ពួកតំណាងរាស្ត្រអ៊ុយក្រែនវ៉ៃគ្នាមកពីរឿងភាសារុស្ស៊ី
ថ្ងៃនេះរដ្ឋសភាអ៊ុយក្រែនត្រូវពិភាក្សាឡើងវិញទៅលើគម្រោងច្បាប់ស្តីអំពី “គោលការណ៍នៃនយោបាយរដ្ឋខាងភាសា” ដែលន័យរបស់វាគឺលើកស្ថានភាពភាសារុស្ស៊ីឲ្យឡើងដល់លក្ខន្តិកៈជា ”ភាសាយានជាន់ថ្នាក់ខេត្ត”។ ការពិភាក្សាល្ងាចមិញត្រូវអាក់ខាន ទៅ មកពីផ្ទុះឡើងជាការប្រតប់ប្រតាយគ្នាយ៉ាងក្រពុលមុខរវាងពួកអ្នកតំណាងរាស្ត្រខាង បក្សកាន់អំណាចនិងពួកអ្នកតំណាងរាស្ត្រខាងបក្សប្រឆាំងដែលជំទាស់នឹងឯកសារនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
ជាការរំលឹកក្នុងសម័យឃោសនាបោះឆ្នោត ២ឆ្នាំកន្លះមុនលោក Yanoukovich បានសន្យាថា បើគាត់ឈ្នះឆ្នោតជាប្រធានាធិបតី គាត់នឹងប្រែភាសារុស្ស៊ីទៅជាភាសាទី២នៅអ៊ុយក្រែនទន្ទឹមនឹងភាសាជាតិអ៊ុយក្រែនផ្ទាល់។
ដោយបំពេញតាមពាក្យសន្យារបស់ប្រធានាធិបតីបក្សពួកខ្លួនតំណាងរាស្ត្រខាងគណបក្សកាន់អំណាចគឺ”គណបក្សតំបន់” តាំងពីខែសីហាឆ្នាំមុនម៉្លេះ បានដាក់ចេញនូវគម្រោងច្បាប់សមស្របសម្រាប់ទទួលការអនុម័តដោយរដ្ឋសភាតែម្តង។ ទើបថ្ងៃ២៤ឧសភាម្សិលមិញដែលឯកសារនេះ ត្រូវរដ្ឋសភាចាប់ផ្តើមពិភាក្សា។ ក្នុងដំណើរពិភាក្សា ពួកអ្នកតំណាងរាស្ត្រខាងបក្សប្រឆាំង គឺបក្សរបស់លោកស្រីអតីតនាយករដ្ឋមន្ត្រី Timochenko ដែលកំពុងជាប់ក្នុង ពន្ធនាគារតាំងពីឆ្នាំមុនមក សម្រាប់អំឡុងពេល៧ឆ្នាំ តាមបទចុះកុងត្រាខុសច្បាប់ ទិញឧស្ម័នពីរុស្ស៊ី ក៏ នាំគ្នាបះបោរអុកឡុក មិនឲ្យធ្វើការបោះឆ្នោតទៅកើត ជុំវិញគម្រោងច្បាប់នោះ។
ពួកគេ បានត្រដាងផ្ទាំងបដា សរសេរដោយឃ្លាថា “បើអ៊ុយក្រែនបាត់ភាសាជាតិ នោះ គឺនឹង បាត់ទាំងមាតុភូម៌ខ្លួនផ្ទាល់”។ ពួកគេប្តេជ្ញាថានឹង មិនចាកចេញពីសាលប្រជុំសភាឡើយ ហើយ នឹង ឈរការពារ ភាសាកំណើតអ៊ុយក្រែន រហូតដល់ទីអវសាន ! ពួកគេបានប៉ុនប៉ង ឡើង ទៅលើវេទិកាសភា វេទិកាដែលពេលនោះ ខាឃាំង ដោយពួកអ្នកតំណាងរាស្ត្រ ខាង បក្សកាន់ អំណាច។ ពេលប៉ះទង្គិច ប្រតប់ប្រតាយគ្នា មាន តំណាងរាស្ត្រខ្លះ ត្រូវគេប្រទាញប្រទង់ទាល់តែរហែកអាវខ្លះបែកក្បាលហូរឈាមរហូតដល់ត្រូវដឹកទៅមន្ទីរពេទ្យបន្ទាន់ របួសគាត់ត្រូវគ្រូពេទ្យសង្ស័យថា ត្រូវគេដាល់នឹងស្នាប់ដៃ ចំណែករូបប្រធានសភាផ្ទាល់ ដែលវិះៗនឹងធ្លាក់ពីលើវេទិកាគឺត្រូវបង្ខំចិត្តប្រកាសបិទសម័យប្រជុំតែម្តង។
ខ្លឹមសារគម្រោងច្បាប់ គឺថា ៖ ពីក្នុងចំណោមខេត្តទាំងអស់ ចំនួន២៧នៅអ៊ុយក្រែន មានដល់ទៅ ១៣ខេត្ត ជាទីដែលមានបណ្តាជនជាតិរុស្ស៊ី រស់នៅក្នុងអត្រាចាប់ពី ១០%ទៅ ហើយពិតជានៅតាម១៣ខេត្តនោះ ដែលភាសារុស្ស៊ី ត្រូវទទួលលក្ខន្តិកៈ ជា “ភាសាយានជាន់ថ្នាក់ខេត្ត” ពោល គឺ គេអាចប្រើវា ទន្ទឹមនឹងភាសាអ៊ុយក្រែន សម្រាប់ទំនាក់ទំនងនឹងគ្នា សម្រាប់ធ្វើការសិក្សាសម្រាប់អាន សម្រាប់មើលទូរទស្សន៍ មើលភាពយន្តជាភាសារុស្ស៊ីផ្ទាល់។
ជាការកត់សម្គាល់ សម័យក្រោមអំណាចប្រធានាធិបតីមុនគឺលោក Yushenko ដែលស្អប់រុស្ស៊ីដល់ឆ្អឹង រឿងកុន ការផ្សាយទូរទស្សន៍ សៀវភៅសិក្សា ។ល។ ត្រូវបកប្រែខានមិនបាន ទៅជាភាសាអ៊ុយក្រែន។
តាមស្ថិតិដើមឆ្នាំ២០១២នេះពីក្នុងចំណោមបណ្តាជនចំនួន ៤៥លាន៦សែននាក់នៅអ៊ុយក្រែន ជាតិអ៊ុយក្រែនផ្ទាល់ មាន៧៨% ជាតិរុស្ស៊ី ជាប់ចំណាត់ថ្នាក់ទី២ មាន១៧% ក្រៅពីនេះ មាន ជាតិ ម៉ុលដាវី ហុងគ្រីប៊ុលហ្ការី រូម៉ានី ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ