កូរ៉េខាងជើងទំនងជានឹងបាញ់សាកល្បងមីស៊ីលរយៈចម្ងាយឆ្ងាយនៅសប្តាហ៍ក្រោយ
ក្រុមអ្នកជំនាញឯករាជ្យរបស់អាមេរិក បានថ្លែង នៅថ្ងៃសុក្រនេះថា តាមការសិក្សាទៅលើរូបភាពថតដោយផ្កាយរណប កូរ៉េខាងជើងទំនងជាកំពុងតែរៀបចំបាញ់សាកល្បងមីស៊ីលរយៈចម្ងាយឆ្ងាយសាជាថ្មីម្តងទៀត ហើយការរៀបចំបាញ់សាកល្បងនេះ អាចនឹងត្រូវធ្វើរួចរាល់ នៅសប្តាហ៍ក្រោយនេះ។ កាលពីថ្ងៃព្រហស្បតិ៍ ម្សិលមិញនេះ ក្រុមប្រឹក្សាសន្តិសុខអ.ស.ប. បានព្រមានក្រុងព្យុងយ៉ាង ជុំវិញការបាញ់សាកល្បងមីស៊ីលនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
បើយោងតាមវិទ្យាស្ថានស្រាវជ្រាវ នៃសកលវិទ្យាល័យ John Hopkins រូបភាពថតដោយផ្កាយរណបបង្ហាញថា ផ្នែកខ្លះនៃមីស៊ីលរយៈចម្ងាយឆ្ងាយ ត្រូវបានអាជ្ញាធរក្រុងព្យុងយ៉ាង ដឹកយកទៅដល់កន្លែងបាញ់បង្ហោះរួចហើយ ដោយរង់ចាំតែដំឡើងបាញ់ប៉ុណ្ណោះ។ ក្រុមអ្នកជំនាញ ដែលធ្លាប់តាមដានមើលការបាញ់សាកល្បងមីស៊ីលរបស់កូរ៉េខាងជើង កាលពីពេលកន្លងមក បានបញ្ជាក់ថា ប្រសិនបើកូរ៉េខាងជើងធ្វើតាមទម្លាប់ដូចមុន ការរៀបចំបាញ់សាកល្បងមីស៊ីលនេះអាចនឹងត្រូវរួចរាល់ នៅចុងសប្តាហ៍ក្រោយនេះ។
នៅទីក្រុងសេអ៊ូលវិញ មន្រ្តីជាន់ខ្ពស់កូរ៉េខាងត្បូងបានប្រាប់ទីភ្នាក់ងារសារព័ត៌មានបារាំង AFP ថា កូរ៉េខាងត្បូងក៏យល់ថា កូរ៉េខាងជើងបានរៀបចំការបាញ់សាកល្បងមីស៊ីលនេះជិតចប់សព្វគ្រប់ដែរ ប៉ុន្តែ គេមិនអាចដឹងបានថា តើអាជ្ញាធរក្រុងព្យុងយ៉ាងពិតជានឹងបាញ់សាកល្បងមែន ឬក៏អត់ ហើយបាញ់នៅពេលណានោះទេ។
គួររំឭកឡើងវិញថា កូរ៉េខាងជើងធ្លាប់បានបាញ់សាកល្បងមីស៊ីលរយៈចម្ងាយឆ្ងាយនេះ ជាច្រើនលើករួចមកហើយ ក្នុងរូបភាពជាការសាកល្បងបាញ់បង្ហោះផ្កាយរណប។ ការបាញ់សាកល្បងលើកចុងក្រោយបំផុត គឺធ្វើនៅខែមេសាកន្លងទៅថ្មីៗនេះ ប៉ុន្តែ ត្រូវទទួលបរាជ័យ។
កាលពីថ្ងៃព្រហស្បតិ៍ ម្សិលមិញនេះ ក្រុមប្រឹក្សាសន្តិសុខអ.ស.ប. បានព្រមានខ្លាំងៗដល់កូរ៉េខាងជើង កុំឲ្យធ្វើការបាញ់សាកល្បងមីស៊ីលនេះ ព្រោះវាជាការរំលោភទៅលើសេចក្តីសម្រេចរបស់ក្រុមប្រឹក្សាសន្តិសុខ។
ក្រុមអ្នកជំនាញមួយចំនួនលើកឡើងថា កូរ៉េខាងជើងទំនងជាចង់រៀបចំបាញ់សាកល្បងមីស៊ីលនេះឲ្យបានទាន់ ឬបានមុន កូរ៉េខាងត្បូង ដែលគ្រោងបាញ់បង្ហោះផ្កាយរណបរបស់ខ្លួនដែរ នៅថ្ងៃទី២៩ វិច្ឆិកា ម្សិលមិញ។ ក៏ប៉ុន្តែ គម្រោងបាញ់បង្ហោះរ៉ុកកែតផ្ទុកផ្កាយរណបរបស់កូរ៉េខាងត្បូងនេះ ត្រូវបានពន្យារពេលវិញ នៅនាទីចុងក្រោយ ដោយមូលហេតុបច្ចេកទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ