អ៊ុយក្រែនបោះឆ្នោតរើសសមាជិកសភានីតិកាលថ្មី សម្រាប់៥ឆ្នាំទៅមុខ
អ្វី ដែលសម្គាល់ការបោះឆ្នោតលើកនេះនៅអ៊ុយក្រែន ជារដ្ឋឯករាជ្យធំទី២ នៃអតីតសហភាពសូវៀត គឺវាប្រព្រឹត្តទៅ តាមប្រព័ន្ធសមាមាត្រផង តាមប្រព័ន្ធឯកតនាមផង។ ចូលប្រឡូក ដើម្បីដណ្តើមអាសនៈចំនួន ៤៥០ នៃរដ្ឋសភានេះ មាន ៨៧គណបក្ស ពីក្នុងនោះ តាមការស្ទង់មតិ នឹងមានប្រៀបជាងគេ គឺគណបក្សលោកប្រធានាធិបតី Yanukovich និងគណបក្សប្រឆាំងធំបំផុត របស់លោកស្រីអតីតនាយករដ្ឋមន្ត្រី Timochenko ដែលកំពុងជាប់ក្នុងពន្ធនាគារ។
ចុះផ្សាយនៅថ្ងៃ៖
ស្តាប់ - ០២:៤៥
នៅអ៊ុយក្រែន ប្រជាពលរដ្ឋដែលមានសិទ្ធិបោះឆ្នោត មានចំនួនជាង ៣៦លាននាក់។ ហើយថ្ងៃនេះ នៅនឹងដៃគេម្នាក់ៗមានសន្លឹកឆ្នោតដល់ទៅ ២ គឺថា ៖ ១សន្លឹក គេត្រូវបោះតាមប្រព័ន្ធសមាមាត្ររើសតំណាងរាស្ត្រ២២៥នាក់ ដែលប្រជែងដោយបេក្ខជនចំនួន ២.៥៥៤នាក់ និង១សន្លឹកទៀត គេបោះតាមប្រព័ន្ធឯកតនាម រើសតំណាងរាស្ត្រ ២២៥នាក់ដែរ ដែលប្រជែង ដោយ បេក្ខជន២.៦៥៤នាក់។ ដូច្នេះ បេក្ខជនសរុប មានចំនួន ជាង៥.២០០នាក់ បានន័យថា សម្រាប់អាសនៈនីមួយៗ ពីក្នុងចំណោម ៤៥០អាសនៈគឺប្រជែងគ្នាជាមធ្យម ដោយបេក្ខជន ១២ នាក់។ សន្មត់ថាជាប់ឆ្នោត តាមប្រព័ន្ធសមាមាត្រ ដើម្បីមានអាសនៈប្រចាំក្នុងសភា លុះណាតែគណបក្សចេះទទួលបានសំឡេងគាំទ្រចាប់ពី ៥% ឡើងទៅ។ ហើយចូលប្រឡូកតាមប្រព័ន្ធនេះ គឺមានគណបក្សចំនួន២១ ពីក្នុងគណបក្សសរុប ចំនួន៨៧។ គណបក្ស៦៦ទៀតបញ្ឈរឈ្មោះ បេក្ខជនខ្លួន ឲ្យចូលប្រឡូកតាមប្រព័ន្ធឯកតនាម ដែលសន្មត់ថា ឈ្នះឆ្នោត លុះណាតែ ដណ្តើមសំឡេងគាំទ្របាន ៥០%+១សំឡេង។
ចំណុចគួរឲ្យកត់សម្គាល់មួយទៀត គឺថា តែក្នុងរយៈពេល១ខែសោះ រដ្ឋបានចំណាយលុយ អស់១.០០០លានដុល្លារ សម្រាប់ដំឡើង Web Camera នៅតាមគ្រប់តែការិយាល័យបោះឆ្នោត ចំនួនជិត ៣៤.០០០កន្លែង នៅទូទាំងប្រទេស ដែលផ្សាយបន្តផ្ទាល់ អំពីដំណើរប្រព្រឹត្តទៅ នៃការបោះឆ្នោត ហើយវីដេអូរូបភាពនោះ នឹងរក្សាទុកពេញ ១ឆ្នាំ សម្រាប់ជា តឹកតាងក្នុងករណី បើមានការតវ៉ា ទល់នឹងលទ្ធផលវា។ សំខាន់ជាងគេ គឺរូបភាពវាដែលបញ្ចាំងត្រង់ផ្ទាល់លើអេក្រង់ ទំហំ៣ម៉ែត្រ គុណ នឹង៥ម៉ែត្រ នៅឯទីស្តីការ គ.ជ.ប.តែម្តង។
ការបោះឆ្នោតសភាលើកនេះនៅ អ៊ុយក្រែន តាមដានដោយពួកអ្នកសង្កេតការណ៍ ៣.៨០០នាក់ តំណាងឲ្យ២៨ប្រទេស និងអង្គការអន្តរជាតិចំនួន ៣៥ ជាពិសេស គឺ “អង្គការដើម្បីសន្តិសុខ និង សហប្រតិបត្តិការ នៅទ្វីបអឺរ៉ុប” OSCE ដែលមាន ឯកទេសកម្មខាងតាមដាន ការបោះឆ្នោត ក្នុងប្រទេសជាសមាជិក។
ទាក់ទងនឹងការបោះឆ្នោតនេះ លោកប្រធានាធិបតីអ៊ុយក្រែន Viktor Yanukovich ថ្លែងថា ជាការចាំបាច់ ដែលត្រូវឲ្យវាប្រព្រឹត្តទៅ ដោយសុចរិតត្រឹមត្រូវ ក្នុងតម្លាភាព ឆ្លើយស្របនឹង ស្តង់ដារប្រជាធិបតេយ្យ ដើម្បីឲ្យលទ្ធផលវា ទទួលស្គាល់ដោយ សហគមន៍ពិភពលោក។
ចំណែកលោកស្រីអតីតនាយករដ្ឋមន្ត្រីអ៊ុយក្រែន Julia Timochenko ដែលជាគូសត្រូវស្លាប់រស់ របស់ប្រមុខរដ្ឋបច្ចុប្បន្ន និងជាមេដឹកនាំបក្សប្រឆាំងធំបំផុត បានថ្លែងពីក្នុងពន្ធនាគារមកថា មានតែមនុស្សខ្វាក់ និងភ្លើ ប៉ុណ្ណោះ ដែលចាត់ទុកការបោះឆ្នោតនេះថា ប្រព្រឹត្តទៅ ដោយសុចរិត គឺដោយមិនអាស្រ័យឡើយ នឹងលទ្ធផលរបស់វា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ