ទីភ្នាក់ងារវាយតម្លៃហានិភ័យបំណុល បានបន្ទាបចំណាត់ថ្នាក់សាធនភាពរបស់រុស្ស៊ី
ការបន្ទាបនេះ ត្រូវបានប្រកាសថ្ងៃសុក្រ២៥មេសាដោយទីភ្នាក់ងារអន្តរជាតិខាងវាយតម្លៃហានិភ័យបំណុល Standard & Poor’s។ មូលហេតុមកពីស្ថានការណ៍កាន់តែតានតឹងនៅអ៊ុយក្រែន ដែលបង្កជាហានិភ័យដល់សេដ្ឋកិច្ចរុស្ស៊ីផ្ទាល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ទីភ្នាក់ងារអន្តរជាតិខាងវាយតម្លៃហានិភ័យបំណុល Standard & Poor’s បានបន្ទាបឲ្យចុះមួយកម្រិត ចំណាត់ថ្នាក់អធិបតេយ្យរបស់រុស្ស៊ីខាងរូបិយវត្ថុបរទេស គឺពីទ្រនិច BBB ដល់BBB- ទាំងព្យាករថា ចំណាត់ថ្នាក់នេះទៅអនាគត គឺអវិជ្ជមាន។ Standard & Poor’s ថែមទាំងព្រមានទៅផងថា ក្នុងថ្ងៃមុខ ខ្លួនអាចបញ្ចុះចំណាត់ថ្នាក់នេះរបស់រុស្ស៊ីតទៅទៀត លុះទាល់តែច្រានប្រទេសរុស្ស៊ីឲ្យធ្លាក់ក្នុងជំពូកនៃវិនិយោគហៅថា មានលក្ខណៈ“កេងប្រវ័ញ្ច”។ បើធ្លាក់ក្នុងស្ថានភាពនេះមែន នោះរុស្ស៊ីដែលសេដ្ឋកិច្ចខ្លួនស្ថិតនៅនឹងមាត់ជ្រោះដើរថយក្រោយ “ ទៅហើយ មុខជាពិបាកទទួលលទ្ធភាពចូលទៅក្នុងទីផ្សារហិរញ្ញវត្ថុ។
ប៉ុន្តែ លោករដ្ឋមន្ត្រីក្រសួងអភិវឌ្ឍន៍សេដ្ឋកិច្ចរុស្ស៊ី Alexei Oulioukaiev ចាត់ទុកការវាយតម្លៃរបស់ Standard & Poor’s ចំពោះប្រទេសរុស្ស៊ី ថាក៏បណ្តាលមកពីមូលហេតុនយោបាយដែរ។
ការវាយតម្លៃនេះ ត្រូវបានទីភ្នាក់ងារ Standard & Poor’s ធ្វើនៅចំពេលដែលស្ថានការណ៍បន្តតានតឹងនៅអ៊ុយក្រែន មកពីកងទ័ពរដ្ឋាភិបាលអ៊ុយក្រែនវាតប្រតិបត្តិការជាថ្មី ដើម្បីបង្ក្រាបពួកផ្តាច់ទឹកដីដែលរុស្ស៊ីនិយម នៅតាមខេត្តខាងកើតអ៊ុយក្រែន។ ម៉ូស្គូតាមរយៈបបូរមាត់លោករដ្ឋមន្ត្រីការបរទេសរុស្ស៊ី Serguei Lavrov ព្រឹកមិញ បានរិះគន់សមភាគីអាមេរិក លោកJohn Kerry ថាមានទេពកោសល្យខាងប្រែខ្មៅ ទៅស ដោយខំការពាររបបក្រុងគៀវ។
ទីភ្នាក់ងារ Standard & Poor’s ក៏កត់សម្គាល់ថា ស្ថានការណ៍ភូមិសាស្ត្រនយោបាយតានតឹងរវាងរុស្ស៊ី និងអ៊ុយក្រែន អាចជាមូលហេតុញ៉ាំងឲ្យមានលំហូរដើមទុនទាំងរបស់បរទេស ទាំងរបស់ជាតិរុស្ស៊ី ហូរចេញពីសេដ្ឋកិច្ចរុស្ស៊ី។ យ៉ាងណាមិញ គ្រាន់តែក្នុងត្រីមាសទី១ឆ្នាំ២០១៤នេះ លំហូរនេះបានមានទឹកប្រាក់ដល់ ៥១.០០០លានដុល្លារ ស.រ.អា.ទៅហើយ គឺច្រើនជាងឆ្ងាយពីឆ្នាំមុនៗ។ ឧទាហរណ៍ ក្នុងចន្លោះពីឆ្នាំ២០០៨ ដល់២០១៣ លំហូរនេះក្នុង១ឆ្នាំៗ បានមានទឹកប្រាក់តែ ៥៧.០០០លាន ដុល្លារប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ