វៀតណាមនឹងក្លាយជាប្រទេសអាស៊ីទីមួយដែលអនុញ្ញាតឲ្យអ្នកស្រឡាញ់ភេទដូចគ្នារៀបការ?
ចុះផ្សាយនៅថ្ងៃ៖
ស្តាប់ - ០៣:៥៨
កាលពីថ្ងៃអង្គារ ដើមសប្តាហ៍នេះ រដ្ឋមន្រ្តីក្រសួងយុត្តិធម៌វៀតណាមបានធ្វើឲ្យគ្រប់គ្នាមានការភ្ញាក់ផ្អើល នៅពេលដែលលោកលើកឡើងថា រដ្ឋាភិបាលវៀតណាមកំពុងពិចារណាកែប្រែច្បាប់ ដើម្បីទទួលស្គាល់ចំណងអាពាហ៍ពិពាហ៍រវាងអ្នកស្រឡាញ់ភេទដូចគ្នា ដែលជារឿងមិនធ្លាប់មាន នៅអាស៊ី។ តើហេតុអ្វីបានជារបបផ្តាច់ការកុម្មុយនិស្ត ដែលតែងទទួលរងនូវការរិះគន់អំពីបញ្ហាសិទ្ធិមនុស្សមួយនេះ បែរជាឈានមុខគេក្នុងការការពារសិទ្ធិអ្នកស្រឡាញ់ភេទដូចគ្នាបែបនេះ?
កាលពីកន្លងទៅថ្មីៗនេះ នៅពេលដែលគេឮលោកអូបាម៉ាប្រកាសគាំទ្រឲ្យអ្នកស្រឡាញ់ភេទដូចគ្នារៀបការស្របច្បាប់ មានអ្នកខ្លះអបអរសាទរ ហើយមានអ្នកខ្លះទៀតស្រែកជំទាស់ ប៉ុន្តែ យ៉ាងហោចណាស់ក៏មើលទៅហាក់ដូចជាគ្មានអ្នកណាម្នាក់មានការភ្ញាក់ផ្អើលនឹងការប្រកាសរបស់លោកអូបាម៉ានេះដែរ។
ក៏ប៉ុន្តែ វៀតណាម?! វៀតណាម ដែលដឹកនាំដោយរបបផ្តាច់ការកុម្មុយនិស្ត ហើយដែលគេតែងតែរិះគន់រឿងរំលោភសិទ្ធិមនុស្ស ស្រាប់តែប្រកាសចង់អនុញ្ញាតឲ្យអ្នកស្រឡាញ់ភេទដូចគ្នារៀបការដោយស្របច្បាប់ដែរ? នេះទើបជារឿងដែលធ្វើឲ្យគេភ្ញាក់ផ្អើល!
យោងតាមរដ្ឋមន្រ្តីក្រសួងយុត្តិធម៌វៀតណាម នៅឆ្នាំក្រោយ សភាវៀតណាមគ្រោងនឹងរៀបចំធ្វើវិសោធនកម្មច្បាប់ស្តីពីអាពាហ៍ពិពាហ៍ ហើយរដ្ឋាភិបាលវៀតណាមកំពុងពិចារណាបញ្ចូលមាត្រាខ្លះ ដើម្បីបង្កើតក្របខ័ណ្ឌគតិយុត្តមួយ ទាក់ទងនឹងអាពាហ៍ពិពាហ៍រវាងអ្នកស្រឡាញ់ភេទដូចគ្នា។ ច្បាប់ថ្មីនេះក៏នឹងមានចែងផងដែរអំពីសិទ្ធិរបស់អ្នកស្រឡាញ់ភេទដូចគ្នា ចំពោះការកាន់កាប់ និងគ្របគ្រងទ្រព្យសម្បត្តិរួម សិទ្ធិទាក់ទងនឹងការផ្ទេរមរតក និងការសុំកូនមកចិញ្ចឹម ជាដើម។
មានអ្នកជំនាញខ្លះយល់ថា វៀតណាមប្រហែលជានឹងមិនឈានរហូតដល់ទៅទទួលស្គាល់អាពាហ៍ពិពាហ៍រវាងអ្នកស្រឡាញ់ភេទដូចគ្នានោះទេ គឺអាចបង្កើតត្រឹមអត្រានុកូលដ្ឋាន (Etat Civil) ក្នុងទម្រង់ណាមួយ ដែលខុសពីអាពាហ៍ពិពាហ៍ ក៏ប៉ុន្តែ ទទួលស្គាល់តាមផ្លូវច្បាប់ នូវចំណងស្នេហា និងការរួមរស់ជាមួយគ្នា រវាងអ្នកស្រឡាញ់ភេទដូចគ្នា។ ក៏ប៉ុន្តែ មិនថាច្បាប់នេះនឹងបង្កើតទម្រង់អត្រានុកូលដ្ឋានណាមួយ សម្រាប់អ្នកស្រឡាញ់ភេទដូចគ្នានោះទេ គ្រាន់តែការដែលរដ្ឋាភិបាលវៀតណាមលើកយកបញ្ហានេះ មកពិចារណាជាគម្រោងផ្លូវការនោះ គឺជារឿងដ៏កម្រណាស់ទៅហើយ! កម្រ ទាំងសម្រាប់វៀតណាមខ្លួនឯង ដែលជាសង្គមប្រកាន់ប្រពៃណី អភិរក្សនិយម ហើយតែងតែចាត់ទុកការស្រឡាញ់ភេទដូចគ្នាថាជា “ជំងឺសង្គម”។ កម្រ ទាំងសម្រាប់តំបន់អាស៊ីទាំងមូល ដែលនៅប្រទេសខ្លះ ការស្រឡាញ់ភេទដូចគ្នា គឺជាបទល្មើសព្រហ្មទណ្ឌ ដែលអាចត្រូវផ្តន្ទាទោសដាក់ពន្ធនាគាររហូតដល់ទៅ ២០ឆ្នាំ។ សូម្បីតែថៃ ដែលសម្បូរទៅដោយអ្នកស្រឡាញ់ភេទដូចគ្នា ហើយមើលទៅ ដូចជាប្រទេសសេរីនឹងរឿងស្រឡាញ់ភេទដូចគ្នា តាមពិតក៏មិនដែលឃើញមានមន្រ្តីរដ្ឋាភិបាល ឬតំណាងរាស្រ្តថៃណាមួយ លើកយករឿងទទួលស្គាល់ចំណងស្នេហាអ្នកស្រឡាញ់ភេទដូចគ្នានេះមកធ្វើជាប្រធានបទជជែកពិភាក្សាគ្នាជាផ្លូវការនោះដែរ។
ហេតុអ្វីបានជារបបកុម្មុយនិស្តវៀតណាម ដែលជារបបផ្តាច់ការ និងមានបញ្ហារំលោភសិទ្ធិមនុស្សមួយនេះ បែរជាឈានមុខគេ ក្នុងរឿងការពារសិទ្ធិអ្នកស្រឡាញ់ភេទដូចគ្នាបែបនេះទៅវិញ?
បើតាមមើលទៅ មូលហេតុចម្បងទីមួយ គឺប្រហែលដោយសារតែអាជ្ញាធរវៀតណាមយល់ថា ពួកអ្នកស្រឡាញ់ភេទដូចគ្នា មិនមែនជាការគំរាមកំហែងណាមួយ ដល់របបកុម្មុយនិស្ត ដូចអង្គការ ឬសកម្មជនខាងសិទ្ធិមនុស្ស ឬសាសនា ឬអង្គការសង្គមស៊ីវិលផ្សេងទៀត។
ម្យ៉ាងទៀត ខុសពីនៅប្រទេសប្រជាធិបតេយ្យ ដែលរដ្ឋាភិបាលត្រូវទទួលសម្ពាធពីសំណាក់អង្គការសាសនា ឬសកម្មជនអភិរក្សនិយម ដែលប្រឆាំងនឹងអ្នកស្រឡាញ់ភេទដូចគ្នា នៅវៀតណាម អាជ្ញាធរបំបិទសិទ្ធិសេរីភាពរបស់សកម្មជន និងអង្គការសាសនា ទើបគេមិនសូវឃើញមានចលនាពួកអ្នកអភិរក្សនិយមចេញមុខមកប្រឆាំងនឹងការទទួលស្គាល់សិទ្ធិអ្នកស្រឡាញ់ភេទដូចគ្នា។
មានសកម្មជនសិទ្ធិមនុស្សវៀតណាមខ្លះសង្ស័យថា ការដែលរដ្ឋាភិបាលវៀតណាមធ្វើជាគិតគូររឿងអ្នកស្រឡាញ់ភេទដូចគ្នានេះ តាមពិត គ្រាន់តែជាយុទ្ធសាស្រ្ត ដើម្បីបង្វែរអារម្មណ៍សាធារណមតិ ពីបញ្ហាសិទ្ធិមនុស្សផ្សេងទៀតតែប៉ុណ្ណោះ មិនមែនធ្វើឡើង ក្នុងគោលដៅលើកតម្កើងសិទ្ធិអ្នកស្រឡាញ់ភេទដូចគ្នាពិតៗនោះទេ។
ក៏ប៉ុន្តែ បើទោះជាការដែលរដ្ឋាភិបាលវៀតណាមលើកឡើងពីគម្រោងទទួលស្គាល់អាពាហ៍ពិពាហ៍រវាងអ្នកស្រឡាញ់ភេទដូចគ្នា ធ្វើឡើង ក្នុងមូលហេតុអ្វីក៏ដោយ ហើយក្នុងគោលដៅអ្វីក៏ដោយ អ្វីដែលគេសង្កេតឃើញជាទូទៅ នៅវៀតណាម នៅពេលនេះ គឺការផ្លាស់ប្តូរផ្នត់គំនិតរបស់ប្រជាជនវៀតណាម ចំពោះអ្នកស្រឡាញ់ភេទដូចគ្នា។ ការផ្លាស់ប្តូរនៃផ្នត់គំនិតនេះបានបង្ហាញកាន់តែច្បាស់ នៅពេលដែលគេឃើញក្រុមអ្នកស្រឡាញ់ភេទដូចគ្នា នាំគ្នាដង្ហែក្បួនតាមទីសាធារណៈ (ឬហៅថា Gay Pride) នៅទីក្រុងហាណូយ កាលពីថ្ងៃអាទិត្យ កន្លងទៅ ដែលជារឿងមិនធ្លាប់មាននៅវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ