ប្រធានាធិបតីនិងក្រុមប្រឆាំងអ៊ុយក្រែន ចុះហត្ថលេខាលើកិច្ចព្រមព្រៀងបញ្ចប់វិបត្តិនយោបាយ
ដើម្បីស្រោចស្រង់អ៊ុយក្រែនអោយងើបពីវិបត្តិនយោបាយ ជាង៣ខែមកនេះ នៅថ្ងៃសុក្រនេះ ប្រធានាធិបតីវិចទ័រ យ៉ានូកូវិច និងក្រុមប្រឆាំងអ៊ុយក្រែន បានចុះហត្ថលេខារួមគ្នា លើកិច្ចព្រមព្រៀងមួយ ក្រោមអធិបតីភាពរបស់តំណាងសហភាពអឺរ៉ុប។ កិច្ចព្រមព្រៀងចែងទាក់ទងនឹងសំណើរបស់ប្រធានាធិបតីអ៊ុយក្រែន ដែលក្រុមប្រឆាំងបានទទួលយក មានដូចជា ការស្នើអោយមានការបោះឆ្នោតប្រធានាធិបតីមុនអាណត្តិ ការបង្កើតរដ្ឋាភិបាលចំរុះ និងការធ្វើកំណែទម្រង់រដ្ឋធម្មនុញ្ញ។ ក្រោយការចុះហត្ថលេខានេះ សភាអ៊ុយក្រែនបានបោះឆ្នោតគាំទ្រអោយមានការអនុម័តប្រើរដ្ឋធម្មនុញ្ញឆ្នាំ២០០៤ឡើងវិញ។ តែរដ្ឋធម្មនុញ្ញថ្មីនេះ ចែងកាត់បន្ថយអំណាចប្រធានាធិបតី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ដូចដែលប្រធានាធិបតីអ៊ុយក្រែនបានប្រកាស តាំងតែពីព្រឹកថ្ងៃសុក្រនេះ នៅទីបំផុត កិច្ចព្រមព្រៀងមួយ រវាងក្រុមប្រឆាំង និងប្រធានាធិបតីយ៉ានូកូវិច ត្រូវបានចុះហត្ថលេខា ក្នុងទិសដៅដោះស្រាយវិបត្តិនយោបាយអ៊ុយក្រែន ដែលបានរ៉ាំរ៉ៃជាង៣ខែមកនេះ។ គណៈកម្មាធិការតំណាងក្រុមបាតុករនៅទីលានឯករាជ្យម៉ៃដាន់ ក្នុងទីក្រុងគៀវ បានអនុម័តនូវគម្រោងកិច្ចព្រមព្រៀងអឺរ៉ុបមួយ យល់ព្រមអោយមេដឹកនាំក្រុមប្រឆាំង៣រូប ចុះហត្ថលេខាលើកិច្ចព្រមព្រៀងជាមួយលោកយ៉ានូកូវិច។
កិច្ចព្រមព្រៀងដែលភាគីទាំង២បានចុះហត្ថលេខា ថ្ងៃសុក្រនេះ ចែងទាក់ទងនឹងសំណើរបស់ប្រធានាធិបតីយ៉ានូកូវិច ចំពោះក្រុមប្រឆាំង។ លោកយ៉ានូកូវិច បានស្នើក្រុមប្រឆាំងអោយយល់ព្រមអោយមានការបោះឆ្នោតប្រធានាធិបតីមុនអាណត្តិ ការបង្កើតរដ្ឋាភិបាលចំរុះ និងការធ្វើកំណែទម្រង់រដ្ឋធម្មនុញ្ញ។ លោកយ៉ានូកូវិចចង់រក្សាទុកច្បាប់ឆ្នាំ២០០៤ ដែលក្រុមបាតុករចង់អោយលុបចោល ប៉ុន្តែ លោកបានយល់ព្រមអោយមានការកាត់បន្ថយអំណាចប្រធានាធិបតី។ ការបន្ថយអំណាចនេះ ក៏ជាការចង់បានរបស់ក្រុមប្រឆាំងពីដំបូងទីផងដែរ។
ក្នុងការចុះហត្ថលេខាលើកិច្ចព្រមព្រៀងនៅថ្ងៃសុក្រនេះ ក្រុមប្រឆាំងបានដាក់លក្ខខណ្ឌអោយរដ្ឋមន្ត្រីមហាផ្ទៃ Vitali Zakhartchenko វិតាលី ហ្សាខាតឆិនកូ និងរដ្ឋអាជ្ញា Viktor Pchonka វិចទ័រ ឆុនកា ស្ថិតនៅក្រៅអនាគតរដ្ឋាភិបាលបណ្តោះអាសន្ន។ មូលហេតុ គឺដោយសារតែអ្នកទាំង២នេះ ជាប់ពាក់ព័ន្ធនឹងការដែលប៉ូលិសនិងតុលាការអ៊ុយក្រែនបានធ្វើសកម្មភាពប្រឆាំងនិងបង្ក្រាបបាតុកម្ម។
គួររំលឹកថា អ៊ុយក្រែនបានធ្លាក់ក្នុងវិបត្តិជាង៣ខែមកនេះ ដើមឡើយដោយសារតែរុស្ស៊ីបានដាក់សម្ពាធរដ្ឋាភិបាលអ៊ុយក្រែន ធ្វើអោយប្រធានាធិបតីយ៉ានូកូវិច ផ្អាកការចុះហត្ថលេខាបង្កើតដៃគូយុទ្ធសាស្ត្រជាមួយសហភាពអឺរ៉ុប។ ប្រជាជនដែលគាំទ្រនយោបាយអឺរ៉ុប បានធ្វើបាតុកម្មប្រឆាំងរដ្ឋាភិបាល រហូតមានការប៉ះទង្គិចហិង្សាជាមួយប៉ូលិស។
សហភាពអឺរ៉ុបមានបារាំងនិងប៉ូឡូញ រួមនឹងអាមេរិកបានចេញអន្តរាគមន៍ ដាក់សម្ពាធប្រធានាធិបតីយ៉ានូកូវិច ជំរុញអោយរកដំណោះស្រាយជាមួយក្រុមប្រឆាំង។ មុនក្រុមប្រឆាំងនិងលោកយ៉ានូកូវិច ចុះហត្ថលេខាលើកិច្ចព្រមព្រៀងថ្ងៃសុក្រនេះ ហិង្សាបាតុកម្ម តាំងពីថ្ងៃអង្គារកន្លងមក បានសម្លាប់មនុស្សជិត៨០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ