទីប្រជុំកោះParacels និងSpratleys។ សេចក្តីប្រកាសនេះបានធ្លាក់មកដល់ ជួនចំពេលមួយដែលទំនាក់ទំនងរវាងចិននិងវៀតណាមមានលក្ខណៈតានតឹងខ្លាំង ដោយហេតុតែទំនាស់ដែនដីនៅក្នុងតំបន់សមុទ្រចិនប៉ែកខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
ចំពោះលោក ង្វៀន តាន់ហ្ស៊ុងអធិបតេយ្យរបស់ប្រទេសវៀតណាមទៅលើParacels និងSpratleys គឺជាការមួយប្រកែកមិនបាន។ នេះជាលើកទីមួយហើយ ដែលនាយករដ្ឋមន្ត្រីវៀតណាមធ្វើសេចក្តីប្រកាសជាផ្លូវការនិងយ៉ាងចំហអ៊ីចឹង នៅក្នុងសំណុំរឿងដ៏រសើបមួយនេះ។
អន្តរាគមន៍ជាផ្លូវការបែបនេះរបស់លោកង្វៀន តាន់ហ្ស៊ុងស្តែងឲ្យឃើញនូវទំនាស់កាន់តែធ្ងន់ធ្ងរឡើងជាលំដាប់រវាងហាណូយនិងប្រទេសចិនដែលបាននិងកំពុងបន្តដណ្តើមគ្នាកាន់កាប់ទីប្រជុំកោះទាំងពីរនៅក្នុងសមុទ្រចិនប៉ែកខាងត្បូង។
«យើងសូមបញ្ជាក់នូវការប្តេជ្ញាចិត្តយ៉ាងមុតមាំរបស់បក្ស របស់ប្រជាជន និងរបស់កងទ័ព ក្នុងការការពារអធិបតេយ្យរបស់យើងទៅលើតំបន់សមុទ្រនិងកោះនានារបស់ប្រទេសយើង»។ នេះជាពាក្យសំដីរបស់លោក ង្វៀន តាន់ហ្ស៊ុងដែលគេចាត់ទុកថាជាអ្នកមានអំណាចខ្លាំងជាងគេបង្អស់នៅក្នុងប្រទេសវៀតណាមសព្វថ្ងៃ។
កាលពីថ្ងៃអាទិត្យទី៦មិថុនាចុងសប្តាហ៍កន្លងទៅនេះ ប្រជាជនវៀតណាមជាច្រើនរយនាក់ បាននាំគ្នាធ្វើបាតុកម្មនៅពីមុខស្ថានទូតចិនប្រចាំនៅទីក្រុងហាណូយ ដើម្បីសម្តែងនូវកំហឹងរបស់ពួកគេ។ បាតុកម្មនេះដែលគេចាត់ទុកថាជាការបើកដៃពីសំណាក់អាជ្ញាធរវៀតណាម ត្រូវបានធ្វើឡើង ប៉ុន្មានថ្ងៃប៉ុណ្ណោះក្រោយពីនាវាចិនបានកាត់ផ្តាច់ខ្សែកាបរបស់កប៉ាល់រុករកប្រេងកាតវៀតណាម និងក្រោយពីនាវាល្បាតចិនបានគំរាមជាថ្មីទូកនេសាទវៀតណាម នៅសមុទ្រចិនប៉ែកខាងត្បូង។
មហិច្ឆតាកាន់តែធំរបស់ចិន កំពុងធ្វើឲ្យបណ្តាប្រទេសអាស៊ីអាគ្នេយ៍មួយចំនួនព្រួយបារម្ភ។ វាក៏កំពុងជំរុញសហរដ្ឋអាមេរិកឲ្យយកចិត្តទុកដាក់កាន់តែខ្លាំងទៅលើទំនាស់ដែនដីនៅក្នុងតំបន់សមុទ្រចិនប៉ែកខាងត្បូងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ