ជនរងគ្រោះដោយអំពើហិង្សាក្រោយការបោះឆ្នោតទាមទារយុត្តិធម៌
ជនរងគ្រោះនិងគ្រួសារជនរងគ្រោះដែលបានស្លាប់និងរងរបួសក្នុងព្រឹត្តិការណ៍ហិង្សាជាបន្តបន្ទាប់ក្រោយការបោះឆ្នោតខែកក្កដាឆ្នាំ ២០១៣ បានទាមទារឲ្យរដ្ឋាភិបាលផ្តល់យុត្តិធម៌ដល់ពួកគេ។ ការទាមទារនេះបានធ្វើឡើងក្នុងវេទិកាពិភាក្សាតុមូលមួយស្តីពីការឆ្ពោះទៅមុខ ក្នុងការប្រយុទ្ធប្រឆាំង និងនិទណ្ឌភាពចំពោះការរំលោភសេរីភាពបញ្ចេញមតិនៅអាស៊ីអាគ្នេយ៍។ វេទិការនេះ ត្រូវបានធ្វើឡើងមុនពីរថ្ងៃ នៃថ្ងៃទិវាអន្តរជាតិ ដើម្បីបញ្ចប់និទណ្ឌភាពលើឧក្រិដ្ឋកម្មប្រឆាំងអ្នកសារព័ត៌មាន។
ចុះផ្សាយនៅថ្ងៃ៖
ស្តាប់ - ០២:១១
វេទិការពិភាក្សាតុមូលស្តីពី និទណ្ឌភាពលើអ្នកសារព័ត៌មាន និងសេរីភាពនៃការបញ្ចេញមតិនេះ ត្រូវបានធ្វើឡើង នៅឯភោជនីយដ្ឋានខ្មែរសូរិន្ទ្រ ដែលមានការចូលរួមពីតំណាងអង្គការសង្គមស៊ីវិល អ្នកសារព័ត៌មាន និងក្រុមគ្រួសាររបស់ជនរងគ្រោះ ដែលនៅមិនទាន់ទទួលបានយុត្តិធម៌សម្រាប់មនុស្សជាទីស្រលាញ់របស់ខ្លួន។
នៅក្នុងកិច្ចពិភាក្សានោះ មានការបង្ហាញពីខ្សែរវីដេអូ ដែលនិយាយពីការទាមទាររកយុត្តិធម៌ ជូនដល់អ្នកស្លាប់ទាំង៦នាក់ នៅក្នុងហេតុការណ៍ប៉ះទង្គិចគ្នារវាងក្រុមបាតុករ និងកងរក្សាសន្តិសុខ អ្នកស្លាប់នៅខាងមុខរោងចក្រអេសអិលស្ទឹងមានជ័យ និងអ្នកស្លាប់នៅលើស្ពានអាកាសជាដើម។ ព្រឹត្តិការណ៍ទាំងអស់នេះ បានកើតមានឡើង បន្ទាប់ពីការបោះឆ្នោតក្នុងអាណត្តិទី ៥ ត្រូវបានបញ្ចប់។
បន្ទាប់មក ក៏មានការបង្ហាញពីបទពិសោធន៍របស់អ្នកសារព័ត៌មានខ្មែរជាច្រើនរូប ដែលធ្លាប់ទទួលរងនូវការវាយដំ និងការគំរាមកំហែងដល់អាយុជីវិត បន្ទាប់ពីពួកគេបានព្យាយាមរាយការណ៍រឿង ដែលទាក់ទងនឹងអំពើពុករលួយ និងការឃុបឃិតនានា។ ក្នុងនោះក៏មានការថ្លែងរបស់កូនប្រុស លោកឈុត វុទ្ធី ដែលជាសកម្មជនការពារព្រៃឈើ និងដែលត្រូវបានគេសម្លាប់កាលពីឆ្នាំ២០១២ដែរ។ ជនរងគ្រោះនិងគ្រួសារជនរងគ្រោះទាំងនោះសុទ្ធតែបានទាមទារឲ្យរដ្ឋាភិបាលផ្តល់យុត្តិធម៌ដល់ពួកគេដើម្បីលុបបំបាត់វប្បធម៌និទណ្ឌភាព។
លោកខៀវ សុភ័ក្ត្រ អ្នកនាំពាក្យក្រសួងមហាផ្ទៃ បានបញ្ជាក់ប្រាប់វិទ្យុបារាំងថា លោកមានក៏មានការសោកស្តាយចំពោះព្រឹត្តិការណ៍ដែលកើតមានឡើងនៅពេលនោះដែរ។ ប៉ុន្តែ លោកបានបញ្ជាក់ថា ហេតុការណ៍នៅពេលនោះក្រុមសមត្ថកិច្ចគ្រាន់តែបំពេញតូនាទី ដើម្បីការពារសន្តិសុខ និងរក្សាសុវត្ថិភាពរបស់ខ្លួនឯងតែប៉ុណ្ណោះ។ អ្នកនាំពាក្យក្រសួងមហាផ្ទៃអះអាងថា ក្រសួងបានធ្វើការស៊ើបអង្កេត និងបញ្ជូនរបាយការណ៍រួចរាល់អស់ហើយទៅកាន់តុលា។
សូមបញ្ជាក់ថា ចាប់តាំងពីឆ្នាំ ១៩៩៦ មក អ្នកកាសែតកម្ពុជា ចំនួន ១៣ នាក់ហើយដែលត្រូវបានគេសម្លាប់ ដែលរួមមានទាំងលោកតាំង ទ្រី ដែលត្រូវបានគេសម្លាប់កាលពីថ្ងៃទី ១២ តុលាឆ្នាំ ២០១ថ្មីៗនេះ នៅក្នុងខេត្តក្រចេះ បន្ទាប់ពីលោកបានព្យាយាមរាយការណ៍ពីការកាប់ឈើខុសច្បាប់។ នេះបើយោងតាមរបាយការណ៍របស់អង្គការសិទ្ធិមនុស្ស។ ប៉ុន្តែ លើកលែងតែនៅលើកចុងក្រោយនេះ អាជ្ញាធរបានចាប់បានឃាតករ ដែលបានសម្លាប់អ្នកកាសែតតាំង ទ្រីយកទៅផ្តទ្ធាទោសនៅពន្ធនាគារ ក្រៅពីនោះជនដៃដល់ភាគច្រើននៅមិនទាន់ត្រូវបានវែកមុខនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ