វិបត្តិអ៊ុយក្រែន៖លោកស្រីមែរគែលប្រាប់លោកពូទីនថាលោកស្រីបារម្ភខ្លាំង
ក្នុងការសន្ទនាទូរសព្ទជាមួយប្រធានាធិបតីរុស្ស៊ីពូទីន នៅថ្ងៃសុក្រនេះ ប្រមុខដឹកនាំអាល្លឺម៉ង់ លោកស្រីអាន់ហ្កឺឡា មែរគែល បាននិយាយប្រាប់លោកពូទីន ថាលោកស្រីមានការព្រួយបារម្ភខ្លាំងចំពោះស្ថានភាពតានតឹងនៅអ៊ុយក្រែននៅពេលនេះ។ នេះបើយោងតាមអ្នកនាំពាក្យរដ្ឋាភិបាលអាល្លឺម៉ង់ លោក ស្តេហ្វិន សីប៊ែរ Stffen Seibert។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
អ្នកនាំពាក្យរដ្ឋាភិបាលអាល្លឺម៉ង់ លោកស្តេហ្វិន សីប៊ែរ បានប្រាប់អោយដឹងនៅថ្ងៃសុក្រនេះថា លោកស្រីអាន់ហ្កឺឡា មែរគែល បានប្រាប់តាមទូរសព្ទទៅលោកពូទីន ថាលោកស្រីមានការព្រួយបារម្ភខ្លាំង ចំពោះភាពតានតឹងនៅភាគខាងកើតអ៊ុយក្រែនបច្ចុប្បន្ននេះ។ ប្រមុខដឹកនាំអាល្លឺម៉ង់ប្រាប់ប្រធានាធិបតីរុស្ស៊ីថា អាល្លឺម៉ង់ចង់អោយរដ្ឋាភិបាលរុស្ស៊ីបង្ហាញសកម្មភាពជាក់ស្តែងថា រុស្ស៊ីពិតជាយល់ស្របតាមកិច្ចព្រមព្រៀងក្រុងហ្សឺណែវ សំដៅដោះស្រាយវិបត្តិអ៊ុយក្រែន ដែលរុស្ស៊ី សហភាពអឺរ៉ុប អាមេរិក និងអ៊ុយក្រែន សម្រេចបានកាលពីថ្ងៃ១៧មេសា កន្លងទៅ។
គួររំលឹកថា កិច្ចព្រមព្រៀង ថ្ងៃ១៧មេសា មានទិសដៅដកហូតអាវុធពីក្រុមប្រដាប់អាវុធខុសច្បាប់ ដែលកំពុងធ្វើសកម្មភាពនៅអ៊ុយក្រែន ចែងបញ្ចប់ហិង្សា សកម្មភាពបង្ក្រាប រឺការបង្ករឿងពីគ្រប់ភាគី និងចែងមិនយកទោសពៃរ៍សកម្មជនគាំទ្ររុស្ស៊ី ដែលបានចូលរួមបះបោរ។ យោងតាមកិច្ចព្រមព្រៀងនេះ សកម្មជនគាំទ្ររុស្ស៊ី និងសកម្មជនក្រុងគៀវ ក៏ត្រូវតែដកខ្លួនឈប់កាន់កាប់អគារសាធារណៈផងដែរ។ អាល្លឺម៉ង់ចោទរុស្ស៊ីថា មិនបានធ្វើអ្វីទៅមុខ ដើម្បីជំរុញអោយមានដំណោះស្រាយវិបត្តិអ៊ុយក្រែនស្របតាមកិច្ចព្រមព្រៀងទេ។
ទាក់ទងនឹងជំនួបទូរសព្ទរវាងលោកស្រី មែរគែល និងលោកពូទីន វិមានក្រិមឡាំងបានបកស្រាយផ្សេងទៅវិញថា មេដឹកនាំទាំង២បានផ្តោះប្តូរយោបល់គ្នាពីបញ្ហាអ៊ុយក្រែននេះ ហើយអ្នកទាំង២ក៏បានលើកឡើងដែរថា រដ្ឋាភិបាលក្រុងគៀវ នៅញញើតក្នុងការអនុវត្តន៍កិច្ចព្រមព្រៀង ក្រុងហ្សឺណែវនេះ។ វិមានក្រិមឡាំងបន្ថែមថា ក្នុងកិច្ចសន្ទនាជាមួយលោកស្រីមែរគែល លោកពូទីនបានថ្កោលទោសរដ្ឋាភិបាលក្រុងគៀវដែលព្យាយាមប្រើកងទ័ពប្រឆាំងជនស៊ីវិល នៅភាគអាគ្នេយ៍។ ទន្ទឹមនេះដែរ លោកស្រីមែរគែល និងលោកពូទីន ក៏បានគូសបញ្ជាក់ផងដែរ ពីសារៈសំខាន់នៃជំនួបត្រីភាគីរវាងរុស្ស៊ី សហភាពអឺរ៉ុប និងអ៊ុយក្រែន ដើម្បីពិភាក្សាពីការផ្គត់ផ្គង់ឧស្ម័ន។
នៅថ្ងៃ១និង២ឧសភា ខាងមុខនេះ ប្រមុខដឹកនាំអាល្លឺម៉ង់ អាន់ហ្កឺឡា មែរគែល នឹងបំពេញទស្សនកិច្ចនៅក្រុងវ៉ាស៊ីនតោន។ លោកស្រីនឹងពិភាក្សាជាមួយលោកអូបាម៉ាពីស្ថានភាពនៅអ៊ុយក្រែន និងពីការស៊ើបការណ៍របស់ភ្នាក់ងារចារកិច្ចអាមេរិកដែលជាប់រឿងអាស្រូវថា បានលួចស្តាប់ទូរសព្ទថ្នាក់ដឹកនាំអឺរ៉ុប រួមមានរូបលោកស្រីមែរគែលផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ